Read Kuranko Luka 19 Bible Online

Luka 19 - Kuranko bible

Luka 19

¹Yisa donta Yɛrikɔ soe burɔ, a sɔgɛ ye a la, a ni tenbi nyɔ rɔ nun.

²Duti-makelelɛnuna kun-tigi do ye nyɔ nun, a tɔgɔ Sakiyasi, ado nɔnfulu-tigi le.

³A ye a rayala nun ka a lɔn ni Yisa ye nya min kɔnɔ a wuru kati! Ka a tɛgɛ nyamala ko ma, a ma ke Yisa yenna.

⁴Woletɔ a tara a burila nyama yarɔ. A yɛlɛta toro-kuri la Yisa yen-koe la a tenbimatoe kilɛ wo fɛ.

⁵Yisa kera nyɔ tumɛ min, a ya a yɛ layɛlɛ san ma ka a fɔ Sakiyasi ye ko, “Sakiyasi, yigi tiriya! N bi yiyala ila bɔn la bi.”

⁶Sakiyasi yigira tiriya ka Yisa labɛn sewa-ba la.

⁷Min bɛɛ ya wo yen, wonu ya gbunyɛ dabira. Anu ko, “E, n bɔnu, kei kɛ ara ta yiya hakɛ-tigi warɛ!”

⁸Sakiyasi ya a lasɔ ka a fɔ Mari ye ko, “N tigi, i wɔlɔ matɔlɔ! N si nna nɔnfulu-talɛ di bolo-kolɔnnu ma. N bara fen bɔ minnu bolo kensunteyɛ la, n si wo nyɔgɔn nani lasɛgi wo tiginu ma tun.”

⁹Yisa ya a fɔ a ye ko, “Kisi-koe ara ke bɔn kɛ la bi, ado Iburayima-bɔnsɔn-bɛrɛ le kei kɛ la ala dɛnkɛninyɛ fɛ.

¹⁰ Nde, Hadama-dan ara na ka mɔgɔ-samanɛnu nyini anubɛ ka wonu kisi.”

¹¹ Minnu tole masɔnɛ a la wulɔn, Yisa ya tili kɛ tɛgɛ wonu ye. Kɛ wati ya a taran, a gbɛrɛnnɛ Yerusalɛm ma. Anu yili ye a ma ko Allala mansayɛ bɔmatoe le gbɛ rɔ.

¹²A ya wo lɔn min kɛ, a ko, “Mɔgɔ-ba do ye nyɔ nun anu ya min kele nyamanɛ do rɔ wula-yan la ka ta sigi mansayɛ la. Wo kɔma, sɛgi-sɔgɛ ye a la a warɛ tun.

¹³Yanni a ni ta, a ya ala wɔli-kɛla tan kele. A ya sɛnɛ-wodi-mɛlɛn kelen[11] di anu kelen-kelennamɛ-bɛɛ ma. A ko, ‘Wo ni to kɛ mayɛlɛmana ka tɔnɛ sɔrɔn ha n na tumɛ.’

¹⁴Kɔnɔ a ma di ala nyamanita-mɔgɛnu ye min kɛ, anu ya kilayɛnu nata a gbere la ka a fɔ ko, ‘Ma sa a fɛ, kei kɛ ni ma mala mɔgɔ-ba la tun.’

¹⁵“A mara mansɛ la tumɛ min, wo kɔma, a sɛgira. A ya wodi to ala wɔli-kɛlɛ minnu bolo, a ya wonu kele alako anu ya min nyɔgɔn tɔnɛ sɔrɔn, anu ni na wo yira a la.

¹⁶A fɔlɔtɛ nara. A ko, ‘N fa, i ya sɛnɛ-wodi-mɛlan min don nde bolo, n bara tan sɔrɔn tɔnɔyɛ la.’

¹⁷A tigi ko, ‘I wara i raya. Wɔli-kɛla-nyimɛ le ile la! I wara lanayɛ kɛ fen-dɔgɔmɛ rɔ min kɛ, n si i ma so kun tan kun-tigi la.’

¹⁸Wɔli-kɛlɛ fila nyɔgɛ nara, a ko, ‘N fa, i ya sɛnɛ-wodi-mɛlan min to nde bolo, n bara loli sɔrɔn tɔnɔyɛ la.’

¹⁹A ya a fɔ wo ye fanan ko, ‘N si i sigi so-kun loli kun na.’

²⁰“Wɔli-kɛlɛ doi nara, a ko, ‘N fa, ila sɛnɛ-wodi-mɛlan bira. N ya a mara kura-kundi do rɔ.

²¹N kilanta i la bawo ila ko ragbɛlɛ. Ita ma min na, i ye wo le tɛgɛla i nyɛrɛ ye, ado ile ma wo ki.’

²²A tigi ya a fɔ wo ye ko, ‘Ile, wɔli-kɛla-yogomɛ! N si i yiliki i nyɛrɛla kumɛ fɛ! I ya a lɔn ko nna ko ragbɛlɛ, nyɛ? Nta ma min na, n bi wo le tɛgɛla, ado nde ma wo ki, nyɛ?

²³Nba, nfenna worɔ, i ma nna wodi sa wodi lamara tinɛ alako n ba na tumɛ min, n ni a tɔnɔ nɛ sɔrɔn a kuma tun.’

²⁴“Minnu sɔnɛ nyɔ, a ya a fɔ wonu ye ko, ‘Sɛnɛ-wodi-mɛlan min bi a bolo, wo ni wo bi a bolo. Sɛnɛ-wodi-mɛlɛn tan ye wɔli-kɛlɛ min bolo, wo ni a don wo bolo!’

²⁵Anu ya a fɔ a ye ko, ‘Kɔnɔ n tigi, sɛnɛ-wodi-mɛlɛn tan ye wo bolo!’

²⁶ A ya anu yabi ko, ‘N bi a fɔla wo ye ko fan ye min bolo, do si sa wo kuma wonu ye. Kɔnɔ fen sa min bolo, hali a dɔgɔmanɛ min bi a bolo, wo si bi a bolo.

²⁷Nba, n yoge kɛnu, a ma di minnu ye ko n ni ma anuna mansɛ la, wo na wonu na yan ka anu faga n yala!’ ”

²⁸Yisa ban kɛ fɔla, a sɔra ala karan-dannu yarɔ ka Yerusalɛm kilɛ bira.

²⁹A gbɛrɛnta Bɛtifagi anubɛ Bɛtani soenu ma tumɛ min Ɔlifi kɔnkɛ[12] dafɛ, a ya ala karan-den filɛ sɔ a yarɔ.

³⁰A ya sarakanɛ kɛ don anu bolo. A ko, “So-nɛ min bi wo yarɔ, wo ta nyɔ. Wo wa ke nyɔ, wo si sofɛli-dan kirinɛ yen, mɔgɔ ma sigi min na bɛ. Wo ni a fulen ka na a la yan.

³¹Ni mɔgɔ-wo-mɔgɔ ya wo manyinika ko, ‘Wo ye a fulenna nfen na?’ A fɔ a ye ko, ‘Mari makoe ye a la.’ ”

³²Anu tara fan bɛɛ taran iko Yisa ya a fɔ anu ye nya min.

³³Anu bi sofɛli-bulan fulenna tumɛ min, a tiginu ya anu manyinika ko, “Wo ye a fulenna nfenna?”

³⁴Anu ya anu yabi ko, “Mari makoe ye a la.”

³⁵Anu tara sofɛli-bulan la Yisa wara. Anu ya anuna duruki donu sa sofɛlɛ kuma ka Yisa dɛnbɛ sigila a la.

³⁶A ye tala tumɛ min, anu ya anuna kurɛnu tafulen a yarɔ kilɛ la.

³⁷A gbɛrɛnta Yerusalɛm soe ma tumɛ min, kilɛ ye yigila Ɔlifi kɔnkɛ kɔrɔ kan min, a gba-fɛ-bilala siyaman wulita baraka birala Alla ye. Anu bara Alla yen kabana-koenu kɛla nun min kɛ, anu bi a tantola anu kulu-mayɛlɛnɛ la wola ko la.

³⁸ Anu ko, “Allala duwɛ ni to mansɛ wo fɛ min bi nala Mari tɔgɛ rɔ! Yisi-kimɛ ni taran Arinyɛni tɔ. Gbiliyɛ ni di Alla ma san-kole bɛɛ kuma pon!”

³⁹Farisi minnu bi nyama tɛma, wo donu kumara Yisa ye. Anu ko, “Karan-mɔgɔ, a fɔ ila karan-dannu ye ko anu ni anu made!”

⁴⁰Yisa ya anu yabi ko, “N bi a fɔla wo ye, ni anu ya anu made, kuri kɛnu bɛrɛn si gbele-gbelen.”

⁴¹Yisa gbɛrɛnta Yerusalɛm soe ma tumɛ min, a ya a yen nkɛkuna, a dira ala ko la.

⁴²Yisa ko, “E, Yerusalɛm kɛnu, ni wo ya a lɔn nun min si yisi-kimɛ lana wo ma, wo kin! Kɔnɔ wonu dogonnɛ wo ma kaka,

⁴³ado tele donu si na, wo yogenu si tarɛ mini wo ma ka kilɛ tɛgɛ wo ma kan tinɛ bɛɛ rɔ.

⁴⁴Anu si wo halaki pɔ! Hali kuru kelen ti to a gbɛ rɔ bawo Alla nara wo wara wo kisi tinɛ tumɛ min, wo ya wo ban a la wulɔn.”

⁴⁵Yisa donta Alla-Bato-Bɔn la tumɛ min, a ya fere-kɛlɛnu-gbenyɛ dabira.

⁴⁶ A ya a fɔ anu ye ko, “A sɛbɛnɛ Allata kitabu rɔ ko, ‘Anu si nna bɔn kele madiyali-kɛ-bɔn.’ Kɔnɔ wole ye a mala kankannu dogon tinɛ la!”

⁴⁷ Yisa tora mɔgɛnu karanna tele-wo-tele Alla-Bato-Bɔn la. A faga-sɔgɛ ye saraka-masɔla-wɛnu na anubɛ tɔn-karan-mɔgɛnu anubɛ kun-tigi minnu bi anu tɛma nun.

⁴⁸Kɔnɔ anu si a faga nya min, anu ma wo lɔn bawo mɔgɛ bɛɛ tora anu tole masɔla a la. A ma di anu ye, hali ala kuma kelen ni tenbi anu tole la.