Read Kuranko Kɛwɔlɛnu 10 Bible Online

Kɛwɔlɛnu 10 - Kuranko bible

Kɛwɔlɛnu 10

¹Kei do ye Sɛsariya soe burɔ nun, wo tɔgɛ Kɔniliyasi. Romu kɛlɛ-den-kurɔn min tɔgɛ ko, “Italita Kurɔn,” anuna kun-tigi do le.

²Dina-mɔgɛ le fanan. Ale anubɛ ala denbayɛ bɛɛ ye Alla batola, ado a duruta Yahudiya bolo-kolɔnnu dɛnbɛna bɛrɛkɛ! A ye Alla madiyala tuma-wo-tuma kɔnɔ Yahudiya ma.

³Lunyɛ do tele-makima-wati (3 pm), a ya Allala melika yen ko-rayirɛ rɔ. Melika wo ye donna ala bɔn la ka a rakele ko, “Kɔniliyasi!”

⁴A ya melika mafɛlɛn sin! A kilanta dɔgɔma-ma-de! A ko, “N fa, nfen mara?” Melika ya a fɔ a ye ko, “I wara bolo-kolɔnnu dɛnbɛ min kɛ, Alla ara sɔn ila madiyalɛnu ma. A ara a fonde to i ko.

⁵Nba kaka, i ni mɔgɛ donu nata Yapa ka kei do manyinika min tɔgɛ Saimon Pita.

⁶A yiyanɛ Saimon karankɛ warɛ min siginɛ kɔgɔ-yi dafɛ.”

⁷Wo kɔma, melika wo tara. Kɔniliyasi ya ala bonna-wɔli-kɛlɛ mɔgɔ fila kele. Ala kɛlɛ-dan min bi a kandanna, a ya wo fanan kele, ado dina-mɔgɛ le wo fanan na.

⁸Min mara, a ya wo rakaran wonu ye ka anu nata Yapa soe burɔ.

⁹Wo banda kɛ, anu gbɛrɛnnɛ Yapa soe ma tumɛ min, wo ya a taran, Pita ye Alla matara tinɛ bɔn kuma[9] tele-latelan.

¹⁰Kɔnkɛ ya a bira bɔn kuma nyɔ. Anu bi dɔn-fan tela tumɛ min, ale fanan ya ko-rayirɛ do yen.

¹¹A ya Arinyɛnɛ dɛ lakanɛ yen. Fan min manɛ iko kura-belebele, a ya wo yen yigila. A dunnɛ a tɔnkɔn nanɛ ma ha ka yigi dugi ma.

¹²Sogo-su siyaman[10] anubɛ sagan-fannu anubɛ konanu bi a rɔ.

¹³A ya kuman-kan lamɔɛn ko, “Pita, i lasɔ. I ni kɛnu faga ka anu dɔn!”

¹⁴Kɔnɔ Pita ya a sɔsɔ, a ko, “Ade, Mari! N ma fenfen dɔn bɛ n tanɛ ye min na. N ti fen-kɔsɔnɛ dɔn mumɛ!”

¹⁵A ya kuman-kan lamɔɛn tun ko, “Alla ara min sɛninya, i kana i miri ko wo kɔsɔnɛ.”

¹⁶Kɛ mara kinyama sawa. Wo kɔma, kurɛ wo sɛgira Arinyɛni tɔ.

¹⁷Pita ye a hɛnkili lamirila ko-rayirɛ kɛ kɔrɛ ma wati min, Kɔniliyasi ya kei minnu sɔ, wonu bi Saimon karankɛla bɔn manyinikala, ado anu sɔnɛ sansan don-dɛ la.

¹⁸Anu ya nyinikalɛ kɛ ko, “Sundan do ye yan ba, min tɔgɛ Saimon Pita?”

¹⁹Ha ka, Pita ye ko-rayirɛ kɛ kɔrɛ-lɔn-koe rɔ. A ye wo kun na tumɛ min, Allala Ni-Sɛnimɛ ya a fɔ a ye ko, “Pita, kei mɔgɔ sawa ara na. Anu bi i manyinikala.

²⁰I lasɔ. Yigi ka bila anu fɛ. I kana sika bawo nde le ya anu sɔ.”

²¹Nba, Pita yigira ka a fɔ mɔgɛ wonu ye ko, “Wo ye min nyinina, nde le wo la. Wo nara nfenna ko la?”

²²Anu ya a yabi ko, “Romu kɛlɛ-den-kun-tigi Kɔniliyasi le ya ma sɔ i wara. Mɔgɔ-nyimɛ le min bi Alla batola. Yahudiya bɛɛ ye a gbiliyala bɛrɛkɛ! Allala melika do le ya a fɔ a ye ko a ni ile kele ala bɔn la. I ye nala min fɔla, a ye a fɛ ka wo lamɔɛn i bolo.”

²³Pita ya mɔgɛ wonu nadon bɔn la. Anu kira nyɔ. Wo banda kɛ, a bilara anu fɛ. A ta-nyɔgɛ, Yapa dɛnkɛninya-mɔgɛ donu fanan tara a fɛ.

²⁴Wo banda kɛ fanan, anu kera Sɛsariya. Nba, Kɔniliyasi ara a na-kelen-nyɔgɛnu anubɛ a diyana-mɔgɛ bɛɛ kele nun. Anu siginɛ Pita makɔnɔ tinɛ.

²⁵Nba, Pita kera tumɛ min, Kɔniliyasi ya a labɛn. A ya a sa a kɔrɔ a bato tinɛ.

²⁶Kɔnɔ Pita ya a bira. A ko, “I lasɔ bawo mɔgɔni-gbuyi le nde la dɔrɔn.”

²⁷Pita donta bɔn la tumɛ min, a tora kumala Kɔniliyasi ye. A ya mɔgɔ siyaman nadɛnnɛ taran nyɔ.

²⁸A ya a fɔ anu ye ko ala Yahudiya-dinala ko la, a kana sibolo-gbɛrɛnu kɔndɔn, ado a kana ta-nyɔgɔnyɛ kɛ anu fɛ. Kɔnɔ Alla ara a yira a la ko a kana a miri mɔgɔ-wo-mɔgɔ ma ko mɔgɔ-sɛninyani ma, a kɔsɔnɛ.

²⁹Woletɔ a ko anu ya kilayɛnu nata a ma min kɛ, a ma sika mumɛ! A bilara anu fɛ. A ya nyinikalɛ kɛ ni anu ya a kele min ma?

³⁰Kɔniliyasi ko, “A tele-nani-nyɔgɛ le bi, kɛ-nyɔgɔn-wati le nun gben, n bi madiyali kɛla nna bɔn la tele-makima-wati kɛ rɔ. Kei do nara minna kurɛ ye malan-malanna a ma, wo sɔra n yakɔrɔ.

³¹Kei wo ko, ‘Kɔniliyasi! I wara bolo-kolɔnnu dɛnbɛ min kɛ, Alla ara sɔn ila madiyalɛnu ma. A ara a fonde to i ko.’

³²A ko n ni mɔgɛ do lata Yapa ka kei do kele min tɔgɛ Saimon Pita. A ko a yiyanɛ Saimon karankɛ warɛ min siginɛ kɔgɔ-yi dafɛ.

³³Nba, n ya anu nata i ma kelenna, ado i na-koe kɛ ara i sɔn-nyimɛ yira n na. Awa kaka, Mari ara i sɔ min fɔ tinɛ, ma dama ye i makɔnɔna Mari Alla yakɔrɔ yan ka wo bɛɛ lamɔɛn.”

³⁴Pita ya kumɛ dabira. A ko, “N bara a lɔn de gbɛ ko tonyɛ le, mɔgɛ bɛɛ kelen Alla yala. A ti lafisalayɛ kɛ hali!

³⁵Min ba kilan a la ka ko-latelennɛ kɛ, a si mɔgɛ wo rabira, a mara mɔgɔ su-wo-su la.

³⁶A ya kumɛ min nake Isirɛla mɔgɛnu ma ka yisi-kimɛ kibara-nyimɛ fɔ Yisa, Allata-Mɔgɔ-Yabɔnɛ baraka rɔ, wo ya wo lɔn. Bɛɛta Mari le wo la.

³⁷Yɔni banta batasili-ko-kawandili bɔla tumɛ min, ka a dabira Kalili sigisɔn rɔ ha ka ke Yudiya nyamanɛ bɛɛ rɔ, ko-wɛ min kɛra wo kɔma, wo ye wo kalama, wa?

³⁸Ado nfan, Alla ya ata Ni-Sɛnimɛ labɔn Yisa, Nasarɛti kɛ, kuma nya min ka sɛnbɛ di a ma, wo ye wo fanan kalama. A tara kan tinɛ bɛɛ rɔ ko-nyima-kɛ-tinɛ. Minnu bɛɛ ye nyinɛta sɛnbɛ kɔrɔ nun, a ya wo bɛɛ hɔrɔya bawo Alla ye a fɛ.

³⁹A ya koe min bɛɛ kɛ Yahudiyanuna nyamanɛ rɔ anubɛ Yerusalɛm soe burɔ, wonu sereyɛ le male la. A laban, anu ya a gbangban kɔlɔma ma ka a faga.

⁴⁰Kɔnɔ a tele sawa nyɔgɛ ma, Alla ya a lawuli ka bɔ furinu tɛma. A bɔra gbɛ rɔ ma ye.

⁴¹Bɛɛ ma a yen nun fɔ Alla ara ban male minnu yabɔla nun, ko ma ni ma a sereyɛnu na. Alla ya a lawuli tumɛ min ka bɔ furinu tɛma, male le ya fen-dɔn-kɛ a fɛ.

⁴²Alla ya a fɔ ma ye ko ma ni kibara-nyimɛ kɛ kawandili bɔ mɔgɛnu ye ka sereyɛ kɛ bɔ. A ko a ara a latɛgɛ min ma ko a ni kɛndɛwaganu anubɛ furinuna kiti tɛgɛ, ale le Yisa wo la.

⁴³ Nɛbi bɛɛ ya ala koe fɔ ko mɔgɔ-wo-mɔgɔ wa dɛnkɛninya a ma, Alla si wo makoto a hakɛ ma ale tɔgɛ sɛnbɛ baraka rɔ.”

⁴⁴Pita ye kumala tumɛ min, min bɛɛ tole masɔnɛ wo kumɛ la, Allata Ni-Sɛnimɛ yigira wonu dama kuma.

⁴⁵Yahudiya dɛnkɛninya-mɔgɛ minnu bilara Pita fɛ ka bɔ Yapa soe burɔ, wonu kawara ko Alla ara ata Ni-Sɛnimɛ labɔn sibolo-gbɛrɛnu fanan kuma.

⁴⁶Anu ya kan-gbɛrɛnu-fɔɛ fanan namɔɛn anu bi Alla tantola ala sɛnbɛ-bala ko la nya min. Pita kumara tun, a ko,

⁴⁷“Mɔgɛ kɛnu bara Allata Ni-Sɛnimɛ sɔrɔn iko male fanan ya a sɔrɔn nya min. Mɔgɛ si anu nakala kama worɔ ko anu kana batasi yi rɔ?”

⁴⁸Woletɔ a ya a fɔ anu ye ko anu ni batasi Yisa, Allata-Mɔgɔ-Yabɔnɛ tɔgɛ rɔ. Wo kɔma, anu fanan ya ale Pita madiya ko a ni to anu fɛ wati-ni kɔrɔ.