Read Kuranko Yɔni 20 Bible Online

Yɔni 20 - Kuranko bible

Yɔni 20

¹[30] Nba, Lɛhɛrɛ subaga-dɛ ma, Mariyama Magadala kɛ tara kanbɛ dɛ la. Anu ya kanbɛ da-latogon kuri min na, a ya wo bɔnɛ taran kanbɛ dɛ la.

²A burimatoe tara Saimon Pita warɛ anubɛ Yisa diyana-karan-dan. A ya a fɔ anu ye ko, “Anu bara Mari furi labɔ kanbɛ rɔ. Anu bara a sa kan min, ma ma nyɔ lɔn!”

³Pita anubɛ karan-dan doi wo tara kanbɛ dɛ la.

⁴Anu filɛ bɛɛ ya anu buri ka ta kanbɛ dɛ la kɔnɔ karan-dan doi wo kin natiri Pita ko. Ale fɔlɔn kera kanbɛ dɛ la.

⁵A ya a madu ka kasankɛ-sanɛ yen kɔnɔ a ma don kanbɛ burɔ.

⁶Wo kɔma, Saimon Pita nara ka don kanbɛ burɔ kelenna! A ya kasankɛ-sanɛ yen

⁷anubɛ Yisa salɛ makirinɛ kurɛ min na nun. Kɔnɔ kurɛ wo sani ma kasankɛ dafɛ. A lamininɛ sanɛ a dan na.

⁸Nba, karan-dan doi wo min fɔlɔn kera kanbɛ dɛ la, wo fanan donta. A ya a yen min kɛ, a lara a la. (

⁹Anu ma a nya-yen nun ko a sɛbɛnɛ Allata kitabu rɔ ko Yisa si wuli ka bɔ furinu tɛma.)

¹⁰Wo kɔma, ala karan-dannu sɛgira anu barɛ.

¹¹Mariyama sɔra kanbɛ dɛ la, a ye dila. A ye dila tumɛ min, a ya a madu ka kanbɛ burɛ rafɛlɛn.

¹²A ya melika fila yen. Kura-gbɛ ye anu kan na, anu siginɛ Yisa furi sanɛ kan min nun. Kelen siginɛ a salɛ sa tinɛ, doi ye a tontɛ sa tinɛ.

¹³Anu ya a manyinika ko, “N na, i ye dila nfenna?” A ya anu yabi ko, “Anu bara n Mari labɔ yan. Anu bara a sa kan min, n ma nyɔ lɔn!”

¹⁴A ya kɛ fɔ tumɛ min, a ya a tintan ka Yisa sɔnɛ yen. Kɔnɔ a ma a lɔn ni Yisa le nun.

¹⁵Yisa ya a manyinika ko, “N na, i ye dila nfenna? I ye yon nyini tinɛ?” A ya Yisa lɔn ki-fen fɛ-biralɛ la nun, woletɔ a ya a fɔ a ye ko, “N fa, ni ile le ya a labɔ yan, i tara a la kan min, wo fɔ n ye. N ni ta a labɔ nyɔ.”

¹⁶Yisa ya a fɔ a ye ko, “Mariyama.” Mariyama ya a tintan ka a fɔ a ye ko, “Karan-mɔgɔ.” (A ya wo fɔ Hiburu-kan rɔ ko, “Rabonai.” Wo kɔrɛ le, “Karan-mɔgɔ.”)

¹⁷Yisa ya a fɔ a ye ko, “I kana i bole tugu n na bawo n ma yɛlɛ wɛ n Fa Alla warɛ. Kɔnɔ ta a fɔ n na-kelen-nyɔgɛnu ye ko n bi nala yɛlɛla san-kole rɔ n Fa anubɛ wo Fa warɛ, nta Alla anubɛ wota Alla, kɔni.”

¹⁸Mariyama Magadala kɛ tara a fɔ Yisala karan-dannu ye ko a ara Mari yen, ado Mari ara min fɔ a ye, a ya wo bɛɛ rakaran anu ye.

¹⁹Nba, Lɛhɛrɛ wurɛ la, Yisala karan-dannu nadɛnnɛ anu nyɔgɔn fɛ bɔn la. Bon-rasɔgɔnɛ anu bolo bawo anu kilannɛ Yahudiyanuna kun-tiginu na. Yisa ya anu natɛrɛna ka sɔ anu tɛma. A ya anu kɔndɔn ka a fɔ ko, “Alamɛ wo ya yisi-kimɛ sɔrɔn.”

²⁰A ban kɛ fɔla, a ya a kɔɛn filɛ anubɛ a tɔnkɔn yira anu na. Mari yen ala karan-dannu bolo, anu sewara kati!

²¹Wo kɔma, Yisa ya a fɔ anu ye tun ko, “Alamɛ wo ya yisi-kimɛ sɔrɔn. N Fa Alla ya n sɔ nya min, nde fanan bi wo sɔla wo nya le.”

²²A ya kɛ fɔ tumɛ min, a ya a niyi lafɛ anu kuma. A ko, “Wo ni Allala Ni-Sɛnimɛ sɔrɔn.

²³ Ni wo ya minnu hakɛ makoto, wonu ma ara koto. Ni wo ma minnu hakɛ makoto, Alla ti wonu makoto.”

²⁴Yisala karan-dan do ye nyɔ min tɔgɛ Tamasi (anu bi min kelela, “Fɛran”). Yisa nara tumɛ min, wo sa a ta-nyɔgɛnu fɛ nun.

²⁵Karan-dan doinu ya a fɔ a ye ko, “Ma ara Mari yen!” Tamasi ya a fɔ anu ye ko, “Ni n ma lɔntuma-pɛrɛ yen a kɔɛnnu tɔ ka n bolo-nɔlɔnɛ don lɔntuma-gbɛ wonu tɔ anubɛ ka n bole ladon a tɔnkɔn rɔ, nde ti la a la.”

²⁶Lɔgɔkun kelen wo kɔma, Yisala karan-dannu ya anu nadɛn bɔn la tun, Tamasi ye anu fɛ. Bon-rasɔgɔnɛ anu bolo. Yisa nara sɔ anu tɛma tun. A ko, “Alamɛ wo ya yisi-kimɛ sɔrɔn.”

²⁷Wo kɔma, a ya a fɔ Tamasi ye ko, “I bolo-nɔlɔnɛ sa yan. N bolenu mafɛlɛn. I bole rasagan ka a don n tɔnkɔn rɔ. Sikɛ ni bɔ i rɔ. I ni la n na!”

²⁸Tamasi ya a yabi ko, “N Mari anubɛ nta Alla!”

²⁹Yisa ya a fɔ a ye ko, “I wara n yen min kɛ, wo le ara a ma, i wara la n na. Minnu ma n yen kɔnɔ anu lara n na, mɔgɔ-sewanɛ le wonu na de!”

³⁰Yisa ya kabana-ko-wɔli siyaman kɛ ala karan-dannu yala minnu sɛbɛni ma kitabu kɛ rɔ.

³¹Kɔnɔ kɛnu sɛbɛnɛ alako wo ni la a la ko Yisa kɛ, Allala dan le, Alla ya min yabɔ ma kisi-koe la. Wo wa dɛnkɛninya a ma, wo si habadan-nimayɛ sɔrɔn a tɔgɛ rɔ.