Read Kuranko Luka 22 Bible Online

Luka 22 - Kuranko bible

Luka 22

¹ Biredi-Yɛlɛbɛlɛ-Dɔn-Ladɛn gbɛrɛnta tumɛ min, Kanan-Koe, kɔni,

²saraka-masɔla-wɛnu anubɛ tɔn-karan-mɔgɛnu ya anu taya ka fɛrɛ nyini Yisa faga-koe ma dogɔn rɔ bawo anu kilannɛ mɔgɛnu na.

³Yudasi-Isakariyati min bi Yisala karan-den tan-ni-filɛ do la, Setanɛ donta wo yisi rɔ.

⁴Wo le ya a ma, ale Yudasi tara kuma saraka-masɔla-wɛnu anubɛ Alla-Bato-Bon-makandannɛnuna kun-tiginu na. A ye a fɛ ka a lɔn a si Yisa don anu bolo nya min.

⁵Wo diyara anu ye. Anu sɔnta wodi-bɔ-koe ma ka a sara.

⁶Yudasi fanan sɔnta wo ma. A wulita ka fɛrɛ nyini a si ke Yisa donna anu bolo nya min, nyama sa a kalama tumɛ min.

⁷Biredi-Yɛlɛbɛlɛ-Dɔn-Ladɛn-lunyɛ kera, anu si saga-dannu faga lunyɛ min Kanan-Ko-Ladiyɛla ko la.

⁸Yisa ya Pita anubɛ Yɔni sɔ. A ya a sara anu na ko, “Wo ta Kanan-Ko-kimanɛ rabɛn ma ye.”

⁹Anu ya a manyinika ko, “I ye a fɛ, ma ni a rabɛn mi?”

¹⁰A ko, “Wo wa don soe burɔ tumɛ min, yi-dagɛ ye kei min kuma, wo si wo nyɔgɔn bɛn. Wo ni bila a fɛ ha a wa don bɔn la.

¹¹Wo ni bon-tigi manyinika ko, ‘Karan-mɔgɔ ko a ye a fɛ ka a lɔn kɔnkɔ wo ye kan min anubɛ ala karan-dannu si Kanan-Ko-kima dɔn kan min.’

¹²A si san-bɔn yira wo la, wo si fan-bɛɛ-rabɛnnɛ taran san-bɔn wo la. Wo si dɔn-fan rabɛn nyɔ.”

¹³Anu tara fan bɛɛ taran iko Yisa ya a fɔ anu ye nya min. Anu ya Kanan-Ko-kima rabɛn.

¹⁴Kima-dɔn-wati kera tumɛ min, Yisa sigira tebulu la anubɛ ala kilaya tan-ni-filɛ.

¹⁵A ya a fɔ anu ye ko, “Yanni n ni tɔrɔyɛ sɔrɔn, a sɔgɛ ye n na ko n ni Kanan-Ko-Ladiyɛ kɛ kɛ wo fɛ

¹⁶bawo n bi a fɔla wo ye, n ti a dɔn tun fɔ a tɛgɛnɛ min ma, wo wa kanbali Allala mansayɛ rɔ tumɛ min.”

¹⁷Wo kɔma, Yisa ya yi-lafɛ bi ka baraka bira Alla ye. A ko, “Wo ni kɛ bi. Wo bɛɛ ni wo min a la.

¹⁸N bi a fɔla wo ye, n ti nɔnbɔ-gbɔ-yi kɛ min tun fɔ Allala mansayɛ wa na tumɛ min.”

¹⁹Wo kɔma, a ya biredi bi ka baraka bira Alla ye. A ya a rakerikeri ka a di anu ma. A ko, “N fɛrɛ-bɔnkɛ le kɛ la n bara min ni wola ko la. Wo ni kɛ ma alako wo hɛnkili si to n ko nya min.”

²⁰ Kima-dɔn banta tumɛ min, a ya nɔnbɔ-gbɔ-yi do bi tun. A ko, “Nɔnbɔ-gbɔ-yi kɛ le Allata sarama-kan-kurɛ tamasere la min kirinɛ wo ye n yele fɛ. Yele wo bɔnnɛ wole le ye.

²¹ “Kɔnɔ mɔgɔ kelen bi wo tɛma min si n don n yogenu bolo tɔ. Wo siginɛ n fɛ tebulu la yan,

²²ado nde, Hadama-dan si faga iko Alla ara a latɛgɛ nya min kɔnɔ min si n don n yogenu bolo tɔ, gbalo ye wo mɔgɛ kuma!”

²³Anu wulita anu nyɔgɔn manyinikala, ni min si kɛ ma anu tɛma.

²⁴ Yisala karan-dannu wulita anu nyɔgɔn sɔsɔla, ni min si ma mɔgɔ-ba la anu tɛma.

²⁵ Yisa ya a fɔ anu ye ko, “Sɛnbɛ ye duninya-kɛ-mansɛnu bolo anuna mɔgɛnu kuma, ado kun-tiginu si anu nyɛrɛ kele ko, ‘Mɔgɛnu diyana-mɔgɛ.’

²⁶ Kɔnɔ a kana ma wo nya wole tɛma. Mɔgɔ-ba ye min na wo tɛma, wo ni ma iko wo dɔgɛ. Ile mɔgɔ-ba, i ni ma iko wɔli-kɛlɛ.

²⁷ Min siginɛ a ye fen-dɔn la anubɛ min bi wɔli-kɛla-fen dɔnnɛ wo ye, anu filɛ tɛma, mɔgɔ-ba ye yon na? Min siginɛ, mɔgɔ-ba ye wo le la. Kɔnɔ nde ye wo tɛma iko wɔli-kɛlɛ.

²⁸“Wo ara to n fɛ nna kɔrɔbɔɛ bɛɛ kɔrɔ.

²⁹Iko n fa ara sɛnbɛ di n ma ka ma kun-tigi la nya min, n si sɛnbɛ di wo ma wo nya na le fanan.

³⁰ Wo si wo de-nyini nna tebulu la nna mansayɛ rɔ ka wo sigi mansaya-waganɛnu tɔ Isirɛla bɔnsɔn tan-ni-filɛ kiti tɛgɛ tinɛ.”

³¹Yisa ko, “Saimon, i tole masɔ! Setanɛ ara wo dama nyini wo rafɛ-koe la iko sɛni-salɛ si fui-fan anubɛ a fɔrɔn fara anu nyɔgɛ na nya min.

³²Kɔnɔ Saimon, n bara Alla madiya ile ye ko ila dɛnkɛninyɛ kana ban. I wa sɛgi nde ma tumɛ min, i ni i na-kelen-nyɔgɛnu sɛnbɛ don.”

³³Pita ya a yabi ko, “Mari, n tabɛnnɛ ka ta yele la i fɛ hali ka faga i fɛ!”

³⁴Yisa ya a fɔ a ye ko, “Pita, n bi a fɔla i ye, dondɔn ti keke bi, ni i ma a fɔ iko sawa ko i ma n lɔn.”

³⁵ Wo kɔma, Yisa ya a fɔ anu ye ko, “N ya wo sɔ min kɛ, wo tumɛ wo ma ta wodi-bɔrɛ la, anubɛ tagama-bɔrɛ, anubɛ sanbarɛ, fen dasara wo bolo wulɔn, ba?” Anu ya a yabi ko, “Fenfen ma dasa ma bolo wulɔn.”

³⁶Yisa ko, “Kɔnɔ kaka, ni wodi-bɔrɛ ye min bolo, anubɛ tagama-bɔrɛ, a ni wo bi. Ni faan sa min bolo, wo ni ala duruki fere ka do san.

³⁷ Bawo n bi kɛ fɔla wo ye, min sɛbɛnɛ Allata kitabu rɔ ndela ko la, a ko anu ya a kofu ko-yogoma-kɛlɛnu ma, ado fɔ wo ni na bɔ-a-la. Min sɛbɛnɛ ndela ko la, wo ye nala bɔla a la le.”

³⁸Karan-dannu ko, “Mari, i ma faan fila yen!” A ko, “Wo ara a bɔ!”

³⁹Yisa bɔra nyɔ ka ta Ɔlifi kɔnkɛ kuma iko a duruta a mala nya min. Karan-dannu bilara a fɛ.

⁴⁰A kera nyɔ tumɛ min, a ya a fɔ anu ye ko, “Wo ni Alla madiya ko wo kana bui magbɛrɛnkɛ rɔ.”

⁴¹Yisa ya a masɛgi anu na doni[14] ka ta a dan na. A ya a nyɛnkin madiyali-kɛ-tinɛ.

⁴²A ko, “N fa, ni i si sɔn, tɔrɔyɛ[15] kɛ bɔ n kuma kɔnɔ nde sako ma de, fɔ ile sako.”

⁴³Melika do bɔra gbɛ rɔ a wara ka a sɛnbɛ don.

⁴⁴Yisa tɔrɔta bɛrɛkɛ min kɛ, a ya madiyali kɛ bɛrɛkɛ! Wusi bɔra a ma iko yele ka tinti dugi ma.

⁴⁵A ban madiyali kɛla, a sɛgira ala karan-dannu wara. A ya anu taran kinɔgɛ rɔ. Anu bandannɛ yisi-lafinyɛ bolo nun bɛrɛkɛ!

⁴⁶A ya anu manyinika ko, “Wo ye kinɔgɔla nfenna? Wo ni wo lasɔ ka madiyali kɛ ko wo kana don magbɛrɛnkɛ rɔ.”

⁴⁷Yisa ye wo fɔɛ kun na tumɛ min, nyama nara. Yudasi min bi Yisala karan-den tan-ni-filɛ do la nun, wo sɔnɛ nyama yarɔ. A nara Yisa wara ka a sunbu.

⁴⁸Kɔnɔ Yisa ya a manyinika ko, “E, Yudasi, i ye nde, Hadama-dan donna n yogenu bolo tɔ sunbuli fɛ, wa?”

⁴⁹Karan-dan minnu bi Yisa fɛ, min bi nala mala, wonu ya wo yen tumɛ min, anu ko, “Mari, ma ni mala faannu bi ka kɛlɛ kɛ, wa?”

⁵⁰Kelen bi anu tɔ, wo ya saraka-masɔla-kun-tigi-wɛla yɔɔn bolo-nyimama-tole tɛgɛ a la.

⁵¹Kɔnɔ Yisa ya a fɔ anu ye ko, “Wo ni a to wo ma!” A ya a bole maga kei wo tole la ka a dandan.

⁵²Wo kɔma, saraka-masɔla-wɛnu anubɛ Alla Bato Bon makandannɛnuna kun-tiginu anubɛ Yahudiya kɛmɔgɛ minnu nara a bira tinɛ, Yisa ya wonu manyinika ko, “Fɔ wo ni na faannu anubɛ gbelekɛnu na iko tɔn-tinyalɛ le nde la, wa?

⁵³ N taranta wo fɛ wati bɛɛ Alla-Bato-Bɔn la, wo ma wo raya n bira-koe la. Wota wati le kɛ la. Pinpi ara ban sɛnbɛ sɔrɔnna wo kuma.”

⁵⁴Anu ya Yisa bira ka ta a la saraka-masɔla-kun-tigi-wɛla bɔn la. Pita bilara a fɛ wula-yan la.

⁵⁵Kiti ye kɛla bɔn min na, tɛ ladɛnnɛ mɔgɛnu bolo kata burɛ tɛma nyɔ. Pita siginɛ anu tɛma a gbala tinɛ.

⁵⁶Wɔli-kɛla-musi do ya a siginɛ yen tɛ fɛ tumɛ min, a ya a mafɛlɛn sin, a ko, “Kei kɛ fanan bi a fɛ nun, yɔ!”

⁵⁷Kɔnɔ Pita ya a masɔsɔ. A ko, “N ma a lɔn ni!”

⁵⁸A ma mɛ wo kɔma, kei do ya a yen. Wo ko, “Kelen de ile fanan na!” Kɔnɔ Pita ya a fɔ ko, “Nde ma de!”

⁵⁹Hawa kelen tenbinɛ, kei do ya a fɔ a ye fɔrɔsɛ la, a ko, “Sika-wo-sika sa n tɔ, kei kɛ ye ale Yisa fɛ nun bawo Kalili kɛ le ale fanan na!”

⁶⁰Kɔnɔ Pita ya a fɔ ko, “I ye min fɔla, nde sa wo do-wo-do kalama!” A ye wo fɔɛ kun na tumɛ min, dondɔn kekera.

⁶¹Mari ya a yɛ lamunun Pita la ka a mafɛlɛn sin! Pita ya a miri Marila kumɛ ma, a ya min fɔ ko, “Yanni dondɔn ni keke bi, i si a fɔ iko sawa ko i ma n lɔn.”

⁶²Pita burimatoe bɔra dila biribiri!

⁶³Minnu bi Yisa kandanna nun, wonu ya a mayɛlɛn ka a gbesi.

⁶⁴Anu ya a yɛ lakiri ka a manyinika ko, “Ile nɛbi, yon bara i gbesi wo la?”

⁶⁵Anu ya a manyini siyaman-kɛ.

⁶⁶Banda-ka-dɛ ma, Yahudiya kɛmɔgɛnu, saraka-masɔla-wɛnu anubɛ tɔn-karan-mɔgɛnu, wonu ya anu nyɔgɔn nadɛn. Anu nara Yisa la anu yakɔrɔ.

⁶⁷Anu ko, “Allata-Mɔgɔ-Yabɔnɛ le ile la, wa? A fɔ ma ye.” A ya anu yabi ko, “Ni n ya wo fɔ wo ye, wo ti la a la,

⁶⁸ado ni n ya wo manyinika, wo ti n yabi.

⁶⁹Kɔnɔ ka a dabira bi ma, nde, Hadama-dan si n sigi Alla sɛnbɛ-tigi kɔɛn-nyimɛ rɔ.”

⁷⁰Anu dama ko, “Allatalata dan le ile la worɔ, wa?” A ya anu yabi ko, “Wo ya tonyɛ le fɔ wo la, wo le nde la.”

⁷¹Anu ko, “Ma mako sa sereyɛnu na tun! Male nyɛrɛ ara ala kumɛ lamɔɛn!”