Read Kuranko Tɔn-Fɔɛ-Fila-Nyɔgɛ 26 Bible Online

Tɔn-Fɔɛ-Fila-Nyɔgɛ 26 - Kuranko bible

Tɔn-Fɔɛ-Fila-Nyɔgɛ 26

¹“Wota Mari Alla ye nala lanyiri-nyamanɛ min dila wo ma, wo wa ta wo sigi-bole rabɛn nyɔ rɔ tumɛ min,

² wo si wola dɔn-fen-kun-fɔlɛnu bi ka anu sa sendenu tɔ ka ta anu na kan-tina-kelan wo rɔ wota Mari Alla si na min yabɔ wo si a bato kan min.

³Wo si ta a don saraka-masɔlɛ bolo min bi nyɔ wo wati rɔ. Wo ni a fɔ saraka-masɔlɛ wo ye kelen-kelenyɛ ma ko, ‘A sɔgɛ ye ma la ka a fɔ Alla ye ko ma ara na nyamanɛ wo rɔ a ya lanyiri kiri ma benbanu ye minna ko la ma ye. N bi n dantɛgɛla wola ko la.’

⁴“Saraka-masɔlɛ wo si sende wo bi wo bolo ka a sigi wota Mari Allala saraka-mintan-tinɛ yarɔ.

⁵Wo kɔma, wo si a fɔ Mari ya la nyɔ ko, ‘Ma benba anubɛ ala denbayɛ bɔra Aram nyamanɛ rɔ ka to yilan-yilanna ha anu tara anu sigi Iyipiti nyamanɛ rɔ. Anu bi tala nyɔ tumɛ min, anu ma siya kɔnɔ wati-tenbinɛ, a bɔnsɔn ya fanka sɔrɔn ka siyaya.

⁶Iyipiti mɔgɛnu ma ma bira a kin na mumɛ! Anu ya ma fɔrɔsɛ ka ma ma yɔɔnnu na.

⁷Ma ya ma kan nabɔ ma benbanuta Alla ma ka di a dala. Mari Alla ya ma di-kɛ-kan lamɔɛn. A ya ma tɔrɔyanɛ yen.

⁸Mari Alla ya ma labɔ Iyipiti ata kabana-ko-sɛnbɛ la. A ya ko-makilannɛnu nadan ma ye tagama-kilɛ ma alako ma ni bɔ nyɔ.

⁹A nara ma la nyamani-hakikɛ kɛ rɔ.

¹⁰Woletɔ Mari ya dɔn-fen-kun-fɔlɛ min di ma ma, n bara na ntɛ la a ye.’ “Wo wa ban kumɛ kɛnu fɔla tumɛ min, wo ni dɔn-fen-kun-fɔlɛ wonu bi sendenu tɔ ka anu dantɛgɛ Mari ma a bato-koe la.

¹¹Mari ye ko-nyimɛ min kɛla wo ye, wobɛ wola denbayɛnu si baraka bira a ye wola ko la. Wo tenbi nyagalan kɛ la, wo ni a ma, sundannu anubɛ Lifayi bɔnsɔn-mɔgɛ minnu siginɛ wo tɛma, wonu ni kofu wo ma.

¹² “San-sawa wo san-sawa, wo si to wola yakanu dila Lifayi bɔnsɔn-mɔgɛnu ma anubɛ mɔgɔ-tɔrɔnɛ minnu dɛnbɛna sa, a mara sundan na wo, a mara kelenni na wo, a mara kɛɛ-musu la wo. Wo si a ma, mɔgɛ kɛnuna dɔntɛ si a bɔ anu ye anuna soenu tɔ. Wo wa ban wola yakanu ratalala mɔgɔ-tɔrɔnɛnu na,

¹³wo ye kumɛ kɛnu denu fɔla Mari ye ko, ‘N bara nna yaka damasi ratala Lifayi bɔnsɔn-mɔgɛnu na anubɛ sundannu anubɛ kelennɛnu anubɛ kɛɛ-musinu iko i ya a fɔ ma ye nya min nun. N ma ila tɔn tinya, hali ka nyina doni-bɛrɛni ila yaka-bɔ-koe kɛ la.

¹⁴N bi saya-diyi-kɛ la tumɛ min, n ma fenfen bɔ yaka kɛ la ka a dɔn. Wo tumɛ n sɛninyabɛlɛ iko tɔn ya a fɔ nya min, n ma fenfen bɔ ila yaka kɛnu na bɔn la. N ma fenfen bɔ anu na ka anu ma furu-kɔ-fan la. N bara ile Mari kuman-kan bira ka a latɔnbagaya ka a tɛgɛ ila yaka kɛnuna ko ma.

¹⁵Mari, i kolan layigi Isirɛla mɔgɛnu ma ka bɔ Arinyɛni tɔ ka ma mafɛlɛn. Iko i wara lanyiri kiri ma benbanu ye nya min, i ni ita duwɛ layigi male kuma anubɛ nyamani-hakikɛ kɛ i wara min di ma ma kɛ la.’

¹⁶“Wota Mari Alla ara a fɔ wo ye bi, ko wo ni ata tɔn bɛɛsi mara wo sɔndɔmɛ rɔ ka anu bira gben!

¹⁷Wo ya a fɔ bi, ko wo tigi le Mari Alla la. Wo ara lanyiri kiri nun tɔn kɛnu bira-koenu ma. Wo ko a ya min bɛɛsi fɔ wo ye, wo si wonu bira.

¹⁸ Bi, Mari Alla fanan bara wo rabira iko ata mɔgɛnu iko a ya lanyiri kiri wo ye nya min. A ya a fɔ wo ye ko wo ni ala tɔn damasi bira.

¹⁹A si sɛnbɛ di wole Isirɛla bɔnsɔn ma. A si a ma, wole Isirɛla bɔnsɔn si tɔgɔ-nyimɛ sɔrɔn duninya ma ka matɔgɔlɛ anubɛ gbiliyɛ di wo ma ka tenbi bɔnsɔn doinu na. A si wo ma mɔgɔ-sɛnimɛnu na ka wo ma a halala-mɔgɛnu na iko a ara lanyiri kiri wo ye nya min.”