Read Kuranko Kɛwɔlɛnu 18 Bible Online

Kɛwɔlɛnu 18 - Kuranko bible

Kɛwɔlɛnu 18

¹Wo kɔma, Pɔli bɔra Atɛn soe burɔ ka ta Kɔrɛnti soe burɔ.

²A ya Yahudiya do taran nyɔ, a tɔgɛ Akuwila. A sɔrɔnta Ponta nyamanɛ rɔ. Anubɛ ala musi Purusila na-san le nun ka bɔ Itali nyamanɛ rɔ bawo Romu Nyamani-Kun-Tigi-Ba Kalodiyasi ara a fɔ nun ko Yahudiya bɛɛ ni bɔ Romu soe burɔ. Pɔli tara anu kɔndɔn tinɛ.

³A mɛra nyɔ wɔlila anu fɛ bawo a ye a beli-fan sɔrɔnna fani-bɔn-nadan-wɔlɛ wo le tɔ iko wonu fanan bi a mala nya min.

⁴Sulen-Tele bɛɛ ma, a kumara Yahudiya-dina-bɔn la ka a raya ko Yahudiyanubɛ sibolo-gbɛrɛnu ni yɛlɛma ka ma dɛnkɛninya-mɔgɛnu na.

⁵Sailasi anubɛ Timoti kera nyɔ tumɛ min ka bɔ Masidoniya nyamanɛ rɔ, Pɔli tora kawandili bɔla Yahudiyanu ye wati bɛɛ. A ye sereyɛ bɔla anu ye ko Yisa, Allata-Mɔgɔ-Yabɔnɛ le.

⁶Kɔnɔ tɔ-a-la, anu ya a sɔsɔ ka a manyini. Woletɔ a ya ala duruki ragbɔngbɔn anu kan ma. A ya a fɔ anu ye ko, “Ni wo halakira, wo ti mɔgɔ ta-a-la! Nta sa a rɔ. Ka a dabira bi ma, n si ta sibolo-gbɛrɛnu wara la.”

⁷Woletɔ a tara don sibolo-gbɛrɛ dola bɔn la min tɔgɛ Taita Yasita. Alla-batolɛ le wo la. Ala bɔn tugunnɛ Yahudiya-dina-bɔn la.

⁸Yahudiyanuna dina-bon-kun-tigi Karisipa, wonubɛ ala denbayɛ bɛɛ dɛnkɛninyara Mari ma. Kɔrɛnti kɛ siyaman ya Allala kumɛ lamɔɛn. Anu siyaman dɛnkɛninyara ka batasi.

⁹Suyi do rɔ, Pɔli ya ko-rayirɛ do yen. Mari ya a fɔ a ye wo rɔ ko, “I kana kilan. Mɔgɔ-wo-mɔgɔ ti ke i madumala bawo n bi i fɛ. I ni to kawandili bɔla. I kana bandan bawo ntɛ le mɔgɔ siyaman na soe kɛ burɔ.”

¹¹Woletɔ Pɔli tora mɔgɛnu karanna Allala kumɛ la nyɔ san kelen ani a tala.

¹²Kaliyo ye Romu kɛnuna sigisɔn-mansayɛ la Kiriki nyamanɛ wo rɔ min tɔgɛ Akeya tumɛ min, Yahudiyanuna kun-tigi donu ya Pɔli bira ka ta a la kiti tɛgɛ tinɛ.

¹³Anu ko, “Kei kɛ ye a rayala ko mɔgɛnu ni Alla-bato-nya do ma min bi mala tɔn kan ma!”

¹⁴Yanni Pɔli ni kuma tumɛ min, Sigisɔn-Mansa Kaliyo ya a fɔ Yahudiyanu ye ko, “Ni telenbɛliya-koe le, ni wo ma, ko-yogoma-koe do le nun, n si n munyu wole Yahudiyanu kɔrɔ worɔ.

¹⁵Kɔnɔ kiti kɛ bɛɛ tɛgɛnɛ kumɛnu anubɛ tɔgɛnu anubɛ wola tɔn-koe le ma, woletɔ wole nyɛrɛ ni kiti kɛ ban wo gbansan tɛma. N ti ma wo ko-sufanu kiti-tɛgɛlɛ la!”

¹⁶A ya anu gben kiti tɛgɛ tinɛ rɔ.

¹⁷Nyama ya Yahudiyanuna dina-bon-kun-tigi Sasitɛni bira ka a gbesi kiti-tɛgɛ-bɔn yarɔ. Kɔnɔ Mansa Kaliyola ko ma taran wo rɔ hali doni!

¹⁸ Pɔli ya tele siyaman bɔ Marita mɔgɛnu fɛ Kɔrɛnti soe burɔ. Wo kɔma, ale wo, Akuwila wo, anubɛ Purusila donta kulɔn rɔ ka ta Siriya nyamanɛ rɔ. Yanni a ni don kulɔn rɔ, a ya a kunyɛ sii Sɛnkariya soe burɔ bawo a ara a dato Alla ye nun.

¹⁹Anu sawɛ ke Ɛfɛsa soe burɔ, Pɔli ya Akuwila anubɛ Purusila to nyɔ. Yanni a ni Ɛfɛsa soe boloka, a tara Yahudiya-dina-bɔn la kawandili bɔ tinɛ Yahudiyanu ye.

²⁰Anu ya a madiya ko a ni mɛ anu fɛ kɔnɔ a ma sɔn wo ma.

²¹A ya a masara anu na ka a fɔ anu ye ko, “Ni Alla sɔnta, n bi nala tun.” A donta kulɔn rɔ Ɛfɛsa soe nyɔ ka ta Sɛsariya soe burɔ.

²²A kera Sɛsariya tumɛ min, a ya dɛnkɛninya-mɔgɛnu kɔndɔn. Wo kɔma, a tara Antiyaki soe burɔ tun.

²³A mɛra nyɔ doni. Wo kɔma, a tara Kalesiya anubɛ Parigiya nyamanɛnu tɔ ka nyɔ-dɛnkɛninya-mɔgɛ bɛɛ sɛnbɛ don.

²⁴Yahudiya do nara Ɛfɛsa soe burɔ min tɔgɛ Apɔlɔsi. A sɔrɔnta Alɛsandariya soe burɔ. A kusan kumala, ado a karannɛ Yahudiyanuna kitabu ma bɛrɛkɛ!

²⁵A ya Mari Yisata koe fanan lɔn. A kumara sɛnbɛ-wɛ la Yisa wara-koenu tɔ a kin na kɔnɔ a ya Yɔnila batasili-koe dɔrɔn lɔn.

²⁶Apɔlɔsi kumara yisi-latɛgɛ rɔ Yahudiya-dina-bɔn la nyɔ. Akuwila anubɛ Purusila ya ala kumɛ lamɔɛn tumɛ min, wonu tara a la anu barɛ ka Allala koe faranfasi a ye a kilɛ fɛ.

²⁷Apɔlɔsi ya a latɛgɛ ko a ni bɔ Akeya sigisɔn rɔ. Woletɔ Marita mɔgɛ minnu bi Ɛfɛsa, wonu ya kɛdi sɛbɛ Marita mɔgɛnu ma Akeya sigisɔn rɔ ko anu ni a rabira nyɔ. A kera nyɔ tumɛ min, minnu dɛnkɛninyara Yisa ma Allata hinɛ baraka rɔ, a ya wonu dɛnbɛ kati!

²⁸A ya Yahudiyanu nɔ kumɛ rɔ gbɛ rɔ. A ya a fɔ gbɛ rɔ ka bɔ Yahudiyanuna kitabu rɔ ko Yisa, Allata-Mɔgɔ-Yabɔnɛ le.