Read Kuranko Yɔni 18 Bible Online

Yɔni 18 - Kuranko bible

Yɔni 18

¹Yisa banta madiyalɛ kɛ kɛla tumɛ min, anubɛ ala karan-dannu tara ka Kidirɔn yi tɛgɛ. Ki-fannu bi kan tinɛ wo rɔ. Yisa anubɛ ala karan-dannu donta ki-fan wonu kɔrɔ.

²Yudasi min si na a maburi, wo ya nyɔ lɔn bawo Yisa anubɛ ala karan-dannu duruta tala nyɔ.

³Woletɔ Yudasi tara ki-fan wonu kɔrɔ. Saraka-masɔla-wɛnu anubɛ Farisinu ya Alla-Bato-Bɔn kandannɛnu anubɛ kɛlɛ-dan donu nata a fɛ. Anu tara lɛnpunu anubɛ kala-mɛlannu na anu bolo. Anu tara kɛlɛ-kɛ-mirannu na anu bolo fanan.

⁴Yisa ya koe bɛɛ lɔn min bi nala mala a la. Woletɔ a sɔra anu yakɔrɔ ka a fɔ anu ye ko, “Wo ye yon nyini tinɛ?”

⁵Anu ya a yabi ko, “Yisa, Nasarɛti kɛ.” A ko, “Wo le nde la.” Yudasi, min si na Yisa don a yogenu bolo tɔ, wo ye anu tɛma nun.

⁶Yisa ya a fɔ anu ye min kɛ ko, “Wo le nde la,” anu sɛgira anu kɔma ka bui dugu ma.

⁷Yisa ya anu manyinika tun ko, “Wo ko wo ye yon nyini tinɛ?” Anu ko, “Yisa, Nasarɛti kɛ.”

⁸Yisa ko, “N bara a fɔ wo ye nun ko wo le nde la. Ni wo ye nde le nyini tinɛ, nba, wo ni doi kɛnu to nyɔ, anu ni ta.” (

⁹A ya kɛ fɔ alako min fɔra nun, wo ni bɔ-a-la ko, “N Fa Alla ya min bɛɛ di n ma, hali wo kelen ma to-a-rɔ.”)

¹⁰Faan ye Saimon Pita bolo nun. Saraka-masɔla-kun-tigi-wɛla yɔɔn taranta anu tɛma, wo tɔgɔ le Malaka. Pita ya faan wo sagan ka wo bolo-nyimama-tole tɛgɛ a la.

¹¹ Yisa ya a fɔ Pita ye ko, “Ila faan lasɛgi a gbɛ rɔ! N Fa Alla ara yi-lafɛ[23] min di n ma, i sa a fɛ, n ni n min wo la, wa?”

¹²[24] Kɛlɛ-dannu anubɛ anuna kɛlɛ-den-kun-tigi anubɛ Alla-Bato-Bon kandannɛnu ya Yisa bira ka a kiri lenlen!

¹³Anu tara a la Kaifasi biran-kei, Anasi wara fɔlɔn. San wo la, Kaifasi le saraka-masɔla-kun-tigi-wɛ la nun.

¹⁴ Kaifasi le ya Yahudiyanu nalɔn nun ko a fisa, mɔgɔ kelen ni faga mɔgɛ bɛɛla ko la.

¹⁵Saimon Pita anubɛ Yisala karan-dan do bilara Yisa fɛ. Saraka-masɔla-kun-tigi-wɛ ya doi wo lɔn bɛrɛkɛ! Woletɔ a donta Yisa fɛ kata burɔ.

¹⁶Pita sɔnɛ tora kɔma don-dɛ dafɛ. Saraka-masɔla-kun-tigi-wɛ ya Yisala karan-dan min lɔn, wo sɛgira ka kuma yɔɔn-musi wo ye min bi don-dɛ kandanna alako Pita ni don nyɔ.

¹⁷Yɔɔn-musi min bi don-dɛ kandanna, wo ya a fɔ Pita ye ko, “Kei kɛla karan-dan do ma ile la?” Pita ya a yabi ko, “Ade, wo ma nde la de!”

¹⁸Dafere-kimɛ wati le nun, woletɔ wɔli-kɛlɛnu anubɛ nyɔ-kandannɛnu ya tɛ ladɛn. Anu sɔnɛ ta-wɔlɔn wo fɛ anu gbala tinɛ. Pita fanan sɔra anu fɛ nyɔ a gbala tinɛ.

¹⁹Saraka-masɔla-kun-tigi-wɛ ya Yisa manyinika ala karan-dannuna ko la anubɛ ala karanla ko la.

²⁰Yisa ya a yabi ko, “N bara kuma gbɛ rɔ mɔgɛ bɛɛ ye. N bara mɔgɛnu karan dina-bɔnnu na anubɛ Alla-Bato-Bɔn la, Yahudiya bɛɛ la si dɛn kan min. N ma fenfen fɔ dogɔn rɔ.

²¹I ye n manyinikala kama worɔ? Minnu ya n kan lamɔɛn, wonu manyinika. N ya min fɔ anu ye, anu ya wo lɔn. Anu denu manyinika tun.”

²²Yisa ya kɛ fɔ tumɛ min, Alla-Bato-Bon kandannɛ minnu bi nyɔ, kelen ya a dɛ ratii. A ko, “I ye kumala saraka-masɔla-kun-tigi-wɛ ye ka le?”

²³Yisa ya a yabi ko, “Ni n bara koe do fɔ min ma telen, wo fɔ mɔgɛ bɛɛ ye yan. Kɔnɔ ni n ya tonyɛ le fɔ, i ye n gbesila nfenna worɔ?”

²⁴Wo kɔma, Anasi ya a kirinɛ lata Saraka-Masɔla-Kun-Tigi-Wɛ Kaifasi ma.

²⁵Pita sɔnɛ tora tɛ dafɛ nyɔ, a ye a gbala tinɛ. Wo kɔma, donu ya a manyinika ko, “Kei kɛla karan-dan do ma ile la, wa?” Kɔnɔ Pita ya a masɔsɔ, a ko, “Ade, wo ma nde la de!”

²⁶Pita ya saraka-masɔla-kun-tigi-wɛla yɔɔn min tole tɛgɛ a la, wola mɔgɛ do ya Pita manyinika ko, “N ma ile le yen a fɛ ki-fannu kɔrɔ nun?”

²⁷A ya a ban Yisa la tun. A ye wo fɔɛ kun na, dondɔn kekera.

²⁸Wo kɔma, anu ya Yisa bi Kaifasi warɛ ka ta a la Romu-kun-tigi-wɛ warɛ min bi anu dama kun na, kɔni. Subaga-dɛ le nun. Yahudiyanu ma sɔn donna bɔn la bawo anu kana anu nyɛrɛ latinya. Ni anu ya wo ma, anu ti sɛninya ka Kanan-Ko-Ladiyɛ dɔn-fan dɔn.

²⁹Nba, Romu-Kun-Tigi-Wɛ Pailɛti bɔra luyi ma ka anu manyinika ko, “Kei kɛ ya tɔn nyuman tinya wo yala?”

³⁰Anu ya a yabi ko, “Ni kei kɛ ma ko-yogomɛ kɛ nun, ma ti na a la i wara nun.”

³¹Pailɛti ya a fɔ anu ye worɔ ko, “Wole nyɛrɛ ni a kiti iko wola tɔn ya a fɔ nya min.” Yahudiyanu ya a yabi ko, “Wo sɛnbɛ sa male bolo ka mɔgɔ faga.” (

³² Kɛ bɛɛ mara alako Yisa ya kumɛ min fɔ ala sayɛla ko la nun, wo ni bɔ-a-la.)

³³Pailɛti donta ala bɔn la. A ya Yisa kele ka a manyinika ko, “Yahudiyanuna mansɛ le ile la, wa?”

³⁴Yisa ya a yabi ko, “Nyinikalɛ kɛ bɔra i nyɛrɛ miriya le tɔ, ka, mɔgɔ-gbɛrɛ le ya nna koe fɔ i ye?”

³⁵Pailɛti ya a fɔ a ye ko, “Yahudiya le nde la, wa? I nyɛrɛta mɔgɛnu anubɛ anuna saraka-masɔla-wɛnu ya i don n bolo. I ya nfen ma?”

³⁶Yisa ko, “Nta mansayɛ sa duninya kɛ rɔ. Ni a ye duninya kɛ rɔ nun, nna mɔgɛnu si kɛlɛ kɛ n ye. Anu ti sɔn n don-koe la Yahudiya mɔgɔ-banu bolo. Nna mansayɛ sa yan tɔ mumɛ!”

³⁷Pailɛti ya a manyinika worɔ ko, “Nba, mansɛ le ile la worɔ, wa?” Yisa ya a yabi ko, “I wara tonyɛ le fɔ ko mansɛ le nde la.[25] N nara duninya kɛ rɔ ko-kelen-pela ko la alako ka Allala tonyɛ fɔ mɔgɛnu ye. Min bɛɛ ye nyinina tonyɛ ma, wonu si anu tole masɔ n na.”

³⁸Pailɛti ya a manyinika tun ko, “Tonyɛ ye nfen na?” Nba, Pailɛti bɔra Yahudiyanu barɛ luyi ma tun ka a fɔ anu ye ko, “Ndeta miriya, kei kɛ ma ko-yogoma fenfen kɛ!

³⁹Kɔnɔ san-bo-san, n duruta mɔgɔ kelen bolokala wo ye yelela-mɔgɛnu tɛma Kanan-Ko-Ladiyɛ wati rɔ. Nba, wo ye a fɛ, n ni wole Yahudiyanuna mansɛ boloka, wa?”

⁴⁰Anu gbele-gbelenta ka a yabi ko, “Ade, i kana ale boloka! I ni Barabasi boloka!” (Nba, Barabasi,[26] bui-ma-kɛlɛ le nun.)