Read Kuranko Tɔn-Fɔɛ-Fila-Nyɔgɛ 19 Bible Online

Tɔn-Fɔɛ-Fila-Nyɔgɛ 19 - Kuranko bible

Tɔn-Fɔɛ-Fila-Nyɔgɛ 19

¹Musa ya Mari kuman-kan kɛ latenbi Isirɛla mɔgɛnu ma ko, “Wota Mari Alla wa ban mɔgɛ wonu fagala wo yarɔ tumɛ min, wo si anuna soe wonu bi anu bolo ka wo sigi nyɔ.

²Wo si Yorodan bɛ tele-yigi warala-nyamanɛ tala sigi tina sawa la. Kan-tina sawɛ kɛ damasi si so kelen-kelen yabɔ min bi anuna soenu tɛma. Wo ni kilɛnu naka wola so sawɛ kɛnu ma minnu yabɔnɛ alako mɔgɔ-fagalɛ si ke a burila nya min ka ta nyɔ a kanan-koe la.

⁴“Ni gbalo sara mɔgɛ do bole ma, a ni mɔgɛ do faga a ma min nawuli a ma, a si a buri ka ta mɔgɔ-lakisi-soe wo do rɔ.

⁵Tamasere le kɛ la. Ni mɔgɔ fila tara firɛ rɔ sɔgɔ tɛgɛ tinɛ, doi ni to sɔgɛ tɛgɛla, tɛgɛran ni bɔ a la, wo ni ta bɛn a ta-nyɔgɛ wo la, wo ni faga, nba, a si a buri ka ta lakisi-soe wo do burɔ.

⁶Ni wo ya so kelen de dɔrɔn yabɔ nyamanɛ wo damasi rɔ, a si ma wulɛ la donu bolo. Furi wota mɔgɛ minnu bi a tayili sarala yisi-bɔɛ bolo, wonu si ke mɔgɛ wo birala le bawo soe wo fɛ-yan a la. Ko tinyanta wo min bolo, ni anu ya kei wo faga, anu bara a faga fu bawo a ta-nyɔgɛ wo fagara a bolo sɔgɔ tɛgɛ tinɛ, a ma a lawuli a ma.

⁷Woletɔ Mari Alla ara a fɔ wo ye ko wo ni mɔgɔ-lakisi-so sawa yabɔ nyamani sawɛ wo rɔ.

⁸“Ni wota Mari Alla ya a ma, wo ni nyamanɛ do sɔrɔn wola nyamanɛ wo kuma iko a ya a fɔ wo benbanu ye nya min,

⁹wo si lakisi-so sawa yabɔ kan-tina-kurɛ wo rɔ tun, a ni ma so kɔnɔntɔ la. Ni wo ya wota Mari keni ka ata kuman-kan bira ka wo latɔnbagaya a ya wo karan min na, a nyamani-toe min tonɛ, a si wo sa wola nyamanɛ kuma.

¹⁰Wo si so sawa bi wonu tɔ ka wonu kofu wola so wɔrɔ fɔlɔtɛ ma, woletɔ nondɔn sa mɔgɛ minnu na, wonu ti faga. Wole fanan kana yiliki sɔrɔn mɔgɔ-faga-koe rɔ lanyiri-nyamanɛ wo rɔ.

¹¹“Kɔnɔ ni mɔgɛ do ya a ta-nyɔgɛ faga sɔgɔ-labɔɛ ma, mɔgɔ-fagalɛ wo ni a buri ka ta mɔgɔ-lakisi-soe wo do rɔ,

¹²a bɔra soe min tɔ, mɔgɔ-ba minnu bi nyɔ, wonu si kilayɛ lata lakisi-soe wo kun-tiginu ma ko, ‘Wo ni na mɔgɔ-fagalɛ wo la de!’ Anu ba na a la, anu si a don furi wo na-kelen-nyɔgɛ do bolo. Wo si ale fanan faga.

¹³Wo kana kinikini a ma hali doni bɛrɛni! Wo si mɔgɔ-fagalɛnu bɔ Isirɛla mɔgɛnu tɛma feu, alako wola koe bɛɛ si ta a kilɛ fɛ wo bolo nya min.

¹⁴ “Mari ye nala nyamanɛ min dila wo ma, wo wa ta sigi nyɔ tumɛ min, wo kana wo sigi-nyɔgɛnuna dan-kuru-kɔrɛnu bɔ anu gbɛ rɔ.

¹⁵ “Mɔgɔ kelenta sereyɛ ti mɔgɛ yiliki fɔ a wa tenbi mɔgɔ kelen na, a ni to yiliki sɔrɔnna.

¹⁶Ni mɔgɛ do ya tɔgɛ sa a ta-nyɔgɛ do la sereya bɔ tinɛ,

¹⁷anu mɔgɔ fila si ta Marita kan-tina-yabɔnɛ wo rɔ. Saraka-masɔlɛnu anubɛ kiti-tɛgɛla-kun-tiginu si kiti wo sa.

¹⁸Kiti-tɛgɛlɛnu ni a lakɔrɔsi a kila-bɛrɛbɛrɛ fɛ. Ni anu ya a yen ko mɔgɛ wo ara foninya-sereyɛ le bɔ,

¹⁹anu bɛnta ka tɔrɔyɛ min sigi kuma-tigi wo ma, sereya-bɔlɛ wo si wo dunɛ bi. Ni wo ya wo ma, wo si karagbɛlɛnu ban wo tɛma.

²⁰Mɔgɛ minnu bi kɛ sufa lamɔɛnna, wonu ti sisi ka kɛ nyɔgɔn ko sufa ma, anu si kilan.

²¹ Wo kana kinikini mɔgɔ-sufa wonu ma mumɛ! Wonuta tɔrɔyɛ si ma ka le. Ni mɔgɔla tɔgɔ-sanɛ ya a ma, mɔgɛ do ni faga, anu si ale fanan faga. Ni mɔgɛ do ya a ma, mɔgɔ yɛ ni tii, anu si ale fanan yɛ tii. Ni mɔgɛ do ya a ma, mɔgɔ nyin ni keri, anu si ale fanan nyin keri. Ni mɔgɛ do ya a ma, mɔgɔ bole ra ni keri, anu si ale fanan bole rakeri. Ni mɔgɛ do ya a ma, mɔgɔ kian ra ni keri, anu si ale fanan kian rakeri.”