Read Kuranko Maraka 13 Bible Online

Maraka 13 - Kuranko bible

Maraka 13

¹Yisa ye bɔla Alla-Bato-Bɔn la tumɛ min, ala karan-den kelen ya a fɔ a ye ko, “Karan-mɔgɔ, kuru-belebele-wɛ kɛnu mafɛlɛn! Nba de, ado bon-makawanɛ le kɛnu na!”

²Yisa ya a yabi ko, “I wara bon-belebele kɛnu yen, ba? N bi a fɔla wo ye ko kuri kɛnu, hali kelen-bɛrɛn ti to a gbɛ rɔ. A bɛɛ si wayan.”

³Yisa ya a mayigi Ɔlifi kɔnkɛ kuma Alla-Bato-Bɔn telen tɔ tumɛ min, Pita, Yemesi, Yɔni, anubɛ Anduru nara a wara dogɔn rɔ.

⁴Anu ya a manyinika ko, “Yerusalɛm bu-wati fɔ ma ye. Tamasere nyamintan si a yira ma la ko a kɛ-tumɛ ara ke?”

⁵Yisa ya a fɔ anu ye ko, “Wo ni a ma wo fɛrɛma. Wo kana sɔn, mɔgɔ-wo-mɔgɔ ni wo mayuwaya.

⁶Mɔgɔ-siyaman si na n tɔgɛ rɔ ka a fɔ ko, ‘Ale le nde la,’ ado anu si mɔgɔ-siyaman mayuwaya.

⁷Wo si kɛlɛ-koenu namɔɛn anubɛ kɛlɛ-kibarɛnu kɔnɔ wo kana kilan. A fɛrɛ sa fɔ wonu ni ma kɔnɔ ala ban ma wo la fɔlɔn.

⁸Sibolo-gbɛrɛnu si wuli anu nyɔgɔn kan ma. Nyamanɛnu si wuli anu nyɔgɔn kan ma. Dugu-yɛrɛyɛran si kɛ kan tina siyaman tɔ. Kɔnkɔ-fitinɛnu si na. Wola tɔrɔyɛnuna fɔlɔtɛ le kɛnu na dɔrɔn.

⁹ “Wo ni a ma wo fɛrɛma bawo anu si wo kiti ka wo ladon Yahudiya-dina-bɔnnu na anu si wo gbesi kan min. Anu si ta wo la kun-tiginu anubɛ mansɛnu bara ndela ko la ko wo ni ma sereyɛnu na n ye.

¹⁰A fɛrɛ sa fɔ kibara-nyimɛ kawandilɛ kɛ ni bɔ mɔgɛ bɛɛ ye fɔlɔn.

¹¹Anu ba wo bira ka ta wo la kiti-bɔn la, wo si min fɔ anubɛ wo si a fɔ nya min, wo kana haminya wola ko la. A wati wa ke, wo ye nala min fɔla, wo si wo sɔrɔn bawo wo ye min fɔla, wota kuma ma wonu na. Kumɛ wonu bi bɔla Allata Ni-Sɛnimɛ le bolo min bi kumala wo rɔ.

¹²Mɔgɛnu si anu na-kelen-nyɔgɛnu kunyɛ don a yogenu bolo tɔ alako anu ni anu faga. Fanu si wo nyɔgɔn ma anuna dannu na. Dannu si wuli anu sɔrɔnnɛnu kan ma hali ka anu nadon sayɛ rɔ.

¹³ Mɔgɛ bɛɛ si wo kɔn ndela ko la kɔnɔ ni min si a munyu ha ala ban, wo si kisi.

¹⁴ “Wo si ‘kisimiriya koe’ sɔnɛ yen kan tinɛ do rɔ, a sɔ tina ma min na. (Minnu bi kɛ karanna, anu ni anu taya a kɔrɛ-lɔn koe ma!) Minnu bi Yudiya nyamanɛ rɔ, wonu ni anu buri ka yɛlɛ kɔnkɛnu kuma.

¹⁵ Ni min taranta ala bɔn kuma,[21] hali a ma a bolo-fan-fenfen bi ala bɔn la.

¹⁶Ni min taranta ala sɛnɛ rɔ, a kana sɛgi ala duruki bi tinɛ.

¹⁷Musu-kolomɛ anubɛ denbɛnu, wo wati si ma gbalo-belebele la anu kuma.

¹⁸Wo ni Alla matara ko wola buri-kɛ kana bɛn samɛ ma

¹⁹ bawo mɔgɛnu si tɔrɔyɛ sɔrɔn ka tenbi tɔrɔyɛ bɛɛ la min nyɔgɔn ma kɛ bɛ kebi duninya danta, ado a nyɔgɔn ti kɛ fanan mumɛ!

²⁰Kɔnɔ Mari ara ban do bɔla tele wonu na. Ni a ma wo ma nun, mɔgɔ-wo-mɔgɔ ti kisi. Kɔnɔ Mari si do bɔ tele wonu na ala mɔgɔ-yabɔnɛnuna ko la.

²¹“Nba, ni mɔgɔ-wo-mɔgɔ ya a fɔ wo ye ko, ‘I yɛ lata, Allata-Mɔgɔ-Yabɔnɛ ye yan,’ ni wo ma, ‘A ye pan!’—wo kana la wo la,

²²ado minnu ya anu nyɛrɛ mayira iko Alla le ya anu sɔ, wonu si bɔ gbɛ rɔ. Donu si anu nyɛrɛ ma nɛbinu na fanan. Anu si kabana-ko-belebele-wɛnu kɛ Allala mɔgɔ-yabɔnɛnu yanfa-koe la, ni a si ke mala, kɔni.

²³Wo ni a ma wo fɛrɛma! N bara kɛ fɔ wo ye yanni a wati ni kɛ.

²⁴ “Tɔrɔya-tele wonu ba tenbi tumɛ min, tele la si fin. Karɛ ti gbɛ tun.

²⁵ Lolenu si bɔ san-kole rɔ ka bui. San-koletɔ-fannu na si maga ka bɔ anu gbɛ rɔ.

²⁶ Mɔgɛnu si nde, Hadama-dan yen nala banda-fin-gbɛ rɔ sɛnbɛ-ba anubɛ gbiliya-wɛ la n bolo.

²⁷N si nta melikanu nata duninya-tonko-nanɛ bɛɛ rɔ. Anu si nna mɔgɔ-yabɔnɛnu nadɛn ka bɔ duninya kan tinɛ bɛɛ rɔ.

²⁸“Wo ni hɛnkili sɔrɔn toro-kuri fɛ. A bolɔnnu ba a matii tumɛ min ka yanba-kun-nɛnu nabɔ, wo si a lɔn wo le ma ko samɛ ara gbɛrɛn, ka, n foni?

²⁹A ye wo nya na le, wo wa koe kɛ bɛɛ yen tumɛ min, wo si a lɔn ko wati ara gbɛrɛn. A sɔnɛ dɛ la.

³⁰Wo ni wo hɛnkili to kɛ ko! Minnu bi anu kɛndɛ la kɛ wati rɔ, yanni wo bɛɛ ni faga, koe kɛ bɛɛ si bɔ-a-la.

³¹San-kole anubɛ dugu-kole si tenbi kɔnɔ nna kumɛ ti tenbi mumɛ!

³² “Koe kɛ bɛɛ si ma wati min, mɔgɔ-wo-mɔgɔ ma wo tele lɔn, ni wo ma, a wati, hali Arinyɛnitɔ-melikanu. Hali nde, Allata Dan, n ma a lɔn fɔ n Fa kelen pe, wo le ya a lɔn.

³³Wo ni a ma wo fɛrɛma, ado wo yɛ-lakalannɛ ni to bawo wo ma wo na-tumɛ lɔn.

³⁴ A si ma iko kei min bɔra a warɛ ka ta tagama rɔ. Wo ya ala wɔli-kɛlɛnu to ala bɔn kun na. A ya wɔlɛ to anu kelen-kelennamɛ-bɛɛ bolo. A ya a fɔ da-kandannɛ ye ko a ni a yɛ lakalan.

³⁵Woletɔ wo yɛ-lakalannɛ ni to bawo wo ma bon-tigi na-tumɛ lɔn. Wo ma a lɔn ni a si na wurɛ la, suyi tɛma, dondɔn-keke-wati, ni wo ma, sun-tele-fɛran. Wo ma a lɔn,

³⁶ado ni a nara yona, a kana wo taran kinɔgɛ rɔ.

³⁷Nba, n bi min fɔla wo ye, n bi wo le fɔla bɛɛ ye. Wo yɛ-lakalannɛ ni to tolon!”