Read Kuranko Luka 24 Bible Online

Luka 24 - Kuranko bible

Luka 24

¹Lɛhɛrɛ subaga-dɛ ma, musinu tara kanbɛ dɛ la. Anu ya sɛnti min tabɛn, wo ye anu bolo.

²Anu ya farɛ kurukurunnɛ bɔnɛ taran kanbɛ dɛ la.

³Anu donta nyɔ burɔ tumɛ min, anu ma Mari Yisa furi yen.

⁴Anu kɔndɔfilinɛ sɔra nyɔ kɛla ko la. Tiriyante wo rɔ, kei kura-gbɛ-tigi filɛ minna kurɛnu bi malan-malanna anu ma, wonu sɔra anu dafɛ.

⁵Musinu kilanta kati! Anu ya anu maburun dugi ma. Kei wonu ya a fɔ anu ye ko, “Nfenna ko la, wo ye mɔgɔ-kɛndɛ nyinina mɔgɔ -faganɛnu tɛma?

⁶A sa yan. A la ara wuli. Wo ye Kalili tumɛ min, a ya min fɔ wo ye, wo ni wo hɛnkili to wo ko.

⁷ A ko nun fɔ ale, Hadama-dan ni don hakɛ-tiginu bolo minnu si a gbangban kɔlɔma ma. A ko a tele sawa nyɔgɛ, a si wuli ka a niyi lafɛ tun.”

⁸Wo kɔma, musinu ya anu hɛnkili lamiri Yisala kumɛnu ma.

⁹Anu sɛgira ka bɔ kanbɛ dɛ la tumɛ min, anu ya kɛ bɛɛ fɔ ala karan-den tan-ni-kelan ye anubɛ mɔgɔ-toe bɛɛ.

¹⁰Musi kɛnu tɔgɛ le Mariyama, Magadala kɛ anubɛ Yowana anubɛ Yemesi na Mariyama. Wonubɛ musi donu ya koe kɛnu fɔ kilayɛnu ye.

¹¹Kɔnɔ Yisala kilayɛnu ya anu miri ko musinu ya min fɔ, yuwaya-kumɛ le wo la. Anu ma la wo la.

¹²Kɔnɔ Pita burimatoe tara ha kanbɛ dɛ la. A ya a burun ka kasankɛ-rakolɔn yen kanbɛ burɔ. A sɛgira a warɛ. Koe min bara ma, a ye kawala wola ko la.

¹³Wo tele nyɛrɛ rɔ, Yisa gba-fɛ-bilala fila ye tala so-nɛ do rɔ min tɔgɛ Ɛmeyasi. Ka bɔ Yerusalɛm ka ta nyɔ, mɛli wɔrɔnfila le.

¹⁴Koe min bɛɛ mara, anu bi wo rakaranna anu nyɔgɔn ye.

¹⁵Anu bi a rakaranna tumɛ min, Yisa nyɛrɛ nara anu dafɛ ka tagama anu fɛ.

¹⁶Anu ya a yen kɔnɔ hali wo, anu ma a lɔn Yisa la.

¹⁷Yisa ya a fɔ anu ye ko, “Wo ye nfen fɔ tinɛ wo nyɔgɔn tɛma kilɛ fɛ yan?” Anu yisi-tinyanɛ sɔnɛ!

¹⁸Kelen min tɔgɛ Kaliyopasi, wo ya Yisa manyinika, a ko, “Sundan le ile la Yerusalɛm soe burɔ, wa? Koe min bɛɛ ara ma tele-dande kɛnu kɔrɔ, ile le kelen pe ma wonu lɔn, ba?”

¹⁹Yisa ya a manyinika ko, “Koe nyamintannu?” Anu ya a yabi ko, “Koe minnu bara ma Yisa Nasarɛti kɛ la. Nɛbi le kei wo la nun. Sɛnbɛ ye ala kɛwɔlɛnu anubɛ ala kumɛnu tɔ Alla anubɛ mɔgɛ bɛɛ yala.

²⁰Mala saraka-masɔla-wɛnu anubɛ nyɔ-kun-tiginu ya a don a yogenu bolo tɔ a faga-koe la. Anu ya a gbangban kɔlɔma ma.

²¹Ma yili ye a ma nun ko ale le wo la min bi nala Isirɛla mɔgɛnu kunkala! Ka tenbi wo bɛɛ la, a tele sawa nyɔgɛ le kɛ la kebi wo mara.

²²Musi minnu bi ma tɛma, wonu donu nara dantɛgɛli-makawanɛ la. Anu tara kanbɛ dɛ la subaga-dɛ kɛ ma,

²³anu nara, anu ko anu ma Yisa furi yen. Anu sɛgira ka a fɔ ma ye ko anu ya fen yen minnu muninyanɛ melikanu na. Wonu ko a ye a niyi la.

²⁴Ma ta-nyɔgɛ donu tara kanbɛ dɛ la. Anu ya a yen iko musinu ya a fɔ nya min, ado anu denu fanan ma ale Yisa yen.”

²⁵Yisa ya a fɔ kei filɛ wonu ye ko, “Wole ko-nya-yenbɛlɛnu? Nɛbinu ya min bɛɛ fɔ, wo ti la wonu na yona!

²⁶Ko Allata-Mɔgɔ-Yabɔnɛ ni tɔrɔ, wo kɔma, a ni don ata gbiliyɛ rɔ, wo ma bɛn, wa?”

²⁷Wo kɔma, min sɛbɛnɛ alela ko la Allata kitabu rɔ ka a dabira Nɛbi Musala kitabunu ma ka a sigi nɛbinuna kɛdi-sɛbɛnɛ bɛɛ ma, Yisa ya wo bɛɛ fɛsɛfɛsɛ anu ye.

²⁸Anu bi tala kan min nun, anu gbɛrɛnta so-nɛ wo ma. Yisa ya a ma iko a ye tenbila nyɔ la

²⁹kɔnɔ anu ya a madiya bɛrɛkɛ! Anu ko, “To ma fɛ fɔlɔn. Tele ara ta, suyi ketoe le.” Woletɔ a donta ka to anu fɛ.

³⁰A sigira anu fɛ tebulu la. A ya biredi bi ka baraka bira Alla ye. Wo kɔma, a ya biredi rakerikeri ka a di anu ma.

³¹Wo mɛ, anu yɛ lakara. Anu ya a lɔn Yisa la. Kɔnɔ tiriyante wo rɔ, a tununta anu ma yen!

³²Anu ya a fɔ anu nyɔgɔn ye ko, “A ye kumala ma ye tumɛ min kilɛ la ka Allata kitabu faranfasi ma ye, a manɛ de nun iko ma kɔntɔ-diyanɛ bɛrɛkɛ!”

³³Anu wulita ka sɛgi Yerusalɛm kelenna! Anu ya ala karan-den tan-ni-kelen nadɛnnɛ taran anubɛ mɔgɛ donu.

³⁴Karan-dannu ya a fɔ anu ye, ko, “Mari ara wuli serr! Saimon ara a yen!”

³⁵Min mara kilɛ la, mɔgɔ filɛ wonu ya wo rakaran anu ye. A ya biredi rakerikeri tumɛ min, anu ya a lɔn kelenna ko Mari le. Anu ya wo bɛɛ rakaran anu ye.

³⁶Anu bi kɛ fɔɛ kun na tumɛ min, Mari nyɛrɛ sɔra anu tɛma ka a fɔ anu ye ko, “Wo yisi ni kimɛ.”

³⁷Anu kilanta bɛrɛkɛ! Anu ya anu miri ko anu bara yiyɛ yen.

³⁸Yisa ya a fɔ anu ye ko, “Wo yisi tɔrɔnɛ nfen na? Sikɛ kɛ bɛɛ donnɛ wo rɔ kama?

³⁹Wo ni n bolenu anubɛ n kiannu mafɛlɛn. Wo ni a lɔn ko nde le yati! Wo ni wo bole maga n na ka a lɔn ko nde le bawo fɛrɛ-bɔnkɛ anubɛ kole sa yiyɛ rɔ iko wo ye a yenna nde rɔ nya min.”

⁴⁰A ban kɛ fɔla, a ya a bolenu anubɛ a kiannu yira anu na.

⁴¹Anu sewanɛ kɔnɔ kabana-koenu ya a ma, anu ma ke lala a la yona. Woletɔ a ya anu manyinika ko, “Dɔn-fan do ye wo bolo yan, ba?”

⁴²Anu ya yɛgɛ-tenɛ do di a ma.

⁴³A ya a bi ka wo dɔn anu yala.

⁴⁴Wo kɔma, a ya a fɔ anu ye ko, “N bi wo fɛ tumɛ min nun, n ya koe kɛnu fɔ wo ye nun. Koe min bɛɛ sɛbɛnɛ ndela ko la Nɛbi Musala tɔn rɔ anubɛ nɛbinuna kitabunu tɔ anubɛ Yaburi kitabu rɔ, fɔ wonu ni bɔ-a-la.”

⁴⁵A ya anu hɛnkili ya-maka alako anu ni Allata kitabu nya-yen.

⁴⁶A ya a fɔ anu ye ko, “Kɛ le sɛbɛnɛ ko fɔ nde, Allata-Mɔgɔ-Yabɔnɛ ni tɔrɔ, a tele sawa nyɔgɛ ma, n ni wuli ka bɔ sayɛ rɔ.

⁴⁷A sɛbɛnɛ fanan ko tubi koe anubɛ hakɛ-makoto-ko-kawandilɛ si bɔ sibole bɛɛ ye n tɔgɛ rɔ ka a dabira Yerusalɛm yan.

⁴⁸Koe kɛnu bɛɛ sereyɛ le wole la.

⁴⁹ N fa ya lanyiri kiri min na, nde nyɛrɛ si wo lana wo ma. Kɔnɔ wo ni to Yerusalɛm fɔlɔn ha sɛnbɛ wo ni na ka bɔ san ma ka yigi wo kuma.”

⁵⁰ Wo kɔma, Yisa tara anu na ha Bɛtani soe burɔ. A ya a bole layɛlɛ san ma ka duwa anu ye.

⁵¹Nba, a ye duwala anu ye tumɛ min, a bɔra anu dafɛ. A layɛlɛta Arinyɛni tɔ.

⁵²Anu fara sewa-ba la. Anu ya a bato ka anu kɔ-sɛgi Yerusalɛm.

⁵³Anu tora Alla-Bato-Bɔn la tumɛ bɛɛ baraka birala Alla ye.