Read Kuranko Tɔn-Fɔɛ-Fila-Nyɔgɛ 20 Bible Online

Tɔn-Fɔɛ-Fila-Nyɔgɛ 20 - Kuranko bible

Tɔn-Fɔɛ-Fila-Nyɔgɛ 20

¹Musa ya Mari kuman-kan latenbi ko, “Wo wa ta wo yogenu kɛlɛ tinɛ, ni wo ya a yen ko anuna soeenu anubɛ anuna kirindinu siya wotɛnu ko, hali anuna kɛlɛ-dannu siya wotɛnu ko, wo kana kilan anu na. Wota Mari Alla min ya wo kisi ka wo labɔ Iyipiti, wo si to wo fɛ.

²Yanni wo ni ta kɛlɛ rɔ, wola saraka-masɔlɛ do si sɔ wo yarɔ ka a fɔ ko,

³‘Wole Isirɛla mɔgɛnu, wo ni wo tole masɔ n kuman-kan la. Wo ni wo yisi gbɛlɛya. Wo kana kilan wo yogenu na ka wo buri anu kɔrɔ.

⁴Wota Mari ye wo fɛ. A si wo sɛnbɛ don, wo ni anu nɔ feu!’

⁵“Kɛlɛ-kurugbɛ wonu si anuna kɛlɛ-dannu manyinika ka a fɔ ko, ‘Mɔgɛ do ye wo tɛma yan tɔ min bara ban ala bɔn sɔla kɔnɔ a ma a dantɛgɛ wɛ Mari ma? Ni mɔgɛ wo do ye wo tɛma, wo tigi ni sɛgi a warɛ. Ni wo tigi ma sɛgi, a ni ta a kunyɛ to kɛlɛ rɔ, mɔgɔ-gbɛrɛkɛ si ala bɔn wo bi ka a dantɛgɛ Mari ma gbɛ!

⁶Mɔgɛ do ye wo tɛma yan tɔ minna ki-fan gbɔ-fɔlɔtɛ ara ke keri ma? Ni wo ye wo tɛma, a ni sɛgi a warɛ. Ni wo tigi ya a tui, a ni ta a kunyɛ to kɛlɛ rɔ, mɔgɔ-gbɛrɛkɛ si to a diya ala ki-fan wonu tɔ.

⁷Mɔgɛ do ye wo tɛma yan tɔ minna kɔɛn-kurɛ ye bɔn la? Ni wo tigi ye wo tɛma, wo si sɛgi a warɛ. Ni wo mɔgɔ sufa ya a tui, a ni ta a kunyɛ to kɛlɛ rɔ, ala musi wo si to kei-gbɛrɛkɛ ye.’

⁸“Kɛlɛ-kurugbɛ si nyinikalɛ sa tun ko, ‘Mɔgɛ do ye wo tɛma yan tɔ, kilandɔgɔtore min na? Ni wo tigi ye wo tɛma, a ni ta a warɛ. Ni wo tigi tara wo fɛ kɛlɛ rɔ, a si a ma, a ta-nyɔgɛnu ni kilan.’

⁹Kɛlɛ-kurugbɛnu ba ban kɛnu fɔla, anu si kun-tiginu sigi kɛlɛ-dan kɛnu kun na.

¹⁰“Wo wa ta mɔgɛ minnu kɛlɛ tinɛ soe do burɔ, wo ni fɛrɛ di anu ma, anu ni dɛgɛ min wo ye.

¹¹Ni wo tara minnu kɛlɛ tinɛ, anu ni tarɛ dɛ laka ka dɛgɛ min wo ye yona, wo si anu ma wola yɔɔnnu na ka anu nawɔli kosɛbɛ!

¹²Kɔnɔ ni wo tara minnu kɛlɛ tinɛ kɔnɔ anu ma sɔn dɛgɛ minna, wo si kurɔn don anu ma.

¹³Wota Mari Alla wa sɛnbɛ di wo ma tumɛ min, wo si keinu damasi kɛlɛ ka anu faga tɛrr!

¹⁴Kɔnɔ ni a diyara wo ye, wo si anuna musinu bi le, anubɛ anuna dannu, anubɛ anuna kolo-fannu. Fenfen diyara wo ye wo kɔma, wo si wonu bi le wo nyɛrɛ ye. Wota Mari ara wonu di wo ma fasai!

¹⁵Wo wa ban sigila lanyiri-nyamanɛ rɔ tumɛ min, wota Mari ni fɛrɛ di wo ma ka ta nyamanɛ do kɛlɛ tinɛ min fɛ-yan wo la, wo ye a mala anuna soenu na wo nya na le.

¹⁶“Wo wa ta Kenan mɔgɛnu kɛlɛ tinɛ tumɛ min, wo si a mɔgɛ damasi faga.

¹⁷Wo si anu faga ka anu nato dogbe! Hɛtinu wo, Amoranu wo, Kenannu wo, Pɛrasanu wo, Hefanu wo, anubɛ Yebusinu, wo si anu damasi faga tɛrr, iko Mari ara a fɔ wo ye nya min.

¹⁸Wo ye wo mala alako wonu kana wo karan anuna bɛsɛ-kɔ-bolo-yogomɛnu na. Ni wo bilara anu fɛ, wo ara hakɛ kɛ wota Mari la.

¹⁹“Ni wo tara soe minnu kɛlɛ tinɛ, wo mɛra kɛlɛ la nya-wo-nya, wo kana anuna ki-fen-kurinu tɛgɛ muk! Wo si kɔlɔma wonu gbɔɛ dɔn kɔnɔ wo kana anu kuri tɛgɛ bawo wo yogo ma anu denu na.

²⁰A kɔlɔma-toenu, wo si wonu tɛgɛ le anu kɛlɛ-koela ko la ha wo ni soe bira.”