Read Kuranko Kɛwɔlɛnu 12 Bible Online

Kɛwɔlɛnu 12 - Kuranko bible

Kɛwɔlɛnu 12

¹Mansa Hɛrodi burunta Mari Yisata mɔgɛnu tɔrɔla wati wo le tɔ.

²A ya kɛlɛ-dannu sɔ Yɔni na-kelen-nyɔgɛ Yemesi ma ka a kan natɛgɛ,

³ado Hɛrodi ya a yen tumɛ min ko Yahudiyanu diyana-koe le wo la, a ma dan wo ma. A ya Pita fanan bira. (Wo kɛra Biredi-Yɛlɛbɛlɛ-Dɔn-Ladɛn wati rɔ.)

⁴ Anu ya a sa yele la. Anu ya a don kɛlɛ-den mɔgɔ nani, sigi tina nani (16) bolo alako anu si a kandan nya min. A ye Hɛrodi kɔntɔ nun ko Kanan-Ko-Ladiyɛ wa ban, a ni ala kiti fɔ Yahudiyanu yala.

⁵Pita sanɛ yele la tumɛ min, Mari Yisata mɔgɛnu ma fara Alla matarala a ye mumɛ!

⁶A sɔgɛ ye Hɛrodi la ka Pita kiti mɔgɛnu yala tele min na, suyi wo rɔ, Pita kinɔgɔra a kandanna mɔgɔ filɛ tɛma, a kirinɛ yɔlɔkɔ fila la. Yele-bon-kandannɛnu sɔnɛ dɛ la.

⁷Tiriyante wo rɔ, Marita melika sɔra nyɔ. Waan rakara yele-bɔn la. Melika ya Pita magbesi a kanban-kunyɛ ma ka a lakunden. A ko, “I lasɔ tiriya!” Tiriyante wo rɔ, yɔlɔkɛnu buira ka bɔ a bolenu na.

⁸Melika ko, “I ni i mabɛn ka ila sanbarɛ don i kian rɔ.” Pita ya wo ma. Melika ko, “Ila duruki don i kan la ka bila n fɛ.”

⁹Pita bilara a fɛ ka bɔ yele la. Hali wo, melika wo ya min bɛɛ ma, Pita ya a lɔn ko a ye ko-rayirɛ le yenna nun dɔrɔn.

¹⁰Anu tenbira kandannɛ sigi tinɛ fɔlɔtɛ la, anubɛ a fila nyɔgɛnu. Nɛgɛ-dɛ min bi yele la nyɔ, anu kera wo ma tumɛ min, dɛ wo lakara a nyɛrɛ ma anu ye. Anu donta soe burɔ. Anu bi tagamana soe burɔ nkɛkuna, tiriyante wo rɔ, melika wo ya Pita boloka.

¹¹Wo kɔma, min bara ma Pita la, a ya a miri wonu ma. A ko, “N bara a lɔn gbɛ serr, ko tonyɛ le! A sɔgɛ ye Yahudiyanu na ka min sigi n ma nun, Mari ara ala melika sɔ ka n tanka anubɛ Yahudiyanu masibɛ ma.”

¹²A ya a nyɛrɛ lɔn tumɛ min, a tara Yɔni-Maraka na warɛ, Mariyama, kɔni. Mɔgɔ siyaman nadɛnnɛ nyɔ Alla matarala.

¹³Pita ya sansan-don-dɛ matugu. Wɔli-kɛla-dunmusi min tɔgɛ Roda, wo nara ka na a lɔn ni min bi nyɔ.

¹⁴A ya Pita kuman-kan lamɔɛn min kɛ, a tɛrɛnara. A ma dɛ laka sewɛ bolo. A burimatoe sɛgira ka a fɔ ko, “Pita sɔnɛ dɛ la.”

¹⁵Anu ya a fɔ a ye ko, “I ma ara yuwaya! I foni!” Kɔnɔ a kirita a ma ko tonyɛ le. Woletɔ anu ya a yabi ko, “A yiyɛ le dɔrɔn.”

¹⁶Kɔnɔ Pita tora dɛ matugula dɛɛ! Tɔ-a-la, anu ya dɛ laka a ye. Anu ya a yen tumɛ min, anu kawara!

¹⁷A ya a bole sa a dɛ la ko anu kana kuma. Mari ya a labɔ yele la nya min, a ya wo bɛɛ rakaran anu ye. A ko, “Wo ni a fɔ Yemesi[12] anubɛ ma na-kelen-nyɔgɔn toe bɛɛ ye min mara.” A bɔra ka ta kan-tina-gbɛrɛ.

¹⁸Bandɛ kara tumɛ min, yele-makandannɛnu kɔndɔfilita dɔgɔma-ma-de! Anu ko, “Nfen bara ma Pita la?”

¹⁹Hɛrodi ya a fɔ ko anu ni a nyini kɔnɔ anu ma ke a yenna. Woletɔ a ya yele-makandannɛnu fɛsɛfɛsɛ bɛrɛkɛ! Wo kɔma, a ya yele-makandannɛ wonu faga-koe latɛgɛ. Wo ban, Hɛrodi bɔra Yudiya ka ta a sigi Sɛsariya soe burɔ.

²⁰Mansa Hɛrodi diminyara Taya anubɛ Saidon so-burɔ-mɔgɛnu ma kati! Kɔnɔ anuna nyamanita-mɔgɛnu bi anuna dɔn-fannu sɔrɔnna Mansa Hɛrodila nyamanɛ le tɔ. Woletɔ anu ya anu nadɛn ka ta Hɛrodi yen. Bilasita min bi Hɛrodila mɔgɔ-ba do la, anu ya wo fɔlɔn ma anu yatigi la bawo wo le kun-tigiyɛ la nyɔ. Wo kɔma, anubɛ Bilasita tara Hɛrodi wara ka a madiya ni a si kɛlɛ ban.

²¹Wati wo kera tumɛ min, Hɛrodi ya ala mansaya-duruki don a kan na ka sigi ala mansaya-waganɛ rɔ. A kumara mɔgɛnu ye.

²²Anu ya wɔyɔ layɛlɛ ko, “Mɔgɔ sa kumala kɛ la fɔ Alla!”

²³Tiriyante wo rɔ, Marita melika ya Hɛrodi gbesi a rɔ. A buira dugi ma bawo a ma Alla gbiliya. Tɔ-a-la, tunbinu kɛra a rɔ ha a fagara.

²⁴Wo bɛɛ rɔ, Allala kumɛ tora nyɛnsɛnna ka wara.

²⁵Banabasi anubɛ Sɔli ya anuna wɔlɛ ban tumɛ min, anu bɔra Yerusalɛm soe burɔ ka sɛgi Antiyaki soe burɔ. Anu tara Yɔni-Maraka la anu bolo.