Read Kuranko Maraka 8 Bible Online

Maraka 8 - Kuranko bible

Maraka 8

¹A ma mɛ wo kɔma, nyama-belebele-gbɛrɛ ladɛnta. Dɔn-fen-mumɛ sa anu bolo min kɛ, Yisa ya ala karan-dannu kele a wara. A ko,

²“N bara kinikini mɔgɛ kɛnu ma bawo anu bara tele sawa kɛ n fɛ. Nba kaka, dɔn-fen sa anu bolo tun.

³Ni n ya anu nata anu barɛ, n ma anu de-nyini, anu si kirɔn-a-la kilɛ la bawo donu bɔra dinkira-yan rɔ.”

⁴Ala karan-dannu ya a manyinika ko, “Mɔgɛ si ke dɔn-fan sɔrɔnna mintɔ wulɛ kɛ rɔ yan min si mɔgɛ kɛ bɛɛ rabɔ?”

⁵Yisa ya anu manyinika ko, “Biredi yili ye wo bolo?” Anu ya a yabi ko, “Wɔrɔnfila.”

⁶Yisa ya a fɔ nyama ye ko anu ni sigi dugi ma. A ya biredi wɔrɔnfilɛ wo bi ka baraka bira Alla ye. A ya anu takerikeri ka anu don ala karan-dannu bolo alako anu ni a fara nyama tɛma. Karan-dannu ya wo ma.

⁷Yɛgɛ-mɛsɛ doni fanan bi anu bolo. Yisa ya baraka bira wo fananna ko la ka a fɔ ala karan-dannu ye ko anu ni wonu fanan fara mɔgɛnu tɛma.

⁸Mɔgɛ waga nani nyɔgɛ (4,000) ya fen dɔn ka fa pin! Karan-dannu ya sende wɔrɔnfila lafa anu datoe la. Wo kɔma, Yisa ya nyama masara.

¹⁰Tiriyante wo rɔ, anubɛ ala karan-dannu donta kulɔn rɔ ka ta Damanuta sigisɔn rɔ.

¹¹ Farisi donu nara ka Yisa-sɔsɛ dabira a kɔrɔbɔ tinɛ. Anu ya a fɔ a ye ko a ni kabana-koe do yira anu na ka bɔ Arinyɛni tɔ alako anu ni a lɔn ni Alla le ye a fɛ.

¹² Yisa kurunta, a ko, “Nfenna mɔgɛ kɛnu bi kabana-koe manyinikala n bolo tolon? Ado nfan, wo ni wo hɛnkili to kɛ ko! Kabana-ko fenfen ti kɛ mɔgɛ kɛnu ye mumɛ!”

¹³A bɔra anu fɛ ka sɛgi kulɔn rɔ alako a ni tenbi dalɛ kɔgɔma.

¹⁴Nba, ala karan-dannu nyinara ka na biredi gbɛrɛ la anu bolo. Biredi kelen pe, wo le ye anu bolo kulɔn rɔ.

¹⁵ Yisa ya anu makawandi ko, “Wo ni a ma wo fɛrɛma Farisinu anubɛ Mansa Hɛrodita biredi-yɛlɛ-fanla ko la.”

¹⁶Anu ya a fɔ anu nyɔgɔn ye ko, “A ye kɛ fɔla bawo biredi sa ma bolo, nyɛ?”

¹⁷Anu bi min fɔla nun, Yisa ye wo kalama, woletɔ a ya anu manyinika ko, “Biredi sa wo bolo min kɛ, nfenna wo ye wo rakaranna wo nyɔgɔn tɛma? Ha bi, wo sa kɛ nya-yenna! Wo hɛnkili sa, wa?

¹⁸ Yɛ ye wo bolo kɔnɔ wo sa fen yenna. Tole ye wo bolo kɔnɔ wo sa ko lamɔɛnna. N ya biredi loli rakerikeri mɔgɛ waga loli (5,000) ye tumɛ min, wo ara nyina wo ko, wa? Wo ya sende yili lafa anu datoenu na?” Anu ya a yabi ko, “Tan-ni-fila.”

²⁰Yisa ya anu manyinika ko, “N ya biredi wɔrɔnfila rakerikeri mɔgɔ waga nani (4,000) ye tumɛ min, wo ya sende yili lafa anu datoenu na?” Anu ya a yabi ko, “Wɔrɔnfila.”[14]

²¹A ya anu manyinika worɔ ko, “Nba, ha ka, wo ma a nya-yen bɛ, wa?”

²²Nba, Yisa anubɛ ala karan-dannu kera Bɛti-Sayida soe burɔ. Mɔgɛ donu nara fiyɔn la Yisa wara ka a madiya ko a ni a bole tugu a la.

²³Yisa ya fiyɔn wo bira a bole ma ka ta a la soe kɔma. Yisa ban a da-yi kɛla a yɛ ma tumɛ min, a ya a bolenu sa a kuma ka a manyinika ko, “I ye fen yenna, wa?”

²⁴Kei wo ya a yɛ layɛlɛ. A ko, “N bi mɔgɛnu yenna kɔnɔ anu mani de iko kɔlɔmanu tenbi tagamana.”

²⁵Yisa ya a bolenu sa kei wo yɛ ma tun. Kei wo yɛ lakara bɛrɛkɛ! A ye fen yenna a kilɛ fɛ kaka!

²⁶Nba, Yisa ya a lata a warɛ kɔnɔ a ko, “I kana sɛgi soe tun.”

²⁷Wo kɔma, soe min tɔgɛ Sɛsariya-Filipai, so-mɛsɛ minnu bi wola foolɛ rɔ, Yisa anubɛ ala karan-dannu tara nyɔnu tɔ. Anu tamatoe, a ya anu manyinika ko, “Yon bi nde la? Mɔgɛnu bi nfen fɔla nna ko la?”

²⁸ Anu ya a yabi ko, “Donu ko Yɔni-Batasi-Kɛlɛ le ile la. Donu ko Nɛbi Ilaya. Donu fanan ko nɛbi-gbɛrɛ le.”

²⁹ A ya anu manyinika ko, “Wole don? Wole ko kama? Yon bi nde la wole yala?” Pita ya a yabi ko, “Allata-Mɔgɔ-Yabɔnɛ le ile la.”

³⁰Nba, Yisa ya a fɔ anu ye ko, “Wo kana n wara-koe fɔ mɔgɔ-wo-mɔgɔ ye.”

³¹Wo kɔma, Yisa ya ala karan-dannu karan dabira. A ko, “A fɛrɛ sa fɔ nde, Hadama-dan ni tɔrɔ Yahudiya-kɛmɔgɛnu anubɛ saraka-masɔla-wɛnu anubɛ tɔn-karan-mɔgɛnu bolo. Anu si anu ban n na ka n faga. A tele sawa nyɔgɛ, Alla si n nawuli tun ka bɔ furinu tɛma.”

³²A ya kɛ ragbɛ anu ye feu! Wo kɔma, Pita ya Yisa labɔ doinu dafɛ. A ya Yisa makumɛ dabira.

³³Yisa ya a yɛ lamunun ala karan-dannu na. A ya Pita makuma, a ko, “Ile, bɔ n fɛ. I ye Setanɛta kumɛ le fɔ tinɛ wo la! Ila miriya kɛ, mɔgɛnu miriya le wo la kɔnɔ Allata miriya ma wo la!”

³⁴ Yisa ya nyama anubɛ ala karan-dannu kele a wara. A ya a fɔ anu ye ko, “Ni mɔgɔ-wo-mɔgɔ ye a fɛ ka bila n fɛ, fɔ a ni a nyɛrɛ wara-koe boloka ka a nyɛrɛ faga-kɔn bi ka bila n fɛ,

³⁵ ado mɔgɛ min bi a fɛ ka a nyɛrɛ niyi kisi, wo tigi si bɔnɔ a niyi la. Kɔnɔ min bi bɔnɔna a niyi la nde anubɛ kibara-nyimɛla ko la, wo niyi la si kisi.

³⁶Ni mɔgɛ ya duninya fan bɛɛ sɔrɔn kɔnɔ a ni bɔnɔ a niyi la, a ya nfen tɔnɛ sɔrɔn wo la?

³⁷Mɔgɔ ti ke fenfen dila a niyila ko la.

³⁸Nba, wati-yogomɛ kɛ, mɔgɛnu ma Alla lɔn wati min, ni mɔgɛ ya a kan-kɔ sɔ nde anubɛ nna karan la, nde, Hadama-dan anubɛ melika-sɛnimɛnu ba na tumɛ min n Fa Allata gbiliyɛ rɔ, nde fanan si n kan-kɔ sɔ wo tigi la.”