Read Kuranko Luka 6 Bible Online

Luka 6 - Kuranko bible

Luka 6

¹ Lunyɛ do, Sulen-Tele ma, Yisa ye tagamana nun sɛnɛ rɔ. Ala karan-dannu wulita fui-fan gbesila ka a togotogon anu bolo tɔ ka a kole dɔn.

²Farisi donu ko, “Nfenna wo ye wo mala? Mala tɔn ko mɔgɔ kana wo ma Sulen-Tele ma.”

³Yisa ya anu yabi ko, “Kɔnkɛ ya Mansa Dawuda anubɛ ala mɔgɛnu bira tumɛ min, anu ya min ma, wo ma wo karan, ba?

⁴ A donta Allala fani-bɔn la. Biredi min dantɛgɛnɛ Alla ma, anubɛ ala keminɛnu ya wo dɔn, hali anu bi tɔn tinyana wo dɔn tinɛ, ado saraka-masɔlɛnu denu dɔrɔn ni biredi wo dɔn nun”

⁵Yisa ya a fɔ tun ko, “Nde, Hadama-dan le Mari la Sulen-Tele kuma.”

⁶Sulen-Tele-gbɛrɛ ma, Yisa tara Yahudiya-dina-bɔn la ka mɔgɛnu karan. Kei do ye nyɔ nun min bole faganɛ a la.

⁷Tɔn-karan-mɔgɛ donubɛ Farisinu bi a fɛ ka Yisa maburi tɔn-tinyɛla ko la. Woletɔ anu ya anu yɛ bɛn a ma ni a si mɔgɛ lakɛndɛya Sulen-Tele ma.

⁸Kɔnɔ Yisa ya anu miriya lɔn. Woletɔ a ya a fɔ kei-bolo-faganɛ ye ko, “Na, i sɔ mɔgɛnu yala yan.” Kei ya a lasɔ.

⁹Yisa ya a fɔ anu ye worɔ ko, “N bi wo manyinikala. Mala tɔn ko ma ni nfen ma Sulen-Tele ma? Ma ni mɔgɛnu dɛnbɛ, ka, ma ni anu tɔrɔ? Ma ni mɔgɛnu niyi lakisi, ka, ma ni anu halaki?”

¹⁰A ya anu dama mafɛlɛn sin! A ya a fɔ kei wo ye ko, “I bole rasagan.” A ya wo ma nkɛkuna, a bole kɛndɛyara kusen!

¹¹Nba, tɔn-karan-mɔgɛnu anubɛ Farisinu diminyara bɛrɛkɛ! Anu burunta a fɔla anu nyɔgɔn tɛma anu si min ma Yisa la.

¹²Wo wati rɔ, Yisa yɛlɛta kɔnkɛ do kuma madiyali-kɛ-tinɛ. A kira nyɔ Alla madiyɛ la.

¹³Bandɛ kara tumɛ min, a ya ala karan-dannu nadɛn anu nyɔgɔn fɛ ka mɔgɔ tan-ni-fila yatɔnbɔn anu tɔ ka anu ma ala kilayɛnu na tɔ-a-la.

¹⁴Anu tɔgɛ le kɛnu na, Saimon (a ya min tɔgɔ sa fanan ko Pita) anubɛ a na-kelen-nyɔgɛ Anduru, Yemesi anubɛ Yɔni, Filipi anubɛ Batalamiyu,

¹⁵Matiyu anubɛ Tamasi, Alafala dan Yemesi, anubɛ Saimon (min si kɛlɛ kɛ ala nyamanɛla ko la),

¹⁶Yemesila dan Yudasi, anubɛ Yudasi-Isakariyati min ya Yisa don a yogenu bolo tɔ.

¹⁷Yisa yigira ka bɔ kɔnkɛ wo kuma ala karan-dannu fɛ. Anubɛ ala karan-den siyaman sɔra lɛɛ do rɔ. Sɛrɛ-wɛ ye nyɔ. Anu bɔra Yudiya nyamanɛ kan bɛɛ anubɛ Yerusalɛm anubɛ Taya anubɛ Saidon soe minnu sɔnɛ kɔgɔ-yi dafɛ.

¹⁸Wonu nara anu dandan-koe la ka anu tole masɔ a la. Nyina-yogomɛ ara minnu tɔrɔ, wonu fanan kɛndɛyara.

¹⁹Mɔgɛ bɛɛ ya a raya alako ka anu bole tugu a la bawo ala sɛnbɛ ye donna mɔgɛnu tɔ anu dama dandan-koe la.

²⁰Yisa ya a yɛ sɔ ala karan-dannu na, a ko, “Mɔgɔ-sewanɛ le wole bolo-kolɔnnu na bawo Allala mansayɛ, wotɛ le!

²¹Mɔgɔ-sewanɛ le wole kɔnkɔtoenu na bawo wo si fa pim! Mɔgɔ-sewanɛ le wole di-kɛlɛnu na bawo wo si na yɛlɛn!

²² “Mɔgɛnu ba wo kɔn ka anu ban wo la, mɔgɔ-sewanɛ le wole la. Anu si wo manyini ka a fɔ ko mɔgɔ-yogomɛ le wole la ka a tɛgɛ nde, Hadama-dan la ko ma!

²³ Wo wa ma tumɛ min, wo ni wo dɔn sewɛ la bawo barayi-wɛ maranɛ wo ye Arinyɛni tɔ, ado wo benbanu ya nɛbinu tɔrɔ wo nya na le.

²⁴Nɔnfuli ye wole minnu bolo kaka, gbalo ye wo kuma bawo wo lafɛrɛnɛ!

²⁵Wole minnu buyi lafanɛ, gbalo ye wo kuma bawo kɔnkɛ si wo bira! Wole minnu bi yɛlɛnna kaka, gbalo ye wo kuma bawo wo si mɔni ka di!

²⁶Mɔgɛnu ba wo tɔgɔ-nyimɛ fɔ tumɛ min, gbalo ye wo kuma bawo wo benbanu ya a fɔ wo nya na le foninya-nɛbinu ma.

²⁷“Wole minnu bi n kan lamɔɛnna, n bi a fɔla wo ye ko wo ni wo yogenu keni. Minnu bara wo kɔn, wo ni ko-nyimɛ kɛ wonu ye.

²⁸Minnu bi wo dankala, wo ni duwa wonu ye. Minnu sa wo birala a kin na, wo ni Alla madiya wonu ye.

²⁹Minnu ba wo dɛ fan kelan ratii, a ni doi fanan tintan a la, a ni wo bɛrɛn tatii. Ni mɔgɔ ya wola duruki bi wo bolo fɔrɔsɛ la, wo ni wola duruku-kɔrɔ-don fanan don a bolo.

³⁰Minnu ba wo tara fen ma, wo ni anu kɔ. Ni mɔgɛ ya wo bolo-fan bɔ wo bolo, wo kana a manyinika ala ko la tun.

³¹ Wo ye a fɛ, donu ni min ma wo ye, wole fanan ni wo ma anu ye.

³²“Ni wo ya wo diyana-mɔgɛ dɔrɔn keni, wo si duwɛ nyamintan sɔrɔn worɔ? Hali hakɛ-tiginu, minnu fɔlɔn ya anu keni, anu denu fanan si wonu keni!

³³Minnu bara ko-nyimɛ kɛ wo ye, ni wo ya ko-nyimɛ kɛ wonu dɔrɔn ye, wo si duwɛ nyamintan sɔrɔn worɔ? Hali hakɛ-tiginu fanan si wo ma!

³⁴Wo hɛnkili ye fen-sɔrɔn-koe ma minnu bolo, ni wo ya wonu dɔrɔn dɔndɔ, wo si duwɛ nyamintan sɔrɔn worɔ? Hali hakɛ-tiginu si anu ta-nyɔgɔ-hakɛ-tiginu dɔndɔ bawo anu yili ye a ma ko anu si wo nyɔgɔn-takɛn sɔrɔn tun!

³⁵Wo ni wo yogenu keni ka ko-nyimɛ kɛ anu ye. Wo ni anu dɔndɔ, hali wo ma wo hɛnkili lamiri fen-sɔrɔn-koe ma anu bolo tun. Wo si barayi-ba sɔrɔn. Alla min bi Fan Bɛɛ Kun na, wo si ma ale Allata dannu na, ado Alla ye ko-nyimɛ kɛla fisiriwɔlɛnu anubɛ wunduyogenu ye.

³⁶Wo ni kinikini mɔgɛnu ma iko wo Fa Alla kinikininɛ wole ma nya min.

³⁷“Wo kana mɔgɛnu kiti, woletɔ Alla ti wo fanan kiti. Wo kana mɔgɛnu yiliki, woletɔ Alla ti wo fanan yiliki. Wo ni mɔgɛnu makoto, woletɔ Alla si wo fanan makoto.

³⁸Wo ni mɔgɛnu kɔ, woletɔ Alla si wo kɔ, ado a si a suma wo ye a kin na! A la si fa pen ka a madɛndɛn ka a don wo bolo. Wo ye fan sumanna doinu ye nya min, Alla si a suma wo ye wo nya na le.”

³⁹ Yisa ya tili kɛ tɛgɛ anu ye ko, “Fiyɔn ti ke fiyɔn bole birala. Ni a ya wo ma, anu filɛ bɛɛ si bui denkɛ rɔ.

⁴⁰ Karan-den wo karan-den ma tenbi a karan-mɔgɛ la. Kɔnɔ karan-den wo karan-den wa ban karanna, a si ma iko a karan-mɔgɔ.

⁴¹“Nfenna ko la i si buriburi yen i ta-nyɔgɛ yɛ ma kɔnɔ kon-gbondon min bi i nyɛrɛ yɛ ma, i hɛnkili sa tugula wo la?

⁴²I si a fɔ i ta-nyɔgɛ ye kama ko, ‘N bɔ, sɔ wa, n ni buriburi bɔ i yɛ ma,’ kɔnɔ i sa kon-gbondon wo yenna min bi i nyɛrɛ yɛ ma? Ile nyɛrɛ-mayiralɛ! Kon-gbondon fɔlɔn bɔ i nyɛrɛ yɛ ma, wo kɔma, buriburi minnu bi i ta-nyɔgɛ yɛ ma, i si ke wo yenna ka wo bɔ nyɔ.

⁴³“Kɔlɔma min sabatira, wola gbɔɛ si mɔgɛ munanfaga. Kɔlɔma min ma sabati, wo le ti gbɔ-nyimɛ labɔ.

⁴⁴ Kɔlɔma bɛɛ si lɔn a gbɔɛ le fɛ. Mɔgɔ ti toro-gbɔɛ keri kɔlɔma-kuru-wɔnimɛ la. Mɔgɔ ti mankoro[4] gbɔɛ fanan keri kɔlɔma-kuru-wɔnimɛ la.

⁴⁵ Mɔgɔ-nyimɛ si ko-nyimɛ labɔ a yisi rɔ. Mɔgɔ-yogomɛ si ko-yogomɛ labɔ a yisi rɔ, ado mɔgɔ yisi fanɛ min na, a dɛ ye wo le fɔla.

⁴⁶“Nfenna wo ye a fɔla ko wota Mari le nde la kɔnɔ wo sa nna kumɛ birala?

⁴⁷Min bɛɛ si na nde wara nta kumɛ lamɔɛn tinɛ ka a bira, n si na mɔgɛ wola muninyɛ yira wo la.

⁴⁸Wo tigi mani de iko mɔgɛ min tenbi bɔn sɔla, a si denkɛ sin ka a layigi pon ha ka ke kuri ma alako bon-kurukɛ ni sigi farɛ kuma. Bɛ wa fa ka wara, a si tugu wo tigila bɔn burɔ kɔnɔ a la ti maga bawo ala bɔn sɔnɛ farɛ le kuma.

⁴⁹Kɔnɔ mɔgɛ min bi nna kumɛnu namɔɛnna kɔnɔ a sa anu birala, wo tigi mani de iko mɔgɛ min tenbi bɔn sɔla, a ma a kurukɛ. Yi wa tugu wo tigila bɔn burɔ tumɛ min, a ti mɛ buila ka tinya! A rakerikerinɛ si to feu!”