Read Kuranko Tɔn-Fɔɛ-Fila-Nyɔgɛ 24 Bible Online

Tɔn-Fɔɛ-Fila-Nyɔgɛ 24 - Kuranko bible

Tɔn-Fɔɛ-Fila-Nyɔgɛ 24

¹ “Ni kei do ya musi do furu kɔnɔ tɔ-a-la, a ni a yen musi wo kɛ-nya do ye nyɔ min ma kin a yala, a si furu-tinya-kɛdi sɛbɛ ka wo don musi wo bolo ka a gben ala bɔn la.

²Ni kei-gbɛrɛkɛ ya musi wo furu,

³ni wo fanan ya a yen ko a sɔgɛ la ara bɔ a la, wo fanan si furu-tinya-kɛdi sɛbɛ ka a di a ma ka a gben. Hali ala kei fila nyɔgɛ wo ma furu-tinya-kɛdi di a ma, ni a fagara,

⁴a mara nya-wo-nya gbɛ, ala kei fɔlɔtɛ ti a ma ala musi la tun. Musi wo ni ma a yala iko musu-sɛninyabɛlɛ iko tɔn ya a fɔ nya min. Ni a ya ala musu-kɔrɛ wo bi tun, kei wo ara bila Mari la. Wota Mari Alla ye nala lanyiri-nyamanɛ min dila wo ma, wo kana ko-yogoma-su kɛnu nana wo tɛma wo rɔ.”

⁵“Ni kei min bɔ-san musu-kurɛ sigila bɔn la, wo kana sɔn kei wo ni ta kɛlɛ rɔ de! Wo kana wɔli-gbɛrɛkɛ don ale kei wo bolo. A ni to bɔn la san kelen kɔrɔ ka ala musi lasewa.

⁶“Ni mɔgɛ do tara mɔgɛ do warɛ tuluma sigi tinɛ, a kana sɔn, tuluma-sigilɛ wo ni ala dɔn-fen-bunden-fan sigi tulumɛ la a ma. Wo si a ma, ala denbayɛ ti ke anu de-nyini-fannu bundenna.

⁷ “Ni min ya a na-kelen-nyɔgɛ Isirɛla mɔgɛ do kankan ka a ma ala yɔɔn la, ni wo ma, ka a mayira yɔɔnyɛ rɔ, wo si wo tigi faga don! Ni wo ya wo ma, wo si ko-yogoma-su wonu ban wo tɛma.

⁸ “Ni fɛrɛma-kirayɛ bɔra mɔgɛ do fɛrɛ ma, wo ni a ma iko Mari ya a fɔ saraka-masɔlɛnu ye nya min.

⁹ Mari Alla ya min ma n kɔrɔ Miriyam la wo tumɛ ma ara bɔ Iyipiti, wo ni wo miri wo ma.

¹⁰ “Ni mɔgɛ do ye ala duruki sigi koe rɔ mɔgɛ do ma tulumɛ la, a ye duruki wo sigila mɔgɛ min ma tulumɛ la, mɔgɛ wo kana don a fɛ bɔn la duruki bi tinɛ.

¹¹A ni a makɔni luyi ma, a tigi ni na a don a bolo nyɔ.

¹²Ni bolo-kolɔn le tuluma-sigilɛ wo la, ala duruki kana ki a ta-nyɔgɛ wo bolo kudu, ha sɔgɔma.

¹³Wura-wo-wura, a si ala duruki wo lasɛgi a tigi ma, a ni to a donna a kan na. Sɔgɔma, a ni a don a ta-nyɔgɛ wo bolo. Wo ko-sunu si ma Mari anubɛ bolo-kolɔn wo diyana-koe la.

¹⁴ “A mara Isirɛla mɔgɔ la wo, a mara sundan na wo, mɔgɔ kana ala wɔli-kɛla bolo-kolɔn kensunya.

¹⁵A wa telen wɔlila gbɛn, yanni tele-kolo-wulan ma, a ni a sarɛ sɔrɔn bawo a makoe ye sarɛ wo la. Ni a ma a sarɛ sɔrɔn a tumɛ rɔ, a si wɔli-tigi wo yasere-masa Mari ye. Hakɛ le wo la wɔli-tigi bolo.

¹⁶ “Wo kana denbɛnu faga anuna dannuna ko-yogomɛnuna ko la. Wo kana dannu fanan faga anu sɔrɔnnɛnuna ko-yogomɛla ko la. Wo ni mɔgɛ bɛɛ bira a nyɛrɛta ko-yogoma-yili la.

¹⁷ “Wo kana sundannu anubɛ kelennɛnuna yo tinya anu bolo. Wo kana kɛɛ-nyaganɛnuna kurɛnu bi anu bolo tulumayɛ la.

¹⁸Wo ni wo miri ko wole fanan bi yɔɔnyɛ rɔ nun Iyipiti nyamanɛ rɔ kɔnɔ wota Mari Alla ya wo hɔrɔya. Woletɔ Mari Alla ya tɔn kɛnu di wo ma.

¹⁹ Wo tenbi wola fui-fannu tɛgɛla tumɛ min, ni wo nyinara minnu ko, wo kana wo yɛ lasɛgi wonu ma ka wo tɛgɛ tun. Wo ni wonu to mɔgɔ-tɔrɔnɛnu ye minnu dɛnbɛna sa, a mara sundan na wo, a mara kelenni na wo, a mara kɛɛ-musu la wo. Ni wo ya wo ma, wota Mari Alla si ata duwɛ layigi wo kuma koe bɛɛ rɔ.

²⁰Ni wo nyinara wola kɔn-gbɔɛ minnu ko a keri tinɛ, wo kana sɛgi wonu keri tinɛ tun. Wonu si ma mɔgɔ-tɔrɔnɛ wonutɛ la.

²¹Wola ki-fannu fanan bi wo nya. Wo wa ban wola ki-fannu nadɛnna, wo kana sɛgi sangban tatenkan tinɛ tun. Min bi tola sangban rɔ, mɔgɔ-tɔrɔnɛnutɛ le wonu na.

²²Wo ni wo miri wole fanan bi tɔrɔyɛ rɔ nun yɔɔnyɛ rɔ Iyipiti nyamanɛ rɔ. Woletɔ wota Mari Alla ya tɔn kɛnu di wo ma.”