Read Kuranko Maraka 2 Bible Online

Maraka 2 - Kuranko bible

Maraka 2

¹Tele-dande kɔma, Yisa sɛgira Kapereniyam soe burɔ. Kumɛ wo nyɛnsɛnta ko a ara a kɔsɛgi a warɛ.

²Mɔgɔ-siyaman nara anu nyɔgɔn fɛ ha sɔ-tina wo sɔ-tina ma to hali bonda-dɛ la. Yisa ye Allala kumɛ kawandili bɔla anu ye tumɛ min,

³kei min solomonyanu-faganɛ a la, mɔgɔ nani nara wo la sanyili rɔ.

⁴Kɔnɔ anu ma ke kilɛ sɔrɔnna nyama bolo ka a ladon bɔn la. Woletɔ anu yɛlɛta a la bɔn kuma ka woe sɔgɔ alako anu si a layigi nya min sanyili rɔ mɔgɛnu tɛma Yisa yakɔrɔ. Anu ya woe wo sɔgɔ tumɛ min, anu ya kirayatoe wo layigi Yisa kɔrɔ sanyili rɔ.

⁵Yisa ya anuna dɛnkɛninya-wɛ yen tumɛ min, a ya a fɔ kirayatoe wo ye ko, “N bɔ, i hakɛnu ma ara koto.”

⁶Tɔn-karan-mɔgɛ minnu siginɛ nyɔ, wonu ya anu miri ko,

⁷“Yon bi kei kɛ la min bi Alla lafɛyala? Mɔgɔ-wo-mɔgɔ ti ke hakɛ makotola fɔ Alla kelen pe!”

⁸Yisa ya anu miriyanu lɔn nkɛkuna, a ya a fɔ anu ye ko, “Wo ye wo mirila wo nya na kama?

⁹Ka a fɔ kirayatoe wo ye ko a hakɛnu ma ara koto anubɛ ka a fɔ ko a ni a lasɔ ka ala sanyili bi ka tagama, nyamintan fɔɛ gbɛlɛ?

¹⁰N si a yira wo la kɛ rɔ ko sɛnbɛ ye nde, Hadama-dan bolo dugu-kole kɛ kuma ka hakɛ makoto.” Wo kɔma, kei min solomonyanu-faganɛ a la, a ya a fɔ wo ye ko,

¹¹“I lasɔ. I ni ila sanyili bi. Sɛgi i warɛ bɔn la!”

¹²Kei wo ya a lasɔ kelenna ka ala sanyili lamɔrɔmɔrɔ. A ya a bɔ anu dama yala. Anu dama kawara bɛrɛkɛ, ka Alla tanto. Anu ko, “Ma ma kɛ-nyɔgɔn yen bɛ!”

¹³Yisa sɛgira Kalili dalɛ dala tumɛ min, mɔgɔ siyaman nara a wara. Yisa ya anu karan dabira.

¹⁴A tamatoe, a ya duti-makelelɛ do yen, wo tɔgɛ Lifayi, Alafala dan. A siginɛ ala wɔli-kɛ-tinɛ. Yisa ya a fɔ a ye ko, “Bila n fɛ.” Lifayi ya a lasɔ ka bila a fɛ.

¹⁵Wo kɔma, Yisa ye fen-dɔn la Lifayila bɔn la tumɛ min, duti-makelelɛnu[2] anubɛ hakɛ-tigi siyaman nara ka sigi ale anubɛ ala karan-dannu fɛ nyɔ.

¹⁶Farisi[3] minnu bi tɔn-karan-mɔgɔyɛ la, wo donu ya Yisa yen fen-dɔn la hakɛ-tiginu anubɛ duti-makelelɛnu fɛ tumɛ min, anu ya ala karan-dannu manyinika ko, “Nfenna Yisa ye fen-dɔn la duti-makelelɛnu anubɛ hakɛ-tiginu fɛ?”

¹⁷Yisa ya wo lamɔɛn min kɛ, a ya a fɔ anu ye ko, “Minnu kɛndɛ, wonu mako sa bɛsi-bɔlɛ la fɔ minnu kirɛ, ado n ma na mɔgɔ-telennɛnu kele tinɛ fɔ hakɛ-tiginu alako wonu ni bila n fɛ.”

¹⁸Lunyɛ do, Yɔni-Batasi-Kɛlɛla karan-dannu anubɛ Farisinu bi sun-don kun na nun. Mɔgɛ donu nara Yisa wara ka a manyinika ko, “Nfenna Yɔni-Batasi-Kɛlɛla karan-dannu anubɛ Farisinuna karan-dannu bi sunyɛ donna kɔnɔ itɛnu ti sunyɛ don?”

¹⁹Yisa ya anu yabi ko, “A ye wo burɔ ko mɔgɛ minnu bi kɔnyɔ-masɔɛ rɔ, fananta kɔnyɔ-kura-tigi ye anu fɛ, wonu si kɔnkɔ? Wo ti ke mala ni! Fananta kɔnyɔ-kura-tigi ye anu fɛ, anu ti sunyɛ don.

²⁰Kɔnɔ a wati wa ke, anu ba kɔnyɔ-tigi[4] wo bi anu tɛma tumɛ min, anu si sunyɛ don worɔ.

²¹“Mɔgɛ ti kura-kundu-kurɛ[5] bi ka duruku-kɔrɛ labɛtɛrɛ wo la bawo a kurɛ wo ra si don ka duruku-kɔrɛ wo rafara ka tenbi a fɔlɔtɛ la.

²²Mɔgɔ ti ke baan lamarala gbolo-bɔrɔ-kɔrɛ[6] rɔ. Ni a ya wo ma, a wa kanfa, a si gbolo-bɔrɔ-kɔrɛ wo rafara. Baan wo si bon. Gbolo-bɔrɛ fanan si tinya. Kɔnɔ baan la ni mara gbolo-bɔrɔ-kurɛ rɔ.”

²³ Yisa anubɛ ala karan-dannu tenbira sɛnɛ do rɔ Sulen-Tele ma. Ala karan-dannu ya fui-fan-gbesi dabira ka a togotogon anu bolo tɔ ka a kole dɔn.

²⁴Woletɔ Farisinu ya a fɔ Yisa ye ko, “A mafɛlɛn ila karan-dannu bi min mala kɛ la Sulen-Tele ma. Anu bi mala tɔn tinyana wo la!”

²⁵ Yisa ya anu yabi ko, “Mansa Dawuda ya min kɛ wo tumɛ kɔnkɛ ye anubɛ ala keminɛnu na, wo ma wo karan bɛ, wa?

²⁶ A donta Allala bɔn la. Biredi min dantɛgɛnɛ Alla ma, anubɛ ala keminɛnu ya wo dɔn, hali anu bi tɔn tinyana wo dɔn tinɛ. A ya kɛ ma wo tumɛ Abiyatari ye saraka-masɔ-kun-tigiyɛ la, ado saraka-masɔlɛnu denu dɔrɔn ni biredi wo dɔn nun.”

²⁷Yisa ko, “Sulen-Tele ladanta mɔgɔ ye. Mɔgɔ ma dan Sulen-Telela ko la,

²⁸ado nde, Hadama-dan le Mariyɛ la Sulen-Tele kun na.”