Read Kuranko Tɔn-Fɔɛ-Fila-Nyɔgɛ 28 Bible Online

Tɔn-Fɔɛ-Fila-Nyɔgɛ 28 - Kuranko bible

Tɔn-Fɔɛ-Fila-Nyɔgɛ 28

¹ Musa ya a fɔ Isirɛla mɔgɛnu ye ko, “Ni wo ya wota Mari Alla kuman-kan latɔnbagaya ka ata tɔnnu bira iko n bara min di wo ma kɛ la bi, a si a ma, wo ni sɛnbɛ sɔrɔn ka tenbi sibolo-toenu na duninya rɔ.

²Ni wo ya Marita kuman-kan bira, duwɛ kɛ bɛɛ si ma wotɛ la.

³“Wola soenu anubɛ wola wɔli-kɛ-tinɛnu si duwɛ sɔrɔn.

⁴“Marita duwɛ si to wo ye ka a ma, wo ni yiri boi! Wola fui-fannu ni ma-a-la. Wola kolo-fannu ni siyaya.

⁵“Wola dɔn-fen-namara-sagɛnu anubɛ wola dɛgɛ-ramaga-mirannu si duwɛ sɔrɔn. Anu ta ti kolonya.

⁶“Wo tara kan-bo-kan hali tagama-kilɛ ma, wo ye Marita duwɛ kɔrɔ.

⁷“Wo yogenu ba na wo kɛlɛ tinɛ tumɛ min, anu si bɔ kila kelen fɛ kɔnɔ wota Mari si anu tanyɛnsɛn wo ma. Anu bɛɛ si belenna anu burila wo kɔrɔ kila-siyamɛnu fɛ.

⁸“Marita duwɛ si taran wola wɔlɛnu tɔ, hali wola bondɔnnu ta ti kolonya dɔn-fannu na. Wota Mari Alla ye nala nyamanɛ min dila wo ma, ata duwɛ si taran nyɔ rɔ.

⁹“Ni wo ya Marita tɔnnu bira, a si wo ma a halala-mɔgɛnu na iko a ya lanyiri kiri nya min.

¹⁰Wo kɔma, duninya-mɔgɛ bɛɛ si a lɔn ko Allata mɔgɔ-yabɔnɛ le wole la. Anu si kilan wo la.

¹¹Wota Mari Alla si den-siyaman di wo ma anubɛ kolo-fannu anubɛ sɛnita-fannu lanyiri-nyamanɛ wo rɔ.

¹²Wota Mari Alla si bandɛ lana a wati rɔ ka bɔ ala yi-bara-lafani-belebele-wɛ rɔ san-kole ma. Wo ye wɔlɛ minnu kɛla, ale si wɔlɛ wonu baraka, woletɔ sibolo-gbɛrɛkɛ-mɔgɛnu si ta wole wara dɔndɔ sa tinɛ kɔnɔ wole ti ta anu denu bara yili tɛgɛ tinɛ.

¹³Wota Mari Alla si a ma, wo si ma kun-tiginu na koe bɛɛ rɔ, ado wo ti to kɔma ko-wo-ko rɔ. Ni wo ya tɔn kɛnu bira, wo si to fan bɛɛsi kuma kɔnɔ wo ti to fenfen kɔrɔ.

¹⁴Kɔnɔ Mari ko wo kana ata tɔn tinya doni-bɛrɛni! Wo kana bɛsɛnu kɔ hali ka wo niyi sa anu kuma.”

¹⁵“N bara Allata tɔn min di wo ma kɛ la bi, ni wo ya wo ban wo bira-koe ma, dankɛ kɛnu si wo bira.

¹⁶“Wola soenu anubɛ wola wɔli-kɛ-tinɛnu si dankɛ sɔrɔn.

¹⁷“Wola dɔn-fen-namara-sagɛnu anubɛ wola dɛgɛ-ramaga-mirannu si to dankɛ kɔrɔ. Anu takolɔn si to.

¹⁸“Mari si a ma, wo ti den-siyaman sɔrɔn. A si a ma, wo ra ni bunden iko kɔrɔdagɛ. A si a ma, wola kolo-fannu si kasara.

¹⁹“Wo tara kan-bo-kan, wo ye Marita dankɛ kɔrɔ.

²⁰“Ni wo ya wo ban Mari la ka ko-yogomɛ ma, Mari si yakɔrɔ-mamɔ-belebele lana wo kuma. Tɔ-a-la, wo si kasara pɔɔ!

²¹A si kiraya-kuntan bɛɛ lana wo kuma. Hali mɔgɔ-den-kelen-bɛrɛni kɛndɛ ti to lanyiri-nyamanɛ rɔ.

²²Mari si kiraya-yogomɛnu nana wo kuma minnu si wo bara. Yiri-kirayɛ si wo bira. Kimɛ ti bɔ wo la. Banda mumɛ ti na wola nyamanɛ rɔ. Samɛ si ma iko telema-kerekere wo wati rɔ. Taraba-tele si mɛ wo tɔrɔla ha wola sɛnita-fan bɛɛsi ni gbala. Kɔndɔfili kɛ si to wo kuma ha wo damasi ni faga.

²³San-kole ma si tɛgɛ. Wola dugi si gbɛlɛya iko fara-kole.

²⁴Tɔnkɔlɔn anubɛ telema-fɔnyɔ si gbangban don wo kun na bufan! Banda-yi ma de!

²⁵“Mari si a ma, wo yogenu si wo nɔ. Wo wa ta wo yogenu kɛlɛ tinɛ tumɛ min, wo si ta kila kelen fɛ kɔnɔ wonu si wo ranyɛnsɛn. Wole si belenna wo burila anu kɔrɔ kila-siyamɛnu fɛ. Ni mɔgɔ-gbɛrɛkɛnu ya wo tɔrɔya-nya yen, anu si kilan kati!

²⁶Wo furinu si ma konanu anubɛ sogenu dɔn-fan la. Mɔgɔ ti taran nyɔ min si wonu gben wo furinu ma.

²⁷Mari si sumunu-kirayɛ sigi wo ma iko a ya a ma Iyipiti mɔgɛnu na nya min nun. Tɛlɛ anubɛ tɛli-wonke si taran wo fɛrɛ ma belenna da-wo-da. Nyɛkɛ si wuya wo fɛrɛ ma belenna iko koronya-munke. Kɛnu bɛsi mumɛ ti taran mɔgɔ bolo.

²⁸Mari si wo kumakɔ ka wo fiyonya. Wo ni ma tɔlɔn-tɔlɔn!

²⁹Wo si belenna wo bole mɛmɛla tagama tinɛ tele tɛma iko fiyɔn. Wo ya ko-wo-ko ma, a si tinya wo la. Wo yogenu si to wo kankanna ka wo bira boloko-yogomɛ-kɛ. Wo ti wo dɛnbɛn-mɔgɔ sɔrɔn.

³⁰“Wo si musinu mabira kɔnɔ kei-gbɛrɛkɛ donu si anu furu. Wo si bɔnnu sɔ kɔnɔ wo ti don anu kɔrɔ. Wo si wola ki-fannu ki kɔnɔ hali anu gbɔ kelan, wo ti ke a dɔnna.

³¹Wo yogenu si wola ninkinu boso wo yala kɔnɔ hali a kundunɛ, wo ti a bila wo dɛ rɔ. Anu si wola sofɛlɛnu bi ka ta anu na pon, fɔ ni wo tora anu mafɛlɛnna. Anu ti anu nasɛgi wo ma muk! Wo yogenu si wola sagɛnu tala anu nyɔgɔn tɛma. Mɔgɔ-wo-mɔgɔ ti taran nyɔ min si wo dɛnbɛ.

³²Sibolo-gbɛrɛkɛ-mɔgɛnu si wola dannu bi ka ta anu ma yɔɔnnu na wo yala kɔnɔ sɛ sa wole ye. Wo yɛ ti bɔ kilɛ la wola dan wonu nasɛgi-koe rɔ kɔnɔ fufafu le wo la.

³³Wo wa ban tɔrɔ-dɛgbɛ kɛla sɛnɛ minnu na, sibolo-gbɛrɛkɛ-mɔgɛnu si na sɛnita-fan wonu bi ka ta a la anu bolo pon! Woleta tɔnɛ si ma tɔrɛ anubɛ bosɛ la.

³⁴Wola tɔrɔyɛ si wo kumakɔ ka wo ma tulan!

³⁵Sumunɛ si wo ban ka a fɔlɔ wo kiannu ma ha ka a sigi wo kunyɛnu na. A dumɛ si tagbaya wo ma, ado anu ti kɛndɛya hali!

³⁶“Mari si wole anubɛ wola mansɛ lagbengben ka wo labɔ wola nyamanɛ rɔ ka ta wo don wo yogenu bolo anuna nyamanɛ rɔ. Wo yogenu si to wo gbenna ka ta wo la nyamanɛ do rɔ, wo ma wo kian sɔ wɛ kan min nun, hali wo benbanu. Wo wa ke wonu bole tɔ tumɛ min, wo si anuna bɛsɛnu kɔ. Kɔlɔma anubɛ kuru-malɛsɛnɛ le wonu na.

³⁷Ni nyɔ-mɔgɛnu ya wo tɔrɔ-nya yen, anu ti sisi wo mafɛlɛnna. Anu si wo manyini ka wo lafɛya bɛrɛkɛ!

³⁸“Yanni wo ni ma, wo si fen-siyaman fui kɔnɔ ko ti bɔ anu tɔ kamasɔrɔn kondɔnnu si anu dɔn sa!

³⁹Wo si wola ki-fannu fɛ-bira kɔnɔ wo ti wola kɔn-gbɔɛ wonu yi min, hali ka anu dɔn kamasɔrɔn tunbinu si anu tinya wo bolo.

⁴⁰Ɔlifi-kɔlɔma-siyaman si taran wo bolo kɔnɔ wo ti anu tuli sɔrɔn bawo anu gbɔɛnu pose le ye buila dugi ma.

⁴¹Dannu si taran wo bolo kɔnɔ wo si foo anu na bawo wo yogenu si wonu bira yɔɔnyɛ rɔ.

⁴²Kondɔnnu si na ka wola ki-fan damasi dɔn tɛrr!

⁴³“Sundan minnu bi wo tɛma, wonu fanka si koloya wotɛ ko, wole fanka ma si to yigila doni-doni!

⁴⁴Wole si ta anu denu bara dɔndɔ sa tinɛ kɔnɔ anu denu ti ta wole wara yili tɛgɛ tinɛ. Wonu si ma kun-tiginu na wole kuma koe bɛɛ rɔ. Wole si to anu kɔrɔ.

⁴⁵“Bawo wo ma wota Mari Alla kuman-kan bira min kɛ, woletɔ tɔrɔya-dɛgbɛ kɛ bɛɛ si sigi wo ma ha wo si ban fagala.

⁴⁶Tɔrɔyɛ wo si ma Allata-kiti-misalɛ la wo kegeyɛnu ye burubukai!

⁴⁷Wo ma sɔn Mari sako-kɛ-koe ma wo yisi-sewanɛ la wo tumɛ wo ye wo diya,

⁴⁸woletɔ Mari ye wo yogenu natuntunna wo ma. Wo si tɔrɔ anu ye, wo kannu na si gbala, wo si ma kɔnkɔtoenu na, fɛriyɛ si wo bira, wo si to bolo-kolonyɛ rɔ. Mari si a ma, wo yogenu ni yɔlɔkɛnu sɔ wo kannu na. Ha wo si faga, yɔlɔkɛ wo ye wo kannu na.

⁴⁹“Mari si a ma, sibolo-gbɛrɛkɛ-mɔgɛnu si na wo tɛma ka bɔ wula-yan la pon, wo ti minnu kuman-kan lamɔɛn hali! Wonu si na kɛ wo ma iko bibinu.

⁵⁰Wo yoge kɛnu si na kɛ wo ma ka wo bira boloko-yogomɛ-kɛ. Anu ti kinikini wo ma mumɛ, dennɛnu wo, kinanu wo, anu ti kinikini wo do-wo-do ma.

⁵¹Anu si wola kolo-fannu anubɛ wola sɛnita-fannu bi wo bolo. Kɔnkɛ si wo faga. Wola fui-fen wo, wola ki-fen wo, wola kolo-fen wo, anu si wo bɛɛ bi wo bolo. Wo ye fagala wo nya na le.

⁵²Hali wo yili-madiyanɛ ye tara-layan-bɛ minnu na wola soenu ma, anu si soe wonu damasi bira-a-la wola nyamanɛ rɔ.

⁵³“Anu ba na bui wola soenu ma tumɛ min, dɔn-fannu-sɔrɔn-koe si gbɛlɛya wo kuma ha wota Mari Alla ya dan minnu kerifa wo la, wo si wonu dɔn.

⁵⁴Kɔnkɛ si wo bira dɔgɔma-ma-de, bawo dɔnta-gbɛrɛkɛ ti taran wo bolo. Hali kei-nɔnfulu-tigi minnu bi wo tɛma, wonu si anuna dannu dɔn. Mɔgɔ-nyimɛ wonu ti kinikini mɔgɛ ma ka anu kɔ anuna den-soge wonu tɔ. Hali anuna bara-musinu anubɛ anu dɔgɛnu, hali anuna dan-tomɛnu, anu ti wonu fanan kɔ.

⁵⁵

⁵⁶ Hali musu-nɔnfulu-tigi minnu bi anu diya nun wo tɛma, ni wo do muira kɔnkɔ-wati wo rɔ, ala dan wonubɛ min bi bɔla, a kelen pe si wonu dɔn sa! Hali ala kei min di a ye, wo ti ko lɔn wo rɔ, hali ka a ratala ala dannu na.

⁵⁷

⁵⁸“Ni wo ma wota Mari Alla tɔgɔ-makawanɛ gbiliya ka ata tɔn kɛnu bira minnu sɛbɛnɛ kitabu kɛ rɔ,

⁵⁹Mari si kiraya-yogomɛ kɛnu nana wobɛ wo kegeyɛnu kuma. A si kiraya-dandanbɛlɛnu anubɛ wuka-kirayɛnu nana wo kuma.

⁶⁰A ya kiraya-yogomɛ min bɛɛsi lana Iyipiti mɔgɛnu kuma nun, a si kiraya-yogomɛ wonu kɛ wole fanan ma taragba! Wo ti kɛndɛya mumɛ!

⁶¹Hali kirayɛ minnu bara-koe ma sɛbɛ kitabu kɛ rɔ, wonu si wo bira ka wo kasara feu!

⁶²Hali wo siyayara iko lolenu, wo dande kɛndɛ si to bawo wo ma sɔn Allata kuman-kan latɔnbagayala.

⁶³Iko Mari sewanɛ ya wo lasiyaya nya min ka wo ma fen-tiginu na, ni wo ma ala tɔnnu bira, a si sewa wo nya na le fanan ka wo ma bolo-kolɔnnu na ka wo rabunden sinini! A ye nala lanyiri-nyamanɛ min dila wo ma, a si wo wurun nyɔ rɔ.

⁶⁴“Ka a fɔlɔ duninya-tonko kelan ma ha ka a sigi a tonko-doi la, Mari si wo ranyɛnsɛn sibolo-gbɛrɛkɛ-mɔgɛnu tɛma. Wo tenbi anu tɛma, hali wo benbanu ma bɛsɛ minnu kɔ, wole si wonu kɔ. Kɔlɔma-malɛsɛnɛ anubɛ kuru-malɛsɛnɛ le wonu na.

⁶⁵Wo tara wo sigi kan-bo-kan, wo ti yisi-kimɛ sɔrɔn nyɔ. Wo si ma yilan-yilantoenu na bawo wo ti wo sigi-tina-latelennɛ sɔrɔn wo nyɛrɛ ma. Mari si a ma, wo ni to hɔnna yigi-tɛgɛ bolo. Wo yisi si tinya bawo wo ye masibɛ kɔrɔ tuma-wo-tuma. Wo kumakɔnɛ si to kilan bolo su-ni-tele.

⁶⁶

⁶⁷Wo ya fenfen yen, wo si a ma, wo yisi ni to tugula gbi-gbi! Banda wa ka, a sɔgɛ si wo bira iko wurɛ ni ke tiriya! Wurɛ wa ke, a sɔgɛ si wo bira iko banda ni ka tiriya!

⁶⁸Hali wota Mari ya a fɔ ko wo ti sɛgi Iyipiti tun kɔnɔ wola ko-yogomɛ si a ma, Mari ni wo lasɛgi Iyipiti tun yi-kuma-kulɔn rɔ. Wo wa ke nyɔ tumɛ min, wo si wo nyɛrɛ mayira wo yogenu ma alako wo ni ma yɔɔnnu na anu kɔrɔ kɔnɔ anu ti sɔn wo la.”