Read Kuranko Tɔn-Fɔɛ-Fila-Nyɔgɛ 21 Bible Online

Tɔn-Fɔɛ-Fila-Nyɔgɛ 21 - Kuranko bible

Tɔn-Fɔɛ-Fila-Nyɔgɛ 21

¹“Wota Mari Alla ye nala lanyiri-nyamanɛ min dila wo ma, wo wa ke nyɔ rɔ, ni mɔgɛ do ya furi taran binyɛ rɔ, a ma a fagalɛ lɔn,

²wota kun-tiginu anubɛ wota kiti-tɛgɛlɛnu si ta nyɔ rɔ ka a mafɛlɛn soe min fɛ-wuru furi wo la.

³Kun-tigi minnu bi soe wo burɔ, kiti-tɛgɛlɛnu si wonu kele. Kiti-tɛgɛlɛ wonu si a fɔ kun-tigi wonu ye ko, ‘Wo tenbi nala, wo ni na ninki-yɛrɛ la, anu ma min nawɔli wɛ doni bɛrɛni!’

⁴Anu si yɛrɛ wo bi ka ta a la yi-nɛ do dafɛ min ti gbala, anu ma sɛnɛ sa kan min tele-kelen-bɛrɛni! Anu si ninki wo kan keri nyɔ.

⁵Saraka-masɔlɛ donu fanan si bɛn wo rɔ nyɔ bawo wonu denu bi karagbɛlɛnu kiti damasi tɛgɛla. Wota Mari Alla ya anu nabɔ ka anu ma ata wɔli-kɛlɛnu na minnu si duwɛ kɛ ale Mari tɔgɛ rɔ.

⁶Furi dafɛ-so-burɔ-mɔgɔ-ba wonu si anu bole laku ninki-suyi wo kuma.

⁷Anu tenbi anu bole lakula ninki wo kuma, anu si a fɔ ko, ‘Male ma mɔgɛ kɛ faga, ado ma ma a lɔn min ya a faga.

⁸Mari, i yandi, i ya male Isirɛla mɔgɛ minnu nabɔ Iyipiti nyamanɛ rɔ, i ni ma makoto. Mɔgɛ min bara faga kɛ la, ma ma nɔndɔn yen min na ma wara la, i kana ma bira wo yili la.’ Ni wo ya a ma iko Mari ya a fɔ nya min, wo ti yiliki sɔrɔn Mari bolo. Wo hakɛ yama si togon.”

¹⁰“Wota Mari Alla wa sɛnbɛ di wo ma wo yogenu kuma ka anu bira,

¹¹tumado wo si musu-kinyɛ do taran nyɔ a sɔgɛ ye mɔgɛ do la ka min ma ata musi la.

¹²A si musi wo bi ka ta a la a warɛ. Musi wo si a kunyɛ gbana ka a surannu tɛgɛ.

¹³Anu ba a bira, kurɛ min bi a ma nun, a si a mayɛlɛma ka wonu bɔ a ma. Kei wo si musi wo lamara ala bɔn la ka fɛrɛ di a ma alako a ni karɛ kelen diyi kɛ ala mɔgɛnuna ko la. Wo kɔma, a si nyandan rasa ala kei ye.

¹⁴Kɔnɔ tɔ-a-la, ni anu ma kun, a si a boloka. Kan tinɛ min ba diya musi wo ye, a si ta nyɔ. Bawo kei wo ara a latenbi a kɔma min kɛ, a kana a mayira iko yɔɔn, ni wo ma, ka a yɔɔnya-birɛ-kɛ.”

¹⁵“Tumado musu fila ye kei do bolo, ala fɛ-sigi-musi anubɛ ala bara-musi. Musu filɛ wonu ni den-keinu sɔrɔn a ye. Ni a taranta, fɛ-sigi-musi ya kei wola sarɛ sɔrɔn, kei wo kana lafisayalɛ kɛ den-kei filɛ wonu tɛma.

¹⁶A bɛnta ka min di sarɛ wo ma, a kana wo bi ka a di ala bara-musila den-keminɛ ma.

¹⁷A si fan min di den-kei-doi wo ma, a ni wo nyɔgɔn fila di sarɛ ma hali a ma ma bara-musila dan la. Fɔ kei wo ni ala den-kei-sarɛ gbiliya. A bɛnta, wo ni min sɔrɔn, a ni wo di wo ma. Sarɛ wo le si a fala keiyɛ labɔ gbɛ rɔ.”

¹⁸“Ni a taranta, den-kei do ye mɔgɛ do bolo, min tengberenta, a ara murutiya ala mɔgɛ wonu ma, hali anu bi a tiila kɔnɔ a ti anu kuman-kan bira mumɛ!

¹⁹Dan wola mɔgɛnu si a bi ka ta a la soe mɔgɔ-banu bara. Anu si dan wo kiti.

²⁰Dan wo sɔrɔnnɛnu si a fɔ ko, ‘Mala dan kɛ tengberenta, a murutiyani de! A ti ma kuman-kan bira. A kelan, a ye mala wodi rakese-kesenna ma ma, a kelan, gbɛɛtoe le ale la.’

²¹Kei minnu bi soe wo burɔ, wonu si dan wo bi ka a mabon kuri la ha a ni faga. Ni wole Isirɛla mɔgɛnu ya wo ma, wo si karagbɛlɛyɛ ban wo tɛma wola nyamanɛ rɔ. Ni Isirɛla mɔgɔ-wo-mɔgɔ ya ko-sufa kɛ lamɔɛn wo tɛma, wo tigi si kilan.”

²²“Ni mɔgɛ ya ko-yogomɛ ladan min si a ma, anu ni a faga, ni anu ya wo furi dun kɔlɔma la ka a ma tamasere la,

²³ anu kana a furi-dunnɛ to nyɔ ha subagɛ ma. Fɔ anu ni wo togon wo tele nyɛrɛ rɔ, woletɔ Mari Allata dankɛ ti wola nyamanɛ bira. Mɔgɔ-wo-mɔgɔ furi dunnɛ kɔlɔma la, wo tigi ye Marita dankɛ kɔrɔ.”