Read Kuranko Maraka 6 Bible Online

Maraka 6 - Kuranko bible

Maraka 6

¹Yisa bɔɛ Yairasi warɛ, a makolota kan min, a sɛgira nyɔ. Ala karan-dannu bilanɛ a fɛ.

²Sulen-Tele ma, a ya mɔgɛnu karan Yahudiya-dina-bɔn la. Mɔgɔ siyaman nadɛnta nyɔ. Anu ya ala karan lamɔɛn tumɛ min, anu dama kawara. Anu ya nyinikalɛ kɛ ko, “Yon ya hɛnkili kɛ di a ma? A ya hɛnkili kɛ bɛɛ sɔrɔn mintɔ? A si ke kabana-koenu mala kama?

³Bon-tuwalɛ le ma kɛ la, Mariyamala dan, kɔni? Yemesi, Yusufu, Yudasi, anubɛ Saimon, a dɔgɔ-keminɛnu le wonu na. A dɔgɔ-musi bɛɛ siginɛ yan de!” Woletɔ a bɔrɔbɔnɛ anu bolo. Anu ma sɔn dɛnkɛninyala a ma.

⁴ Yisa ya a fɔ anu ye ko, “Nɛbi si gbiliyɛ sɔrɔn kan tinɛ bɛɛ fɔ a nyɛrɛ sɔrɔn-soe burɔ anubɛ ala mɔgɛnu bolo.”

⁵A ya a bole sa kirayato-dandenu kuma alako wonu na si kɛndɛya nya min. Kɔnɔ wo kɔma, a ma ke kabana-ko-gbɛrɛ kɛla nyɔ.

⁶A kawara anuna dɛnkɛninyabɛlitayɛ ma kati! Wo kɔma, so-mɛsɛ minnu bi nyɔla foolɛ rɔ, Yisa tagamanta wo bɛɛ rɔ ka mɔgɛnu karan.

⁷A ya ala karan-den tan-ni-filɛnu kele anu nyɔgɔn fɛ ka anu sɔ fila-filanyɛ ma. A ya nyina-gben-sɛnbɛ di anu ma.

⁸ Yisa ya a fɔ anu ye ko, “Dɔn-fen wo, tagama-bɔrɔ wo, wodi wo, hali duruki-gbɛrɛ, wo kana ta wo fenfen na wo bolo fɔ wola sewuri. Wo ni wota sanbarɛ don.”

⁹

¹⁰A ya a fɔ anu ye fanan ko, “Wo ni to wo yiya-fɔlɔtɛ rɔ, ha wo bɔ-tumɛ ni ke soe wo burɔ.

¹¹ Ni anu ma wo rabira soe min tɔ hali ka anu tole masɔ wo la, wo tenbi soe wo bolokala, wo ni wo kian ragbɔngbɔn nyɔ. Wo si ma sereyɛ la anu kan ma!”

¹²Nba, anu tara kawandili bɔ tinɛ ko mɔgɛnu ni yɛlɛma ka anu hakɛnu boloka.

¹³ Anu ya nyina siyaman gben ka tuli kɛ kirayato siyaman ma anu kɛndɛya-koe la.

¹⁴ Mansa Hɛrodi ya Yisa wara-koe bɛɛ lamɔɛn bawo Yisa mankan ara nyɛnsɛn kan tinɛ bɛɛ rɔ. Mɔgɛ donu ya anu miri ko, “Yɔni-Batasi-Kɛlɛ ara sɛgi a niyi la. Wo le ya a to, a ye kabana-ko-wɛnu kɛla a sɛnbɛ la.”

¹⁵Kɔnɔ donu ko, “Nɛbi Ilaya le ale la.” Donu fanan ko, “Fɔlɔ-nɛbi-wɛ do le ale la.”

¹⁶Mansa Hɛrodi ya wo lamɔɛn tumɛ min, a ko, “Yɔni-Batasi-Kɛlɛ le, yɔ! N ya a kunyɛ tɛgɛ a la kɔnɔ a ara a sɛgi a niyi la.”

¹⁷ Hɛrodi ya a dɔgɔ-keminɛ Filipila musi bi a bolo min kɛ nun, Yɔni-Batasi-Kɛlɛ tora a fɔla Hɛrodi ma nun ko, “A ma bɛn i ni i dɔgɔ-keminɛla musi bi a bolo!” Wo le ya a ma, Hɛrodi nyɛrɛ ya Yɔni bira-koe latɛgɛ nun ka a sa yele la alako a si ala musi Hɛrodiyasi hɛnɛ nya min.

¹⁸

¹⁹Ala musi Hɛrodiyasi diminyanɛ Yɔni ma nun. A faga-sɔgɛ ya a bira kɔnɔ a ma ke a fagala Mansa Hɛrodila ko la.

²⁰Mansa Hɛrodi kilanta Yɔni la bawo a ya Yɔni lɔn mɔgɔ-nyimɛ la, ado a sɛnima. Woletɔ a ya a kandan a kin na! Hɛrodi wa a tole masɔ Yɔni la tuma-wo-tuma, a kɔndɔ si fili kɔnɔ hali wo, a di a ye ka a tole masɔ a la tun!

²¹Tɔ-a-la, Hɛrodiyasi ya fɛrɛ sɔrɔn Yɔni ma. Mansɛ sɔrɔn-tele kera tumɛ min, a ya ladiyɛ kɛ ala kun-tiginu ye nun anubɛ ala kɛlɛ-den-kunyɛnu anubɛ Kalili nyamanita-mɔgɔ-banu.

²²Hɛrodiyasila dunmusi donta bɔn la ka a dɔn anu ya la. Dɔn-kɛ wo ya Mansa Hɛrodi anubɛ a ta-nyɔgɛnu hɛnɛ kati! Nba, mansɛ ya a fɔ dunmusi ye ko, “Nfen sɔgɛ ye i la? I ye fenfen fɛ, n si wo di i ma.

²³N bara n keli, i wa n madiya fenfenna ko la, n si wo di i ma, hali nta nyamanɛ talɛ!”

²⁴Woletɔ dunmusi tara a na manyinika. A ko, “N ni nfen fɔ a ye?” A na ya a yabi ko, “Yɔni-Batasi-Kɛlɛ kunyɛ.”

²⁵Dunmusi sɛgira mansɛ wara tiriya ka a fɔ a ye ko, “N bi a fɛ, i ni Yɔni-Batasi-Kɛlɛ kunyɛ sa miran rɔ ka a di n ma kaka!”

²⁶Kumɛ wo ya mansɛ yisi tinya bɛrɛkɛ! Kɔnɔ a ma ke a sɔsɔla bawo a ara a keli a ye mɔgɛ bɛɛ yala.

²⁷Woletɔ a ya a makandannɛ do sɔ tiriya ko a ni na Yɔni kunyɛ la. A makandannɛ wo tara yele la ka Yɔni kunyɛ tɛgɛ a la.

²⁸A nara a la miran rɔ ka a di dunmusi wo ma. Dunmusi fanan ya wo don a na bolo.

²⁹Yɔnila karan-dannu ya wo lamɔɛn tumɛ min, anu nara a furi bi tinɛ ka ta a togon.

³⁰Yisala kilayɛnu sɛgira a wara. Anu ya koe min bɛɛ kɛ, anubɛ ka mɔgɛnu karan nya min, anu ya wo bɛɛ rakaran Yisa ye.

³¹Mɔgɔ siyaman bi ta-ni-sɛgi kɛla nya min, Yisa anubɛ ala karan-dannu ma fɛrɛ sɔrɔn hali ka fen dɔn. Woletɔ a ya a fɔ anu ye ko, “Ma ta wona ma dan na kan tinɛ do rɔ. Ma ni ma sulen wati-ni kɔrɔ.”

³²Nba, anu dɔrɔn de donta kulɔn rɔ ka ta wula-da-rakolɔn rɔ anu dan na.

³³Hali wo, mɔgɔ siyaman ya anu tamatoe yen! Anu burimatoe tara anu yarɔ ka bɔ soe bɛɛ rɔ. Anu fɔlɔn kera kan tinɛ wo rɔ Yisa anubɛ ala karan-dannu yarɔ.

³⁴ Yisa bɔra kulɔn rɔ tumɛ min, a ya nyama-belebele-wɛ wo yen. A yisi fara kinikinɛ la anuna ko la bawo anu manɛ iko saga-fɛ-birala sa sagɛ minnu fɛ. Wo le ya a ma, a wulita anu karanna ko siyaman na.

³⁵Wurɛ kera tumɛ min, ala karan-dannu ya a fɔ a ye ko, “Suyi ara ke, ado wulɛ le kɛ la.

³⁶Sɛnɛ minnu bi yan dafɛ anubɛ so-mɛsɛnu, i ni nyama lata nyɔnu tɔ alako anu ni ta dɔn-fan do san anu nyɛrɛ ye.”

³⁷Yisa ya a fɔ anu ye ko, “Wole nyɛrɛ ni dɔn-fan di anu ma.” Anu ya a manyinika ko, “I ye a fɛ, ma ni ta san-kelen-sarɛ don biredi rɔ anu de-nyini-koe la, wa?”

³⁸Yisa ya anu yabi ko, “Biredi yili ye wo bolo? Wo ta a mafɛlɛn.” Anu ya wo lɔn tumɛ min, anu ya a fɔ a ye ko, “Ma ya biredi loli yen anubɛ yɛgɛ fila fanan.”

³⁹Nba, Yisa ya a fɔ ala karan-dannu ye ko, “Wo ni mɔgɛ bɛɛ fara ka anu kurun-kurɔn nasigi bin-kuran kuma.”

⁴⁰Woletɔ mɔgɛnu sigira mɔgɔ kɛmɛ-kɛmɛyɛ ma, ani mɔgɔ bi-loli bi-lolinyɛ ma.

⁴¹Wo kɔma, Yisa ya biredi loli anubɛ yɛgɛ filɛ wonu bi. A ya a yɛ layɛlɛ san ma ka baraka bira Alla ye. A ya biredi loli wo rakerikeri ka a don ala karan-dannu bolo alako anu ni wonu tafara mɔgɛnu tɛma. A ya yɛgɛ fila fanan fara anu dama tɛma.

⁴²Bɛɛ ya fen dɔn ka fa pim!

⁴³Mɔgɛnu datoe min tora, ala karan-dannu ya sende tan-ni-fila lafa biredi-kundi anubɛ yɛgɛ toe wo la.

⁴⁴Kei minnu ya biredi wo dɔn, wonu yatɛ bɛnta mɔgɔ waga loli (5,000) ma.

⁴⁵Yanni a ni nyama lata, Yisa ya ala karan-dannu sigi kulɔn rɔ tiriya ka anu nata a yarɔ dalɛ kɔma Bɛti-Sayida soe burɔ.

⁴⁶A ban mɔgɛnu masarala, a yɛlɛta kɔnkɛ kuma ka madiyali kɛ.

⁴⁷Wura-dɛ wo la, kulɔn ara ke dalɛ tɛma, ado Yisa kelen pe le gbele ma.

⁴⁸A ya a yen ko ala karan-dannu bi tɔrɔla kulɔn lata-koe rɔ bawo fɔnyɔ ara a kunyɛ sa anu ma. Su-talɛ ma, Yisa ye tagamana yi kuma anu bara la. A tora doni, a ni tenbi anu na nun.

⁴⁹Kɔnɔ anu ya a yen tagamana yi kuma tumɛ min, anu ya a lɔn yiyɛ le la. Anu gbele-gbelenta kilan bolo.

⁵⁰Anu dama kun makɔra. Yisa kumara anu ye kelenna! A ko, “Wo ni wo yisi kimɛ! Nde le. Wo kana kilan!”

⁵¹A donta anu fɛ kulɔn rɔ. Fɔnyɔ sigira-a-la don! Karan-dannu kawara bɛrɛkɛ! Anu kɔndɔ filita bawo

⁵²anu ma biredi-koe wo nya-yen bɛ min kɛ nun. Anu yisi gbɛlɛyara, ado anu ma ke kɛ fanan nya-yenna.

⁵³Anu ya dalɛ tɛgɛ ka na Kɛnɛsarɛti soe burɔ. Anu ya kulɔn kiri nyɔ.

⁵⁴Anu bɔra kulɔn rɔ nya min, mɔgɛnu ya Yisa lɔn kelenna!

⁵⁵Woletɔ anu burimatoe tara kan tinɛ bɛɛ rɔ ka na kirayatoenu na a wara. Anu nara anu na sanyilinu tɔ.

⁵⁶Yisa tara kan tinɛ min bɛɛ rɔ, a mara so-mɛsɛ la wo, a mara so-wɛ la wo, a mara sɛnɛ la wo, mɔgɛnu ya anuna kirayatoenu bi ka anu sa barɛ tɛma. Anu ya a madiya alako a ni sɔn kirayatoenu ni anu bole tugu hali ala duruki da-gbole la. Min bɛɛ ya anu bole tugu a la, wonu kɛndɛyara.