Read Kuranko Maraka 15 Bible Online

Maraka 15 - Kuranko bible

Maraka 15

¹Tiriyante wo rɔ, subaga-dɛ ma, saraka-masɔla-wɛnu anubɛ Yahudiya-kɛmɔgɛnu anubɛ tɔn-karan-mɔgɛnu anubɛ mɔgɔ-ba-toe bɛɛ ya anu nyɔgɔn nadɛn ka sɔn Yisa faga-koe ma. Anu ya Yisa kiri ka ta a don Pailɛti bolo.

²Pailɛti ya a manyinika ko, “Yahudiyanuna mansɛ le ile la, wa?” Yisa ya a yabi ko, “Ɔn, a ye iko i wara a fɔ nya min.”

³Saraka-masɔla-wɛnu ya ko-yogomɛ siyaman fɔ Yisala ko la,

⁴woletɔ Pailɛti ya a manyinika tun ko, “I ti anu yabi? Anu bara minnu fɔ ila ko la, i sa wonu namɔɛnna?”

⁵Yisa ma sɔn hali ka kuma kelen fɔ tun. Wo le ya a ma, Pailɛti kawara kati!

⁶Kanan-Ko-Ladiya-wo-Ladiya wa ke, mɔgɛnu ba Pailɛti manyinika yelela-mɔgɛ minna ko la, a duruta wo kelen bolokala anu ye.

⁷Wo wati ya a taran, kei min tɔgɛ Barabasi, wo ye yele la. Wo ya murutiyɛ kɛ ka mɔgɛnu faga murutiyɛ wo rɔ.

⁸Nyama ladɛnta tumɛ min, anu ya Pailɛti madiya ko a duruta min kɛla anu ye, a ni wo kɛ anu ye.

⁹Pailɛti ya anu manyinika ko, “Wo ye a fɛ, n ni Yahudiyanuna mansɛ boloka wo ye, wa?”

¹⁰A ya a lɔn serr, ko saraka-masɔla-wɛnu bara Yisa don a bolo keliyɛ lela ko la.

¹¹Kɔnɔ saraka-masɔla-wɛnu ya nyama hɛnkili labila ko a ni Barabasi boloka anu ye.

¹²Pailɛti kumara nyama ye tun ko, “Nba, wo ye min kelela Yahudiyanuna mansɛ, wo ye a fɛ, n ni nfen ma wo la worɔ?”

¹³Anu sɔnkɔra tun ko, “A gbangban kɔlɔma ma!”

¹⁴Kɔnɔ Pailɛti ya anu manyinika ko, “A ya ko-yogomɛ nyamintan kɛ?” Anu sɔnkɔra ha ka a dan natenbi ko, “A gbangban kɔlɔma ma!”

¹⁵Pailɛti ye a fɛ ka nyama hɛnɛ, woletɔ a ya Barabasi boloka anu ye. A ya a ma, ala kɛlɛ-dannu ya Yisa gbesi ka a don anu bolo ko anu ni a gbangban kɔlɔma ma.

¹⁶Kɛlɛ-dannu tara Yisa la kun-tigila kata burɔ. Anu ya anu ta-nyɔgɛ kɛlɛ-dan kele ka anu nadɛn.

¹⁷Anu ya duruku-yan kara-fin-damɛ[23] don Yisa kan na ka wɔnɛ ma mansaya-fulɛ[24] la a ye ka wo don a kunyɛ la.

¹⁸Anu wulita a mayɛlɛnna a kɔndɔn tinɛ. Anu ko, “Yahudiyanuna mansɛ, alamɛ i mɛra!”

¹⁹Anu ya a gbesi a kunyɛ rɔ kɔlɔma la ka anu nɔgɔ-yi kɛ a ma. Anu ya anu nyɛnkin a kɔrɔ ka a ma iko anu bi a gbiliyala.

²⁰Anu banta a mayɛlɛnna tumɛ min, anu ya duruku-yan kara-fin-damɛ wo bɔ a kan na ka a nyɛrɛta fanɛnu don a ma tun. Anu tara a la a gbangban tinɛ kɔlɔma ma.

²¹ Anu bi tala tumɛ min, anu bɛnta kei do la min tɔgɛ Saimon, Sairini[25] kɛ le. A bɔmatoe sɛnɛ rɔ nun ka ta soe. Kɛlɛ-dannu ya a fɔrɔsɛ Yisa faga-kɔlɔma bi-koe la. (Saimon wo, Alɛsanda anubɛ Rufasi fa le, kɔni.)

²²Anu tara Yisa la ha kan tinɛ min tɔgɔ Kalakata. Wo kɔrɛ le ko, “Kun-Kole ye Kan Min.”

²³Fan min tɔgɛ mira,[26] anu ya wonubɛ gbɛɛ yabasan ka a di Yisa ma kɔnɔ a ma sɔn a minna.

²⁴ Wo kɔma, anu ya a gbangban kɔlɔma ma. Anu ya korɔn nakɛ ka ala durukinu tatala anu nyɔgɔn tɛma.

²⁵Anu ya a gbangban kɔlɔma ma sun-tele-wati (9 am).

²⁶Anu ya a yiliki min na, anu ya wo sɛbɛ walan ma ko, “Yahudiyanuna Mansɛ.”

²⁷Minnu bi buila mɔgɛnu ma ka anuna bolo-fannu bi, anu ya wo filɛ gbangban kɔlɔmanu ma Yisa tɔnkɔnnu tɔ, kelen a bolo-nyimɛ rɔ, kelen a maran rɔ. [

²⁸ Allata kitabu bɔra-a-la wo rɔ ko, “A kofura ko-yogoma-kɛlɛnu ma.”]

²⁹ Mɔgɔ-tenbimatoenu ya anu kunyɛ radɔn[27] Yisa ma ka a lafɛya. Anu ko, “Ile. I ko i si Alla-Bato-Bɔn wayan ka a sɔ tun tele sawa kɔrɔ,

³⁰nba, yigi ka bɔ kɔlɔma ma gbɛ! I ni i nyɛrɛ kisi!”

³¹Saraka-masɔla-wɛnu anubɛ tɔn-karan-mɔgɛnu fanan ya Yisa mayɛlɛn wo nya na le ka a fɔ anu nyɔgɔn ye ko, “A ya donu kisi kɔnɔ a ti ke a nyɛrɛ lakisila!

³²Ma ni Allata-Mɔgɔ-Yabɔnɛ, Isirɛla mansɛ yen yigila kaka ka bɔ kɔlɔma ma, ado ni wo mara, ma si la a la!” Mɔgɔ filɛ minnu gbangbanta kɔlɔma ma a tɔnkɔnnu tɔ, wonu fanan ya a lafɛya.

³³Tele latelan, pinpi burunta nyamanɛ wo bɛɛ kuma ha hawa sawa.

³⁴ Tele-makimɛ-wati (3 pm), Yisa gbele-gbelenta kan-ba la. A ko, “Iloyi, Iloyi, lama sabakatani?” Wo kɔrɛ le, “Nta Alla, nta Alla, i wara n boloka nfenna?”

³⁵Mɔgɛ donu sɔnɛ nyɔ, wonu ya a kan lamɔɛn. Anu ko, “Wo ni wo tole masɔ. A ye Nɛbi Ilaya kelela!”

³⁶ Mɔgɔ kelen ya sefuna-fuyi bi. A burimatoe tara a layigi gbɛɛ-kunayanɛ rɔ ka wo don kɔlɔma-sungban la. A ya a layɛlɛ ka a bɛn Yisa dɛ ma alako a ni a kan lakimɛ. A ko, “A makɔni! Ma ni a yen ni Nɛbi Ilaya si a layigi ka a bɔ kɔlɔma ma!”

³⁷Yisa ya a kan labɔ tun bɛrɛkɛ ka a niyi-laban lafɛ.

³⁸ Nba, yorolan min dunnɛ Alla-Bato-Bɔn tɛma, wo farata fila la ka a dabira a kuma ha a kɔrɔ.

³⁹Kɛlɛ-den-kun-tigi min sɔnɛ kɔlɔma da kɔrɔ nun, Yisa gbele-gbelenta nya min a niyi bɔ tinɛ, wo ya wo yen. A ko, “Allatalata dan nyɛrɛ le kɛ la nun serr!”

⁴⁰ Musi donu sɔnɛ wula-yan la ka a mafɛlɛn. Salomi anubɛ Mariyama, Magadala kɛ anubɛ Mariyama, Yemesi dɔgɔma anubɛ Yusufu na, kɔni, wonu bi anu tɛma.

⁴¹Yisa ye Kalili sigisɔn rɔ tumɛ min, anu ya a dɛnbɛ kati! Musu-gbɛrɛ siyaman fanan bi nyɔ nun minnu bilanɛ a fɛ ha Yerusalɛm.

⁴²Nyima-wurɛ le nun, anu tabɛn-wati Sulen-Telela ko la,

⁴³Yusufu, Arimatiya kɛ nara. Yahudiya mɔgɔ-ba le nun min gbiliyanɛ kati! A ye Allala mansayɛ makɔnɔna. Ale Yusufu ya a yisi ragbɛlɛya ka ta Pailɛti wara ko anu ni Yisa furi don a bolo.

⁴⁴Pailɛti ya a lamɔɛn tumɛ min ko Yisa fagara yona, a kawara. A ya kɛlɛ-den-kun-tigi wo kele ka a manyinika ni Yisa niyi ara ban bɔla.

⁴⁵Kɛlɛ-den-kun-tigi banta a dantɛgɛla Pailɛti ye tumɛ min, a ya a fɔ Yusufu ye ko a ni Yisa furi bi.

⁴⁶Yusufu nara linɛn-kura-kurɛ la a bolo ka a furi layigi kɔlɔma ma ka a kasankɛ. Anu ya kanbɛ min sin nun kuru-faganɛ rɔ, anu ya a sa nyɔ burɔ. Wo kɔma, a ya fara-belebele makuru-kurun ka a sa kanbɛ wo dɛ la.

⁴⁷Mariyama, Magadala kɛ anubɛ Mariyama, Yusufu na, kɔni, wonu bi a mafɛlɛnna nun alako anu ni Yisa sa tinɛ lɔn.