Read Kuranko Luka 18 Bible Online

Luka 18 - Kuranko bible

Luka 18

¹Lunyɛ do, Yisa ya tili kɛ tɛgɛ anu ye ka anu karan alako anu ni madiyali kɛ wati bɛɛ. Anu kana kuri.

²A ko, “Kiti-tɛgɛlɛ do taranta soe do rɔ nun. Ale ma kilan Allatala la, ado mɔgɛ fanan bɔrɔ sa a ye.

³Kɛɛ-musi do ye soe wo burɔ nun, wo tora tala a wara ka a madiya ko, ‘I ni n dɛnbɛ ko n ni yo sɔrɔn n kɛlɛ-nyɔgɛ kuma.’

⁴A mɛra, kiti-tɛgɛlɛ ma sɔn kɔnɔ tɔ-a-la, a ya a fɔ a nyɛrɛ ma ko, ‘Hali n kilanni ma Allatala la, ado mɔgɔ bɔrɔ sa n ye

⁵kɔnɔ ka a tɛgɛ nyagbɛ kɛ bɛɛla ko ma kɛɛ-musi kɛ ye min dila n ma, n si n taya ka ala kumɛ fɔ. Ni wo ma, a si to nala tuma-wo-tuma ha n ni bandan.’ ”

⁶Mari ya a fɔ tun ko, “Ale kiti-tɛgɛla-kensunte ya min fɔ, wo hɛnkili ni to wo ko.

⁷Allata mɔgɛ minnu bi anu kan nabɔla a ma su-ni-tele, wonu don, a ti wonuna kiti tɛgɛ a kilɛ fɛ, wa? A ti anu dɛnbɛ tiriya, wa?

⁸N ni a fɔ wo ye, a si kiti tɛgɛ a kilɛ fɛ ka a ma tiriya! Kɔnɔ nde, Hadama-dan wa na tun, n si dɛnkɛninyɛ taran duninya rɔ, wa?”

⁹Minnu lanɛ anu nyɛrɛta ko-nyimɛ la ka mɔgɛ toe bɛɛ lafɛya, Yisa ya tili kɛ tɛgɛ wonu denu ye.

¹⁰A ko, “Mɔgɔ fila tara Alla-Bato-Bɔn la madiyali-kɛ-tinɛ. Kelan, Farisi le, doi, duti-makelelɛ le.

¹¹“Farisi wo sɔra a dan na ka wuli Alla madiyala ka le, a ko, ‘Alla, n bi baraka birala i ye bawo kɔrɔnditore ma nde la, kensunte ma n na, telenbɛli ma n na nna musi wara la iko mɔgɔ toe bɛɛ ye nya min, ado n bi baraka birala i ye bawo nde sa iko duti-makelelɛ kɛ pan!

¹²Lɔgɔkun-wo-lɔgɔkun, n bi sunyɛ donna tele fila. N bi min bɛɛ sɔrɔnna, n bi wo yaka dila i ma.’

¹³“Kɔnɔ duti-makelelɛ wo ya a masɛgi a la. A ma sɔn hali ka a yɛ layɛlɛ san ma fɔ ka a kɔgɔ-dɛ matugu. A ko, ‘E, Alla, kinikini nde hakɛ-tigi ma!’

¹⁴ N bi a fɔla wo ye, duti-makelelɛ kɛ, a latelennɛ sɛgira a warɛ Alla yala, Farisi wo ma de, ado min ba a nyɛrɛ kɔrɔbi, wo la si yigi. Min ba a nyɛrɛ famayigi, wo la si yɛlɛ.”

¹⁵Mɔgɛ donu nara anuna dennɛnu na Yisa wara alako a ni a bole sa anu kuma ka duwa anu ye. Kɔnɔ ala karan-dannu ya wo yen min kɛ, anu nyɛɛra denba-tigi wonu ma bawo anu bi Yisa tɔrɔla dennɛnuna ko la.

¹⁶Kɔnɔ Yisa ya dennɛnu kele a wara, a ko, “Wo ni sɔn dennɛnu ni na n bara! Wo kana anu mabeli bawo anu denu denuta ye Allala mansayɛ la.

¹⁷Wo ni wo hɛnkili to kɛ ko! Ni min ti Allala mansayɛ rabira iko dennɛ, wo ti don nyɔ rɔ mumɛ!”

¹⁸Yahudiyanuna kun-tigi do ya Yisa manyinika ko, “Karan-mɔgɔ-nyimɛ, n ni nfen ma min si a ma, n ni habadan-nimayɛ sɔrɔn?”

¹⁹Yisa ya a manyinika ko, “I ye n kelela kama ko mɔgɔ-nyimɛ? Mɔgɔ-nyima sa fɔ Alla kelen pe.

²⁰ Ka ila nyinikalɛ yabi, i ya tɔn kɛnu lɔn. Anu ko, ‘Wo kana yɛlɛnyɛ kɛ. Wo kana mɔgɔ faga. Wo kana kankanyɛ kɛ. Wo kana foninya-sereyɛ bɔ. Wo ni wo fa anubɛ wo na gbiliya.’ ”

²¹Kei wo ya a fɔ ko, “Kebi n dennɛ, n ya tɔn kɛ bɛɛ bira.”

²²Yisa ya kɛ lamɔɛn tumɛ min, a ya a fɔ a ye ko, “A tonɛ ko-kelen-pe le ma gbɛ, ta i bolo-fan bɛɛ fere ka wodi wo di bolo-kolɔnnu ma. I si nɔnfuli sɔrɔn Arinyɛni tɔ. Wo kɔma, i ni na bila n fɛ.”

²³Kɔnɔ kei wo ya kɛ lamɔɛn tumɛ min, a yisi magboyara bawo bana le ale la nun!

²⁴Yisa ya a yen min kɛ ko a yisi ma ara gboya, a ko, “Nɔnfulu-tiginu don-koe Allala mansayɛ rɔ, wo gbɛlɛ de,

²⁵ado wo gbɛlɛ ka tenbi nyomɛ don-koe la sɛgilan-woe rɔ.”

²⁶Minnu ya wo lamɔɛn, wonu ya a manyinika ko, “Yon si kisi worɔ?”

²⁷Yisa ya anu yabi ko, “Mɔgɔ ti ke min mala, Alla si ke ka wo bɛɛ ma ata sɛnbɛ la.”

²⁸Pita ya a fɔ a ye ko, “I yɛ lana! Ma ara ma warɛ bɛɛ boloka ka bila i fɛ.”

²⁹Yisa ya a fɔ anu ye ko, “Wo ni wo hɛnkili to kɛ ko! Min bɛɛ ara anu warɛ boloka ka ala musi to ka a na-kelen-nyɔgɛnu to ka a sɔrɔnnɛnu to ka dannu to Allala mansayɛla ko la,

³⁰wo si fen sɔrɔn min tenbira kɛnu bɛɛ la duninya kɛ rɔ anubɛ ka habadan-nimayɛ sɔrɔn ya rɔ fanani.”

³¹Yisa ya ala karan-den tan-ni-filɛ wonu bi anu dan na ka a fɔ anu ye ko, “Wo ni wo tole masɔ! Ma ye tala Yerusalɛm. Nɛbinu ya koe min bɛɛ sɛbɛ nde, Hadama-dan la ko la, wonu si na bɔ-a-la nyɔ.

³²Anu si n don sibolo-gbɛrɛnu bolo minnu si n mayɛlɛn ka n nafɛya hali ka anu nɔgɔ-yi pusen n ma. Anu si n gbesi ka n faga.

³³A tele sawa nyɔgɛ, n si wuli tun ka n niyi lafɛ.”

³⁴Yisala karan-dannu ma kɛ fenfen nya-yen bawo kumɛ wo kɔrɛ dogonta anu ma. Yisa ye kumala minna ko la nun, anu ma wo lɔn.

³⁵Yisa gbɛrɛnnɛ Yɛrikɔ soe ma, kei-fiyɔn do siginɛ kilɛ la. A ye tarali kɛla.

³⁶A ya mɔgɛnu tenbi-kan lamɔɛn tumɛ min, a ya nyinikalɛ kɛ. A ko, “Nfen mara?”

³⁷Anu ya a yabi ko, “Yisa Nasarɛti kɛ le tenbi tinɛ.”

³⁸A gbele-gbelenta, a ko, “Yisa! Dawudala dan! Kinikini n ma!”

³⁹Minnu bi nyama yarɔ, wonu nyɛɛra a ma ko a ni a made. Kɔnɔ a gbele-gbelenta tun bɛrɛkɛ! A ko, “N fa, Mansa Dawudala dan, kinikini n ma!”

⁴⁰Nba, Yisa sɔra ka a fɔ ko anu ni na fiyɔn wo la a wara. A gbɛrɛnta a ma tumɛ min, Yisa ya a manyinika ko,

⁴¹“I ye a fɛ, n ni nfen ma i ye?” A ya a yabi ko, “Mari, n bi a fɛ, n ni fen yen tun.”

⁴²Yisa ya a fɔ a ye wo rɔ ko, “Nba, i ni fen yen! Ila dɛnkɛninyɛ ara i lakɛndɛya.”

⁴³Tiriyante wo rɔ, a kera fen yenna. A bilara Yisa fɛ. A ye baraka birala Alla ye. Mɔgɛnu ya wo yen tumɛ min, anu dama ya Alla tanto fanan.