Read Kuranko Tɔn-Fɔɛ-Fila-Nyɔgɛ 16 Bible Online

Tɔn-Fɔɛ-Fila-Nyɔgɛ 16 - Kuranko bible

Tɔn-Fɔɛ-Fila-Nyɔgɛ 16

¹ Musa ya Mari kuman-kan latenbi Isirɛla mɔgɛnu ma ko, “Wo dama si Kanan-Ko-Ladiyɛ kɛ Abibu[20] karɛ ma. Mari ya wo labɔ yɔɔnyɛ rɔ Iyipiti nyamanɛ rɔ suyi rɔ karɛ wo le la. Wo ni kɛ ma ka wota Mari Alla gbiliya.

²San-bo-san, Abibu karɛ kɛ la, wo si ta kan-tina-kelan wo rɔ min yabɔnɛ Mari bolo. Wo si wola kolo-fannu kan natɛgɛ nyɔ ka wo ma wola Kanan-Ko-Ladiyɛ dɔn-fen-sarakɛnu na.

³Wo si anubɛ biredi dɔn isiti sa min tɔ. Wo si to biredi wo dɔnna tele wɔrɔnfila kɔrɔ iko wo burimatoe ya a ma nya min wo tumɛ wo ye bɔla Iyipiti nyamanɛ rɔ. Wo si biredi kɛ kele tɔrɔya-biredi. Wo tenbi a dɔnna, wo si wo miri wo tele ma wo bɔra tɔrɔyɛ rɔ lunyɛ min.

⁴Tele wɔrɔnfilɛ wo kɔrɔ, mɔgɔ-wo-mɔgɔ kana isiti lamara bɔn la. Wo ye kolo-fan min fagala tele wɔrɔnfilɛ kɛ a tele fɔlɔtɛ wurɛ la, wo ni a mumɛ dɔn wo su kelan rɔ.

⁵“Kɔnɔ wo kana Kanan-Ko-Sarakɛ wonu faga kan-bo-kan fɔ kan-tina-kelan wo rɔ min yabɔnɛ Mari bolo. Wo si kolo-fan wonu faga tele-kolo-wulan wati ma iko wo ya a ma Iyipiti nya min wo bɔra nyɔ tele min ma.

⁷Wo si soge wonu te ka anu dɔn Marita kan-tina-yabɔnɛ wo rɔ. Wo banda kɛ, wo si sɛgi wo warɛ.

⁸Wo si to biredi-yɛlɛbɛlɛ wo dɔnna tele wɔrɔ kɔrɔ. A tele wɔrɔnfila nyɔgɛ wo ma, wo si wola wɔlɛnu boloka ka wo kundɛn Mari Alla bato tinɛ.”

⁹ “Ka a dabira wola dɔn-fen kun fɔlɛ-tɛgɛ tele fɔlɛ ma, wo ni lɔgɔkun wɔrɔnfila dan.

¹⁰A segin nyɔgɛ ma, wo ni ta wola hɛnikɛ kɔ-fan wonu na Mari ye iko a ye bɛɛ kɔla nya min. Wo ni Dɔn-Fen-Kun-Fɔlɛ-Ladɛn kɛ ka wota Mari Alla gbiliya wo wati rɔ.

¹¹Wo si nyagalen nyɔ rɔ wota Mari Allata kan-tina-yabɔnɛ wo rɔ, wobɛ wola dannu anubɛ wola wɔli-kɛlɛnu anubɛ Lifayi mɔgɛnu anubɛ sundannu anubɛ kelennɛnu anubɛ kɛɛ-musinu, wobɛ minnu siginɛ.

¹²Wo ni tɔn kɛnu bira de bawo wo ni la a la ko wole fanan bi yɔɔnyɛ rɔ Iyipiti nyamanɛ rɔ nun.”

¹³ “Wo wa ban wola dɔn-fan wo bɛɛsi ladɛnna wola bɔnnu na tumɛ min, wo si Lele-Sɔɛ-Ladɛn kɛ. Wo si lelenu sɔ ka to kila wonu kɔrɔ tele wɔrɔnfila kɔrɔ.

¹⁴Wo si wo nyɛrɛ ladiya, wobɛ wola dannu anubɛ wola wɔli-kɛlɛnu anubɛ Lifayi mɔgɛnu anubɛ sundannu anubɛ kelennɛnu anubɛ kɛɛ-musinu

¹⁵bawo Marita duwɛ ara to wo ye. Wola ki-fannu sabatira. Wo ni wota Mari Alla gbiliya ka Lele-Sɔɛ-Ladɛn kɛ tele wɔrɔnfila kɔrɔ Marita kan-tina-yabɔnɛ wo rɔ.

¹⁶“Isirɛla kei mumɛ bɛɛ si na Marita kan-tina-yabɔnɛ wo rɔ kinyama sawa san kɔrɔ. A dabira fɔlɔtɛ wo le Kanan-Ko-Ladiyɛ la, wo wa ban, Dɔn-Fen-Kun-Fɔlɛ-Ladɛn, wo wa tenbi, Lele-Sɔɛ-Ladɛn. Kei-wo-kei kana ta sɔ Mari yakɔrɔ nyɔ a bolo lakolɔn

¹⁷iko wota Mari Alla ye bɛɛ kɔla nya min.”

¹⁸Musa ya Mari kuman-kan kɛ latenbi Isirɛla mɔgɛnu ma ko, “Wo ye nala soe minnu sɔrɔnna Mari Alla bolo, wo ni kiti-tɛgɛlɛnu sigi nyɔnu tɔ. Mɔgɛ wonu ni kiti sa a kila-bɛrɛbɛrɛ fɛ.

¹⁹ Anu kana ma mɔgɔ-radunɛnu na. Anu kana lafisayalɛ kɛ kiti tɛgɛ tinɛ. Anu kana dogonta-fan bira. Hali mɔgɛ hɛnkili kolo, dogonta-fan si a ma, a ni fiyonya. Hali a telenta, a ra si du kɔnkɔrɔntɔn!

²⁰Wo ni to ko-latelennɛ kɛla ka to latelan rɔ. Wo si a ma, wo si simayɛ sɔrɔn lanyiri-nyamanɛ wo rɔ Mari Alla ye nala min dila wo ma.”

²¹ “Wo wa saraka-mintan-tinɛ ladan wota Mari Alla ye tumɛ min, wo kana wo gbɛrɛn kɔlɔma-malɛsɛnɛ wo ma min tɔgɛ Asura min malɛsɛnɛ musila muninyɛ la.

²² Wo kana kuru-lɛsɛnɛ donu ma wota bɛsɛnu na. Wo sufanu ma di wota Mari Alla ye dɛɛ!”