Read Kuranko Maraka 10 Bible Online

Maraka 10 - Kuranko bible

Maraka 10

¹Wo kɔma, Yisa bɔra nyɔ ka ta Yudiya nyamanɛ rɔ Yorodan bɛ kɔgɔma. Nyama nara a wara tun. A ya anu karan iko a duruta a mala nya min tuma-wo-tuma.

²Farisi donu nara a wara ka anu taya a bira-koe ma. Anu ya a manyinika ko, “A fɔ ma ye wa, mala tɔn si sɔn ko kei ni a ban ala musi la?”

³Yisa ya anu manyinika ko, “Nɛbi Musa ya tɔn nyamintan di wo ma?”

⁴ Anu ya a yabi ko, “Nɛbi Musa sɔnta ko kei ni furu-tinya-kɛdi sɛbɛ, wo kɔma, a ni ala musi boloka.”

⁵Yisa ya a fɔ anu ye ko, “Nɛbi Musa ya tɔn wo sɛbɛ wo ye bawo wo karagbɛlɛ.

⁶ Kɔnɔ kebi duninya-dan-tumɛ, a fɔra ko, ‘Alla ya kei anubɛ musi dan.’

⁷ Wo le ya a to, kei si a na anubɛ a fa boloka ka tugun ala musi la.

⁸Anu filɛ si ma kelen na. Woletɔ fila ma anu na tun fɔ kelen.

⁹Nba, Alla ara min tugun anu nyɔgɔn na, mɔgɔ kana wo fara.”

¹⁰Karan-dannu sɛgira bɔn la tumɛ min, anu ya Yisa manyinika koe wo ma.

¹¹ A ya a fɔ anu ye ko, “Kei min ba a ban ala musi la ka musu-gbɛrɛ furu, wo ara yɛlɛnyɛ kɛ ala musu-fɔlɔtɛ wo la.

¹²A ye wo nya na le, musi min ba a ban ala kei la ka to kei-gbɛrɛ ye, musi wo ara yɛlɛnyɛ kɛ.”

¹³Mɔgɛ donu nara dennɛnu na Yisa wara ko a ni a bole sa anu kuma kɔnɔ ala karan-dannu ya mɔgɛ wonu makuma.

¹⁴Yisa ya wo yen tumɛ min, a diminyara ka a fɔ ala karan-dannu ye ko, “Wo ni sɔn dennɛnu ni na n bara! Wo kana anu mabeli bawo anu denu denuta ye Allala mansayɛ la.

¹⁵ Wo ni wo hɛnkili to kɛ ko! Ni min ti Allala mansayɛ rabira iko dennɛ, wo ti don a rɔ mumɛ!”

¹⁶Wo kɔma, a ya dennɛnu sigi a kɔnkɔn tɔ ka a bole sa anu kuma ka duwa anu ye.

¹⁷Yisa wulita ala tagama rɔ tumɛ min tun, kei do burimatoe nara ka a nyɛnkin a kɔrɔ a madiya tinɛ. A ko, “Karan-mɔgɔ-nyimɛ, n ni nfen ma alako n ni habadan-nimayɛ sɔrɔn?”

¹⁸Yisa ya a manyinika ko, “I ye n kelela kama ko mɔgɔ-nyimɛ? Mɔgɔ-nyima sa fɔ Alla kelen pe.

¹⁹ Ka ila nyinikalɛ yabi, i ya tɔn kɛnu lɔn. Anu ko, ‘Wo kana mɔgɔ faga. Wo kana yɛlɛnyɛ kɛ. Wo kana kankanyɛ kɛ. Wo kana foninya-sereyɛ bɔ. Wo kana mɔgɔ kensunya. Wo ni wo na anubɛ wo fa gbiliya.’ ”

²⁰Kei wo ko, “Karan-mɔgɔ, kebi n dennɛ, n bara tɔn wo bɛɛ bira.”

²¹Yisa ya a mafɛlɛn sin! Keminɛ wola ko diyara a ye. A ko, “A tonɛ ko kelen ma gbɛ, ta i bolo-fan bɛɛ feri ka wodi wo di bolo-kolɔnnu ma. I si nɔnfuli sɔrɔn Arinyɛni tɔ. Wo kɔma, i ni na bila n fɛ.”

²²A ara a yakɔrɛ funu. A yisi-magboyanɛ tara bawo bana le ale la nun.

²³Yisa ya a yɛ lamunun ala karan-dannu na ka a fɔ anu ye ko, “Nɔnfulu-tiginu don-koe Allala mansayɛ rɔ, wo gbɛlɛ de!”

²⁴Ala karan-dannu kawara kumɛ wola ko la kɔnɔ Yisa ya a fɔ tun ko, “Nna dannu, Allala mansayɛ don-koe gbɛlɛ

²⁵kɔnɔ nɔnfulu-tigi don-koe Allala mansayɛ rɔ, wo gbɛlɛ ka tenbi nyomɛ don-koe la sɛgilan woe rɔ.”

²⁶Karan-dannu kawara bɛrɛkɛ, ka anu nyɔgɔn manyinika ko, “Yon si kisi worɔ?”

²⁷Yisa tora anu mafɛlɛnna sin! A ya anu yabi ko, “Mɔgɔ ti ke wo mala kɔnɔ Alla le si ke koe bɛɛ mala.”

²⁸Wo kɔma, Pita ya a fɔ ko, “Male ara fan bɛɛ to alako ma si bila i fɛ nya min.”

²⁹Yisa ya a fɔ Pita ye ko, “Wo ni wo hɛnkili to kɛ ko! Min bɛɛ ara anu barɛ boloka ka anu na-kelen-nyɔgɛnu to, ka anu sɔrɔnnɛnu to, ka anuna dannu to, ka anuna duginu to nde anubɛ kibara-nyimɛla ko la,

³⁰wo si fen sɔrɔn min tenbira wo la wati kɛ rɔ, ado a ya min bɛɛ boloka, a mara bɔn la wo, na-kelen-nyɔgɛnu wo, a sɔrɔnnɛnu wo, ala dannu wo, ala dugi wo, a si wo nyɔgɔn sigi tina kɛmɛ sɔrɔn, hali tɔrɔyɛ sanɛ wonu kuma yarɔ. A si habadan-nimayɛ fanan sɔrɔn yarɔ.

³¹ Minnu mara a fɔlɔtɛ la, wonu si ma a laban la. Minnu mara a laban la, wonu si ma a fɔlɔtɛ la wulɔn.”

³²Karan-dannu bilanɛ Yisa fɛ ka yɛlɛ Yerusalɛm soe burɔ. Anu kɔndɔfilinɛ kati! Minnu bilanɛ a fɛ, wonu kilanta. Tiriyante wo rɔ, Yisa ya ala karan-den tan-ni-filɛ wonu bi ka ta anu na anu dan na. Koe minnu bi nala mala a la, a ya wonu takaran anu ye.

³³Yisa ya a fɔ anu ye ko, “Wo ni wo tole masɔ. Ma ye tala Yerusalɛm soe burɔ. Anu si nde, Hadama-dan don saraka-masɔla-wɛnu anubɛ tɔn-karan-mɔgɛnu bolo tɔ. Anu si n yiliki sayɛ la ka n don sibolo-gbɛrɛnu bolo tɔ.

³⁴Wonu si n mayɛlɛn ka anu da-yi kɛ n ma. Anu si n gbesi ka n faga. A tele sawa nyɔgɛ, n si wuli tun ka bɔ furinu tɛma.”

³⁵Wo kɔma, Sɛbɛdila dannu, Yemesi anubɛ Yɔni, kɔni, wonu nara Yisa wara. Anu ko, “Karan-mɔgɔ, ma ye a fɛ, i ni koe do kɛ ma ye.”

³⁶Yisa ya anu manyinika ko, “Wo ye a fɛ, n ni nfen ma wo ye?”

³⁷Anu ya a yabi ko, “I wa sigi ila gbiliyɛ rɔ tumɛ min, male ni sigi i fɛ, kelen i bolo-nyimɛ rɔ, kelen i maran rɔ.”

³⁸ Yisa ya a fɔ anu ye ko, “Wo ye n tarala min ma, wo ma wo lɔn. N bi nala tɔrɔyɛ[16] minnu sɔrɔnna, wo si kɛ wo munna wonu kɔrɔ, wa? Anu bi n batasila tɔrɔyɛ min tɔ, wo si ke batasila wo nya na?”

³⁹Anu ya a yabi ko, “Ma si ke le.” Yisa ya a fɔ anu ye ko, “N bi n minna tɔrɔyɛ min na, wo si wo min wo la yati, ado anu bi n batasila tɔrɔyɛ min tɔ, wole fanan si batasi wo nya.

⁴⁰Kɔnɔ min si sigi n bolo-nyimɛ rɔ anubɛ n maran rɔ, sɛ sa nde ye ka wo yabɔ. Alla ara minnu yabɔ, a ara dinkirɛ wo rabɛn wonu denu ye.”

⁴¹Karan-den to tan ya wo lamɔɛn tumɛ min, anu diminyara Yemesi anubɛ Yɔni ma.

⁴² Woletɔ Yisa ya anu dama kele anu nyɔgɔn fɛ. A ko, “Sɛnbɛ ye sibolo-gbɛrɛnuna kun-tiginu bolo anuna mɔgɛnu kuma, ado anuna mɔgɔ-banu bi kun-tigiyɛ kɛla anuna mɔgɛnu kuma. Wo ara duru wo la.

⁴³ Kɔnɔ a kana ma wo nya wole tɛma. Ni wo kelen bi a fɛ ka ma mɔgɔ-ba la, a ni ma wɔli-kɛlɛ la a toenu ye.

⁴⁴Ni wo do ye a fɛ ka ma a fɔlɔtɛ la, a ni ma yɔɔn la a toenu ye,

⁴⁵ado nde, Hadama-dan ma na ko mɔgɛ ni wɔlɛ kɛ n ye, fɔ ka wɔlɛ kɛ mɔgɛnu ye ka n niyi ni mɔgɔ-siyaman kunka-koe la.”

⁴⁶Anu tara Yɛrikɔ soe burɔ. Yisa anubɛ ala karan-dannu anubɛ nyama-ba ye bɔla Yɛrikɔ tumɛ min, Timeyala dan min tɔgɛ Batameyasi, wo siginɛ kilɛ fɛ. Fiyɔn le ale la. A ye tarali kɛla.

⁴⁷A ya a lamɔɛn tumɛ min ko Yisa Nasarɛti kɛ le wo la, a ya gbele-gbelan dabira. A ko, “Yisa! Mansa Dawudala dan, kinikini n ma!”

⁴⁸Mɔgɔ-siyaman ya a makuma ka a fɔ a ye ko a ni a made. Kɔnɔ a gbele-gbelenta tun bɛrɛkɛ! A ko, “N fa, Mansa Dawudala dan, kinikini n ma!”

⁴⁹Yisa sɔra. A ko, “Wo ni a kele.” Woletɔ anu ya fiyɔn wo kele. Anu ko, “I yisi ni kimɛ! I lasɔ. Karan-mɔgɔ ye i kelela.”

⁵⁰A ya ala duruki lafili ka a sɔ tiriya ka ta Yisa wara.

⁵¹Yisa ya a manyinika ko, “I ye a fɛ, n ni nfen ma i ye?” Fiyɔn ya a yabi ko, “N tigi, n bi a fɛ, n ni fen yen tun.”

⁵²Yisa ya a fɔ a ye ko, “Ta, ila dɛnkɛninyɛ ara i lakɛndɛya.” Tiriyante wo rɔ, a kera fen yenna. A bilara Yisa fɛ.