Read Kuranko Tɔn-Fɔɛ-Fila-Nyɔgɛ 15 Bible Online

Tɔn-Fɔɛ-Fila-Nyɔgɛ 15 - Kuranko bible

Tɔn-Fɔɛ-Fila-Nyɔgɛ 15

¹[19] Musa ya Mari kuman-kan latenbi Isirɛla mɔgɛnu ma ko, “San-wɔrɔnfila wo san-wɔrɔnfila wa tenbi, ni yili ye wobɛ mɔgɔ-wo-mɔgɔ tɛma, wo kana wo makele tun.

²Wo si a ma ka le. Ni min bara a ta-nyɔgɛ Isirɛla mɔgɛ do dɔndɔ nun, a kana yili wo makele tun bawo yili-koe ara ban anu tɛma. Mari nyɛrɛ-nyɛrɛ le ya tɔn wo sigi bɛɛ ma.

³Ni a taranta, minna yili ye sibolo-gbɛrɛ la, wo tigi si yili makele kɔnɔ wole kana yili-makele wo nyɔgɔn na san wo nyɛrɛ ma.

⁴“Mari Alla ko a si ata duwɛ layigi wo kuma lanyiri-nyamanɛ wo rɔ wo ye nala min sɔrɔnna kaka. Ni wo ya Marita tɔn kɛnu bira, mɔgɔ-wo-mɔgɔ ti ma bolo-kolɔn la nyamanɛ wo rɔ.

⁶Mari si ata duwɛ layigi wo kuma iko a ya lanyiri kiri wo ye nya min. Nyamani-gbɛrɛkɛ-mɔgɛnu si na dɔndɔlɛ sa wo ma kɔnɔ wole ti ta yili tɛgɛ nyamani-gbɛrɛkɛ-mɔgɛnu ma. Wole si ke anu marala ka to yili-yɔɔnyɛ kɔrɔ wo bolo kɔnɔ anu denu ti ke wole marala.

⁷“Mari Alla si soe minnu di wo ma, wo wa ta sigi wonu tɔ lanyiri-nyamanɛ rɔ, ni wo ta-nyɔgɛ Isirɛla mɔgɛ do bolo-kolɔn makoe taranta fenfen na wo bolo, wo kana kɔrɔndiyɛ sigi a ma ka ma kɔɛnkɔɛntenu na.

⁸Yanni wo ni wo ma, wo ni wo nyɔgɔn makoenu nyinya.

⁹Hali a ya a taran, san wɔrɔnfilɛ kɛ ara gbɛrɛn, wo si yili boloka san min na, wo kana wo ban wo nyɔgɔn-dɔndɔ-koe ma. Hali miriya-yogoma-su wo kana na wo hɛnkili ma. Ni wo ya wo ban wo na-kelen-nyɔgɛnu dɔndɔ-koe ma, ni wo do ya a yasere-masa Allatala ye, wo tigi min ya karagbɛlɛyɛ sigi a la wo la, wo si yiliki sɔrɔn Alla bolo.

¹⁰Ni wo ya wo ta-nyɔgɛnu makoe nyinya foninsereyɛ la, Mari Allata duwɛ si taran wo fɛ koe bɛɛ rɔ.

¹¹ Mari ko bolo-kolɔn minnu bi wo tɛma, wo ni to wonu makoe nyinyala tuma-wo-tuma.”

¹² “Ni wo ta-nyɔgɛ Isirɛla mɔgɛ do ya a nyɛrɛ mayira a ta-nyɔgɛ Isirɛla mɔgɛ do ma iko yɔɔn, a mara kei la wo, a mara musu la wo, i kana a lawɔli ka tenbi san wɔrɔ la. A san wɔrɔnfila nyɔgɛ ma, fɔ i ni a boloka.

¹³I tenbi a masarala, i kana a bolo-lakolɔn boloka de,

¹⁴a ki-fen tɔ wo, a kolo-fen tɔ wo, a fui-fen tɔ wo, fɔ ka a boloka gbegesa, iko Mari Allata duwɛ tora wo fɛ nya min. Ni a taranta, wo na-kelen-nyɔgɛ min bi wɔlila wo kɔrɔ iko yɔɔn san wɔrɔ kɔrɔ, i tenbi wo bolokala, i kana i yisi magboya a la bawo a bɛnta, i ni min nyɔgɔ di wɔli-kɛlɛnu ma, i ye wo le talɛ dila ale ma. Ni min ya wo ma, Mari Allata duwɛ si to wo fɛ boi! Wo ni wo miri ko wole fanan bi yɔɔnyɛ rɔ Iyipiti nun. Wota Mari Alla le ya wo labɔ nyɔ. Woletɔ wota Mari Alla ara tɔn kɛ di wo ma bi. “Kɔnɔ ni a taranta, ile anubɛ ila denbayɛnu diyara le ila yɔɔn wo ye, ado a sigi-bole i fɛ kin, i si a bi worɔ ka ta a la ila bonda-dɛ la ka a tole sɔgɔ bɛɛn la kankan ma nyɔ. Wo si a yira mɔgɛ la ko yɔɔn wo si to wɔlila i ye a siyi-tele-bɛɛ kɔrɔ. Hali yɔɔn-musi fanan si ma wo nya na.”

¹⁹ “Wo ni wola kolo-fannuna den-fɔlɔta-keimɛnu namara anu dan na Mari Alla ye. Wo kana ninki wonu ma sara-ninkinu na. Wo kana sagɛ wonu fɛrɛma-siyi tɛgɛ anubɛ ka tɔnɛ nyini a siyi wo rɔ.

²⁰San-bo-san, wole Isirɛla mɔgɛnu anubɛ wola denbayɛnu si kolo-fan kɛ donu dɔn Marita kan-tina-sɛnimɛ rɔ.

²¹Ni fɛɛ ye kolo-fan kɛ do kian la wo, ni a yɛ tinyanɛ wo, ni fɛɛ-gbɛrɛkɛ ye a la wo, wo kana wo ma sarakɛ la wota Mari Alla ye.

²²Kolo-fen-su wonu, wo si wonu dɔn wola bɔnnu na iko mɔgɛ si bintɔ-soge dɔn nya min. Hali mɔgɛ min ma sɛninya iko tɔn ya a fɔ nya min, wo si wonu dɔn de!

²³ Wo kana soge anubɛ a yele dɔn, fɔ wo ni a kan natɛgɛ. A yele ni bɔ a rɔ dugi ma iko yi.”