Read Kuranko Maraka 14 Bible Online

Maraka 14 - Kuranko bible

Maraka 14

¹ A ara to nun gbɛ tele fila, yanni Kanan-Ko-Ladiyɛ anubɛ Biredi-Yɛlɛbɛlɛ-Dɔn-Ladɛn ni ke. Saraka-masɔla-wɛnu anubɛ tɔn-karan-mɔgɛnu bi fɛrɛ nyinina nun alako anu si Yisa bira dogɔn rɔ nya min ka a faga.

²Anu ko, “Ma kana wo kɛ ladiya-wati rɔ. Ni ma ya wo ma, mɔgɛnu si sɔnkɔ-sɔnkɔ ma ma.”

³ Yisa ye Saimonna bɔn la nun Bɛtani soe burɔ. Fɛrɛma-kiraya-yogomɛ do ye ale Saimon fɛrɛ ma nun. Anu bi fen dɔn la tumɛ min, musi do nara don bɔn la. Kuru-dagɛ min tɔgɛ alabasita, wo lafanɛ a bolo sɛnti-da-gbɛlɛ la min tɔgɛ naradi. A ya dagɛ wo kumɛ keri a la ka sɛnti wo kɛ Yisa salɛ ma.

⁴Mɔgɛ donu bi nyɔ, wonu diminyara ka a fɔ anu nyɔgɔn ye ko, “Sɛnti kɛ tinya-kunya ye nfenna?

⁵A ma si yira nun san-kelen-sarɛ la ka wodi wo di bolo-kolɔnnu ma!” Anu ya musi wo makuma bɛrɛkɛ!

⁶Kɔnɔ Yisa ko, “Wo fara a la! Wo ye musi kɛ nyagbala nfenna? A ara ko-nyimɛ le kɛ n ye kɛ la.

⁷ Bolo-kolɔnnu si taran wo fɛ wati bɛɛ, ado a wa diya wo ye tuma-wo-tuma, wo si ke anu dɛnbɛna. Kɔnɔ nde ti taran wo fɛ wati bɛɛ.

⁸A si ke min kɛla, a ara wo le kɛ. A ya sɛnti kɛ n fɛrɛ ma ka n tabɛn n togon koe la, yanni a wati ni ke.

⁹Nba, wo ni wo hɛnkili to kɛ ko! Kibara-nyimɛ kɛ kawandilɛ wa bɔ duninya kan tinɛ min bɛɛ rɔ, musi kɛ ara min kɛ, mɔgɛnu si wo fɔ alako wo si to mɔgɛnu yili ma nya min.”

¹⁰Wo kɔma, ala karan-den tan-ni-filɛ tɛma, karan-den kelen min tɔgɛ Yudasi-Isakariyati, wo tara saraka-masɔla-wɛnu bara Yisa don-koela ko la.

¹¹Ala kumɛ wo ya anu hɛnɛ bɛrɛkɛ! Anu ya lanyiri kiri a ye ko anu si wodi di a ma. Woletɔ Yudasi wulita fɛrɛ nyinina alako a si Yisa don anu bolo tɔ nya min.

¹²Biredi-Yɛlɛbɛlɛ-Dɔn-Ladɛn-tele fɔlɔtɛ ma, anu si saga-dannu faga lunyɛ min, Yisala karan-dannu nara a wara ka a manyinika ko, “I ye a fɛ, ma ni Kanan-Ko-Ladiyɛ ladan i ye mi?”

¹³Nba, Yisa ya a sara mɔgɔ fila la anu tɔ ka anu nata ko, “Wo ta soe. Kei do si taran yi-dagɛ ye min kuma. Wo si wo nyɔgɔn bɛn. Wo ni bila a fɛ.

¹⁴A wa don bɔn min na, wo ni a fɔ bon-tigi wo ye ko, ‘Karan-mɔgɔ ye a fɛ ka a lɔn konko wo ye kan min anubɛ ala karan-dannu si Kanan-Koe kima dɔn kan min.’

¹⁵A si san-bon-ba yira wo la, wo si fan bɛɛ rabɛnnɛ taran san-bɔn wo la. Wo ni dɔn-fen rabɛn nyɔ.”

¹⁶Karan-dan wonu tara soe burɔ. Anu ya fan bɛɛ taran iko Yisa ya a fɔ anu ye nya min. Anu ya Kanan-Koe kima rabɛn nyɔ.

¹⁷Wura dɛ la, Yisa anubɛ ala karan-den tan-ni-filɛ nara.

¹⁸ Anu bi fen dɔnna tebulu la tumɛ min, Yisa ko, “Wo ni wo hɛnkili to kɛ ko! Mɔgɔ kelen bi wo tɛma min si n don n yogenu bolo tɔ, ado mabɛ wo ye fen-dɔn-kɛla miran kelan rɔ kaka.”

¹⁹Karan-dannu yisi tinyanta bɛrɛkɛ! Anu wulita a manyinikala kelen-kelenyɛ ma ko, “I ye nde le ma?”

²⁰Yisa ya anu yabi ko, “Mɔgɔ kelen de wo tan-ni-filɛ tɛma min bi a bole layigila miran rɔ n fɛ, wo le si n don n yogenu bolo tɔ,

²¹ado nde, Hadama-dan si faga iko a sɛbɛnɛ Allata kitabu rɔ nya min kɔnɔ gbalo-belebele ye mɔgɛ wo kuma, min si nde, Hadama-dan don n yogenu bolo tɔ! A fisa nun, hali mɔgɛ wo ma sɔrɔn nun!”

²²Anu bi fen-dɔn la tumɛ min, Yisa ya biredi bi ka baraka-bira-madiyalɛ kɛ. A ya a rakerikeri ka a di ala karan-dannu ma. A ko, “Wo ni biredi kɛ bi ka a dɔn. N fɛrɛ-bɔnkɛ le kɛ la.”

²³Wo kɔma, a ya yi-lafɛ fanan bi ka baraka bira Alla ye ka wo don anu bolo. Anu dama ya anu min a la.

²⁴ Yisa ko, “N yele le kɛ la n bara Allata sarama-kan kiri min fɛ. N yele bɔnɛ mɔgɔ siyaman hakɛla ko la.

²⁵Wo ni wo hɛnkili to kɛ ko! N ti nɔnbɔ-gbɔ-yi kɛ min tun, fɔ n ba a min a kurɛ la Allala mansayɛ rɔ.”

²⁶Wo kɔma, anu ya bɛti bɔ ka ta Ɔlifi kɔnkɛ kuma.

²⁷ Yisa ya a fɔ anu ye ko, “Wo dama si wo buri ka n boloka bawo a sɛbɛnɛ Allata kitabu rɔ ko, ‘Alla si saga-fɛ-biralɛ faga. Saga-kurɔn si nyɛnsɛn.’

²⁸ Kɔnɔ n ba wuli tumɛ min ka n niyi lafɛ, n si ta wo yarɔ Kalili sigisɔn rɔ.”

²⁹Pita ya a yabi ko, “Hali bɛɛ ya i boloka kɔnɔ nde, nde ti i boloka muk!”

³⁰Yisa ya a fɔ Pita ye ko, “Wo ni wo hɛnkili to kɛ ko! Yanni dondɔn ni keke iko fila bi-suyi-kɛ rɔ, i si a fɔ kinyama sawa ko i ma n lɔn.”

³¹Pita ya a fɔ a yisi bɛɛ la ko, “Hali anu ya n faga i fɛ kɔnɔ ka a fɔ ko n ma i lɔn, n ti wo fɔ mumɛ!” Karan-dan bɛɛ fanan ya a fɔ wo nya na le.

³²Anu tara kan tinɛ do rɔ min tɔgɛ Kɛtisimani. Yisa ya a fɔ ala karan-dannu ye ko, “Wo sigi yan, nde ye tala Alla matarala.”

³³Wo kɔma, a ya Pita anubɛ Yemesi anubɛ Yɔni bi ka ta anu na a bolo. A yisi wulita a tɔrɔla!

³⁴A ya a fɔ anu ye ko, “N yisi tɔrɔnɛ ha n fagamatoe le! Wo to yan ka ki wo ya la.”

³⁵A ya a masɛgi doni. A ya a laburun-a-ma dugi ma ka Alla madiya ko ni a si ke mala, tɔrɔyɛ kɛ ni bɔ a kuma.

³⁶A ya madiyali kɛ ko, “N Fa Alla! I si ke koe bɛɛ kɛla. Ni i si sɔn, tɔrɔyɛ[22] kɛ bɔ n kuma kɔnɔ nde sako ma de, fɔ ile sako.”

³⁷Wo kɔma, a sɛgira ka ala karan-dan wonu taran kinɔgɛ rɔ. A ya a fɔ Pita ye ko, “Saimon, i ye kinɔgɛ le tɔ, wa? I ma ke i sigila n fɛ hawa kelen kɔrɔ?”

³⁸A ya a fɔ anu ye ko, “Wo ni ki wo ya la ka Alla madiya. Woletɔ nyankankantan wa na, hakɛ kana wo nɔ. Wo sɔn kɛndɛ wo burɔ kɔnɔ wo fɛrɛ-bɔnkɛ ti ko-wo-ko nɔ.”

³⁹A tara tun ka madiyali kɛ ka kumɛ sifa wonu fɔ tun.

⁴⁰A sɛgira tun. A ya karan-dannu taran, anu bi kinɔgɛ rɔ. Anu ma ke kila anu ya la. Anu si min fɔ a ye, anu ma wo lɔn.

⁴¹A sɛgira anu bara min kɛ tun a sawa nyɔgɛ rɔ, a ya a fɔ anu ye ko, “Ha bi, wo ye kinɔgɔla ka wo sulen? Wo ara a bɔ! Nde, Hadama-dan don-tumɛ ara ke n yogenu bolo tɔ hakɛ-tiginu sɛnbɛ kɔrɔ.

⁴²Wo ni wo lasɔ. Ma ni ta. Min bi nala n madonna n yogenu bolo tɔ, wo ara na. Wo ma a yen?”

⁴³A ye kumɛ wo kun na tumɛ min, Yudasi min bi Yisala karan-den tan-ni-filɛ tɛma nun, wo nara. Saraka-masɔla-wɛnu anubɛ tɔn-karan-mɔgɛnu anubɛ Yahudiya-kɛmɔgɛnu ya nyama min sɔ, wonu bi a fɛ. Faannu anubɛ gbeleka-kundinu bi wonu bolo.

⁴⁴Ale min bi nala a donna a yogenu bolo tɔ, wo ara tamasere di nyama ma nun ko, “N ba min sunbu, ale le mɔgɛ wo la wo ye nyinina min ma. Wo ni a bira ka ta a la. Wo ni a makandan!”

⁴⁵Yudasi kera nya min wo, a tara Yisa wara. A ko, “Karan-mɔgɔ!” A ya a sunbu.

⁴⁶Woletɔ anu buira Yisa ma ka a bira gben!

⁴⁷Kɔnɔ minnu sɔnɛ nyɔ, wo kelen ya ala faan sagan a lɛɛ rɔ ka saraka-masɔla-kun-tigi-wɛla yɔɔn tole tɛgɛ a la.

⁴⁸Yisa ya a fɔ anu ye ko, “Fɔ wo ni na faannu anubɛ gbeleka-kundinu na n bira tinɛ iko tɔn-tinyalɛ le nde la?

⁴⁹ N bi wo karanna nun tele-wo-tele Alla-Bato-Bɔn la, wo ma n bira. Kɔnɔ a fɛrɛ sa fɔ min sɛbɛnɛ Allata kitabu rɔ, wo ni bɔ-a-la.”

⁵⁰Wo kɔma, ala karan-dan bɛɛ bɔra a fɛ ka anu buri.

⁵¹Kemini do, a fɛrɛya-bɔnɛ linɛn-kurɛ gbansan la, wo bilanɛ Yisa fɛ. Anu ya a bira tumɛ min,

⁵²a porokɔlɔta anu bolo ka ala linɛn-kurɛ to anu bolo. A gbu-makolɔn ya a buri.

⁵³Wo kɔma, anu ya Yisa bi ka ta a la saraka-masɔla-kun-tigi-wɛla bɔn la. Saraka-masɔla-wɛnu anubɛ Yahudiya-kɛmɔgɛnu anubɛ tɔn-karan-mɔgɛnu nadɛnta nyɔ.

⁵⁴Pita bilara a fɛ wula-yan la ha saraka-masɔla-kun-tigi-wɛla kata burɔ. A donta kata burɔ ka a sigi da-kandannɛnu fɛ tɛ fɛ a gbala tinɛ.

⁵⁵Saraka-masɔla-wɛnu anubɛ Yahudiya-kɛmɔgɛ bɛɛ ya anu taya ka foninya-sereyɛnu nyini Yisa kan ma anu si a faga minna ko la. Kɔnɔ anu ma ko-wo-ko yen a ya min tinya.

⁵⁶Sereya siyaman ya foninyɛ fɔ Yisa kan ma kɔnɔ anuna kumɛ ma bɛn anu nyɔgɔn ma.

⁵⁷Mɔgɛ donu sɔra ka foninyɛ kɛ sa Yisa kuma.

⁵⁸ Anu ko, “Ma ya a lamɔɛn a ye a fɔla ko mɔgɛnu bara Alla-Bato-Bɔn kɛ min sɔ, a si wo wayan. Tele sawa kɔma, a si a kurɛ sɔ tun, mɔgɔ ma min sɔ.”

⁵⁹Kɔnɔ hali wo, anuna kumɛ ma ke bɛnna anu nyɔgɔn ma.

⁶⁰Saraka-masɔla-kun-tigi-wɛ ya a lasɔ ka a fɔ Yisa ye ko, “Anu bara i maburi min ma kɛ, kuma sa ile bolo?”

⁶¹Kɔnɔ Yisa ya a made. Hali dafa, a ma a tɛgɛ. Saraka-masɔla-kun-tigi-wɛ ya a manyinika tun ko, “Allata-Mɔgɔ-Yabɔnɛ le ile la, Alla gbiliyanɛta dan, kɔni?”

⁶² Yisa ya a yabi ko, “Wo le nde la, ado wo dama si nde, Hadama-dan siginɛ yen sɛnbɛ bɛɛ tigi kɔɛn-nyimɛ rɔ. Wo si n namatoe yen ka bɔ san-kole rɔ banda finyɛ rɔ!”

⁶³Saraka-masɔla-kun-tigi-wɛ ya wo lamɔɛn tumɛ min, a ya ala duruki rafara diminyɛ bolo. A ko, “Ma mako sa sereya-gbɛrɛ la tun!

⁶⁴ Wo ara ala tanama-kumɛ lamɔɛn. Wo miriya ye kama?” Anu dama wulita a kan ma. Anu ya a yiliki ko ka a faga.

⁶⁵Donu wulita anu nɔgɔ-yi kɛla Yisa ma. Anu ya a yɛ lakiri ka a matugu. Anu ko, “Min ya i tugu, i bole telen wo la!” Kandannɛ wonu ya a bira ka a dɛ ratii.

⁶⁶Pita siginɛ kata burɔ tumɛ min, saraka-masɔla-kun-tigi-wɛla wɔli-kɛ-musu do nara.

⁶⁷A ya Pita yen a ye a gbalala tɛ fɛ tumɛ min, a ya a mafɛlɛn sin! A ko, “Ile fanan bi Yisa, Nasarɛti kɛ fɛ nun.”

⁶⁸Kɔnɔ Pita ya a sɔsɔ. A ya a yabi ko, “Nde ma a lɔn. I ye min fɔla, n ma wo nya lɔn.” Nba, Pita bɔra ka ta tenbi-bolɔn la. A ma mɛ, dondɔn kekera.

⁶⁹Wɔli-kɛ-musi wo ya a yen tun. Minnu sɔnɛ nyɔ wara la, a ya a fɔ wonu ye ko, “Kelen de kɛ la, yɔ!”

⁷⁰Kɔnɔ Pita ya a sɔsɔ tun. Wati nɛ kɔma, minnu sɔnɛ nyɔ, wonu ya a fɔ Pita ye tun ko, “I ti ke a masɔsɔla ko kelen ma ile la bawo Kalili kɛ le ile fanan na.”

⁷¹Pita ya a keli. A ko, “I ye kei minna ko fɔla, n ma wo lɔn muk!”

⁷²Tiriyante wo rɔ, dondɔn keke fila nyɔgɛ kera. Pita ya a miri Yisala kumɛ ma ko, “Yanni dondɔn ni keke iko fila, i si a fɔ iko sawa ko i ma n lɔn.” A ya-yi bɔra biribiri diyi-kɛ bolo.