Read Kuranko Luka 8 Bible Online

Luka 8 - Kuranko bible

Luka 8

¹Wo kɔma, Yisa tagamanta so-wɛnu anubɛ so-nɛnu tɔ ka Allala mansaya kibara-nyima-kawandili bɔ. Karan-den tan-ni-filɛ wonu bilara a fɛ.

²A ya nyina-yogomɛnu gben musi minnu fɛ anubɛ ka anuna kirayɛnu dandan, wonu fanan bilara a fɛ, ado Mariyama Magadala kɛ, Yisa ya nyina wɔrɔnfila gben wo le fɛ.

³ Kusala musi Yoyana, minna kei ye kun-tigiyɛ kɛla Hɛrodila bɔn la anubɛ Susana anubɛ musu-gbɛrɛ-siyaman, wonu ya Yisa anubɛ ala karan-dannu dɛnbɛ anu bolo-fannu na.

⁴Mɔgɛnu tora nala ka bɔ so siyaman tɔ dɛɛ! Nyama-wɛ ladɛnta tumɛ min, Yisa ya tili kɛ tɛgɛ anu ye. A ko,

⁵“Kei do tara ala sɛnɛ rɔ sugu fui tinɛ. A ye sugi fuila tumɛ min, do buira kila-kole la. Mɔgɛnu sɔra a kuma. Konanu ya a dɔn.

⁶Do buira fara-kole ma bɔnkɛ ma siya kan min. A fɛrɛnta tumɛ min, a fagara bawo yi sa nyɔ.

⁷Sugi do buira wɔnɛnu tɛma. Anubɛ wɔnɛnu yɛlɛta anu nyɔgɔn fɛ kɔnɔ tɔ-a-la, wɔnɛnu ya a dɔn.

⁸Sugi do buira bɔnku-lamonɛ rɔ. A fɛrɛnta ka a kole kɛ. A kelen-kelennamɛ-bɛɛ ya kɛmɛ-kɛmɛ sɔrɔn.” Yisa ya kumɛ wo kundon, a ko, “Nba, ni min si ko nya-yen, a ni a tole masɔ wo la!”

⁹Yisala karan-dannu ya a manyinika tili kɛ kɔrɛ ma.

¹⁰ A ya anu yabi ko, “N bara Allala mansaya-hɛnkilimayɛ gbundu-koenu di wole ma. Kɔnɔ n si a fɔ doinu ye tilinu tɔ. Ni n ma wo ma iko Nɛbi Aiseya ya a fɔ nya min, ‘Anu bi fan mafɛlɛnna kɔnɔ anu sa a yenna. Anu bi anu tole masɔla kɔnɔ anu sa ko lamɔɛnna.’

¹¹“Tili kɛ kɔrɛ le kɛ la. Sugi wo, Allala kumɛ tamasere le wo la.

¹²Mɔgɛ donu manɛ iko sugi min si bui kila-kole la. Mɔgɛ wo si a lamɔɛn kɔnɔ a wa a lamɔɛn nya min, Setanɛ si na worɔ ka wo fɔrɔn a yisi rɔ alako a kana dɛnkɛninya a ma ka kisi.

¹³Sugi min fuira fara-kole ma, wo mani de iko mɔgɛ min bi kumɛ lamɔɛnna, ado a si a bira sewɛ la tiriya! Sugi wo fɛrɛnta kɔnɔ a ma ke a suli yigila. A dɛnkɛninyara wati-kundunɛ kɔrɔ kɔnɔ magbɛrɛnkɛ nara tumɛ min, a ya ala dɛnkɛninyɛ boloka.

¹⁴Sugi min buira wɔnɛnu tɛma, wo mani de iko mɔgɛ min bi kumɛ lamɔɛnna kɔnɔ duninya hɔn-koe anubɛ nɔnfulu-keni anubɛ duninya diyana-ko-su bɛɛ ya a ma, kumɛ wo fagara a yisi rɔ feu! Ko ti bɔ ala dɛnkɛninyɛ rɔ hali!

¹⁵Sugi min buira dugu-lamonɛ rɔ, wo mani de iko mɔgɛ min bara Allala kumɛ lamɔɛn ka a lamara a yisi-nyimɛ rɔ. A si to ala kumɛ birala ha a si gbɔ.

¹⁶ “Mɔgɔ-wo-mɔgɔ ti lɛnpu lamalan ka bɔnku-dagɛ burun a kun na. A ti a ladon sa-fan kɔrɔ fanan. Kɔnɔ a si a sigi tebulu kuma. Mɔgɛnu ba don bɔn la tumɛ min, anu si waan yen.

¹⁷ “Fan min bɛɛ dogonnɛ, wonu si bɔ gbɛ rɔ. Fan min bɛɛ yamatogonnɛ, wonu yama si ka.

¹⁸ “Wo ni a ma wo fɛrɛma worɔ ko-lamɔɛn tinɛ. Bawo fen bi min bolo, Alla si do sa wo kuma. Kɔnɔ fen-kɛndɛ sa min bolo, a yili ye fen-nɛ min ma, Alla si wo bɔ a bolo.”

¹⁹Yisa na anubɛ a dɔgɛnu nara a wara kɔnɔ anu ma ke anu gbɛrɛnna Yisa ma bawo nyama kolo.

²⁰Mɔgɛ do ya a fɔ Yisa ye ko, “I na anubɛ i dɔgɛnu sɔnɛ luyi ma. I yen-sɔgɛ ye anu na.”

²¹Yisa ya a fɔ anu dama ye ko, “Minnu bi Allala kumɛ lamɔɛnna ka a bira, n na anubɛ n dɔgɛnu le wonu na.”

²²Lunyɛ do, Yisa anubɛ ala karan-dannu donta kulɔn rɔ. A ya a fɔ anu ye ko, “Ma tenbi wona dalɛ kɔma.” Woletɔ anu wulita.

²³Anu bi dalɛ tɛgɛla tumɛ min, kinɔgɛ tenbira Yisa ma salon! Fɔn-belebele tugura dalɛ kuma. Yi wulita donna kulɔn rɔ. Anu taranta masiba-wɛ rɔ.

²⁴Karan-dannu nara Yisa wara ka a lakunden ko, “Karan-mɔgɔ, karan-mɔgɔ! A ara to doni, ma ni faga.” Yisa ya a lasɔ ka fɔnyɔ anubɛ yi makuma. Anu makimɛra don!

²⁵A ya a fɔ ala karan-dan wonu ye ko, “Wola dɛnkɛninyɛ ye mi?” Kɔnɔ anu dama kilanta. Anu kawara ka a fɔ anu nyɔgɔn ye ko, “Nfen mɔgɔ-sufa ye kɛ la? A ye fɔnyɔ anubɛ yi makumala, ado wo bɛɛ ye ata kumɛ birala!”

²⁶Anu tenbira ha Kadara kɛnuna nyamanɛ rɔ min bi Kalili dalɛ kɔgɔma.

²⁷Yisa sɔra gbele ma tumɛ min, kei do bɔra ka a labɛn. Nyina-yogomɛ ye a fɛ. A ara mɛ, a ma kurɛ don a ma. Sa tinɛ sa a bolo fɔ kaburu-soe burɔ.

²⁸Nyinatoe wo ya Yisa yen tumɛ min, a wɔrɔndɔra bɛrɛkɛ! A ya a sa Yisa kɔrɔ ka a fɔ a kulu-mayɛlɛnɛ la ko, “Alla min Bi Fan Bɛɛ Kun Na, wola dan Yisa, i ye nyinina nfen ma n bolo? N bi i madiyala, i kana n tɔrɔ!”

²⁹A ya kɛ fɔ bawo Yisa ya a fɔ nyina-yogomɛ ye ko a ni bɔ kei wo fɛ. Nyinɛ wo ara wuli a la nun iko siyaman. Hali mɔgɛnu ya a bira ka a bolenu anubɛ a kiannu kiri yɔlɔkɛnu na, a si yɔlɔkɛ wonu tɛgɛ ka ta wulɛ rɔ nyinɛ bolo.

³⁰Yisa ya a manyinika ko, “I tɔgɛ kama?” A ya a yabi ko, “N tɔgɛ le Nyama.” A ya wo fɔ bawo nyina siyaman bi a fɛ.

³¹Nyinɛ wonu ya Yisa madiya ko a kana anu nata denka-rayan rɔ anu si tɔrɔyɛ sɔrɔn kan min.

³²Kɔsɛnu namara tinɛ ye nyɔ wara la. Anu bi anu de-nyinina kɔnkɛ kuma. Nyinɛnu ya Yisa madiya ko a ni sɔn ko a ni anu nadon kɔsɛnu tɔ. A sɔnta anu ta-koe ma.

³³Woletɔ nyinɛnu bɔra kei wo fɛ ka don kɔsɛnu tɔ. Kɔsɔ-wɔrɛ wo burumatoe yigira kɔnkɔ-kerikerinya la ka yigi dalɛ rɔ. Anu tora-a-rɔ yi rɔ nyɔ.

³⁴Minnu bi kɔsɛ wonu kandanna, wonu ya wo yen nkɛkuna, anu burimatoe tara ka kibarɛ wo nyɛnsɛn soe anubɛ sɛnɛnu tɔ.

³⁵Min mara, mɔgɛnu tara wo ragbɛ tinɛ. Anu nara Yisa wara ka kei wo siginɛ taran Yisa dafɛ. Nyinɛnu bara bɔ a fɛ, ado kurɛ ye a ma. A hɛnkili ma ara sɔ. Anu dama kilanta kati!

³⁶Kei wo kɛndɛyara nya min, minnu ya wo yen, wonu ya wo rakaran mɔgɛnu ye.

³⁷Nyama min bɛɛ bɔra Kadara kɛnuna nyamanɛ rɔ, anu ya a fɔ Yisa ye ko a ni bɔ nyɔ bawo anu dama ara kilan bɛrɛkɛ! Woletɔ Yisa donta kulɔn rɔ ka sɛgi.

³⁸Nyinɛnu bɔra kei min fɛ, wo ya Yisa madiya ko, “Sɔn, n ni ta i fɛ.” Kɔnɔ Yisa ya a lasɛgi, a ko,

³⁹“Sɛgi i warɛ. Mari ara ko-nyimɛ min kɛ i ye, i ni to wo fɔla anu ye.” Kei wo tara soe wo kan tinɛ bɛɛ rɔ ka Yisala kabana-koe rakaran mɔgɛnu ye.

⁴⁰Mɔgɔ siyaman bi Yisa makɔnɔna dalɛ tonko kelan tɔ nun. Yisa sɛgira tumɛ min, anu ya a labɛn sewɛ la.

⁴¹Kei min tɔgɛ Yairasi, Yahudiya-dina-bon-kun-tigi, kɔni, wo nara nyɔ. A ya a sa Yisa kɔrɔ ka a madiya ko a ni ta a warɛ

⁴²bawo ala dunmusu kelen pe, min sɔrɔn ara san tan-ni-fila bɔ, wo ye faga-koe rɔ. Yisa bilara Yairasi fɛ tumɛ min, nyama ya a lafoo.

⁴³Musi do ye nyɔ musinuna kirayɛ ara min tɔrɔ san tan-ni-fila kɔrɔ. A ara a bolo-fan bɛɛ ni bɛsi-bɔlɛnu ma kɔnɔ wonu fenfen ma ke a dandanna.

⁴⁴A nara nyama tɛma Yisa kɔma ka a bole tugu Yisala duruku-da-gbole la. Ala kirayɛ ya a boloka tiriya!

⁴⁵Yisa ya nyinikalɛ kɛ ko, “Yon ya a bole tugu n na?” Mɔgɔ-wo-mɔgɔ ma a sɔn a la. Pita ko, “Karan-mɔgɔ, mɔgɔ siyaman bi ila foolɛ rɔ, anu bi i latuntunna kan tinɛ bɛɛ.”

⁴⁶Kɔnɔ Yisa ko, “Mɔgɛ do ara a bole tugu n na, yɔ! N bara a lɔn bawo sɛnbɛ do ara bɔ n tɔ.”

⁴⁷Musi ara a lɔn ko a ti ke a dogonna, a yɛrɛyɛrɛnmatoe nara ka a sa Yisa kɔrɔ mɔgɛ bɛɛ yala. A ya a bole tugu Yisa la minna ko la, a ya wo fɔ a ye anubɛ a kɛndɛyara nya min tiriya!

⁴⁸Yisa ya a fɔ a ye ko, “N na, ila dɛnkɛninyɛ ara i lakɛndɛya. Ta yisi-kimɛ rɔ.”

⁴⁹Yisa ye wo fɔla tumɛ min, kilayɛ nara ka bɔ kun-tigi warɛ ka a fɔ Yairasi ye ko, “Ila dunmusi ara faga. Hali i ma karan-mɔgɔ tɔrɔ tun.”

⁵⁰Yisa ya wo lamɔɛn ka a fɔ Yairasi ye ko, “I kana kilan. Dɛnkɛninya tun. Ila dan si kɛndɛya.”

⁵¹Yisa kera nyɔ tumɛ min, a ma sɔn mɔgɔ-wo-mɔgɔ ni don bɔn la a fɛ fɔ Pita anubɛ Yemesi anubɛ Yɔni anubɛ furi wo na anubɛ a fa.

⁵²Mɔgɛ bɛɛ ye dila ka anu dɛ sa-a-rɔ dennɛ wola ko la. Yisa ko, “Wo kana di. Dennɛ wo ma faga. A ye kinɔgɛ le tɔ dɔrɔn!”

⁵³Anu dama ya Yisa mayɛlɛn bawo anu ya a lɔn serr ko dennɛ wo ara faga.

⁵⁴Kɔnɔ Yisa ya a bira a bole ma ka a fɔ a ye ko, “Dunmusu-nɛ, i lasɔ!”

⁵⁵A niyi sɛgira a rɔ. A ya a lasɔ tiriya! Yisa ko, “Wo ni dɔn-fen di a ma.”

⁵⁶A sɔrɔnnɛnu kawara kɔnɔ Yisa ya a fɔ anu ye ko koe min bara ma kɛ, anu kana wo fɔ mɔgɔ-wo-mɔgɔ ye.