Read Kuranko Luka 11 Bible Online

Luka 11 - Kuranko bible

Luka 11

¹Lunyɛ do, Yisa ye madiyali kɛla kan tinɛ do rɔ. A banta tumɛ min, ala karan-dan do ya a fɔ a ye ko, “Mari, ma si Alla madiya nya min, ma karan wo la iko Yɔni ya ala karan-dannu karan nya min.”

²Yisa ya a fɔ anu ye ko, “Wo si madiyali kɛ ka le ko, ‘Ma Fa Alla, i tɔgɛ ni sɛninya. Ila mansayɛ ni na ma kuma.

³I ni bita dɔn-fan di ma ma.

⁴I ni ma makoto ma hakɛ la iko male bɛrɛn bi wonu makotola nya min minnu bi ko-yogomɛ kɛla ma la. I kana sɔn, ma ni don kɔrɔbɔlɛ rɔ.’ ”

⁵A ya a fɔ ala karan-dannu ye ko, “Ni wo do tara wo diyana-mɔgɛla bɔn la suyi tɛma ka a manyinika ko, ‘N bɔ, n dɔndɔ biredi gbu sawa la.

⁶N diyana-mɔgɛ do tenbimatoe. Wo ara na n bara. Fenfen sa n bolo n si min di a ma!’

⁷I diyana-mɔgɛ min bi bɔn wo la, ni wo ya i yabi ko, ‘I kana n tɔrɔ! N bara bɔn rasɔgɔ. Mabɛ nna dannu bara ma sa. N ti ke n nasɔla ka fen di i ma kaka.’

⁸N bi a fɔla wo ye, hali a ma a lasɔ ka biredi di i ma ka a tɛgɛ wola diyanayɛ ma, i ma miliya ka to a manyinikala min kɛ, i makoe ye fan min na, a si a lasɔ ka wo bɛɛ di i ma.

⁹“Woletɔ n bi a fɔla wo ye ko wo ni to tarali kɛla, wo si a sɔrɔn. To nyinini kɛla, wo si a yen. To dɛ matugula, a la si ka wo ye.

¹⁰Min ba to tarali kɛla, wo si a sɔrɔn. Min ba to nyinini kɛla, wo si a yen. Min ba to dɛ matugula, a la si ka wo ye.

¹¹Dan wa a fa tara yɛgɛ ma, a fa si duguma-fan di a ma, wa?

¹²A wa a tara sisi-kɛwɔlɛ ma, a si bondalɛ di a ma, wa?

¹³Hali wole min sɔn yogo, wo ya a lɔn ko a kin ka fen-nyimɛ di wola dannu ma. Wo Fa min bi Arinyɛni tɔ don, wo ti fen di wo ma min tenbira wo la, wa? Minnu bi a tarala, ale le sa Allata Ni-Sɛnimɛ dila wonu ma, wa?”

¹⁴Lunyɛ do, Yisa ya nyinɛ gben kei fɛ min ya a boboya, ado nyinɛ bɔra a fɛ tumɛ min, kei wo wulita kumala. Nyama kawara.

¹⁵ Kɔnɔ donu ko, “Nyina-kun-tigi Biyɛsiba, wo le ara nyina-gben-sɛnbɛ di a ma.”

¹⁶ Donu bi a fɛ ka Yisa kɔrɔbɔ, woletɔ anu ya a fɔ a ye ko a ni kabana-koe do kɛ min si a yira ko Alla le ya sɛnbɛ kɛ di a ma.

¹⁷Kɔnɔ Yisa ya anu miriya lɔn. A ya a fɔ anu ye ko, “Ni mɔgɛnu bi anu nyɔgɔn kɛlɛla nyamani-wo-nyamani rɔ, nyamanɛ wo ti mɛ. Ni kɛlɛ donta denbayɛ min tɛma, denbayɛ wo ti mɛ nyɛnsɛnna.

¹⁸Woletɔ ni Setanɛ ya Setanɛ kɛlɛ, ala mansayɛ si mɛ kama? Kɔnɔ wo ko n bi nyinɛnu gbenna bawo Biyɛsiba le ya sɛnbɛ wo di n ma.

¹⁹Ni n bi anu gbenna wo nya le, wolela mɔgɛnu bi anu gbenna kama wo rɔ? Wola mɔgɛnu bara a yira ko wo ma telen!

²⁰Kɔnɔ n bi nyinɛnu gbenna Allala sɛnbɛ le la. Wo ye a yirala ko Allala mansayɛ ara ban kela wo ma.

²¹“Ni mɔgɔ-fankalamɛ, Setanɛ, kɔni, ni anubɛ ala kɛlɛ-kɛ-fannu tabɛnnɛ ka ala bɔn kandan, a bolo-fan bɛɛ si kisi.

²²Kɔnɔ ni min fanka kolo atɛ ko, ni wo buira a ma ka a nɔ, fankalamɛ wo lanɛ kɛlɛ-kɛ-fan minnu na, a si kɛlɛ-kɛ-fan wo bɛɛ bi ka a bolo-fan bɛɛ fara mɔgɛnu na.

²³ “Ni min sa n fɛ, wo ye n kan ma. Ni min sa n dɛnbɛna fen-nadɛn la, wo ye a ranyɛnsɛnna.

²⁴“Nyina-yogomɛ wa bɔ mɔgɛ fɛ tumɛ min, a si yilan-yilan wulɛ rɔ ka a sulen tinɛ nyini. Ni a ma kan tinɛ do yen, a si a fɔ a nyɛrɛ ye ko, ‘Sɔ wa, n bɔra nna bɔn min na, n ni sɛgi nyɔ tun.’

²⁵Nba, a si sɛgi ka bon-rakolɔn taran. A sɛninyanɛ. A bɛɛ rabɛnnɛ feu!

²⁶A si ta worɔ ka na nyina-wɔrɔnfila-gbɛrɛ la a bolo minnu yogo ale nyɛrɛ ko. Anu si na ka anu sigi a fɛ bɔn wo la. Nba, mɔgɛ wola ban si yogoya a fɔlɔtɛ ko.”

²⁷Yisa ya kɛ fɔ tumɛ min, musi do kumara a ye ka bɔ nyama tɛma. A ko, “Min ya i sɔrɔn ka i susun, mɔgɔ-sewanɛ le wo musi la!”

²⁸Kɔnɔ Yisa ya a fɔ a ye ko, “Minnu sewanɛ ka tenbi wo la, wo le, minnu bi Allala kumɛ lamɔɛnna ka a bira gben!”

²⁹ Nyama ya Yisa lafoo tumɛ min, a ya a fɔ anu ye ko, “Bi-mɔgɛnu yogo kati! Wo ye kabana-koe nyinina tamasereyɛ la kɔnɔ wo ti kabana-ko-gbɛrɛ yen fɔ Nɛbi Yonata tamasere.

³⁰ Iko Nɛbi Yona mara tamasere la Ninɛfa kɛnu ye nya min, nde, Hadama-dan si ma tamasere la bi-mɔgɛnu ye wo nya na le.

³¹ Kiti-tɛgɛ-lunyɛ, Dugula Musu-Mansɛ si a lasɔ ka bi-mɔgɛnu yiliki bawo a nara ka bɔ wula-yan la ka na a tole masɔ Mansa Silamɛnita hɛnkilimaya-karan la. Nba, n bi tonyɛ fɔla wo ye, mɔgɛ do ye yan min kolo Mansa Silamɛni ko pirr!

³² Kiti-tɛgɛ-lunyɛ, Ninɛfa kɛnu fanan si anu nasɔ ka wo yiliki bawo wonu ya Nɛbi Yonata kawandilɛ lamɔɛn tumɛ min, anu ya anu kɛ-nyanu yɛlɛma. Kɔnɔ n bi a fɔla wo ye, mɔgɛ do ye yan min kolo Nɛbi Yona ko pirr!

³³ “Mɔgɔ ti lɛnpu lamalan ka a dogon. A ti gbengberan burun a kuma fanan kɔnɔ a si a sigi tebulu kuma, woletɔ mɔgɛnu ba don, anu si waan yen.

³⁴I yɛ mani de i fɛrɛ-bɔnkɛ ye iko lɛnpu-lamalannɛ. Ni i yɛ kɛndɛ, i fɛrɛ bɛɛ lafanɛ waan la. Kɔnɔ ni i yɛ ma kɛndɛ, i fɛrɛ bɛɛ la si fa pinpi la.

³⁵A ma i fɛrɛma worɔ ko waan min bi i rɔ, wo kana ma pinpi la.

³⁶Awa, ni i fɛrɛ fanɛ waan la, pinpi-wo-pinpi sa a rɔ, a bɛɛ la si malan iko lɛnpu si waan labɔ i ye nya min.”

³⁷Yisa banta kumala tumɛ min, Farisi do ya a kele fen dɔn tinɛ. Yisa tara a sigi ka fen-dɔn-kɛ.

³⁸Farisi ya a yen tumɛ min ko Yisa ma a bole laku yanni a ni fen dɔn iko anuna tɔn ye nya min, a kawara.

³⁹Nba, Mari ya a fɔ a ye ko, “Wole Farisinu bi wola yi-lafɛnu anubɛ piletinu kɔmɛ makula kɔnɔ wo burɛ fanɛ karagbɛlɛyɛ anubɛ wunduyogoyɛ la.

⁴⁰Wole kun-takolɔnnu! Alla min ya a kɔmɛ ladan, ale le ma a burɛ fanan nadan?

⁴¹Kɔnɔ min bi wola yi-lafɛnu anubɛ piletinu burɔ, wo ni wo di bolo-kolɔnnu ma, fan bɛɛ si sɛninya wo ye worɔ.

⁴² “Kɔnɔ gbalo ye wole Farisinu kuma bawo wo ara yaka bɔ nako-fannu tɔ kɔnɔ wo ara wo ban telenbagayɛ anubɛ Alla-keni-koe ma. A bɛnta, wo ni wonu ma le kɔnɔ wo kana wo ban a toenu fanan ma.

⁴³“Gbalo ye wole Farisinu kuma bawo sigi-tina-nyimɛnu di wo ye Yahudiya-dina-bɔnnu na. Gbiliya-kɔndɔlinu di wo ye barɛnu tɔ.

⁴⁴Gbalo ye wo kuma bawo wo mani de iko kanba-dogonnɛnu, mɔgɛnu si tagama min kuma, anu sa a kalama.”

⁴⁵Tɔn-karan-mɔgɛ do ya a fɔ a ye fanan ko, “Karan-mɔgɔ, i ye min fɔla kɛ la, i ye male fanan lafɛya tinɛ wo la!”

⁴⁶Yisa ya a fɔ a ye ko, “Gbalo ye wole tɔn-karan-mɔgɛnu fanan kuma bawo dunɛ min bi-koe gbɛlɛ, wo ye wo sala mɔgɛnu kuma kɔnɔ wole nyɛrɛ ti wo bolo-nɔlɔnɛ tugun dunɛ wo la ka anu dɛnbɛ.

⁴⁷Gbalo ye wo kuma! Wo ara kanba-nyimɛnu sin nɛbinu ye ka bɔnnu sɔ wonu kuma, wo benbanu ya nɛbi minnu faga, kɔni.

⁴⁸Wo ya anuna kanbɛnu nadan tumɛ min, wo nyɛrɛ ara sɔn ko wo benbanu ya min ma nɛbinu faga tinɛ, wole ara sɔn wonu ma.

⁴⁹Wola ko la, Alla anubɛ ala hɛnkilimayɛ ko a si nɛbinu anubɛ kilayɛnu sɔ wo benbanu bara. Anu si donu faga anu tɔ ka donu bɛnsɛnkɔninya.

⁵⁰Woletɔ ka a dabira duninya-dan-tumɛ, nɛbi minnu bara faga, wole bi-mɔgɛnu si tɔrɔyɛ sɔrɔn nɛbi-kɔrɔmɛ wo bɛɛ faga-koe la.

⁵¹ Ka a dabira Ebɛlila sayɛ ma ha ka a sigi Sakarayala sayɛ la, ale min fagara saraka-bɔ-tinɛ anubɛ kan-tina-sɛnimɛ tɛma, kɔni. N bi a fɔla wo ye ko bi-mɔgɛnu si tɔrɔyɛ sɔrɔn wonu damala ko la terr!

⁵²“Gbalo ye wole tɔn-karan-mɔgɛnu kuma bawo da-nyin min bi hɛnkilimaya-bɔn lakala, wo ara wo dogon mɔgɛnu ma. Wole ti sɔn donna nyɔ, ado minnu bi a fɛ ka don, wo ara wonu nasɛgi!”

⁵³Yisa bɔra nyɔ tumɛ min, tɔn-karan-mɔgɛnu anubɛ Farisinu wulita a yakɔrɔ-mamɔla ka a manyinika nyinikali-gbɛlɛmɛnu na.

⁵⁴Ni a si koe do fɔ min ma telen anu yala, anu bi a fɛ ka a bira koe wonu fɛ.