Read Kuranko Maraka 12 Bible Online

Maraka 12 - Kuranko bible

Maraka 12

¹ Wo kɔma, Yisa ya tili kɛ tɛgɛ anu ye. A ko, “Dugu-tigi do ye nyɔ nun min ya ki-fannu ki ka a masansan. A ya gbere-kole ladan ka bɛndɛnu sɔ. Wo kɔma, a ya mɔgɛ sinka a la. A bɔra a warɛ ka ta tagama rɔ.

²Anu gbɔɛ-keri-wati kera tumɛ min, a ya ala wɔli-kɛlɛ do sɔ anu ma ko anu ni atɛ di a ma.

³Kɔnɔ anu ya wɔli-kɛlɛ wo bira ka a gbesi ka a lasɛgi a bolo-lakolɔn.

⁴Wo kɔma, a ya wɔli-kɛla-gbɛrɛ sɔ. Anu ya wo gbesi a kunyɛ rɔ ka a layarabi kati!

⁵A tigi ya wɔli-kɛla-gbɛrɛ lata tun. Anu ya wo faga. A ya mɔgɔ siyaman nata. Anu ya wo donu gbesi ka donu faga.

⁶Mɔgɔ kelen pe ara to, a si min nata. Wo le ki-fen-tigi wo diyana-dan la. Tɔ-a-la, a ya ala dan wo lata ko, ‘N lanɛ a la ko anu si nna dan gbiliya serr!’

⁷Kɔnɔ anu ya a fɔ anu nyɔgɔn ye ko, ‘Ki-fen-tigila dan le kɛ la. Wo na, ma ni a faga. Ma si a bolo-fannu sɔrɔn worɔ!’

⁸Woletɔ anu ya ala dan wo bira ka a faga. Anu ya a furi bɔ ki-fannu kɔrɔ ka a lakɛ a rɔ.”

⁹Yisa ya nyinikalɛ kɛ. A ko, “Ki-fen-tigi si nfen ma anu na worɔ? A si na ka anu faga ka mɔgɔ-gbɛrɛnu sinka nyɔ la.

¹⁰ Wo ma Allata kitabu kan tinɛ wo karan bɛ, wa? A ko, ‘Bon-sɔlɛnu ya anu ban kuri min na, wo le ara ma sɛbɛna-kuru-tɔnɔnamɛ la.

¹¹Mari nyɛrɛ-nyɛrɛ ya kɛ ma, ado wo mara kabana-ko-wɛ la ma yala!’ ”

¹²Yahudiyanuna kun-tiginu ya anu taya Yisa bira-koe ma bawo anu ya a lɔn ko Yisa ya tili wo tɛgɛ anu denu denu ma. Kɔnɔ anu kilanta nyama la min kɛ, anu bɔra a fɛ ka ta anu ye.

¹³Anu ya Farisi donubɛ Mansa Hɛrodila mɔgɛ donu[19] nata Yisa ma nyinikali-kɛ-tinɛ a bira-koe la.

¹⁴Anu nara a wara, anu ko, “Karan-mɔgɔ, ma ya a lɔn ko mɔgɔ-telennɛ le ile la. I ti kilan mɔgɔ-wo-mɔgɔ la, ado bɛɛ rakɛn ile yala. I ye mɔgɛnu karanna a kilɛ fɛ ka a bɛn Alla wara-koe ma. Nba, i miriya ye kama? Ka duti sara Romu nyamani-kun-tigi ma, mala tɔn-tinyɛ le wo la, ka, a sa wo nya?”

¹⁵Kɔnɔ Yisa ya anuna yanfɛ yen. A ya a fɔ anu ye ko, “Wo ye wo rayala n bira-koe ma nfenna? Na duti-wodi do la, n ni a mafɛlɛn.”

¹⁶Anu nara wodi-mɛlan do la. A ya anu manyinika ko, “Yon yakɔrɛ anubɛ tɔgɛ ye kɛ ma?” Anu ya a yabi ko, “Romu nyamani-kun-tigi.”

¹⁷Nba, Yisa ya a fɔ anu ye ko, “Romu nyamani-kun-tigitɛ ye min na, wo ni wo di ale ma. Allatɛ ye min na, wo ni wo di Alla ma.” Anu kawara a ma bɛrɛkɛ!

¹⁸ Sadusi[20] donu nara Yisa wara. (Wonu denu bi a fɔla ko mɔgɛnu ti wuli ka bɔ sayɛ rɔ.)

¹⁹ Anu ko, “Karan-mɔgɔ, Nɛbi Musa le ya tɔn kɛ sɛbɛ ma ye ko, ‘Ni kei fagara, a ma den to, a na-kelen-nyɔgɛ ni kɛɛ-musi wo bi alako wo ni dan sɔrɔn kei wo ye min fagara.’

²⁰Nba, na-kelen-nyɔgɛ kei wɔrɔnfila ye nyɔ nun. A fɔlɔtɛ ya musi furu. Ale kei wo fagara. A ma den to.

²¹A dɔgɛ ya kɛɛ-musi wo bi. Wo fanan fagara. A ma den to. A mara a dɔgɔ-kei sawa nyɔgɛ fanan na wo nya na le.

²²Wo kɔma, a toenu fanan. Na-kelen-nyɔgɔma wɔrɔnfilɛ bɛɛ ya musi wo bi. Anu fagara. Anu ma den to. A laban, musi wo nyɛrɛ fagara.

²³Nba, furinu ba wuli tumɛ min, a si ma yonna musi la anu tɛma, ado a sigira anu dama wara nun?”

²⁴Yisa ya anu yabi ko, “Wo ara sama feu! Wo ma Allata kitabu lɔn anubɛ Allala sɛnbɛ.

²⁵Furinu ba wuli tumɛ min, anu si ma iko Arinyɛnitɔ-melikanu. Keinu ti musi furu. Musinu ti ta kei-wara-sigi rɔ.

²⁶ Nba, ka furi-lawuli-koe fɔ, Alla ya min fɔ wo ye, wo ma wo karan bɛ, wa? Ta-mɛlan ye kɔlɔma-mɛsɛ min tɔ, Musa ya wo sɛbɛ kan min, Alla ya a fɔ Nɛbi Musa ye ko Iburayimata Alla le ale la anubɛ Isiyakata Alla anubɛ Yakobata Alla.

²⁷Wo kɔrɛ le ko nimɛnuta Alla le ale la, furinuta ma. Wo ara sama feu!”

²⁸ Tɔn-karan-mɔgɛ do ye nyɔ nun min ya anuna sɔsɔli-sɛ lamɔɛn. A ya a yen ko Yisa ara Sadusinu yabi a kin na! Woletɔ ale fanan nara Yisa wara ka a manyinika ko, “Tɔn nyamintan kolo tɔn bɛɛ ko?”

²⁹ Yisa ko, “Kɛ le kolo a bɛɛ ko. A sɛbɛnɛ ko, ‘Isirɛla mɔgɛnu, wo ni wo tole masɔ kɛ la! Ma Mari Alla kelen pe le ye mata Mari la.

³⁰I ni ita Mari keni i yisi bɛɛ la anubɛ i sɔndɔmɛ bɛɛ, i hɛnkili bɛɛ, anubɛ i sɛnbɛ bɛɛ la.’

³¹ A fila nyɔgɛ min tugunnɛ wo la, wo le kɛ la ko, ‘I ni i sigi-nyɔgɛ keni iko i nyɛrɛ.’ Tɔn-gbɛrɛkɛ sa min kolo tɔn kɛnu ko.”

³² Tɔn-karan-mɔgɛ ya a fɔ Yisa ye ko, “Karan-mɔgɔ, i ya tonyɛ le fɔ wo la yati, ko Mari kelen pe le ye Alla la, ado Alla-gbɛrɛ sa ale kɔma.

³³ Woletɔ mɔgɛ ni Alla keni a yisi bɛɛ la, a hɛnkili bɛɛ la, anubɛ a sɛnbɛ bɛɛ la. I ni i sigi-nyɔgɛ keni iko i nyɛrɛ, ado yanni mɔgɛ ni na sogenu na ka anu mintan saraka-bɔ-tinɛ kuma anubɛ ka saraka-gbɛrɛnu di Alla ma, a fisa, mɔgɛ ni tɔn filɛ kɛnu bira.”

³⁴Yisa ya a lɔn ko a ara a yabi a kilɛ fɛ min kɛ, a ya a fɔ a ye ko, “I fɛ-ma-yan Allala mansayɛ la.” Ka a bi wo wati ma, mɔgɔ-wo-mɔgɔ ma sisi Yisa manyinikala nyinikali-gbɛrɛ la tun.

³⁵Yisa ye mɔgɛnu karanna Alla-Bato-Bɔn la tumɛ min, a ya nyinikalɛ kɛ ko, “Tɔn-karan-mɔgɛnu bi a fɔla kama ko Allata-Mɔgɔ-Yabɔnɛ si bɔ Mansa Dawuda bɔnsɔn rɔ?

³⁶ Mansa Dawuda ye a fɔla Allata Ni-Sɛnimɛ baraka rɔ ko, ‘Mari ya a fɔ n Mari ye ko a ni a sigi a bolo-nyimama-kɔɛn wara la ha ale Mari ni a yogenu sa a tontɛ kɔrɔ.’

³⁷Mansa Dawuda nyɛrɛ ya a kele ko, ‘Mari.’ Nba, ni Mansa Dawuda ya a kele ko, ‘Mari,’ Allata-Mɔgɔ-Yabɔnɛ si bɔ Mansa Dawuda bɔnsɔn rɔ kama worɔ?” Yisala karan ya a diya don nyama-belebele wo rɔ.

³⁸Iko anu ya anu karan nya min, a ko, “Wo ni a ma wo fɛrɛma tɔn-karan-mɔgɛnuna ko la. A di wonu ye ka tagama anuna duruku-yannu bilanɛ anu kan na. A di anu ye fanan ko mɔgɛnu ni gbiliya-kɔndɔli di anu ma fen mayira tinɛ.

³⁹Anu bi sigi-tina-nyimɛnu yabɔla Yahudiya-dina-bɔnnu na anubɛ ka kan-tina-nyimɛnu yabɔ ladiyɛnu tɔ.

⁴⁰Anu bi kɛɛ-musinu kensunyala ka anuna bɔnnu bi anu bolo, wo kɔma, ka anu nyɛrɛ mayira madiyali-yannu fɛ! Anuna tɔrɔyɛ si yogoya bɛɛtɛ ko!”

⁴¹Yisa ya a sigi Alla-Bato-Bɔn wodi labui tinɛ telentɛ rɔ tumɛ min, a ya nyama mafɛlɛn anu bi anuna wodi labuila nyɔ nya min. Nɔnfulu-tigi siyaman ya wodi siyaman nabui.

⁴²Wo kɔma, kɛɛ-musu bolo-kolɔn fanan nara ka wodi-mɛsɛ fila sa a rɔ, anuna wodi-mɛlan-dɔgɔmanɛ, kɔni.

⁴³Yisa ya ala karan-dannu kele anu nyɔgɔn fɛ ka a fɔ anu ye ko, “Wo ni wo hɛnkili to kɛ ko! Kɛɛ-musu bolo-kolɔn kɛ ara min nabui kenkirɛ rɔ, wo tenbira a toe bɛɛtɛ la minnu bi wodi labuila kenkirɛ rɔ.

⁴⁴Bawo doinu ya min sa, anu ya wo bɔ anuna nɔnfulu-wɛ denu tɔ. Kɔnɔ iko ale bolo-kolonyanɛ ye nya min, a ara a beli-fan bɛɛ sa a rɔ.”