Read Kuranko Tɔn-Fɔɛ-Fila-Nyɔgɛ 27 Bible Online

Tɔn-Fɔɛ-Fila-Nyɔgɛ 27 - Kuranko bible

Tɔn-Fɔɛ-Fila-Nyɔgɛ 27

¹Musa anubɛ ala mɔgɔ-banu ya a fɔ Isirɛla mɔgɛnu ye ko, “Ma ye nala min fɔla wo ye kɛ la bi, wo ni wonu bira.

² Wo wa Yorodan bɛ tɛgɛ wati min ka ta lanyiri-nyamani-hakikɛ rɔ wo benbanuta Mari Alla ye nala min dila wo ma, wo si kuru-belebele-wɛ donu bi ka wonu nadɛn kan-tina-kelen Ebali kɔnkɛ kuma. Wo si kuru-ladɛnnɛ manunku ka tɔn kɛnu damasi sɛbɛ nyɔ ma.

⁵ Wo kɔma, wo ni saraka-mintan-tinɛ ladan nyɔ-kurinu na kundu-fen-gbɛ sa minnu ma.

⁶Wo kana saraka-mintan-tinɛ fenfen nadan kurinu na minnu malɛsɛnɛ kundu-fan la. Wo si to wola saraka-mintantɛnu mintanna gburr, wota Mari Alla ye nyɔ le.

⁷Wo si to wola yisi-kima-sarakɛnu dɔnna nyɔ fanan. Wo ni to sewala nyɔ wota Mari Alla yakɔrɔ.

⁸Wo si tɔn kɛnu sɛbɛ a kin na kuru-manunkunɛ kɛnu kuma.”

⁹Wo kɔma, Musa anubɛ saraka-masɔlɛnu ya a fɔ Isirɛla mɔgɛ bɛɛ ye ko, “Wole Isirɛla mɔgɛnu, wo ni wo yɛ sɔ n na ka wo tole masɔ. Wole ara ma Mari Allata mɔgɛnu na bi.

¹⁰Woletɔ wo ni ala kumɛnu natɔnbagaya ka ata tɔnnu bira n bi nala min dila wo ma kɛ la.”

¹¹Wo tele nyɛrɛ rɔ, Mari ya a fɔ Isirɛla mɔgɛnu ye ko,

¹² “Wo wa ban Yorodan bɛ tɛgɛla tumɛ min, wo bɔnsɔn-mɔgɛ kɛnu si ta anu sɔ Kɛrisim kɔnkɛ bu la ka duwɛ labira, Simiyɔn bɔnsɔn wo, Lifayi bɔnsɔn wo, Yuda bɔnsɔn wo, Isakari bɔnsɔn wo, Yusufu bɔnsɔn wo, anubɛ Bɛnyamɛ bɔnsɔn.

¹³Bɔnsɔn-mɔgɛ doi kɛnu si ta anu sɔ Ebali kɔnkɛ bu la ka dankɛ labira, Rubɛn bɔnsɔn wo, Kadi bɔnsɔn wo, Asɛra bɔnsɔn wo, Sɛbulɔn bɔnsɔn wo, Dan bɔnsɔn wo, anubɛ Nafatali bɔnsɔn.

¹⁴Lifayi bɔnsɔn-mɔgɛnu si dankɛ kɛnu kɛ anu kulu-mayɛlɛnɛ la. Anu si a fɔ ko,

¹⁵ “ ‘Alamɛ Allata dankɛ taranta wo mɔgɛnu kuma minnu bi fannu lɛsɛla bɛsɛnu muninyɛ rɔ ka anu kɔ hali dogɔn rɔ bawo bɛsɛnu ma di Alla ye.’ “Minnu bi danka-kɔnkɛ wo bu la, wonu si a labira ko, ‘Amina.’

¹⁶ “ ‘Alamɛ Allata dankɛ taranta wo mɔgɛnu kuma minnu ti sɔn anu fa anubɛ anu na gbiliya-koe ma.’ “Anu si a labira ko, ‘Amina.’

¹⁷ “ ‘Alamɛ Allata dankɛ taranta wo mɔgɛnu kuma minnu si anu ta-nyɔgɛnuna dan-kurinu bɔ anu gbɛ rɔ.’ “Anu si a labira ko, ‘Amina.’

¹⁸ “ ‘Alamɛ Allata dankɛ taranta wo mɔgɛnu kuma minnu si fiyɔnnu bila kila-yogomɛ fɛ.’ “Anu si a labira ko, ‘Amina.’

¹⁹ “ ‘Alamɛ Allata dankɛ taranta wo mɔgɛnu kuma minnu si mɔgɔ-tɔrɔnɛnuna saratiyi tinya anu bolo, a mara sundan na wo, a mara kelenni na wo, a mara kɛɛ-musu la wo.’ “Anu si a labira ko, ‘Amina.’

²⁰ “ ‘Alamɛ Allata dankɛ taranta wo mɔgɛnu kuma minnu si anu sa anu fanuna musinu fɛ.’ “Anu si a labira ko, ‘Amina.’

²¹ “ ‘Alamɛ Allata dankɛ taranta wo mɔgɛnu kuma minnu si anu sa kolo-fannu fɛ.’ “Anu si a labira ko, ‘Amina.’

²² “ ‘Alamɛ Allata dankɛ taranta wo mɔgɛnu kuma minnu si anu sa anu tirisan-musinu fɛ.’ “Anu si a labira ko, ‘Amina.’

²³ “ ‘Alamɛ Allata dankɛ taranta wo mɔgɛnu kuma minnu si anu sa anu biran-musinu fɛ.’ “Anu si a labira ko, ‘Amina.’

²⁴“ ‘Alamɛ Allata dankɛ taranta wo mɔgɛnu kuma minnu si mɔgɛnu faga hali dogɔn rɔ.’ “Anu si a labira ko, ‘Amina.’

²⁵“ ‘Alamɛ Allata dankɛ taranta wo mɔgɛnu kuma minnu si dogonta-fan bira ka mɔgɔ faga, nɔndɔn sa min na.’ “Anu si a labira ko, ‘Amina.’

²⁶ “ ‘Alamɛ Allata dankɛ taranta wo mɔgɛnu kuma minnu ti sɔn tɔn kɛnu bira-koe ma.’ “Anu si a labira ko, ‘Amina.’ ”