Read Kuranko Kɛwɔlɛnu 11 Bible Online

Kɛwɔlɛnu 11 - Kuranko bible

Kɛwɔlɛnu 11

¹Kilayɛnu anubɛ dɛnkɛninya-mɔgɛ minnu bi Yudiya fan bɛɛ, wonu ya a lamɔɛn ko sibolo-gbɛrɛnu fanan bara Allala kumɛ rabira.

²Nba, Pita tara Yerusalɛm tumɛ min, a di minnu ye ko sibolo-gbɛrɛnu ni kemininya iko Yahudiyanu, wonu ya a makuma.

³Anu ko, “Sibolo-gbɛrɛ minnu kemininyani ma, i wara yiya wonu barɛ ka fen-dɔn-kɛ anu fɛ fanan! Wo tɛgɛnɛ nfen ma?”

⁴Woletɔ koe min bɛɛ kɛra kebi a dabira tumɛ, Pita ya wo bɛɛ rakaran anu ye.

⁵A ko, “N bi Alla-matarɛ kun na Yapa tumɛ min, n ya ko-rayirɛ do yen. N ya fan do yen yigila min manɛ iko kura-belebele. A dunnɛ a tɔnkɔn nanɛ ma. A ye yigila ka bɔ Arinyɛni tɔ ka sɔ n dafɛ.

⁶N ya a burɛ rafɛlɛn tumɛ min, n ya sogenu yen anubɛ firarɔ-sogenu anubɛ sagan-fannu anubɛ konanu.

⁷N ya kuman-kan do lamɔɛn, a ye a fɔla n ye ko, ‘Pita, i lasɔ. I ni kɛnu faga ka anu dɔn!’

⁸Kɔnɔ n ya a fɔ ko, ‘Ade, Mari! N ma fenfen dɔn bɛ n tanɛ ye min na. N ti fen-kɔsɔnɛ dɔn mumɛ!’

⁹Kuman-kan bɔra Arinyɛni tɔ tun ko, ‘Alla ara min sɛninya, i kana i miri ko wo kɔsɔnɛ.’

¹⁰Kɛ mara kinyama sawa, ala ban, a bɛɛ sɛgira Arinyɛni tɔ tun.

¹¹Wo wati nyɛrɛ rɔ, kei mɔgɔ sawɛ minnu nanara n ma ka bɔ Sɛsariya, wonu kera bɔn wo la, n bi kan min nun.

¹²Allata Ni-Sɛnimɛ ya a fɔ n ye ko n kana sika, n ni ta anu fɛ. N na-kelen-nyɔgɔ mɔgɔ wɔrɛ kɛnu fanan tara n fɛ Sɛsariya, ado ma dama donta Kɔniliyasila bɔn la.

¹³A ya melika sɔnɛ yen ala bɔn la nya min, a ya wo bɛɛ fɔ ma ye. Melika wo ya a fɔ a ye ko a ni mɔgɛ do lata Yapa soe burɔ, mɔgɛ do nyini tinɛ min tɔgɛ Saimon Pita.

¹⁴A ko a si kumɛnu fɔ a ye anubɛ ala denbayɛ bɛɛ si kisi min fɛ.

¹⁵Nba, n wulita kumala tumɛ min, Allata Ni-Sɛnimɛ yigira anu fanan kuma iko a yigira male kuma nya min fɔlɔ-nun.

¹⁶ Mari ya kumɛ min fɔ, n nabilara wo la ko, ‘Yɔni ya batasili kɛ yi rɔ kɔnɔ wole si batasi Allata Ni-Sɛnimɛ la,’

¹⁷ado a ara gbɛ feu, ko male dɛnkɛninyara Mari Yisa, Allata-Mɔgɔ-Yabɔnɛ ma tumɛ min ko Alla ya kɔ-fan min di male ma, a ara wo sifa le di sibolo-gbɛrɛnu ma. Nba, nfen bi nde la nun worɔ ko n ni Alla lakala?”

¹⁸Anu ya kɛ lamɔɛn tumɛ min, anu ya a makumɛ boloka ka Alla tanto. Anu ko, “Nba, Alla ara fɛrɛ di sibolo-gbɛrɛnu fanan ma ko anu ni tubi ka habadan-nimayɛ sɔrɔn!”

¹⁹ Dɛnkɛninya-mɔgɛnu ya tɔrɔyɛ min sɔrɔn Sitifen sayɛ kɔma, wo ya a ma, anu nyɛnsɛnta. Donu tara fɔɔ Finisiya anubɛ Saiparasi nyamanɛnu tɔ anubɛ soe min tɔgɛ Antiyaki ka Allala kumɛ fɔ Yahudiyanu dɔrɔn ye.

²⁰Kɔnɔ minnu dɛnkɛninyanɛ Saiparasi anubɛ Sairini soenu burɔ, wo donu tara Antiyaki ka Mari Yisata kibara-nyima-kawandili bɔ sibolo-gbɛrɛnu ye.

²¹Marita sɛnbɛ tora anu fɛ. Mɔgɔ siyaman dɛnkɛninyara Mari ma ka bila a fɛ.

²²Koe wo mankan kera Mari Yisata mɔgɛnu ma Yerusalɛm. Woletɔ anu ya Banabasi lata Antiyaki.

²³A kera nyɔ tumɛ min, Alla ara ata duwɛ layigi ata mɔgɛnu kuma nya min, wo yen a bolo, a sewara. A ya anu dama makawandi ko anu ni lanayɛ kɛ ka telen Mari ye anu yisi bɛɛ la.

²⁴Mɔgɔ-nyimɛ le Banabasi la. A fanɛ Allata Ni-Sɛnimɛ anubɛ dɛnkɛninyɛ la, woletɔ mɔgɔ siyaman mara Maritɛ la nyɔ.

²⁵Wo kɔma, Banabasi tara Sɔli nyini tinɛ Tarasa soe burɔ.

²⁶A ya a yen tumɛ min, a nara a la Antiyaki. San kelen kɔrɔ, anu mɔgɔ filɛ tora ladɛn kɛla Mari Yisata mɔgɛnu fɛ nyɔ ka nyama-ba karan. Antiyaki soe burɔ, Yisata mɔgɛnu tɔgɔ kele fɔlɔtɛ kɛra ko Kirasitita mɔgɛnu.[11]

²⁷Wo wati rɔ, nɛbi donu bɔra Yerusalɛm soe burɔ ka ta Antiyaki.

²⁸ Kelen bi anu tɛma min tɔgɛ Agabasi, wo ya a sɔ ka wɔlɔyiyɛ kɛ Allata Ni-Sɛnimɛ sɛnbɛ baraka rɔ ko kɔnkɔ-fitinɛ ye nala duninya bɛɛ rɔ. (Wo kɛra wo tumɛ Kaladiyasi ye Romu nyamanɛ kun-tigiyɛ la.)

²⁹Yisata mɔgɛnu ya a latɛgɛ ko anu kelen-kelennamɛ-bɛɛ wa ke anu bolo-fan fenfen sɔrɔnna, anu ni wo lata anu na-kelen-nyɔgɛnu ma minnu siginɛ Yudiya nyamanɛ rɔ anu dɛnbɛn-koe la.

³⁰Anu ya wodi wo don Banabasi anubɛ Sɔli bolo ka a lata Mari Yisata mɔgɔ-banu ma Yerusalɛm soe burɔ.