Read Kuranko Tɔn-Fɔɛ-Fila-Nyɔgɛ 4 Bible Online

Tɔn-Fɔɛ-Fila-Nyɔgɛ 4 - Kuranko bible

Tɔn-Fɔɛ-Fila-Nyɔgɛ 4

¹Musa ya a fɔ Isirɛla mɔgɛnu ye tun ko, “Wo ni wo tole masɔ! N bi nala tɔn min bɛɛsi fɔla wo ye kɛ la, wo ni anu bira gben! Ni wo ya wo ma, wo benbanuta Mari Alla ye nala nyamanɛ min dila wo ma, wo si simayɛ sɔrɔn ka sigi yisi-kimɛ rɔ nyɔ rɔ kaka!

² N bi nala min fɔla wo ye, wo kana fenfen sa tɔn wo kuma, ado wo ka fen bɔ a la. N bi nala ma Mari Allata kumɛ minnu fɔla wo ye kɛ la, wo ni wo bira gben!

³ “Wo tumɛ ma ye Piyɔri kɔnkɛ fɛ, wo nyɛrɛ-nyɛrɛ ya a yen Mari ya min ma wo wati rɔ. Minnu ya Beyali bɛsɛ kɔ, Mari ya wonu faga nya min, wo ya a yen wo nyɛrɛ yɛ la serr!

⁴Kɔnɔ mɔgɛ minnu ya anu telen wota Mari Alla ye wo wati rɔ, ha kaka wonu kɛndɛ.

⁵“N bara ban wo karanna nta Mari Allata tɔnnu na, a ya min fɔ n ye nun. Wo wa ta nyamanɛ wo mɔgɛnu kɛlɛ tumɛ min ka wo sigi nyɔ, wo ni tɔn kɛnu bira.

⁶Ni wo ya tɔn kɛnu bira, wo si a yira sibolo-gbɛrɛnu na ko hɛnkilimɛ le wole la. Anu ba wola tɔn kɛnu wara-koe lamɔɛn, fɔ anu ba a fɔ ko, ‘Mɔgɛ kɛnu kusan ko ladanna, anu hɛnkili kolo.’ ”

⁷Musa ya a fɔ kɛ kɔma tun ko, “Hali sibolo-gbɛrɛkɛ-mɔgɛnu siya ka tenbi ma la, anuta bɛsɛnu sa anu dɛnbɛna iko mata Mari Alla ye ma fɛ nya min ka ma dɛnbɛ ni ma ya a tɔgɛ rakele wati min.

⁸Hali sibolo-gbɛrɛkɛ-mɔgɛnu siyayara ka tenbi ma la kɔnɔ tɔn sa anu bolo minnu natelennɛ iko n bara wo karan min na kɛ la bi.

⁹“Wo ni a ma wo fɛrɛma de! Wo ara min yen wo nyɛrɛ yɛ la kɛ la, wo kana nyina wo ko wo siyi-tele bɛɛ kɔrɔ. Wo benbanu ya min yen anu sɔra Mari yakɔrɔ Sinayi kɔnkɛ kɔrɔ tumɛ min, wo ni wo rakaran wola dannu anubɛ wo mamanɛnu ye. Mari ya a fɔ nde, Musa ye nun ko n ni Isirɛla mɔgɛnu nadɛn kan-tina-kelen kɔnkɛ wo kɔrɔ nyɔ. Mari ko a sɔgɛ ye a la, anu ni a lamɔɛn a ye nala min fɔla nyɔ woletɔ anu si ale Mari gbiliya anu siyi-tele bɛɛ rɔ. Wo si a ma, anu ni anuna dannu karan alako anu si mata Mari Alla gbiliya nya min.

¹⁰

¹¹ “Wo ni a fɔ wola dannu ye ko wo tumɛ wo sɔnɛ Sinayi kɔnkɛ kɔrɔ, Mari ya Sinayi kɔnkɛ yamatogon banda-fin-digidigi-wɛ anubɛ ta-sisi-fin-bɛ la anubɛ ta-mɛlan min bi yɛlɛla fɔ san-kole.

¹²Wo ni a fɔ anu ye fanan ko wo ya Mari kuman-kan lamɔɛn ka bɔ ta-mɛlan wo rɔ kɔnɔ wo ma ke ale yenna wo yɛ la.

¹³ A ya a fɔ wo ye wo si ata sarama-kan bira nya min. A ya ata tɔn tan minnu sɛbɛ kuru-walan fila ma, wo ni wonu natɔnbagaya.

¹⁴ Mari ya a fɔ n ye ko n ni wo karan tɔn wo bɛɛsi la, woletɔ wo wa ta nyamanita-mɔgɛ wonu kɛlɛ ka wo sigi nyɔ, wo si to wo mirila Marita tɔn kɛnu ma ka a latɔnbagaya worɔ.”

¹⁵Musa ya a fɔ Isirɛla mɔgɛnu ye ko, “Mari ye kumala wo ye ka bɔ ta-mɛlan rɔ tumɛ min Sinayi kɔnkɛ kuma, wo ma ke a yenna, hali ala muninyɛ. Woletɔ min fisa, wo ni a ma wo fɛrɛma,

¹⁶ wo kana ko-yogoma ma ka bɛsɛnu nadan. Wo kana bɛsɛ ladan minnubɛ hadama-dan muninyanɛ.

¹⁷Wo kana sogenu muninyɛ ladan bɛsɛ la, ni wo ma, konanu, ni wo ma, yɛgɛnu.

¹⁸ Fenfen sufa min bi a niyi la, wo kana wonu muninyɛ ladan ka anu kɔ.

¹⁹Fenfen min bi san ma iko tele anubɛ karɛ anubɛ lolenu, wo kɔ-sɔgɛ kana wo bira. Wota Mari Alla ya wonu di duninya mumɛ ma[8] le.

²⁰ Wo mɔgɛ le wole la Mari ya minnu nabɔ tɔrɔya-fafanɛ rɔ Iyipiti nyamanɛ rɔ min manɛ iko wɔnkɔrɔ-tɛ. A ya wo labɔ nyɔ alako wo ni ma aletɛ la. Wo ye wo nya na le ha bi.

²¹ Wole le ya a ma, Mari kɔrɔtɔra nde, Musa ma. A ya a fɔ ka a gbɛlɛya gben, ko nde ti ta lanyiri-nyamanɛ rɔ.

²²Nde sa bɛ tɛgɛla tun, ado n bi nala fagala kaka. Kɔnɔ a ara to doni, wole ye bɛ tɛgɛla ka don nyɔ.

²³Wo ni a ma wo fɛrɛma, wo kana nyina wobɛ Mari Alla sarata min na. Wo ni ata kumɛ bira, wo kana bɛsi-wo-bɛsi ladan wo nyɛrɛ ye

²⁴ bawo wota Mari Alla mani de iko ta-wɔnkɔrɔmɛ. A sa nyinina a ma ko fenfen ni a senaya.[9]

²⁵“Wo mɛra nyɔ nya-wo-nya, wo ni dannu sɔrɔn anubɛ wo mamanɛnu, wo kana bɛsi-wo-bɛsi ladan. Bɛsi-yogomɛ-ladan-koe kana wo don hakɛ rɔ. Ko-yogomɛ le wo la Mari yala. Wo si a ma, a fonde ni bɔ wo kuma.

²⁶“San-kole anubɛ dugu-kole si ma n sereyɛ la bi. Ni wo ma nna kumɛ bira, wo wa Yorodan bɛ tɛgɛ tumɛ min ka ta lanyiri-nyamanɛ wo rɔ, wo ti mɛ nyamanɛ wo rɔ! Wo si tunu yen!

²⁷ Wo kɔma, Mari si wo ranyɛnsɛn. Wo si basan sibolo-gbɛrɛkɛnu na. Wo siyaman si faga. Wo ma ni dɔgɔya.

²⁸Mɔgɔ-gbɛrɛkɛnu bara bɛsɛ minnu nadan anu nyɛrɛ bole la, wo si wonu kɔ. Bɛsɛ wonu ti ke fen yenna, anu ti ke fan sumɛ birala, anu ti ke fen dɔnna, anu ti ke ko lamɔɛnna bawo kɔlɔma anubɛ kuri le wonu na mɔgɛnu ya minnu nadan anu bole la.

²⁹ Wo wati rɔ, ni wo tora wo yɛ lakalanna wota Mari Alla ma ka a nyini wo yisi bɛɛ la, wo si a yen yati!

³⁰Wo tenbi yakɔrɔ-mamɔɛ kɛ rɔ tumɛ min, ado koe kɛ bɛɛ ni ma wo la kɔnɔ tɔ-a-la, wo si wo yɛ lamunun Mari la ka ata kumɛ latɔnbagaya,

³¹a si kinikini wo ma worɔ. A ti wo boloka, a ti wo halaki. Anubɛ wo benbanu ya sarama-kan min kiri, a ti nyina wo ko.

³²“Ka a fɔlɔ duninya dan wati ma ha ka a sigi kaka la, ni min bara kɛ sufa kabana-koe yen a yɛ la ka a lamɔɛn a tole la, wo ni nyinikalɛ wo sa kan tinɛ bɛɛ rɔ.

³³Ha bi, wo ara a lamɔɛn Mari ara kuma mɔgɛ donu na ta-mɛlan rɔ wa, anu kɛndɛ ni to?

³⁴Ka a bi fɔlɔfɔlɔ ma ha ka a sigi kaka la, ha bi, wo ara a yen bɛsɛ ara sibole do kunka iko Alla ya wo kunka Iyipiti nyamanɛ rɔ wati min sibolo-gbɛrɛkɛ bolo wa, ka anu ma ata mɔgɛnu na a nyɛrɛ ye? Wo nyɛrɛ yala serr, Mari ya ata kabana-koenu mayira ka kɛlɛ kɛ wo ye ka ko-makawanɛnu kɛ anubɛ ka ko-makilannɛnu kɛ.

³⁵ Mari ya wo bɛɛsi yira wo la ka a ragbɛ wo ye alako wo ni la a la ko a kelan le Alla la. Alla-gbɛrɛkɛ sa duninya rɔ fɔ ale kelen pe.

³⁶A ya a ma, wo ya a kuman-kan lamɔɛn san-kole rɔ alako a si wo karan. A ya a ma, wo ya ata ta-sɛnimɛ yen. A kumara wo rɔ wo ye.

³⁷Bawo wo benba benbɛnu di a ye min kɛ, woletɔ a ya wole yabɔ Iyipiti ka na wo la yan ata sɛnbɛ fɛ.

³⁸Wo tenbi tagamana nun, a ya wo yogo-siyamɛnu gben wo yarɔ minnu tagbɛlɛ wo ko. A ya wo ma alako wo ni anuna nyamanɛ sɔrɔn wo siginɛ min tɔ kaka.

³⁹Wo ni wo miri bi ko. Wo kana nyina. Mari le Alla la san-kole rɔ anubɛ dugu-kole kuma. Mari-gbɛrɛkɛ sa nyɔ ale kɔma.

⁴⁰N bi tɔn minnu dila wo ma bi, wo ni wonu bira a kila-bɛrɛbɛrɛ fɛ. Ni wo ya wo ma, ka a bi wole ma ka a sigi wo kegeyɛnu na, koe bɛɛ si bɛn wole ma. Wota Mari Alla ye nala nyamanɛ min natenbila wo ma kɛ la, wo si simayɛ sɔrɔn wo rɔ. A si to wo bolo habadan!”

⁴¹ Musa ya so sawa yabɔ Yorodan bɛ tele-bɔɛ wara la ka anu ma mɔgɔ-lakisi-soenu na.

⁴²Ni mɔgɛ ya mɔgɔ faga, a yogo ma min na, ado a ma a lawuli a ma, mɔgɛ wo si a buri ka ta lakisi-soe wo do rɔ. Mɔgɔ-faganɛ wo na-kelen-nyɔgɛ ti ke a fagala worɔ.

⁴³Soe wonu tɔgɛ le kɛnu na, Bisa min bi Rubɛn bɔnsɔn-mɔgɛnuta nyamanɛ rɔ kɔnkɛ kuma wula-da-rakolɔn rɔ, Ramɔti min bi Kadi bɔnsɔn-mɔgɛnuta nyamanɛ rɔ Kaliyadi nyamanɛ rɔ anubɛ Kolan min bi Basan nyamanɛ rɔ, kɔni. Manasa bɔnsɔn-mɔgɛnu sigira nyɔ.

⁴⁴Musa ya Marita tɔn karan Isirɛla mɔgɛnu ye

⁴⁵anu bɔɛ Iyipiti nyamanɛ rɔ. A ye a karanna anu ye tumɛ min, wo ya a taran, anu bi Yorodan bɛ dafɛ Bɛti-Piyɔri soe da kɔrɔ. Dugi kan tinɛ wo ye Amora Mansa Saihɔn le bolo nun. Wo siginɛ Hɛsibɔn soe burɔ nun.

⁴⁶

⁴⁷Musa anubɛ Isirɛla mɔgɛnu bɔɛ Iyipiti nyamanɛ rɔ ka na nyɔ, anu ya mansɛ wonubɛ ala mɔgɛnu nɔ. Anu sigira Mansa Saihɔn anubɛ Mansa Ɔkula nyamanɛnu tɔ. Mansa Ɔku, wotɛ le Basan nyamanɛ la nun. Isirɛla mɔgɛnu ya nyamanɛ min bi tele-bɔɛ wara la,

⁴⁸dan wo le ya a fɔlɔ Arɔra soe ma min bi Anɔn bɛ dafɛ. Dan wo le tara fɔ Hɛrɔman kɔnkɛ ma, anu bi a fɔla min ma fanan ko Siriyon kɔnkɛ.

⁴⁹Kan tinɛ kɛ do ye Dalɛ-Faganɛ wara la Yorodan bɛ tele-bɔɛ wara la. Dan wo ye tala tele bɔɛ ha Pisiga kɔnkɛ.