Read Kuranko Tɔn-Fɔɛ-Fila-Nyɔgɛ 6 Bible Online

Tɔn-Fɔɛ-Fila-Nyɔgɛ 6 - Kuranko bible

Tɔn-Fɔɛ-Fila-Nyɔgɛ 6

¹Musa ya a fɔ Isirɛla mɔgɛnu ye tun ko, “Mata Mari Alla ya tɔn kɛnu don n bolo ka wo karan anu na. Wo ye nala wo sigila wola nyamanɛ min tɔ kaka, wo wa ke nyɔ rɔ, wo si tɔn kɛnu bira.

²Wole wo, wola dannu wo, anubɛ wo mamanɛnu ni to wota Mari Alla gbiliyala ka ata tɔnnu bira. Fananta wo ye wo niyi la, ni wo ya wo ma, wo si mɛ siginɛ nyamanɛ wo rɔ.

³Wole Isirɛla mɔgɛnu, ni wo si tɔn kɛnu lɔn de a kila-bɛrɛbɛrɛ fɛ ka anu bira, koe bɛɛ si ta a kilɛ fɛ ka diya wo la. Wo bɔnsɔn si siyaya nyamani-hakikɛ wo rɔ iko wo benbanuta Alla kɛ ya lanyiri kiri anu ye nya min nun.

⁴ “Wole Isirɛla mɔgɛnu, wo ni kɛ lamara wo sɔndɔmɛ rɔ gben, ka a lɔn ko Mari kelen pe kɛ le mata Alla la.

⁵ Wo ni wota Mari Alla keni wo yisi bɛɛ la anubɛ wo sɔndɔmɛ bɛɛ la anubɛ wo sɛnbɛ bɛɛ la.

⁶ Woletɔ n bara tɔn min takaran wo ye nun, wo kana nyina wonu ko.

⁷Wo taranta kan-bo-kan, wo ni to wola dannu makolola karan kɛ la. Wo tenbi luyi ma wo, wo tenbi bɔn na wo, wo tenbi wɔlila wo, wo tenbi wo sulenna wo, wo ni to a karanna wola dannu ye tuma-wo-tuma.

⁸Wo ni anu sɛbɛ ka anu kiri wo bolenu na. Wo ni anu kiri wo telɛnu ma fanan, woletɔ wo si to wo mirila anu ma a kilɛ fɛ.

⁹Wo ni anu sɛbɛ wola bonda-dɛ tɔnkɔn filɛ ma anubɛ wola soenu tarɛ-don-dɛ ma.”

¹⁰ Musa ya a fɔ anu ye tun ko, “Iko wota Mari Alla ya lanyiri kiri wo benbanu ye nya min, Iburayima, Isiyaka, anubɛ Yakoba, kɔni, a ko a si nyamanɛ di wo ma so-belebelenu sɔnɛ min tɔ wo ma minnu sɔ. Anu kin. Nɔnfuli siyaman bi anu tɔ.

¹¹Wo si bɔnnu nafanɛ taran fen-nyima-siyaman na, wo ma tɔrɔ minnu na. Wo si kɔlɔnnu taran, wo ma minnu sin. Wo si ki-fen-siyaman taran, wo ma minnu ki. Mari wa ta wo la nyɔ tumɛ min, wo si dɔnta siyaman sɔrɔn minnu si wo wasa.

¹²Wo ni a ma wo fɛrɛma, wo kana nyina Mari ko min ya wo labɔ yɔɔnyɛ rɔ Iyipiti nyamanɛ rɔ.

¹³ Wo ni wola Mari Alla gbiliya ka ale kelen pe bato. Wo kana lanyiri kiri fenfen ye fɔ ale Alla kelen pe tɔgɛ rɔ.

¹⁴Wo kana bɛsi-wo-bɛsi kɔ minnu bi wo sigi-nyɔgɛnu bolo wola foolɛ rɔ.

¹⁵Ni wo ya bɛsi-gbɛrɛkɛnu kɔ Mari kɔma, a si ata diminyɛ layigi wo kuma ka wo halaki pɔɔ! Wota Mari Alla min bi wo fɛ, a sa nyinina a senɛ ma.

¹⁶ “Wo kana wota Mari Alla kɔrɔbɔ iko wo ya a ma nya min Kɔrɔbɔ-Tinɛ[10] wulɔn.

¹⁷Wo ni a ma wo fɛrɛma. A ara tɔn min bɛɛsi di wo ma, wo ni ata tɔn wo damasi bira.

¹⁸Mari ya min bɛɛsi fɔ wo ye, ni wo ya ko-nyimɛ anubɛ ko-latelennɛ wonu kɛ, wo wara-koe si ta yarɔ. Wo si ke le worɔ ka wo yogenu gben ka lanyiri-nyamani-hakikɛ wo bi anu bolo iko Mari ya a fɔ wo ye nya min.

²⁰“Ni a taranta, wola dannu ya wo manyinika lunyɛ do ko, ‘Nfen ya a to, mata Mari Alla ya tɔn kɛnu di ma ma ko ma ni anu bira?’

²¹Wo si anu yabi ko, ‘Wo tumɛ ma ye yɔɔnyɛ rɔ Iyipiti mansɛ kɔrɔ, wo wati rɔ, Mari ya ma bɔ nyɔ ata sɛnbɛ la.

²²Ma ya Marita kabana-koenu yen ma nyɛrɛ yɛ la nyɔ anubɛ a ya ko-makilannɛ minnu ma Iyipiti mansɛ anubɛ ata mɔgɛnu na.

²³A ya ma labɔ Iyipiti ka na ma la yan tɔ ka nyamanɛ kɛ di ma ma iko a ya lanyiri kiri ma benbanu ye nya min.

²⁴Mata Mari Alla ya a fɔ ma ye ko ma ni tɔn kɛnu bira ka ale Mari gbiliya. Ni ma ya wo ma, a si ma kandan ka ma makoenu nyinya iko a ye wo mala nya min kaka.

²⁵Ni ma tora latelan rɔ Mari ye ka tɔn bɛɛsi bira, ma si ma a yala telenbagɛnu na worɔ.’ ”