Read Kuranko Tɔn-Fɔɛ-Fila-Nyɔgɛ 3 Bible Online

Tɔn-Fɔɛ-Fila-Nyɔgɛ 3 - Kuranko bible

Tɔn-Fɔɛ-Fila-Nyɔgɛ 3

¹Musa ya a fɔ tun ko, “Wo kɔma, ma tara Basan nyamanɛ rɔ kantɔ-wara la. Ma ya a taran, Mansa Ɔku anubɛ ala kɛlɛ-dannu bara kilɛ tɛgɛ ma ma ma kɛlɛ-koe la Ɛdiriya soe dafɛ.

²Mari ya a fɔ nde, Musa ye ko ma kana kilan anu na. A ko a si mansɛ wo don ma bolo ka ala nyamanɛ di ma ma anubɛ ala kɛlɛ-dannu tɛrr! A ko Amora Mansɛ Saihɔn min siginɛ Hɛsibɔn soe burɔ nun, ma ni a ma ale mansɛ la iko ma ya a ma wo la nya min.

³“Ma Mari ya a ma, ma ya nɔ-ko sɔrɔn Mansa Ɔku anubɛ ala kɛlɛ-dannu ma ka anu bɛɛsi faga.

⁴Ma ya anuna so-kun bi-wɔrɛ mumɛ bɛɛsi bira-a-la minnu bi Agabi sigisɔn rɔ Basan nyamanɛ rɔ, Mansa Ɔkuta nyamanɛ, kɔni.

⁵Tara-layan-bɛnu mininɛ soe kɛnu damasi ma. Tarɛ wonu dɛ-rasɔgɔnɛ nɛgɛ-gbaran le la. Anuna so-mɛsɛnɛ donu bi nyɔ, tarɛ minini ma wonu ma.

⁶Ma ya wonu fanan bira-a-la ka a mɔgɛ damasi faga, kei wo, musi wo, hali anuna dennɛnu iko ma ya a ma Mansa Saihɔnta nyamanita-mɔgɛnu na nya min.

⁷Ma ya anuna nɔnfulinu bi anubɛ anuna kolo-fannu ka ta wonu na ma nyɛrɛ ye.

⁸“Ma ya nyamanɛ min bɛɛ sɔrɔn Yorodan bɛ tele-bɔɛ wara la mansa filɛ wonu bolo, a dabirɛ le Anɔn bɛ ma ha ka ta ke Hɛrɔman kɔnkɛ ma.

⁹(Saidon kɛnu ya Hɛrɔman kɔnkɛ kele ko Siriyon. Amoranu ya ale kɔnkɛ kele ko Siniri.)

¹⁰Ma ya kɔnkɔ-kuma-soenu bi anubɛ Kaliyadi nyamanɛ anubɛ Basan nyamanɛ ha ka ta ke tele-bɔɛ wara la ha ka ta ke so fila ma minnu tɔgɛ Salaka anubɛ Ɛdiriya. So filɛ kɛnu bi Basan nyamanɛ rɔ Mansa Ɔku le bolo nun.”

¹¹(Mansa Ɔku kelen pe le tonɛ a niyi la nun Rɛfɛnnu tɔ. Kɔnɔ tɔ-a-la, anu ya a faga. A ya ala nɛgɛ-sofa min nadan, wola yanyɛ, nunkan-nya kɔnɔntɔ. A kɔnɛ, nunkan-nya nani. Ha kaka,[5] ala nɛgɛ-sofa ye Raba soe burɔ Amonnuna nyamanɛ rɔ.)

¹²Musa ya a fɔ tun ko, “Ma ya anuna nyamanɛ bi anu bolo tumɛ min, n ya nyamanɛ wo tala bɔnsɔn filɛ anubɛ a talɛ tɛma. Ka a fɔlɔ Arɔra soe ma min bi Anɔn bɛ dafɛ ha ka ta kantɔ pon, anubɛ Kaliyadi kɔnkɔ-nyamanɛ do, n bara wonu di Rubɛn anubɛ Kadi bɔnsɔnnu ma katarala a soenu ma.

¹³Kaliyadi nyamani-toe anubɛ Basan nyamanɛ, Mansa Ɔku ye kan min nun, kɔni, n ya wonu di Manasa bɔnsɔn-talɛ ma. (Agabi sigisɔn min bi Basan nyamanɛ rɔ, anu bi nyɔ kelela nun ko Rɛfɛnnuna nyamanɛ.)

¹⁴Manasa kegeyɛ do min tɔgɛ Yeya, wo tara bui Agabi sigisɔn-mɔgɛnu ma ka soe wonu bi min bi Basan nyamanɛ rɔ ha ka ta ke Kɛsɔra anubɛ Meyaka nyamanɛnu da kɔrɔ. A ya a tɔgɛ sa soe wonu kuma ka wonu kele ko Yeyaya. Ha bi,[6] anu bi soe wonu kelela wo nya na le.

¹⁵“N bara Kaliyadi nyamani-toe di Makiri kebila-mɔgɛnu ma minnu bɔra Manasa bɔnsɔn rɔ.

¹⁶Ka a dabira Kaliyadi nyamanɛ ma ha ka ta ke Anɔn bɛ ma, n ya wonu di Rubɛn anubɛ Kadi bɔnsɔnnu ma. Dan min bi tala dugu la, wo dan le Anɔn bɛ tɛmɛ la. Dan min bi tala kan tɔ, wo fanan dan le Yabɔki bɛ la min bi anubɛ Amonnu dan la.

¹⁷Bɔnsɔn filɛ anubɛ a talɛ dan min tara tele-yigi wara la, wo dan le Yorodan bɛ la ka a fɔlɔ Kalili dalɛ ma ha ka ta ke Dalɛ Faganɛ[7] ma ha ka ta ke Pisiga kɔnkɛ kɔrɔ.

¹⁸ “Wo wati nyɛrɛ rɔ, n ya a fɔ bɔnsɔn filɛ anubɛ a talɛ ye ko ma Mari Alla ya a ma, anu bara Yorodan-bɛ-kɔmɛ kɛ sɔrɔn tele-bɔɛ wara la. Anu ni a ma, anuna kɛlɛ-dannu ni anu tabɛn ka wuli. Yanni bɔnsɔn-toenu ni bɛ tɛgɛ, anu fɔlɔn ni bɛ tɛgɛ. N ko anu ni ta anu na-kelen-nyɔgɛnu dɛnbɛ kɛlɛ-kɛ-tinɛ.

¹⁹N ya a fɔ ko kɛlɛ-dan wonu ni anuna musinu to anu kɔma anubɛ anuna dannu anubɛ anuna kolo-fannu. (N ya a lɔn ko anuna kolo-fannu siya.)

²⁰N ko anu ni anu ta-nyɔgɛnu dɛnbɛ ha anu fanan ni anu sigi-bole rabɛn yisi-kimɛ rɔ Yorodan bɛ kɔgɔma tele-yigi wara la, Mari ya lanyiri kiri anu ye nyamanɛ minna ko la nun. Mari ara ban anutɛ rabɛnna anu ye. N ko anu ba ban anu na-kelen-nyɔgɛnu dɛnbɛna kɛlɛ la, anu denu fanan si sɛgi anu kɔma-kilɛ la ka na anu sigi anuta nyamanɛ kɛ rɔ yan.

²¹“Wo kɔma, n ya a fɔ Yasowa ye ko, ‘Wota Mari Alla ara min ma Mansa Saihɔn anubɛ Mansa Ɔku la, i wara a yen i nyɛrɛ yɛ la serr! I tara nyamani-wo-nyamani kɛlɛ, Mari si wo nyɔgɔn ma wo ye.

²²Wo kana kilan anu na. Wota Mari Alla nyɛrɛ si kɛlɛ kɛ wo ye.’

²³ “Wati wo nyɛrɛ rɔ, n ya Alla matara ko,

²⁴‘Allatala, n ya a lɔn ko i ye ko-nyimɛ minnu kɛla ma ye yarɔma, i wara a fɔlɔtɛ yira n na ita kabana-koe fɛ kaka. Alla-gbɛrɛkɛ sa san-kole anubɛ dugu-kole ma min si ke kabana-koe ladanna iko ile.

²⁵I yandi, Mari, a ma, n ni Yorodan bɛ tɛgɛ. N ni dugu-hakikɛ wo yen n yɛ la bɛ kɔgɔma. N ni kɔnkɔ-nyamani-hakikɛ wo yen n yɛ la anubɛ Lɛbanan kɔnkɛnu.’ ”

²⁶Wo kɔma tun, Musa ya a fɔ Isirɛla mɔgɛnu ye ko, “Wole Isirɛla mɔgɛnu denu ya a ma, Mari Alla fonde bɔra nde kuma. A ma sɔn ka a wɔlɔ matɔlɔ nna madiyali-kɛ-kan la. Woletɔ Mari ya a fɔ n ye ko n kana kumɛ kɛ nyɔgɔn fɔ tun. Ntɛ ara a bɔ.

²⁷Mari ya a fɔ n ye tun ko, ‘I si min ma, yɛlɛ Pisiga kɔnkɛ kuma. I ni lanyiri-nyamanɛ mafɛlɛn. I ni dugula-waralɛ mafɛlɛn anubɛ kantɔ-waralɛ. Wo kɔma, i ni tele-bɔɛ waralɛ mafɛlɛn anubɛ tele-yigi waralɛ. A mafɛlɛn a kila-bɛrɛbɛrɛ fɛ bawo wo sɛ sa i ye ka Yorodan bɛ wo tɛgɛ.’

²⁸Mari ko Yasowa min bi nala sigila n gbɛ rɔ, a si na min ma, n ni wo fɔ ale ye. N ni a makawandi ka a sɛnbɛ don bawo ale le ye tola mɔgɛnu kuma ka ta anu sigi nyamanɛ wo rɔ nde, Musa ya min mafɛlɛn.

²⁹Wo kɔma, ma mɛra lɛɛ rɔ min bi Bɛti-Piyɔri soe da kɔrɔ.”