Read Kuranko Maraka 1 Bible Online

Maraka 1 - Kuranko bible

Maraka 1

¹Yisa, Allata-Mɔgɔ-Yabɔnɛta kibara-nyimɛ le kɛ la, Allatalata dan, kɔni.

² A dabirara iko Nɛbi Aiseya ya Allala kumɛ latenbi nya min ko, “Nta kilayɛ le kɛ la, n bi min natala i yarɔ ka kilɛ laka i ye.

³ Mɔgɛ do gbele-gbelen-kan ye bɔla wulɛ rɔ ko, ‘Bɛɛ ni kilɛ laka Mari ye. Anu ni kila-latelennɛ ladan a ye!’ ”

⁴Woletɔ Yɔni tara wula-da-rakolɔn rɔ mɔgɛnu batasi tinɛ. A ye kawandili bɔla ko, “Wo ni sɔn batasi-koe ma ka a yira ko wo ara wo kan-kɔ sɔ wola hakɛnu na. Ni wo ya wo ma, Alla si wo makoto wola hakɛnu na.”

⁵Mɔgɛ min bɛɛ ye Yudiya nyamanɛ rɔ anubɛ Yerusalɛm soe burɔ, wonu tara anu tole masɔ Yɔnila kumɛ la. Anu ban anu sɔla anuna hakɛnu na nkɛkuna, a ya anu batasi Yorodan bɛ rɔ.

⁶ Duruki min nadannɛ nyomo-siyi la, Yɔni ya wo don a kan na ka a butɛ kiri sogo-gbole la. A taranta kondɔnnu anubɛ liyi dɔnna nun.

⁷A ya a fɔ mɔgɛnu ye ko, “Mɔgɛ do ye nala n kɔma min sɛnbɛ kolo ntɛ ko. N ma bɛn defan, hali ka ala sanbarɛ fulen a kian rɔ.

⁸N bi batasili kɛla yi la kɔnɔ ale le si wo batasi Allata Ni-Sɛnimɛ la.”

⁹A ma mɛ wo kɔma, Yisa nara ka bɔ Nasarɛti soe burɔ Kalili sigisɔn rɔ. A ke nyɔ, Yɔni ya a batasi Yorodan bɛ rɔ.

¹⁰A bɔra yi rɔ nkɛkuna, Yisa ya Arinyɛnɛ lakanɛ yen san-kole rɔ. Allala Ni-Sɛnimɛ yigira a kuma iko kangbɔɛ.

¹¹ Kuman-kan bɔra Arinyɛni tɔ ko, “N diyana-dan le ile la. I wara n hɛnɛ feu!”

¹²A ma mɛ wo kɔma, Allata Ni-Sɛnimɛ tara a la wula-da-rakolɔn rɔ.

¹³A tora nyɔ tele bi-nani kɔrɔ. Setanɛ ya a kɔrɔbɔ wati wo mumɛ bɛɛ kɔrɔ. Sogo-feremɛnu fanan taranta nyɔ kɔnɔ melikanu nara a fɛ-bira tinɛ.

¹⁴Anu ya Yɔni ladon yele la tumɛ min, Yisa tara Kalili sigisɔn rɔ alako a ni Allala kibara-nyimɛ kawandili bɔ nyɔ rɔ.

¹⁵ A ko, “A wati-bɛrɛbɛrɛ le kɛ la. Allala mansayɛ ara gbɛrɛn! Wo ni wo kan-kɔ sɔ wola hakɛnu na ka la Allata kibara-nyimɛ la fasai!”

¹⁶Yisa ye tagamana Kalili dalɛ dafɛ tumɛ min, a ya yɛgɛ-birala mɔgɔ fila yen, Saimon anubɛ a na-kelen-nyɔgɛ Anduru. Anu bi yɛgɛ birala yalɛ la bawo anu denuta wɔlɛ le wo la.

¹⁷Yisa ya a fɔ anu ye ko, “Wo na bila n fɛ. N si wo madegen mɔgɔ-nyini-nya la Alla ye iko mɔgɛ si yɛgɛnu nyini nya min ka anu bira.”

¹⁸Anu ya anuna yalɛnu boloka kelenna ka bila a fɛ.

¹⁹Anu tɛ doni, Yisa ya na-kelen-nyɔgɔma fila yen tun, Yemesi anubɛ Yɔni, Sɛbɛdila dannu, kɔni. Anu bi anuna kulɔn rɔ anuna yalɛnu tabɛn tinɛ.

²⁰Yisa ya anu yen nkɛkuna, tiriyante wo rɔ, a ya wonu fanan kele. Anu ya anu fa Sɛbɛdi to kulɔn rɔ, anubɛ ata wɔli-kɛlɛnu. Anu fanan bilara Yisa fɛ.

²¹Anu tara ke Kapereniyam soe burɔ. Yahudiyanuta Sulen-Tele kera nkɛkuna, Yisa donta Yahudiya-dina-bɔn la ka mɔgɛnu karan dabira.

²² Min bɛɛ ya ala karan lamɔɛn, wonu kawara ala karan ma. A ma anu karan iko tɔn-karan-mɔgɛnu bawo sɛnbɛ ye ala karan rɔ!

²³Nyina-yogomɛ ye kei min fɛ, tiriyante wo rɔ, wo nara Yahudiya-dina-bɔn la. A wulita gbele-gbelenna.

²⁴A ko, “Yisa, Nasarɛti kɛ, i ye nyinina nfen ma ma bolo? I wara na ma halaki-koe la, wa? Ma ya ile lɔn. Allata mɔgɔ-sɛnimɛ le ile la!”

²⁵Yisa ya a fɔ nyinɛ wo ye ko, “A sigi-a-la don! Bɔ kei kɛ fɛ kelenna!”

²⁶Nyina-yogomɛ ya kei wo layɛrɛyɛrɛn bɛrɛkɛ! A bɔra kei wo fɛ wɔrɔndɔ-kan la a bolo!

²⁷Mɔgɛ bɛɛ kawara ha anu ya a fɔ anu nyɔgɔn ye ko, “Nfen bi kɛ la? Karan-kurɛ do le, wa? Sɛnbɛ ye kei kɛ bolo hali ka kuma nyina-yogomɛnu ma, anu ni ala kumɛ bira.”

²⁸Wo le ya a ma, Yisa mankan nyɛnsɛnta Kalili sigisɔn wo bɛɛ rɔ tiriya!

²⁹Anu bɔɛ Yahudiya-dina-bɔn la, anu tara Saimon anubɛ Anduru warɛ kelenna! Yemesi anubɛ Yɔni bilara anu fɛ.

³⁰A ya Saimon biran-musi fɛrɛma-kaliyanɛ sanɛ taran nyɔ. Yisa kera nkɛkuna, anu ya musi wola ko fɔ a ye.

³¹Yisa tara musi wo wara. A ya musi wo bole bira tumɛ min, fɛrɛma-kaliyɛ ya a boloka kelenna! A ya a dɛnbɛ a lasɔla ka wɔli-kɛ dabira anu ye.

³²Wura-dɛ la tele-yigi kɔmɛ, mɔgɛnu nara kirayato-su bɛɛ anubɛ nyinatoenu na Yisa wara.

³³So-burɔ-mɔgɛ bɛɛ ya anu nadɛn Saimonna bonda-dɛ wo la.

³⁴Min bɛɛsi kirɛ, a ya wonuna kiraya-su bɛɛ dandan ka nyina siyaman gben mɔgɛnu fɛ. A ma sɔn nyinɛnu ni kuma hali doni bawo wonu ya ale Yisa lɔn.

³⁵Wo banda kɛ, subaga dɛ ma, Yisa tara soe kɔma a dan na Alla matara tinɛ.

³⁶Saimon anubɛ a bɔnu tara Yisa nyini tinɛ.

³⁷Anu ya a yen tumɛ min, anu ko, “Mɔgɛ bɛɛ ye i yen-koe rɔ.”

³⁸Kɔnɔ Yisa ya a fɔ anu ye ko, “Ma ni ta soe donu tɔ. A fɛrɛ sa fɔ n ni kibara-nyimɛ lake wonu fanan ma bawo n nara wo lela ko la.”

³⁹ Woletɔ a tara Kalili sigisɔn bɛɛ rɔ. A ya kawandili bɔ Yahudiya-dina-bɔnnu na ka nyinɛnu gben mɔgɛnu fɛ.

⁴⁰Fɛrɛma-kirayatoe do nara a nyɛnkin Yisa kin kɔrɔ a madiya tinɛ a dɛnbɛn -koe la. A ko, “Ni i ye a fɛ ka n nakɛndɛya, n ya a lɔn ko wo sɛnbɛ ye ile bolo ka n nakɛndɛya.”

⁴¹Yisa kinikinita a ma. A ya a bole sa a kuma.[1] A ya a fɔ a ye ko, “N bara sɔn i lakɛndɛya-koe ma.”

⁴²Kirayɛ wo banta kei wo fɛrɛ ma kelenna! A kɛndɛyara feu!

⁴³Yanni Yisa ni a lata a wara, a ya a gbɛlɛya kei wo ye ka a fɔ ko,

⁴⁴ “I kana kɛ fɔ mɔgɔ-wo-mɔgɔ ye de! Ta saraka-masɔlɛ wara tiriya, a ni i mafɛlɛn. Nɛbi Musa ya sarakɛ minna ko fɔ, i ni wo bɔ ka a yira mɔgɛ bɛɛ la ko i wara kɛndɛya.”

⁴⁵Kɔnɔ kei wo tara kan tinɛ bɛɛ rɔ koe kɛ lawanka tinɛ mɔgɛnu tɛma. A tora a fɔla ha Yisa ma ke donna so-wo-so burɔ gbɛ rɔ, fɔ ka to a dan na. Kɔnɔ hali wo, mɔgɛnu tora nala a wara ka bɔ kan tinɛ bɛɛ rɔ.