Read Kuranko Tɔn-Fɔɛ-Fila-Nyɔgɛ 8 Bible Online

Tɔn-Fɔɛ-Fila-Nyɔgɛ 8 - Kuranko bible

Tɔn-Fɔɛ-Fila-Nyɔgɛ 8

¹“N bara Marita tɔn kɛ minnu di wo ma kɛ la bi, wo ni anu bara-koe ma wo fɛrɛma. Ni wo ya wo ma, wo si taran wo diya ka siyaya. Wo si mɛ sigini lanyiri-nyamanɛ wo rɔ.

²Wo ni wo miri de Mari sɔra wo yarɔ wula-da-rakolɔn kɛ rɔ san bi-nanɛ kɔrɔ. Mari ya yakɔrɔ-mamɔɛ lana wo kuma ka wo mafɛlɛn ka a lɔn ni wo ye nya min, ni wo si ala tɔnnu bira le.

³ A ya a yira wo la ko wo makoe ye ale la woletɔ a ya wo lakɔnkɔ. Wo kɔma, a ya biredi-su do di wo ma hali wo benbanu ma min dɔn nun. A ya wo ma alako wo kana wo to dɔntɛ dɔrɔn ma, fɔ ale Allata kumɛ, wo ni ma wola dɔn-fan la.

⁴San bi-nanɛ kɛ kɔrɔ, wola kurɛnu ma gbasa-gbasan wo ma, ado wo kiannu ma yiri.

⁵Wo ni a lɔn fanan yati, ko Mari Alla si wo kolo iko wo fanu si wo makolo nya min.

⁶Wola ko la, wo ni a ma iko Mari ara a fɔ wo ye nya min. Wo si a gbiliya ka ata tɔnnu bira gben!

⁷Wota Mari Alla ye nala nyamani-hakikɛ dila wo ma. Bɛnu anubɛ yi-nɛnu anubɛ tenkenu bi bɔla folo-kunyɛ anubɛ kɔnkɛnu tɔ nyɔ.

⁸Ki-fen anubɛ fui-fen-su bɛɛ ye nyɔ anubɛ liyi.

⁹Kɔnkɔ ti wo bira nyɔ. Fenfen ti dasa wo ma nyɔ. Wo si nɛgɛnu taran farɛnu tɔ. Wo si kɔnkɛnu sin ka silɛɛ bɔ anu tɔ.

¹⁰Wo wa fa pen, wo ni baraka bira Alla ye nyamani-hakikɛ wola ko la.

¹¹ “Wo ni a ma wo fɛrɛma de! Wo kana nyina wota Mari Alla ko. N bara ata tɔn minnu takaran wo ye kɛ la bi, wo kana anu boloka.

¹²Wo wa ban dɔn-fan mumɛ bɛɛ sɔrɔnna wo si min dɔn, anubɛ bon-hakikɛnu wo nyɛrɛ ye,

¹³anubɛ kolo-fen siyamɛnu wo nyɛrɛ ye, anubɛ wodi-gbɛ anubɛ sɛnɛ wo nyɛrɛ ye, anubɛ nɔnfuli sufa bɛɛ wo nyɛrɛ ye tumɛ min,

¹⁴wonu ka a ma, wo ni wasi ka nyina wota Mari Alla ko min ya wo labɔ yɔɔnyɛ rɔ Iyipiti nyamanɛ rɔ.

¹⁵A sɔra wo yarɔ wula-da-rakolɔn rɔ min makilannɛ, duguma-fen-yogomɛnu anubɛ bondalɛnu bi kan min. Wo tumɛ wo ye tagamana wulɛ wo rɔ yi sa kan min, Mari ya yi labɔ farɛ rɔ nyɔ wo ye.

¹⁶Wo ye wula-da-rakolɔn tumɛ min, a ya ata biredi di wo ma nyɔ, hali wo benbanu ma min dɔn fɔlɔ nun. Mari ya gbɛlɛyɛ lana wo kuma ka wo kɔrɔbɔ. Wo dama wa tenbi wo kuma tumɛ min, a si ata duwɛ layigi wo kuma worɔ ka wo makoenu nyinya.

¹⁷Wo tenbi sewɛ wo rɔ, wo kana wo miri ko wo ye fan wonu sɔrɔnna wo nyɛrɛta fanka anubɛ wola kɛwunteyɛ le la.

¹⁸Wo ni wo miri yati, ko wota Mari Alla le ya fan wonu di wo ma. A ye wonu mala wo ye bawo a ya lanyiri min kiri wo benbanu ye, wo kanbali-sɔgɛ ye a la.

¹⁹“Wo kana wota Mari Alla boloka ka wo madu bɛsɛnu kɔrɔ. N bi wo makawandila bi bɛrɛkɛ, ni wo ya wo ma, wo si kasara, yɔ! Sika mumɛ sa wo rɔ!

²⁰Ni wo ma Marita kumɛ bira, wo ye sibole doi kɛnu fagala nya min, wole fanan bi fagala wo nya na le.”