Read Kuranko Tɔn-Fɔɛ-Fila-Nyɔgɛ 7 Bible Online

Tɔn-Fɔɛ-Fila-Nyɔgɛ 7 - Kuranko bible

Tɔn-Fɔɛ-Fila-Nyɔgɛ 7

¹ Musa ya a fɔ Isirɛla mɔgɛnu ye tun ko, “Wota Mari Alla si ta wo la nyamanɛ wo rɔ, wo ye nala sigila kan min. Wo tamatoe, wo si sibolo wɔrɔnfila gben wo yarɔ. Wonu fanka kolo wotɛ ko, ado anu siya wo ko. Sibole wonu tɔgɛ le kɛnu na. Hɛtinu wo, Kagasanu wo, Amoranu wo, Kenannu wo, Perasanu wo, Hefanu wo, anubɛ Yebusinu.

²Wota Mari Alla wa mɔgɛ kɛnu don wo bolo tumɛ min ka anu nɔ, wobɛ mɔgɛ wonu kana ko-wo-ko lakiri wo nyɔgɔn tɛma. Wo kana kinikini anu ma fanan, fɔ ka anu damasi faga tɛrr!

³Wo kana furu-ko-lundan bila wo nyɔgɔn tɔ. Wo kana wola den-sunkurɔnnu di anuna den-keminɛnu ma. Wole fanan ka sɔn anuna dunmusinu furula wola den-keminɛnu ye.

⁴Ni wo ya wo ma, wo si a ma, wola dannu si anu kan-kɔ sɔ Mari la ka anu nyɛrɛ don bɛsi-kɔ-koe rɔ. Ni anu ya anu don wo rɔ, Mari fonde si bɔ wo kuma ka wo damasi halaki pɔɔ!

⁵ Woletɔ wo ni anuna saraka-mintan-tinɛnu wayan ka anu tanyɛnsɛn. Anu bi kuru-lɛsɛnɛ minnu kɔla, wo si wonu tatii. Anuna kɔlɔma minnu muninyanɛ anuna bɛsi-musumɛ la min tɔgɛ Asura, wo ni wonu tɛgɛ ka anu mintan.

⁶ Wo ye wo damasi mala bawo Mari Allatɛ le wole la. A ya wole ma mɔgɔ-yabɔnɛnu na duninya-mɔgɛnu tɛma ka wole ma a halala-mɔgɛnu na.

⁷“Mari ma wole keni ka wo yabɔ bawo wo siya sibolo-doinu ko, ado a ye wo yabɔla wati min, sibolo-dɔgɔmanɛ le wole la nun duninya-sibolenu tɛma.

⁸Mari ya wo kunka ka wo bɔ yɔɔnyɛ rɔ Iyipiti mansɛ bolo bawo a ya wo keni, ado a sɔgɛ ye a la, a ya lanyiri min kiri wo benbanu ye, a si wo kanbali.

⁹ Wo ni a lɔn serr, ko wota Mari Alla kelen pe le wota Alla la. A ti wo baya tele-kelen-bɛrɛni! A si ata lanyiri kanbali wo wara la. A si ata keninteyɛ yira wo bɔnsɔn-matiyinu na minnu si ata tɔnnu bira ka ale fanan keni.

¹⁰Mari ti foo wo mɔgɛnu na minnu ma la ale la ka anu ban a la.

¹¹Woletɔ n bara wo karan tɔn min na kɛ la bi, wo ni anu bira wo bolo filɛ la.

¹² “Ni wo ya wo tole masɔ tɔn kɛnu na ka anu bira a kila-bɛrɛbɛrɛ fɛ, wota Mari Alla si ata lanyiri kanbali wo ye worɔ. A si wo keni worɔ tolon, iko a ya lanyiri kiri wo benbanu ye nya min.

¹³A si wo keni ka ata duwɛ layigi wo kuma. Wo ni siyaya ka yiri boi! A si ata duwɛ layigi wola nyamanɛ rɔ, wo ni ki-fen-siyaman sɔrɔn. Alla si ata duwɛ layigi wo kuma, wola kolo-fannu si sabati. A si duwɛ kɛnu di wo ma lanyiri-nyamanɛ wo rɔ.

¹⁴Sibolo mumɛ sa duninya rɔ min si duwa-su-kɛnu sɔrɔn iko wole. Wo do-wo-do gbandɛ ti to, hali wola kolo-fannu.

¹⁵Mari si wo tanka kiraya-yogomɛ su bɛɛ ma. Wo duruta kiraya-yogoma-su minnu sɔrɔnna Iyipiti, wonu ti wo bira tun, fɔ wo yoge minnu bi wola foolɛ rɔ.

¹⁶Mari Alla ye sibole minnu donna wo bolo, wo kana kinikini anu ma. Wo ni anu damasi faga tɛrr! Wo kana anuna bɛsɛnu kɔ. Ni wo ya wo ma, wo si ma gbalo la wo ye.

¹⁷“Wo ka kilan wo yogenu na bawo anu siya wo ko. Hali anu siya, wo si ke le ka anu gben. Wo ni wo miri Mari ya min ma Iyipiti mansɛ anubɛ ata mɔgɛnu na.

¹⁹Wo ni wo miri tɔrɔya siyamɛ wonu ma Mari ya min sigi anu ma wo fanu yala. Wota Mari Alla ya ata kabana-koenu anubɛ ata fanka mayira ka wo kunka. A ya Iyipiti mɔgɛnu kasara nya min, wo kilannɛ Kenan nyamanita-mɔgɛ minnu na, a si wonu fanan kasara wo nya na le.

²⁰Hali min ya anu buri wo kɔrɔ ka ta anu dogon, Mari si a ma, anu ni faga kumakɔɛ bolo.

²¹Wo ka kilan mɔgɛ kɛnu na mumɛ! Wota Mari Alla ye wo fɛ. Alla-makawanɛ le ale la. A bɛnta mɔgɛ ni kilan a la.

²²A si to sibole wonu gbenna wo yarɔ doni-doninyɛ ma. A ti mɔgɛ wonu faga wo yarɔ latiriya-bole ma. Ni a ya wo ma, sogo-feremɛnu si siyaya nyamanɛ wo rɔ ka ma setanɛ la wo ye.

²³A si wo yogenu don wo bolo. A si a ma, wo ni wonu faga kumakɔɛ bolo.

²⁴Mari si a mansɛnu don wo bolo ka anu faga. Anu tɔgɛ ra si de ka tunu yen! Mɔgɔ-wo-mɔgɔ ti ke kilɛ tɛgɛla wo ma. Wo si anu dama faga tɛrr!

²⁵Wo ni anuna bɛsɛnu mintan. Sɛnɛ anubɛ wodi-gbɛ minnu bi anuna bɛsɛnu ma, a sɔgɔ kana wo bira ka wonu bi. Ni wo ya wo ma, wo si ma gbalo la wo ye bawo wo ko-sunu ma di Alla ye hali doni bɛrɛni!

²⁶Anuna bɛsɛ wonu sɔgɛ la ni bɔ wo la lass bawo anu bi Marila dankɛ le kɔrɔ. Ni wo ya bɛsɛ kɛ do bi ka na a la wola bɔnnu na, dankɛ min bi anu kuma, wo si wole fanan bira.