Read Kuranko Kɛwɔlɛnu 2 Bible Online

Kɛwɔlɛnu 2 - Kuranko bible

Kɛwɔlɛnu 2

¹ Ladɛn min tɔgɛ Pɛntikɔsi,[2] wo kera tumɛ min, dɛnkɛninya-mɔgɛ bɛɛ ladɛnnɛ anu nyɔgɔn fɛ kan-tina-kelen.

²Tiriyante wo rɔ, kuman-kan bɔra san-kole rɔ iko fɔn-sɛnbɛmɛ. Minnu siginɛ bɔn wo mumɛ burɔ, anu damasi ya a lamɔɛn.

³Anu ya fan donu yen minnu manɛ iko ta-mɛlan. Ta-mɛlan wonu manɛ iko mɔgɔ nagan. Wonu nyɛnsɛnta ka sigi mɔgɔ kelen-kelennamɛ-bɛɛ ma.

⁴Allala Ni-Sɛnimɛta sɛnbɛ yigira anu damasi kuma. Bɛɛ ya kan-gbɛrɛ-fɔɛ dabira iko Allata Ni-Sɛnimɛ ye anu nabilala nya min.

⁵Wo wati ya a taran, Yahudiya siyaman bi Yerusalɛm nyɔ nun. Alla-batoli-bɛrɛ le Yahudiya wonu na minnu nara ka bɔ duninya-tonko-nanɛ bɛɛ rɔ.

⁶Wonu ya kuman-kan kɛ bɛɛ lamɔɛn tumɛ min, nyama-wɛ burimatoe nara ka a lɔn min mara. Anu dama kɔndɔfilita bawo anu kelen-kelennamɛ-bɛɛ ya a lamɔɛn anu bi anuna kan fɔla.

⁷Anu kɔndɔfilita ha ka kawa. Anu ko, “Min bɛɛ ye kumala kɛ la, Kalili kɛ le kɛnu na!

⁸A mara kama worɔ ma ye mata kan lamɔɛnna kɛnu da rɔ?

⁹Male donu bɔra Patiya, Midiya, anubɛ Ilam nyamanɛnu tɔ. Donu bɔra Mɛsapotemiya, Yudiya, anubɛ Kapadosiya nyamanɛnu tɔ. Donu bɔra Ponta, anubɛ Esiya nyamanɛnu tɔ.

¹⁰Donu bɔra Parigiya anubɛ Pamfiliya nyamanɛnu tɔ. Donu bɔra Iyipiti anubɛ Libiya nyamanɛ min bi Sairini soe dafɛ. Donu bɔra Romu soe burɔ fanan.

¹¹Yahudiya anubɛ sibolo-gbɛrɛ minnu bi Yahudiyanuna dina rɔ, wonubɛ ma ta-nyɔgɛnu bɔra Kariti anubɛ Arebiya nyamanɛnu tɔ. Hali wo, anu bi Allala kabana-ko-wɔlɛ fɔla min kɛ, ma ye wo lamɔɛnna ma nyɛrɛta kannu tɔ.”

¹²Anu kɔndɔfilita ka kawa. Anu dama tora anu nyɔgɔn manyinikala ko, “Kɛ kɔrɛ ye kama?”

¹³Kɔnɔ donu ya dɛnkɛninya-mɔgɛnu mayɛlɛn, anu ko, “Gbɛɛ le ara mɔgɛ kɛnu bira!”

¹⁴Kumɛ wo ya a ma, Pita anubɛ a ta-nyɔgɔ kilaya tan-ni-kelannu ya anu nasɔ. Pita kumara nyama ye a kulu-mayɛlɛnɛ la. A ko, “N na-kelen-nyɔgɔ Yahudiyanu anubɛ wole Yerusalɛm-sigilɛ bɛɛ, wo ni wo tole masɔ n na. N bi min fɔla, wo ni wo wɔlɔ matɔlɔ wo la.

¹⁵Gbɛɛ ma kɛnu bira iko a ye wo kɔntɔ nya min bawo sun-tele-wati le kɛ la (9 am).

¹⁶Nɛbi Yowɛli ya minna ko fɔ, wo le kɛ la.

¹⁷ ‘Alla ko a si min ma tele-labannu tɔ, wo le kɛ la. A ko a si ata Ni-Sɛnimɛ layigi mɔgɛ bɛɛ kuma. Mala den-keinu anubɛ mala dunmusinu si wɔlɔyiyɛ kɛ. Mala kemini-mɛsɛnu si ko-rayirɛnu yen. Mala kɛmɔgɛnu si kiyonu sa.

¹⁸A ko wo telenu tɔ, a si ata Ni-Sɛnimɛ layigi hali yɔɔnnu kuma, a keima wo, a musuma wo. Anu dama si wɔlɔyiyɛ kɛ.

¹⁹A ko a si kabana-koenu yira san-kole rɔ anubɛ tamaserenu dugu-kole kuma. Yele si bɔ anubɛ tɛ anubɛ ta-sisi-wɛ.

²⁰Yanni ale Marila gbiliya-tele-makawani-bɛ ni ke, a ko tele si fin, karɛ si wulen iko yele,

²¹ado mɔgɔ-wo-mɔgɔ wa madiyali kɛ Mari tɔgɔ rɔ, a ko wo tigi si kisi.’

²²“Wole Isirɛla mɔgɛnu, wo ni wo wɔlɔ matɔlɔ kumɛ kɛnu na! Yisa Nasarɛti kɛ, mɔgɛ le wo la nun Alla ya min sɔ. A ya ala sarati yira wo la nun kɛwɔli-sɛnbɛmɛnu anubɛ kabana-koenu anubɛ tamaserenu fɛ. Alla ya wonu kɛ ale fɛ, ado wole nyɛrɛ ya wo lɔn bawo a kera wo dama yala.

²³ Alla ya a latɛgɛ a nyɛrɛ sako fɛ ko Yisa ni don wo bolo. Wole ya a faga bawo wo sɔnta ko hakɛ-tiginu ni a gbangban kɔlɔma ma wo yala.

²⁴ Kɔnɔ Alla ya a lawuli ka bɔ furinu tɛma. A ya a hɔrɔya saya-dumɛ ma bawo a ti ke tola biralɛ rɔ sayɛ bolo,

²⁵ ado Mansa Dawuda ya Yisala koe fɔ, a ko, ‘Mari ye n fɛ tumɛ bɛɛ. A ye n dafɛ min kɛ, n yisi ti tɔrɔ.

²⁶N yisi la ara fa sewɛ la. Nta kumɛnu mara nyagalen-kumɛnu dɔrɔn na. Hali n mara hadama-dan la, n si n sulen yigi-nyimɛ rɔ serr!

²⁷Yigi wo ye n bolo bawo n niyi ti to lakira. I ti sɔn nde, ila Wɔli-Kɛla-Sɛnimɛ ni tuli kanbɛ rɔ.

²⁸I wara habadan-niyi-kilɛnu yira n na, ado i si n nafa sewɛ la i yakɔrɔ.’

²⁹“N na-kelen-nyɔgɛnu, fɔ n ni ma benba Dawudala koe fɔ wo ye ka a gbɛ. A fagara. Anu ya a togon, ado ha bi, a kanbɛ ye ma fɛ yan.

³⁰ Kɔnɔ nɛbi le nun. Alla ya lanyiri min kiri a ye, a ya wo lɔn. Alla ya a keli ko a si ale Dawuda bɔnsɔn do ma mansɛ la iko ale Dawuda ye nya min nun.

³¹Alla ye a fɛ ka min kɛ yarɔ, Mansa Dawuda ya wo yen. Woletɔ a ye Allata-Mɔgɔ-Yabɔnɛ lawuli-koe le fɔla nun. A ko a ti a to kanbɛ rɔ, a fɛrɛ-bɔnkɛ si tuli kan min.

³²Alla ara Yisa nyɛrɛ kɛ lawuli ka a bɔ furinu tɛma. Ma damasi le sereyɛ wo la.

³³A yɛlɛta ka sigi Alla kɔɛn-nyimɛ rɔ. A ya Allala Ni-Sɛnimɛ sɔrɔn iko a Fa Alla ya lanyiri kiri a ye nya min, ado Alla ara ata Ni-Sɛnimɛ wo labɔn ma kuma iko wo ye min yenna kaka ka a lamɔɛn nya min.

³⁴ Mansa Dawuda nyɛrɛ ma yɛlɛ Arinyɛni tɔ kɔnɔ a ko, ‘Mari ya a fɔ n Mari ye ko a ni a mayigi a bolo-nyimɛ rɔ

³⁵ha a ni a yogenu ma a kin-sɔ-fan la a kian kɔrɔ.’

³⁶“Nba, wole Isirɛla mɔgɛ bɛɛ ni a lɔn serr, ko wo ya Yisa min gbangban kɔlɔma ma, Alla ara wo le ma Mari anubɛ ata Mɔgɔ-Yabɔnɛ la gbɛ!”

³⁷Mɔgɛnu ya wo lamɔɛn tumɛ min, wo ya anu yisi tɔrɔ dɔgɔma-ma-de! Anu ya a fɔ Pita anubɛ Yisata kilayɛ doinu ye ko, “Ma na-kelen-nyɔgɛnu, ma si nfen ma gbɛ?”

³⁸Pita ya a fɔ anu ye ko, “Wo kelen-kelennamɛ-bɛɛ ni yɛlɛma ka wo kan-kɔ sɔ wola hakɛnu na. Wo kɔma, wo ni batasi ale Yisa, Allata-Mɔgɔ-Yabɔnɛ tɔgɛ rɔ, woletɔ Alla si wo makoto wola hakɛnu ma. Alla si ata Ni-Sɛnimɛ di wo ma.

³⁹Alla ya lanyiri wo kiri wobɛ wola dannu ye hali minnu bi wula-yan la, ma Mari Alla ye min bɛɛ kelela a wara, kɔni.”

⁴⁰Pita ya anu kawandi ka kuma-siyaman fɔ anu ye. A ko, “Wo ni wo nyɛrɛ kisi ka bɔ tɔrɔyɛ wo rɔ min bi nala mɔgɔ-yogomɛnu kan ma wola foolɛ rɔ!”

⁴¹Mɔgɔ-siyaman lara kumɛ kɛ la ka batasi. Anu mɔgɔ waga sawa nyɔgɔn (3,000) kofura anu ma tele wo nyɛrɛ kɔrɔ.

⁴²Wonu tora karanna Yisata kilayɛnu fɛ ka ta-nyɔgɔnyɛ kɛ. Anu tora Marita kima dɔnna anu nyɔgɔn fɛ ka Alla matara.

⁴³Yisata kilayɛ wonu ya kabana-ko-siyaman anubɛ tamasere-siyaman kɛ min ya a ma, mɔgɛ bɛɛ kawara.

⁴⁴ Dɛnkɛninya-mɔgɛ bɛɛ tora anu nyɔgɔn fɛ yiri! Anu ya anuna bolo-fannu tafara anu nyɔgɔn tɛma.

⁴⁵Anu ya anuna duginu anubɛ anuna bolo-fannu feri ka wodi wo rafara anu dama tɛma iko anu kelen-kelennamɛ-bɛɛ makoe ye nya min.

⁴⁶Anu tora anu nyɔgɔn nadɛnna Alla-Bato-Bɔn la tele-wo-tele. Anu ya fen-dɔn-kɛ anu nyɔgɔn fɛ ka Marita kima dɔn anu barɛnu tɔ sewɛ anubɛ famayigiyɛ rɔ.

⁴⁷Wo bɛɛ rɔ, anu bi Alla tantola. Anu diyara mɔgɛ bɛɛ ye. Minnu bara kisi, Mari tora wonu makofula tele-wo-tele.