Read Kuranko Tɔn-Fɔɛ-Fila-Nyɔgɛ 2 Bible Online

Tɔn-Fɔɛ-Fila-Nyɔgɛ 2 - Kuranko bible

Tɔn-Fɔɛ-Fila-Nyɔgɛ 2

¹ Musa ya a fɔ kɛ kɔma ko, “Ma bɔra Kɛdɛsi, ma tara wulɛ rɔ tun. Ma bilara kilɛ do fɛ ka ta ke Kɔgɔ-Yi-Wulen bolɔn doi ma min bi tele-bɔɛ wara la iko Mari ya a fɔ n ye nya min nun. Ma dama tora yilan-yilanna Idɔm kɔnkɔ-nyamanɛ rɔ.

²“Wo kɔma, Mari ya a fɔ ma ye ko

³bawo ma ara mɛ yilan-yilanna wulɛ rɔ min kɛ, ma ni ta kantɔ-waralɛ rɔ.

⁴ A ko n ni wo hɛnkili bila kumɛ kɛ la, n bi nala min fɔla wo ye kaka ko, ‘Wo si tenbi Idɔm kɔnkɔ-nyamanɛ rɔ. Idɔm kɛ kɛnu bɔra wo benba Yakoba na-kelen-nyɔgɛ do rɔ min tɔgɛ Isɔ. Kɛmɔgɔni-kelan-sɔrɛ le wobɛ wonu na. Wonu si kilan wo la

⁵kɔnɔ hali wo, wo kana anu nanyini min si a ma, anu yisi ni bɔ wo kɛlɛ-koe la. Mari ko a ti anuna dugi pɛtɛrɛ-kunduni di wo ma bawo a ara ban Idɔm nyamanɛ wo dila Isɔ kegeyɛnu ma.

⁶Wo si anuna min-kɛ-yinu san anu ma anubɛ anuna dɔn-fannu.’

⁷“Wo ni wo miri wo ara koe min bɛɛsi ma ko wota Mari Allata duwɛ tora wo kuma wonu tɔ. A ya wo fɛ-bira ka wo kandan wo tumɛ wo ye wula-da-rakolɔn rɔ. San bi-nanɛ kɛ mumɛ bɛɛsi kɔrɔ, wo ye nyinina min bɛɛsi ma, a ya wonu di wo ma.

⁸“Ma tenbira Idɔm nyamanɛ tɔnkɔn do rɔ ma na-kelen-nyɔgɛ Isɔ kegeyɛnu bi kan min. Ma tara ka kilɛ wo boloka min bi tala Ilati soe anubɛ Iseyɔn-Kiba soe burɔ ha Dalɛ-Faganɛ wara la. Ma tara kantɔ-wara la ka ta ke Mohabu nyamanɛ ma.

⁹ Mari ya a fɔ n ye fanan ko, ‘Wo kana Mohabu mɔgɛnu yakɔrɔ-mamɔ. Lɔti kegeyɛ le wonu na. Wo kana anu kɛlɛ de! N bara Ari soe di anu ma. Hali anuna nyamanɛ sibiri-kunduni, wo ti a sɔrɔn.’ ”

¹⁰(Fɔlɔfɔlɔ nun, mɔgɔ-makilannɛ siyaman bi Ari soe burɔ anu bi minnu kelela Iminnu. Anu yan ferengben iko Anakim mɔgɛnu.

¹¹Anu si kɛnubɛ Anakim mɔgɛnu kele ko Rɛfɛnnu kɔnɔ Mohabu kɛnu bi anu kelela ko mɔgɔ-makilannɛnu.

¹²Fɔlɔ nun, mɔgɛ minnu siginɛ Idɔm nyamanɛ rɔ, wonu siginɛ faran-woenu denu na nun. Kɔnɔ Isɔ kegeyɛnu ya anu gben ka anu nabɔ anuna nyamanɛ wo rɔ. Wo kɔma, Isɔ kegeya-mɔgɛnu sigira nyɔ iko Isirɛla mɔgɛnu si na Kenan kɛnu gbenna nya min ka anu sigi nyɔ.)

¹³Wo kɔma, Musa ya a fɔ ko, “Ma ya Siradi bɛ tɛgɛ iko Mari ya a fɔ ma ye nya min.

¹⁴ Ma bɔɛ Kɛdɛsi-Baniya, san bi-sawa anubɛ san segin (38) ara tenbi. Kɛlɛ-dan min bɛɛsi ye nyɔ wo wati rɔ, wonu bara ban fagala kelen-kelenyɛ ma iko Mari ya a fɔ nya min nun.

¹⁵Mari fonde bɔnɛ tora wo fanu kuma ha mala kɛlɛ-dan labantore wo fagara.

¹⁶Wo tumɛ anu denu bara ban fagala gbɛ,

¹⁷Mari ya a fɔ wo fanu ye worɔ ko,

¹⁸‘Bi, wo dama si tenbi Mohabu nyamanɛ tɔnkɔn rɔ ka ta tenbi Ari soe fanan na.

¹⁹ Wo wa tenbi nyɔ la, wo ara gbɛrɛn Amonnuna nyamanɛ ma. Lɔti bɔnsɔn le wonu na. Wo kana yakɔrɔ-mamɔɛ anubɛ nanparan sanba anu ma bawo Mari ti anuna nyamanɛ di wo ma. A ya nyɔ di anu denu ma pe.’ ”

²⁰(Fɔlɔfɔlɔ nun, Rɛfɛnnu siginɛ Amonnuna nyamanɛ rɔ. Amonnuna nyamanɛ kɛ tɔgɛ le nun ko Rɛfɛn nyamanɛ kɔnɔ Amon wonu bi Rɛfɛn kɛnu kelela ko Samisuminu.

²¹Samisumi kɛnu yan iko Anakim mɔgɛnu yan nya min. Fanka ye anu na, ado anu siya nun. Kɔnɔ Mari ya a ma, Lɔti kegeyɛ, Amonnu, kɔni, ya Samisuminu kɛlɛ ka anu faga. Anu sigira anuna nyamanɛ rɔ.

²²Mari ya min ma Lɔti kegeyɛnu ye, a ya wo le nyɔgɔn ma Isɔ kegeyɛnu fanan ye, Idɔm mɔgɛnu, kɔni. Mari ya a ma, Idɔm mɔgɛnu ya nɔ-ko sɔrɔn faran-woe-ma-mɔgɛnu ma ka anu sigi anuna nyamanɛ rɔ kɔnkɛnu siya kan min. Anu bi nyɔ ha bi.[4]

²³Mɛdetereniyan yi-tɛma-dugi do ye nyɔ min tɔgɛ Kariti. Mɔgɛ minnu siginɛ nyɔ, wo donu bɔra nyɔ ka ta anu sigi Mɛdetereniyan kɔgɔ-yi-kɔnkɔn la. Kɔnɔ yanni Kariti kɛnu ni na anu sigi nyɔ, Afi mɔgɛnu siginɛ nyɔ nun. Kariti kɛnu nara ka Afi mɔgɛnu gben nyɔ rɔ. Anu tara nyamanɛ wo bi anu bolo ka ta ke Kesa soe ma min bi dugula wara la.)

²⁴Musa ya a fɔ anu ye tun ko, “Wo tumɛ ma ara ban tenbila Mohabu nyamanɛ la, Mari ya a fɔ n ye ko, ‘Wo ni wo lawuli ka Anɔn bɛ tɛgɛ. Amoranuna Mansɛ Saihɔn min siginɛ Hɛsibɔn soe burɔ, a si a ma, wo ni nɔ-ko sɔrɔn ale anubɛ ata nyamanita-mɔgɛnu ma. Wo si ta anu kɛlɛ ka wo sigi anuna nyamanɛ rɔ.

²⁵Ka a dabira bi ma, Mari si a ma, duninya-mɔgɛ bɛɛ si kilan wo la. Anu ba wo tɔgɛ lamɔɛn tumɛ min, anu si yɛrɛyɛrɛn.’ ”

²⁶Musa ya a fɔ tun ko, “Wo tumɛ ma siginɛ Kidɛmoti wulɛ rɔ, n ya kilayɛnu nata Mansa Saihɔn ma Hɛsibɔn soe burɔ alako yisi-kimɛ ni don ma tɛma. N ko,

²⁷‘Ni i si sɔn, ma ni tenbi ila nyamanɛ rɔ. Ma ti ma bɔ kila-wɛ fɛ de!

²⁸Ni ma ya wola yi min min, ma si wo sara. Ni ma ya wola dɔn-fan minnu dɔn, ma si wonu fanan sara. Alako tun, ma ni tenbi ila nyamanɛ rɔ.

²⁹Ni ma ara ban tenbila ila nyamanɛ rɔ, ma si Yorodan bɛ tɛgɛ ka ta nyamanɛ wo rɔ Mari Alla si na min di ma ma.’ Isɔ kegeyɛ minnu bi Idɔm nyamanɛ rɔ anubɛ Lɔti kegeyɛ minnu bi Mohabu nyamanɛ rɔ, katarala Ari soe ma, wonu sɔnta ko ma ni tenbi anuna nyamanɛ rɔ.

³⁰“Kɔnɔ ma Mari Alla ya a ma, Mansa Saihɔn yisi gbɛlɛyara gbon! Wo le ya a ma, a ma sɔn ma ni tenbi ata nyamanɛ rɔ muk! Ma kɛlɛ-sɔgɛ ya a bira. Woletɔ Mari ya a ma, ma ya a nɔ ka ala nyamanɛ bi. Ha bi, nyamanɛ wo ye ma bolo.

³¹Wo kɔma, Mari ya a fɔ n ye ka a gbɛ feu, ko ma si anuna nyamanɛ bi anu bolo. A ko, ‘Wo ni anuna nyamanɛ bi anu bolo ka sigi nyɔ.’

³²“Mansa Saihɔn bɔra Hɛsibɔn soe burɔ ka na ala kɛlɛ-dannu na ka na ma taran Yehasi soe da kɔrɔ.

³³Mata Mari Alla ya a ma, ma ya anu halaki ka ale mansɛ anubɛ ala den-keminɛnu faga anubɛ ala kɛlɛ-dannu.

³⁴Ma ya anuna soe bɛɛ bira-a-la ka anu halaki, kei wo, musu wo, den wo. Mɔgɔ-wo-mɔgɔ ma to a niyi la. Ma ya anu nato dogbe!

³⁵Ma ya anuna nɔnfulinu bi anubɛ anuna kolo-fannu.

³⁶Mata Mari Alla ya ma dɛnbɛ ka anuna soe bɛɛ kɛlɛ ka a dabira Arɔra soe ma min bi Anɔn ba lɛɛ rɔ ka ta ke a dafɛ-soe do ma min bi anuna lɛɛ tɛma. Wo kɔma, ma tara ha ka ke Kaliyadi nyamani-dan ma. Anuna soenu tarɛ keri-koe ma gbɛlɛya ma kuma.

³⁷Kɔnɔ ma ma gbɛrɛn Amonnuna nyamanɛ ma anubɛ Yabɔki bɛ ma. Ma ma gbɛrɛn soe wonu ma minnu bi kɔnkɔ-nyamanɛ rɔ anubɛ kan tinɛ wonu tɔ ma Mari Alla ma sɔn ma ni ke kan min.”