Read Kuranko Kɛwɔlɛnu 15 Bible Online

Kɛwɔlɛnu 15 - Kuranko bible

Kɛwɔlɛnu 15

¹ Pɔli anubɛ Banabasi ye Siriya-Antiyaki tumɛ min, mɔgɛ donu nara ka bɔ Yudiya nyamanɛ rɔ. Anu ya Marita mɔgɛnu karan ko mɔgɛ ti ke kisila fɔ a ni kemininya iko Musata tɔn ya a fɔ nya min.

²Kɛ mara sɔsɔli-belebele la Pɔli anubɛ Banabasi anubɛ mɔgɔ wonu tɛma. Woletɔ anu ya a latɛgɛ ko Pɔli wo, Banabasi wo, anubɛ Antiyaki kɛ donu ni ta Yerusalɛm alako Yisata kilayɛnu anubɛ nyɔ-mɔgɔ-banu ni anu kun nayigi kumɛ kɛla ko la.

³Marita mɔgɛ minnu bi Antiyaki, wonu ya kɛnu nata Yerusalɛm. Wonu tenbira Finisiya anubɛ Samariya nyamanɛnu tɔ tumɛ min, sibolo-gbɛrɛnu yɛlɛmanta nya min Alla ye, anu ya dantɛgɛlɛ wo sa nyɔ-dɛnkɛninya-mɔgɛnu ye. Wo ya a ma, Mari Yisata mɔgɛ bɛɛ sewara bɛrɛkɛ!

⁴Anu kera Yerusalɛm tumɛ min, Marita mɔgɛnu wo, Yisata kilaya-toenu wo, anubɛ nyɔ-mɔgɔ-banu ya anu tabira a kin na! Alla ya koe min bɛɛ kɛ mɔgɛnu ye anuna wɔlɛ fɛ, anu ya wo bɛɛ rakaran mɔgɔ-ba wonu ye.

⁵Kɔnɔ Farisi minnu bara dɛnkɛninya Yisa ma, wonu ya anu nasɔ. Anu ko a fɛrɛ sa fɔ sibolo-gbɛrɛ kɛnu ni kemininya iko anu denu, ado anu ya a fɔ anu ye fanan ko anu ni Musata tɔnnu bira iko anu denu.

⁶Yisata kilayɛnu anubɛ nyɔ-mɔgɔ-banu ya anu kun nayigi ka sibolo-gbɛrɛnu wara-koe fɛsɛfɛsɛ.

⁷ Anu mɛra sɔsɔli siyaman sala. Tɔ-a-la, Pita ya a lasɔ. A ko, “N na-kelen-nyɔgɛnu, wo ya a lɔn ko Alla ara nde yabɔ wo tɛma kebi fɔlɔ ka Yisata kibara-nyima-kawandili bɔ sibolo-gbɛrɛnu ye alako anu fanan ni a lamɔɛn ka dɛnkɛninya.

⁸ Nba, Alla ya mɔgɛ bɛɛ yisi lɔn. A ya ata Ni-Sɛnimɛ di male ma nya min, a ara wo di sibolo-gbɛrɛnu fanan ma wo nya na le. Wo ya a ragbɛ ko a ya anu denu fanan yabɔ.

⁹A ma dan-nafarɛ don mabɛ anu tɛma hali! Anu dɛnkɛninyara min kɛ, woletɔ a ya anu makoto anu hakɛ ma.

¹⁰Nfenna worɔ, wo ye a fɛ ka Alla ladiminya ka dunɛ sa dɛnkɛninya-mɔgɛ kɛnu kuma? Ado nfan, mabɛ ma benbanu ma ke dunɛ wo dununa.

¹¹Male ara dɛnkɛninya Mari Yisa ma nya min, anu fanan bi wo nya na le. Ma bɛɛ kisinɛ Mari Yisata hinɛ fɛ.”

¹²Nba, nyama bɛɛ ya anu tole masɔ kumɛ wo la a kin na! Alla ya kabana-koenu anubɛ tamasere min bɛɛ kɛ sibolo-gbɛrɛnu ye anuna wɔli fɛ, Banabasi anubɛ Pɔli ya wo bɛɛ rakaran anu ye.

¹³Anu banta kumala tumɛ min, Yemesi ya a fɔ anu ye ko, “N na-kelen-nyɔgɛnu, wo ni wo wɔlɔ matɔlɔ!

¹⁴Alla hɔnta sibolo-gbɛrɛnu na nya min ka mɔgɛnu yabɔ anu tɛma alako wonu ni ma atɛ la, iko Saimon Pita ban-san le min fɔla.

¹⁵Nɛbinuna kumɛ ara bɛn wo ma, yɔ! Iko nɛbinu ya a sɛbɛ nya min, anu ko,

¹⁶ ‘Nde, Mari si sɛgi ka Dawudala bon-buinɛ sɔ. N si a tinya tinɛnu tabɛn ka a sɔ tun gben!

¹⁷Woletɔ mɔgɔ-toe bɛɛ si nde, Mari nyini. N bara sibole min bɛɛ kele, wonu si ma ntɛ la.

¹⁸Nde, Mari le ya kɛ fɔ, ado n bara mɔgɛnu nalɔn kɛ la kebi fɔlɔ.’ ”

¹⁹Yemesi tora kumala, a ko, “Nta miriya rɔ, sibolo-gbɛrɛ minnu bara anu yɛ lamunun Alla la, ma kana wonu tɔrɔ kemininya-koe la.

²⁰ Kɔnɔ ma ni kɛdi sɛbɛ anu ma ka a fɔ anu ye ko dɔn-fan min bara di bɛsɛnu ma nun, anu kana wo dɔn bawo a latinyanɛ. Anu ni anu nyɛrɛ matanka yɛlɛnya-su bɛɛ ma. Wo kɔma, anu kana sogo-yifanɛ fenfen dɔn bawo a yele ye a rɔ.

²¹Alla ya tɔn min di Musa ma, ma ara wo karan mala dina-bɔnnu na Sulen-Tele bɛɛ kebi fɔlɔ, ado anu si ala kumɛ wo lake soe bɛɛ rɔ.”

²²Nba, Yisata kilayɛnu wo, nyɔ-mɔgɔ-banu wo, anubɛ dɛnkɛninya-mɔgɛ bɛɛ, wonu ya a latɛgɛ ko anu ni mɔgɛ donu bɔ anu tɛma ka wonu nata Siriya-Antiyaki soe burɔ Pɔli anubɛ Banabasi fɛ. Anu ya mɔgɔ fila yabɔ minnu gbiliyanɛ Yisata mɔgɛnu bolo bɛrɛkɛ, Yudasi, anu si min kele fanan ko Basaba anubɛ Sailasi, kɔni.

²³Anu ya kɛdi sɛbɛ ka a don anu bolo. Kɛdi wo ko, “Male Mari Yisata kilayɛnu anubɛ mɔgɔ-banu, “Ma ye wole, ma na-kelen-nyɔgɛ sibolo-gbɛrɛnu kɔndɔnna minnu siginɛ Antiyaki soe anubɛ Siriya anubɛ Salesiya nyamanɛnu tɔ.

²⁴Ma ara a lamɔɛn ko mala mɔgɛ donu tara wo tɔrɔ tinɛ ka wo kɔndɔfili anuna kumɛ fɛ. Kɔnɔ male ma anu sɔ de!

²⁵Woletɔ ma ara ma ladɛn. Ma dama ara sɔn ko ka kilayɛnu nata wo ma. Anu bi tala ma diyana-mɔgɛnu fɛ, Banabasi anubɛ Pɔli, kɔni.

²⁶Wonu denu bara anu niyi fili-a-rɔ ma Mari Yisa, Allata-Mɔgɔ-Yabɔnɛta wɔlɛla ko la.

²⁷Nba, ma ara Yudasi anubɛ Sailasi lata wo ma fanan. Ma ye koe minnu sɛbɛla, wonu si wo bɛɛ fɔ wo ye.

²⁸Allata Ni-Sɛnimɛ anubɛ male ara sɔn ko dunu-gbɛrɛ kana sa wo kuma fɔ tɔn kɛ minnu fɛrɛ sa.

²⁹A fɔlɔtɛ, wo kana fen dɔn min dira bɛsɛnu ma nun. A fila nyɔgɛ, wo kana sogo-yifanɛ dɔn bawo a yele ye a rɔ. A sawa nyɔgɛ, wo ni wo nyɛrɛ matanka yɛlɛnya-su bɛɛ ma. Ni wo ya wo nyɛrɛ matanka koe kɛnu ma, koe bɛɛ si bɛn wo ma. Alla ni to wo fɛ.”

³⁰Anu ya kilaya nani wonu boloka ko anu ni ta Antiyaki soe burɔ. Anu kera nyɔ tumɛ min, anu ya dɛnkɛninya-mɔgɛ bɛɛ ladɛn ka kɛdi wo di anu ma.

³¹Mɔgɛ wonu ya kɛdi karan tumɛ min, anu dama fara sewɛ la makawandili-kumɛ wola ko la.

³²Yudasi anubɛ Sailasi minnu bi nɛbiyɛ la anu tɛma, wonu mɛra kumala Marita mɔgɛnu ye ka anu makawandi ka anu sɛnbɛ don.

³³Anu ban wati-ni bɔla Antiyaki soe burɔ, Marita mɔgɛ minnu bi nyɔ, wonu ya anu nasɛgi tun yisi-kimɛ rɔ. [

³⁴Sailasi ya a latɛgɛ ko a ni to Antiyaki nyɔ.]

³⁵Kɔnɔ Pɔli anubɛ Banabasi mɛra Antiyaki doni. Wonubɛ mɔgɔ siyaman ya mɔgɛnu karan ka Marita kumɛ kawandili bɔ.

³⁶Wati dande kɔma, Pɔli ya a fɔ Banabasi ye ko, “Ma ya Marita kumɛ kawandili bɔ soe min bɛɛ rɔ, ma sɛgi wona ma gbɛ wonu tɔ ka Marita mɔgɛnu sigi-nya lɔn.”

³⁷A sɔgɛ ye Banabasi la ko Yɔni-Maraka ni ta anu fɛ

³⁸ kɔnɔ Pɔli yala, a ma bɛn wo ni ta anu fɛ bawo a ma ke ala wɔli labanna nun. A sɛgira nun ka anu boloka Pamfiliya nyamanɛ rɔ.

³⁹Wo mara sɔsɔli-belebele la anu tɛma ha anu farata anu nyɔgɔn na. Banabasi ya Yɔni-Maraka bi. Wonu donta kulɔn rɔ ka ta Saiparasi yi-tɛma-dugi rɔ.

⁴⁰Marita mɔgɛnu ya Pɔli dantɛgɛ Allata hinɛ ma. Wo kɔma, ale ya Sailasi yabɔ. Anu tara anu nyɔgɔn fɛ.

⁴¹Anu tara Siriya anubɛ Salesiya nyamanɛnu tɔ ka nyɔ-dɛnkɛninya-mɔgɛnu sɛnbɛ don.