Read Kuranko Maraka 4 Bible Online

Maraka 4 - Kuranko bible

Maraka 4

¹ Wo kɔma, Yisa ya mɔgɛnu-karan dabira Kalili dalɛ dafɛ tun. Nyama min kinkinta a la, wo siya min kɛ, a donta kulɔn rɔ ka a mayigi nyɔ. Kulɔn wo siginɛ yi kuma, nyama sɔnɛ yi-kɔnkɔn la.

²A ya ko siyaman fɔ anu ye tilinu tɔ. A ko,

³“Wo ni wo tole masɔ! Kei do tara ala sɛnɛ rɔ sugu fui tinɛ.

⁴A ye sugi fuila sɛnɛ rɔ tumɛ min, do buira kila-kole la. Konanu nara wonu dɔn tinɛ.

⁵Do buira fara-gbaran ma, bɔnkɛ ma siya kan min. A fɛrɛnta tiriya bawo bɔnkɛ ma siya nyɔ.

⁶Tele bɔra tumɛ min, a mafɔsɔra ka gbala bawo a suli ma yigi dugi rɔ bɛrɛkɛ!

⁷Sugi do buira wɔnɛnu tɛma. Anubɛ wɔnɛnu yɛlɛta anu nyɔgɔn fɛ kɔnɔ tɔ-a-la, wɔnɛnu ya a dɔn. Woletɔ fen ma gbɔ.

⁸Kɔnɔ do buira dugu-lamonɛ rɔ. A fɛrɛnta ka a kole don, do kolo bi-sawa, do bi-wɔrɔ, do kɛmɛ.”

⁹Yisa ko, “Nba, ni min si ko nya-yen, a ni a tole masɔ wo la!”

¹⁰Yisa ye a dan na tumɛ min, minnu ya ala karan lamɔɛn, wonubɛ ala karan-den tan-ni-filɛnu nara a wara ka a manyinika ko a ni tili wo faranfasi anu ye.

¹¹Yisa ya a fɔ anu ye ko, “Allala mansayɛ gbundu-ko-hɛnkilimayɛ dira wole ma. Kɔnɔ n si a fɔ doinu ye tilinu tɔ.

¹² Woletɔ (iko a sɛbɛnɛ Allata kitabu rɔ nya min), ‘Anu si to fan yenna kɔnɔ anu ti a ragbɛ. Anu si to anu tole masɔla kɔnɔ anu ti a nya-yen. Bawo ni anu ya ko ragbɛ ka a nya-yen, anu si yɛlɛma Alla wara la. A si anu makoto worɔ.’ ”

¹³Wo kɔma, Yisa ya anu manyinika, a ko, “Ni wo ma tili kɛ nya-yen, wo si ke tili doinu nya-yenna kama?

¹⁴Sugu-fuilɛ ye Allala kumɛ fuila.

¹⁵Mɔgɛ donu manɛ iko sugi minnu si bui kila-kole la. Mɔgɛ wonu si a lamɔɛn kɔnɔ anu ba a lamɔɛn nya min wo, Setanɛ si na worɔ ka wo fɔrɔn anu yisi rɔ.

¹⁶Sugi min fuira fara-gbaran ma, wo mani de iko mɔgɛ minnu bi kumɛ lamɔɛnna, ado anu si a bira sewɛ la tiriya!

¹⁷Kɔnɔ a ma don anu yisi rɔ bɛrɛkɛ! A ti mɛ lefan. Nba, tɔrɔyɛ anubɛ gbɛlɛyɛ wa na tumɛ min, a si a boloka tiriya kumɛ wola ko la!

¹⁸Sugi min buira wɔnɛnu tɛma, wo mani de iko mɔgɛ min bi kumɛ lamɔɛnna

¹⁹kɔnɔ duninya hɔn-koe anubɛ nɔnfulu-keni anubɛ nata-su bɛɛ ya a ma, kumɛ wo fagara a yisi rɔ feu! A ti gbɔ hali!

²⁰Sugi min buira dugu-lamonɛ rɔ, wo mani de iko mɔgɛ min bi kumɛ lamɔɛnna. A si kumɛ lamɔɛn ka a bira. A si gbɔ, do bi-sawa, do bi-wɔrɔ, do kɛmɛ.”

²¹ Yisa tora kumala. A ko, “Mɔgɔ-wo-mɔgɔ ti lɛnpu lamalan ka bɔnku-dagɛ burun a kun na. A ti lɛnpu ladon sa-fan kɔrɔ fanan. Kɔnɔ a si a sigi a sigi-fan kuma.

²² Ko-dogonnɛ bɛɛ si bɔ gbɛ rɔ. Koe min bɛɛ yamatogonnɛ, wonu yama si ka.

²³Nba, ni min si ko nya-yen, a ni a tole masɔ!”

²⁴ A ya a fɔ anu ye fanan ko, “Wo ni a ma wo fɛrɛma worɔ ko-lamɔɛn tinɛ. Wo ye fan sumanna doinu ye nya min, Alla si a suma wole fanan ye wo nya na le, ado wotɛ si gbɛlɛya anutɛ ko.

²⁵ Kɔnɔ fen bi min bolo, Alla si do sa wo kuma. Kɔnɔ fen-kɛndɛ sa min bolo, a yili ye fen-nɛ min ma, Alla si wo bɔ a bolo.”

²⁶Yisa ya a fɔ anu ye tun ko, “Allala mansayɛ mani de iko kei min ya sugi fui ala sɛnɛ rɔ.

²⁷Fui-fannu si fɛrɛn ka sabati su-ni-tele, hali fui-fen-tigi wo ye kinɔgɔla, ni wo ma, a ye wɔlila. A si to wo mala hali fui-fen-tigi ti a sabati-nya lɔn.

²⁸Dugi nyɛrɛ le ye a mala, ki-fan ni sabati ka gbɔ. A yanbɛ si nɔrɔn, wo kɔma, a tɔnsɔn si bɔ a rɔ, wo kɔma, a si mɔ.

²⁹ A wa mɔ, sɛni-tigi si na a tɛgɛ wɔrɔtɛ la.”

³⁰Yisa ya a fɔ tun ko, “Ma si Allala mansayɛ sanka nfen ma? N ni tili do tɛgɛ wo ye min si a faranfasi.

³¹Nba, Allala mansayɛ manɛ iko kende-kole[9] min dɔgɔyanɛ fui-fen-kolenu tɛma duninya rɔ. Ni mɔgɛ ya a fui,

³²a si koloya ka tenbi fui-fan bɛɛ la. A tɔnsɔn si koloya. Wo kɔma, konanu si na anu nyagannu kiri a la.”

³³Yisa ya kawandili bɔ mɔgɛnu ye ka tili kɛ su siyaman tɛgɛ anu ye. Woletɔ anu si ke min nya-yenna, a ya anu karan wo la.

³⁴A ya kawandili min bɛɛ bɔ anu ye, a ya tili le tɛgɛ wo bɛɛ bɔ tinɛ. Kɔnɔ anubɛ ala karan-dannu bi anu dan na tumɛ min, a si wo bɛɛ faranfasi anu ye.

³⁵Wurɛ wo la, Yisa ya a fɔ ala karan-dannu ye ko, “Ma tenbi wona dalɛ kɔgɔma.”

³⁶Anu ya nyama boloka. Yisa siginɛ kulɔn min tɔ, ala karan-dannu donta kulun kelan wo rɔ. Kulɔn donu fanan bi nyɔ nun a fɛ.

³⁷Fɔn-belebele bɔra. Nba, yi ye lunku-lankana a rɔ kulɔn kun na. A tora doni, kulɔn la ni fa yi la.

³⁸Yisa ye kinɔgɔ-belebele rɔ kulɔn burɔ a kɔma kilɛ la! A kunyɛ sanɛ kun-kɔrɔ-sɛ kuma. Karan-dannu ya a lakunden. Anu ko, “Karan-mɔgɔ, ma niyi bɔrɔ sa i ye, wa?”

³⁹Yisa kundenta. A ya a fɔ fɔnyɔ anubɛ yi ye ko, “Fɔnyɔ ma ni kima don!” A sigira a la don! Fɔnyɔ ma tugu tun.

⁴⁰Wo kɔma, Yisa ya a fɔ anu ye ko, “Nfenna wo kilannɛ? Dɛnkɛninya sa wo bolo, wa?”

⁴¹Kɔnɔ anu kun makɔra kati! Anu wulita a fɔla anu nyɔgɔn ye ko, “Nfen mɔgɔ-sufa ye kɛ la? Hali fɔnyɔ anubɛ yi ye ala kumɛ birala!”