Read Kuranko Yɔni 3 Bible Online

Yɔni 3 - Kuranko bible

Yɔni 3

¹Nba, Yahudiyanuna kun-tigi do ye nyɔ nun, a tɔgɛ Nikodimasi. Karan-mɔgɛ do le ale la ka bɔ Yahudiya-dina-sibole do rɔ min tɔgɛ Farisi.[7]

²A nara Yisa wara suyi rɔ. A ya a fɔ a ye ko, “Karan-mɔgɔ, ma ya a lɔn ko karan-mɔgɛ le ile la Alla ya min sɔ. I ye kabana-ko-wɔlɛ minnu kɛla, mɔgɔ-wo-mɔgɔ ti ke wonu kɛla fɔ ni Alla ye a fɛ.”

³Yisa ya a yabi ko, “N bi tonyɛ fɔla i ye, ni mɔgɔ ma sɔrɔn a kurɛ la, a ti ke Allala mansayɛ yenna.”

⁴Nikodimasi ya a manyinika ko, “Mɔgɛ min bara koloya, wo si sɔrɔn a kurɛ la kama tun? A ti ke donna a na buyi rɔ ka sɔrɔn tun.”

⁵Yisa ya a yabi ko, “N bi tonyɛ fɔla i ye, mɔgɔ-wo-mɔgɔ ti ke donna Allala mansayɛ rɔ, fɔ ni a sɔrɔnta yi[8] anubɛ Allala Ni-Sɛnimɛ la.

⁶Mɔgɔni-finyɛ si mɔgɔni-finyɛ sɔrɔn. Kɔnɔ Allata Ni-Sɛnimɛ le si niyi di mɔgɛ ma.

⁷I kana kawa bawo n bara a fɔ i ye ko, fɔ wo dama ni sɔrɔn a kurɛ la tun.

⁸Kan tinɛ min di fɔnyɔ ye, a ye tala nyɔ le. I ye a kan lamɔɛnna kɔnɔ i ma a bɔ-tinɛ lɔn, i ma a ta-tinɛ lɔn. Min bɛɛ sɔrɔnnɛ Allata Ni-Sɛnimɛ bolo, anu bi wo nya le.”

⁹Nikodimasi ya a manyinika tun ko, “Kɛ si ke mala kama?”

¹⁰Yisa ya a yabi ko, “Isirɛla mɔgɛnuna karan-mɔgɔ-wɛ le ile la, i ko i ma kɛ lɔn, ba?

¹¹N bi tonyɛ fɔla i ye, ma ya min lɔn, ma ye wo lela koe fɔla. Ma ara min tayen, ma ye wo rakaranna. Hali wo, mɔgɔ kelen bɛrɛn sa wole rɔ, min lanɛ mala sereyɛ la.

¹²Ni n bara duninya-koe kɛnu fɔ wo ye, wo ma la wo la, ni n ya Arinyɛni-koenu fɔ wo ye, wo si la wo la kama worɔ?

¹³Mɔgɔ-wo-mɔgɔ ma yɛlɛ wɛ Arinyɛni tɔ fɔlɔ, fɔ nde, Hadama-dan min yigira ka bɔ Arinyɛni tɔ.

¹⁴ “Iko Nɛbi Musa ya duguma-fen-misalɛ layɛlɛ kɔlɔma ma san ma wulɛ rɔ nya min, nde, Hadama-dan fanan na si yɛlɛ wo nya.

¹⁵Woletɔ mɔgɔ-wo-mɔgɔ wa dɛnkɛninya nde ma, wo si habadan-nimayɛ sɔrɔn.”

¹⁶Alla le ya duninya keni ha a ya ala den-kei kelen pe ni. Mɔgɔ-wo-mɔgɔ wa dɛnkɛninya a ma, wo ti halaki fɔ ka habadan-nimayɛ sɔrɔn.

¹⁷Alla ma ala dan sɔ duninya rɔ alako a ni ma duninya-kiti-tɛgɛlɛ la, fɔ ka a ma duninya-kisilɛ la.

¹⁸Ni min bara dɛnkɛninya Allala dan ma, kiti sa wo ma. Kɔnɔ ni min ma dɛnkɛninya a ma, wola kiti ara ban tɛgɛla bawo a ma dɛnkɛninya Allala den-kei kelen pe ma.

¹⁹Kiti ye kɛla ka le ko waan nara duninya rɔ kɔnɔ pinpi di mɔgɛnu ye waan ko bawo anu bi ko-yogomɛnu kɛla.

²⁰Nba, minnu bi ko-yogomɛnu kɛla, wan ma di wonu ye. Anu ti na ke waan ma bawo a ma di anu ye anuna ko-yogomɛnu ni bɔ gbɛ rɔ.

²¹Kɔnɔ minnu bi ko-latelennɛnu kɛla, wonu si na ke waan ma alako waan ni a mayira ko anu bi Alla sako kɛla.

²²Wo kɔma, Yisa anubɛ ala karan-dannu tara Yudiya nyamanɛ rɔ. A ya wati-kundu-ni kɛ anu fɛ nyɔ-mɔgɛnu batasi tinɛ.

²³Yɔni fanan ye batasili kɛla tenke-yi[9] do rɔ nun Selɛm soe dafɛ bawo tenke wo rayan nun. Mɔgɛnu ba ta a wara, a si wonu batasi. (

²⁴ Anu ma Yɔni sa wɛ yele la nun.)

²⁵Yɔnila karan-dan donu anubɛ Yahudiya mɔgɛ donu ya sɔsɔli-sɛ dabira ka a bɛn ku-kɛ-koe ma iko anuna dina ya a fɔ anu ye nya min.

²⁶Woletɔ anu tara Yɔni wara ka a fɔ a ye ko, “Karan-mɔgɔ, i ya minna ko fɔ, nba, wo ye mɔgɛnu batasila kaka, ado mɔgɛ bɛɛ ye tala a wara!”

²⁷Yɔni ya anu yabi ko, “Mɔgɔ ti ke fenfen sɔrɔnna anu nyɛrɛ ma, fɔ Alla wa min di a ma.

²⁸ Wole nyɛrɛ le n sere la ko n ya a fɔ ko Alla ya mɔgɛ min yabɔ ma kisi-koe la, Masiya, kɔni, wo ma nde la kɔnɔ n sɔra a yarɔ dɔrɔn.

²⁹“Furu-kiri rɔ, kɔɛn-kurɛ ye min bolo, musu-tigi le wo la. Musu-tigi wo dafɛ-sɔlɛ sɔnɛ ka a tole masɔ. A wa musu-tigi sewa-kan lamɔɛn tumɛ min, ale fanan si sewa. Nta sewɛ kɛ da fanɛ wo nya le.

³⁰Ale ni koloya, nde ni dɔgɔya.”

³¹Yisa ya a fɔ tun ko, “Ale min bɔnɛ Arinyɛni tɔ, wo kolo bɛɛ ko. Nde min bi duninya kɛ rɔ, n ya duninya wara-koe lɔn. Nde si duninya wara-koe fɔ kɔnɔ ale min bɔnɛ Arinyɛni tɔ, ale tenbira koe bɛɛ la.

³²A ara min tayen ka a lamɔɛn, a ye wo le fɔla kɔnɔ mɔgɔ ma ala kumɛ bira.

³³Min ba ala kumɛ bira, wo ara a yira ko Alla ara min fɔ, tonyɛ le.

³⁴Alla ara min sɔ, wo si Allala kumɛ fɔ bawo Alla le si ala Ni-Sɛnimɛ di a ma duk!

³⁵ Ma Fa Alla ara nde, ala dan keni ka fan bɛɛ ladon nta sɛnbɛ kɔrɔ.

³⁶Ni min dɛnkɛninyara nde, Allala dan ma, habadan-nimayɛ ye wo bolo. Ni min ti to ala danta kumɛ birala, wo tigi ti niyi sɔrɔn fɔ Allala diminyɛ min si to a kuma tɛban!”