Read Kuranko Luka 16 Bible Online

Luka 16 - Kuranko bible

Luka 16

¹Yisa ya a fɔ ala karan-dannu ye ko, “Nɔnfulu-tigi do ye nyɔ nun, a ya mɔgɛ do sigi kun-tigiyɛ la. Anu ya a fɔ nɔnfulu-tigi wo ye ko, ‘I ya kun-tigi min sigi, a ye ila wodi tinyana kɔɔ!’

²A ya a kele bɔn la ka a manyinika ko, ‘N bara min namɔɛn ila ko rɔ kɛ la, wo ye kama? N ya nɔnfuli yirika min don i bolo, i ni dantɛgɛ-kɛdi di n ma bawo ile ti ma kun-tigi la n ye tun!’

³Ale kun-tigi ya a fɔ a nyɛrɛ ye ko, ‘N tigi ye n boloka tinɛ le kɛ la. N si nfen ma gbɛ? Sɛnɛ-sa-sɛnbɛ sa n bolo, ado n si miliya ka tarali kɛ.

⁴N bi min mala, n bara wo lɔn de gbɛ! A wa n boloka wɔlɛ la tumɛ min, n si n diyana-mɔgɛnu sɔrɔn minnu si n tabira anu barɛ.’

⁵“Woletɔ a tigila yili ye mɔgɛ min bɛɛ la, a ya wonu kele. A ya a fɔ a fɔlɔtɛ ye ko, ‘N tigila yili min bi i la, nfen nyɔgɔn?’

⁶A ya a yabi ko, ‘Tulu-durɔmu kɛmɛ.’ Nba, kun-tigi ko, ‘Ila yili-kɛdi le kɛ la. I sigi ka bi-loli sɛbɛ tiriya!’

⁷A ya a fɔ doi ye fanan ko, ‘Ile don, yili ye ile bolo?’ A ya a yabi ko, ‘Fui-fen-bɔrɔ kɛmɛ nani.’ Nba, kun-tigi ya a fɔ a ye ko, ‘Ila yili-kɛdi le kɛ la. Kɛmɛ sawa ani mogan sɛbɛ.’

⁸“Kun-tigi-kensunte kɛ tigi ya a matɔgɔ halliyɛ-su wola ko la bawo duninya-kɛ-mɔgɛnu halliyanɛ anuna koenu tɔ ka tenbi wonu na minnu bi waantɛ la.”

⁹Yisa ya a fɔ ko, “N bi a fɔla wo ye, wo ni wo diyana-mɔgɛnu nyini wo nyɛrɛ ye duninya-nɔnfuli rɔ, woletɔ ila nɔnfuli wa ban tumɛ min, Alla si wo rabira a warɛ Arinyɛni tɔ!

¹⁰Minnu telennɛ ko-mɛsɛnu tɔ, wo si lanayɛ kɛ ko-wɛnu fanan tɔ. Min kensunyanɛ ko-mɛsɛnu tɔ, wo si kensunyɛ kɛ ko-wɛnu fanan tɔ.

¹¹Ni wo ma lanayɛ kɛ duninya-kɛ-nɔnfuli la, yon si la wo la nɔnfulu-bɛrɛla ko la?

¹²Ni wo ma lanayɛ kɛ mɔgɛ doinutɛ la, Alla si ke itɛ dila i ma kama?

¹³ “Wɔli-kɛlɛ ti ke wɔlila tigi fila ye wati kelan rɔ. Ni a ya wo ma, kelen si diya a ye, kelen si gboya a ye. A si kelan gbiliya ka kelan lafɛya. Wole fanan bi wo nya na le. Wo ti Alla anubɛ nɔnfuli nyini nya-kun-kelen.”

¹⁴Farisinu ya kɛ bɛɛ lamɔɛn tumɛ min, anu ya Yisa mayɛlɛn bawo wodi di anu ye kati!

¹⁵Yisa ya a fɔ anu ye ko, “Minnu bi anu nyɛrɛ yen-nya rabɛnna mɔgɛnu yala, wole le wonu na kɔnɔ Alla ya wo burɛ lɔn, ado mɔgɛ ye a mirila min ma ko a kolo, kisimiriya-koe le wo la Alla yala.

¹⁶ “Alla ya tɔn minnu di Musa ma wo, nɛbinu ya kɛdi minnu sɛbɛ wo, mɔgɛnu bi anu tole masɔla wonu na nun ha Yɔni-Batasi-Kɛlɛta wati ma. Kɔnɔ kebi wo tumɛ, mɔgɛnu bi anu tole masɔla Allata mansaya-kibara-nyimɛ la. Mɔgɛ bɛɛ ye a rayala ka don a rɔ.

¹⁷ Kɔnɔ iko san-kole anubɛ dugu-kole kɛ ti ban nya min, hali tɔn kɛ nyantarani kelen bɛrɛn ti ban worɔ.

¹⁸ “Kei min ba ala musi boloka ka dogbɛrɛ furu, wo ara yɛlɛnyɛ kɛ, ado kei min ba musu-bolokanɛ wo furu, wo fanan bara yɛlɛnyɛ kɛ.

¹⁹“Nɔnfulu-tigi do ye nyɔ nun min fɛrɛya bɔnɛ kura-da-gbɛlɛnu na. Tele-wo-tele, a si to dɔn-fen-nyimɛ dɔnna.

²⁰Bolo-kolɔn do ye nyɔ fanan nun, a tɔgɛ Lasarasi. Tɛlɛ ye a fɛrɛ mumɛ bɛɛ ma. Anu si na a la nɔnfulu-tigila bonda-dɛ la tuma-wo-tuma,

²¹fɔsɔkɔrɛ dɔn-fen-pɛrɛnɛ minnu bi buila nɔnfulu-tigila tebulu kɔrɔ, a si wonu dɔn. Wulinu fanan bi ala tɛlɛnu dɛ ranɛɛla.

²²“Bolo-kolɔn wo fagara. Melikanu tara a la Iburayima tɔgɔfɛ Arinyɛni tɔ. Nɔnfulu-tigi fanan fagara. Anu ya a togon.

²³Ale nɔnfulu-tigi ye tɔrɔyɛ rɔ lakira. A ya a yɛ layɛlɛ ka Iburayima yen wulɛ la, ado Lasarasi ye ale Iburayima tɔgɔfɛ.

²⁴Woletɔ a gbele-gbelenta, a ko, ‘N fa Iburayima! Kinikini n ma. I ni Lasarasi sɔ alako a ni a bolo-nɔlɔnɛ don yi rɔ ka n nagan makima bawo n bi duma-ba rɔ tɛ kɛ burɔ.’

²⁵“Kɔnɔ Iburayima ko, ‘Nna dan, i miri fɔlɔn. I kɛndɛ tumɛ min, i ye fen-nyimɛ bɛɛ sɔrɔnna kɔnɔ wati wo rɔ, Lasarasi kɛ ye fen-nɔgɔnɛnu gbansan sɔrɔnna. Nba kaka, ale le ye sewɛ la yan, ile ye dumɛ rɔ.

²⁶Ka tenbi wo bɛɛ la, denka-filun-bɛ ye male anubɛ ile tɛma, ado ni minnu bi a fɛ ka bɔ yan ka ta i wara nyɔ, wonu ti ke tala nyɔ. Mɔgɔ ti ke bɔla i warɛ nyɔ fanan ka na male warɛ yan.’

²⁷“Nɔnfulu-tigi ko, ‘Nba, n fa, n bi i madiyala, i ni Lasarasi sɔ. A ni ta n fala bɔn la.

²⁸N na-kelen-nyɔgɛ mɔgɔ loli ye nyɔ. A ni ta ka anu makawandi alako anu kana na tɔrɔya-su kɛ rɔ yan.’

²⁹“Iburayima ko, ‘Nɛbi Musa anubɛ nɛbi doinu bi i na-kelen-nyɔgɛnu bolo nyɔ ka anu makawandi. I na-kelen-nyɔgɛnu ni anu tole masɔ wonu na.’

³⁰Nɔnfulu-tigi ya a sɔsɔ. A ko, ‘N fa Iburayima, wo ti a bɔ! Kɔnɔ ni mɔgɛ do wulita ka bɔ furinu tɛma ka ta anu makawandi, anu si yɛlɛma ka tubi.’

³¹Kɔnɔ Iburayima ko, ‘Ni anu ti anu tole masɔ Nɛbi Musa anubɛ nɛbi doinu na, hali ni mɔgɛ do wulita ka bɔ furinu tɛma ka ta anu makawandi, anu ti la a la.’ ”