Read Kuranko Yɔni 17 Bible Online

Yɔni 17 - Kuranko bible

Yɔni 17

¹Yisa banta kɛ fɔla tumɛ min, a ya a yɛ layɛlɛ san ma. A ko, “N Fa, wati ara ke. I ni nde, ila danta gbiliyɛ yira mɔgɛnu na alako nde fanan si ila gbiliyɛ lasɛgi i ma nya min.

²I wara sɛnbɛ di n ma mɔgɛ bɛɛ kuma alako n si habadan-nimayɛ di wonu ma nya min, i ya minnu don n bolo, kɔni.

³Ni mɔgɛnu ya ile Alla kelen pe lɔn anubɛ nde, Yisa Kirasiti, i ya min sɔ, wo tigi si habadan-nimayɛ sɔrɔn.

⁴N bara ila gbiliyɛ lagbɛ duninya-mɔgɛnu ye, ado i ya wɔli min di n ma, n bara wo ban.

⁵E, n Fa, n bi i fɛ wati min yanni duninya ni dan, gbiliyɛ min bi n bolo wulɔn, i ni wo lasɛgi n ma kaka.

⁶“I ya mɔgɛ minnu di n ma duninya kɛ rɔ, n bara a ma, wonu bara i lɔn. Itɛ le anu na kebi fɔlɔ kɔnɔ i ya anu di nde ma. Anu bara ila kumɛ bira.

⁷Nba kaka, anu bara a lɔn de gbɛ, ko i ya fan min bɛɛ di n ma, wonu bɔnɛ ile le bolo.

⁸I ya sarakanɛ min don n bolo, n bara wo lake anu ma. Anu bara sarakanɛ wo bira. Anu ya a lɔn yati, ko n bɔra ile le warɛ. Anu bara la a la gbɛ, ko ile le ya n sɔ.

⁹“N bi madiyali kɛla anu ye. N sa madiyali kɛla dɛnkɛninyabɛlɛnu ye, fɔ i ya minnu di n ma bawo itɛ le anu denu na.

¹⁰Min bɛɛsi ye ntɛ la, itɛ le wonu na. Min bɛɛsi ye itɛ la, nde fanantɛ le wonu na. Nna gbiliyɛ ma ara yira anu tɔ.

¹¹Nba kaka, n sa duninya kɛ rɔ tun. N bi nala i wara kɔnɔ anu denu si to n kɔma duninya kɛ rɔ. E, n Fa sɛnimɛ! I ya tɔgɛ min di n ma, i ni anu matanka tɔgɔ-sɛnbɛmɛ wo fɛ alako anu ni ma kelen na iko malebɛ ile manɛ kelen na nya min.

¹² N bi anu fɛ tumɛ min, i ya tɔgɛ min di n ma, n ya anu matanka tɔgɔ-sɛnbɛmɛ wo fɛ. Hali kelen ma to-a-rɔ anu tɔ fɔ ale mɔgɔ kelen min bi nala halakila. A fɛrɛ sa fɔ wo ni ma alako min sɛbɛnɛ Allata kitabu rɔ, wo ni na bɔ-a-la.

¹³“Nba kaka, n bi sɛgila i wara. Yanni n ni bɔ duninya kɛ rɔ, n bi koe kɛnu fɔla nna karan-dannu ye alako anu si nna sewa-kanbalinɛ sɔrɔn anu yisi rɔ nya min.

¹⁴N bara ila sarakanɛ fɔ anu ye. Nta karan-dannu gboyanɛ duninya-mɔgɛnu ye bawo duninyata ma anu na, ado duninyata ma nde fanan na.

¹⁵N sa i madiyala ko i ni anu bɔ duninya kɛ rɔ kɔnɔ n bi i madiyala ko i ni anu tanka Setanɛ ma.

¹⁶Iko duninyata ma nde la nya min, duninyata ma anu fanan na wo nya na le.

¹⁷Anu dantɛgɛnɛ i ma ka a tɛgɛ ila kumɛ ma min bi tonyɛ la.

¹⁸Iko i ya nde sɔ duninya kɛ rɔ nya min, nde fanan bi anu sɔla duninya kɛ rɔ wo nya le.

¹⁹N bara n nyɛrɛ dantɛgɛ i ma anuna ko la alako anu fanan ni ma itɛ la fasai!

²⁰“N sa madiyali kɛla anu dɔrɔnna ko la kɔnɔ n bi madiyali kɛla wonu denuna ko la minnu bi nala dɛnkɛninyala nde ma nna karan-dannuna kawandilɛnu fɛ.

²¹N bi madiyali kɛla ko anu bɛɛ ni ma kelen na. E, n Fa! Iko i ye nde rɔ nya min, anubɛ nde ye ile rɔ nya min, anu fanan ni taran nde rɔ wo nya le. Wo le si a ma, duninya-mɔgɛnu si la a la ko ile le ya n sɔ.

²²I ya gbiliyɛ min di n ma, n bara wo di anu denu ma. N ya wo ma alako anu ni ma kelen na iko malebɛ ye nya min.

²³Nde ye anu tɔ, ile fanan bi nde rɔ. Alamɛ anu mara kelen na alako duninya-mɔgɛnu ni a lɔn ko ile le ya n sɔ. Anu ni a lɔn fanan ko i wara anu keni iko i wara nde keni nya min.

²⁴“E, n Fa! I wara anu di n ma. N bi kan min, n bi a fɛ, anu ni to n fɛ nyɔ. I ya gbiliyɛ min di nde ma, n bi a fɛ, anu ni wo yen bawo yanni duninya ni dan, i ya n keni.

²⁵E, n Fa min telennɛ! Duninya-mɔgɛnu ma i lɔn kɔnɔ nde ya i lɔn. Karan-dan kɛnu bara a lɔn ko ile le ya n sɔ.

²⁶N bara a ma, anu bara i lɔn. Nba, n si to wo mala dɛɛ! N bi wo mala le alako i wara n keni nya min, keninteyɛ wo ni to anu tɔ. N bi wo mala le alako n si taran anu tɔ.”