Read Kuranko Kɛwɔlɛnu 21 Bible Online

Kɛwɔlɛnu 21 - Kuranko bible

Kɛwɔlɛnu 21

¹Ma ban ma masarala anu na, ma donta kulɔn rɔ ka ma telen yi-tɛma-dugi min tɔgɛ Kosi. Wo banda kɛ, ma tara yi-tɛma-dugu-gbɛrɛ min tɔgɛ Rode. Ma bɔra nyɔ ka ta Patara soe burɔ.

²Ma ya kulɔn taran nyɔ min bi tala Finisiya nyamanɛ rɔ. Ma donta wo rɔ ka ta yi kuma.

³Ma gbɛrɛnta yi-tɛma-dugi do ma min tɔgɛ Saiparasi. Ma ya wo to ma bolo-maran rɔ ka ta Siriya nyamanɛ rɔ. Ma sɔra Taya soe burɔ bawo anu bi dunɛnu nayigila nyɔ.

⁴Ma tara dɛnkɛninya-mɔgɛnu nyini tinɛ nyɔ ka lɔgɔkun kelen kɛ wonu fɛ. Anu ya a fɔ Pɔli ye Allata Ni-Sɛnimɛ baraka rɔ ko a kana ta Yerusalɛm.

⁵Ma ya lɔgɔkun kelen ban anu fɛ tumɛ min, ma tara kulun bi tinɛ. Anu dama tara ma bila-silala kilɛ fɛ, hali anuna musinu anubɛ anuna dannu. Ma dama ya ma nyɛnkin gbele ma ka Alla matara.

⁶Ma ban ma masarala ma nyɔgɔn na, ma donta kulɔn rɔ tun. Anu denu sɛgira anu barɛ.

⁷Ma tora tala kulɔn rɔ ka bɔ Taya soe burɔ ka ta Polɛmeya soe burɔ. Ma ya Marita mɔgɛnu kɔndɔn nyɔ ka tele kelen bɔ anu fɛ.

⁸ Wo banda kɛ, ma bɔra nyɔ ka ke Sɛsariya soe burɔ. Kawandili-bɔlɛ min tɔgɛ Filipi, ma tara don wo warɛ ko ma ni to ale fɛ. Mɔgɔ wɔrɔnfilɛ[22] minnu bi Marita kilayɛnu dɛnbɛna, wo kelen de Filipi kɛ la.

⁹Dunmusu-nɛ mɔgɔ nani ye a bolo ala bɔn la. Wonu si wɔlɔyiya-kumɛ fɔ.

¹⁰ Ma ya tele-dande kɛ nyɔ. Wonu tenbira, Nɛbi Agabasi nara ke nyɔ ka bɔ Yudiya nyamanɛ rɔ.

¹¹A ya Pɔlila butɛ-kiri-fan bi ka a nyɛrɛ kiannu anubɛ a bolenu kiri wo la. A ko, “Allata Ni-Sɛnimɛ le ya a fɔ n ye ko Yahudiyanuna kun-tigi donu si butɛ-kiri-fan kɛ tigi kiri ka le. Anu si wo ma Yerusalɛm soe burɔ ka a don sibolo-gbɛrɛnu bolo.”

¹²Nɛbi Agabasi ya kɛ fɔ nkɛkuna, mabɛ nyɔ-mɔgɛnu ya Pɔli madiya ko a kana ta Yerusalɛm.

¹³Kɔnɔ Pɔli ya anu manyinika ko, “Wo ye dila nfenna? Wo ye n yisi le tinyana wo la! Ka a fɔ ko anu ni n kiri Yerusalɛm, n tabɛnnɛ wola ko la. Hali anu ba n faga Mari Yisala ko la, tana ma wo la.”

¹⁴Ma ma ke ale Pɔli miriya yɛlɛmana. Woletɔ ma ya a madiyɛ boloka ka a fɔ a ye ko, “Alamɛ Mari sako kɛra.”

¹⁵Ma ta-wati kera tumɛ min, ma ya mala dunɛnu tabɛn. Ma ya Yerusalɛm kilɛ bira.

¹⁶Marita mɔgɛ donu bɔra Sɛsariya soe burɔ ka bila ma fɛ. Ma tara to kei do warɛ min tɔgɛ Meson. Saiparasi kɛ le, ado Marita mɔgɛ le kebi fɔlɔfɔlɔ.

¹⁷Ma kera Yerusalɛm tumɛ min, Marita mɔgɛnu ya ma rabira sewɛ la.

¹⁸Wo banda kɛ, mabɛ Pɔli tara Yemesi kɔndɔn tinɛ. Dɛnkɛninya-mɔgɔ-ba dama ladɛnnɛ nyɔ.

¹⁹Pɔli ya anu kɔndɔn. Alla ya koe min bɛɛ kɛ sibolo-gbɛrɛnu tɛma, a ya wo bɛɛ rakaran anu ye.

²⁰Anu ya wo lamɔɛn tumɛ min, anu dama ya Alla tanto. Anu ya a fɔ Pɔli ye ko, “Ma na-kelen-nyɔgɛ Pɔli, Yahudiya mɔgɔ waga siyaman bara dɛnkɛninya nya min, ma ara a yen worɔ ko Musata tɔn-bira-sɔgɛ ye anu dama la.

²¹A fɔra anu ye nun ko Yahudiya min bɛɛ siginɛ sibolo-gbɛrɛnuna nyamanɛnu tɔ ko i ye wonu karanna ko hali anu ma Musata tɔn bira. Anu ya a lamɔɛn ko anu kana anuna dannu nakemininya anubɛ anu kana Yahudiyanuna namunyɛ bira.

²²Anu bara a lamɔɛn fanan ko i wara na. Ma si wo ma kama wona?

²³ Ma ye a fɛ, i ni kɛ le ma ma ye, ado mɔgɔ nani ye yan minnu bara anu dato nun.

²⁴I ni bila anu fɛ. Wo ni sɛninya wo nyɔgɔn fɛ iko tɔn ya a fɔ nya min. I ni anu makoenu nyinya alako anu kunyɛ si sii[23] nya min. Woletɔ bɛɛ si a lɔn ko koe minnu fɔra anu ye ila ko la ko tonya ma wo fenfen na. Anu si a yen ko ile nyɛrɛ si Musata tɔn bira a kilɛ fɛ.

²⁵ Ma ara kɛdi lata Marita mɔgɛnu ma minnu dɛnkɛninyara ka bɔ sibolo-gbɛrɛnu tɛma ko anu kana fenfen dɔn min bara di bɛsɛnu ma nun. Ma ko anu kana sogo-yifanɛ dɔn bawo a yele ye a rɔ. Ma ko anu ni anu nyɛrɛ matanka yɛlɛnya-su bɛɛ ma.”

²⁶Wo kɔma, Pɔli anubɛ mɔgɔ nanɛ wonu ya anu tabɛn ka anu nyɔgɔn sɛninya. Pɔli donta Alla-Bato-Bɔn la ka sɛninya-telenu ban-tumɛ fɔ. Anu kelen-kelennamɛ-bɛɛta sarakɛ si bɔ wo wati le tɔ.

²⁷Sɛninya-tele wɔrɔnfilɛ wo ban-tumɛ gbɛrɛnta tumɛ min, Yahudiya donu nara ka bɔ Esiya nyamanɛ rɔ. Wonu ya Pɔli yen Alla-Bato-Bɔn la. Anu ya nyama bɛɛ latugu ko anu ni Pɔli bira.

²⁸Anu ya a lasɔnkɔ ko, “Isirɛla mɔgɛnu! Wo ni ma dɛnbɛ! Kei kɛ le ye tala dinkirɛ bɛɛ. A ye mɔgɛ bɛɛ karanna Isirɛla mɔgɛnu kan ma anubɛ Musata tɔn kan ma anubɛ Alla-Bato-Bɔn kɛ kan ma. Nba kaka, a ara na sibolo-gbɛrɛnu na Alla-Bato-Bɔn la ka kan-tina-sɛnimɛ kɛ latinya!” (

²⁹ Anu ya kɛ fɔ bawo anu bara Ɛfɛsa kɛ Tarofimasi yen Pɔli fɛ soe burɔ. Anu ya anu miri ko Pɔli le ara ta wo la Alla-Bato-Bɔn la sibolo-gbɛrɛnu ti ta kan min.)

³⁰Soe bɛɛ lamagara. Mɔgɛ bɛɛ ya anu buri anu nyɔgɔn fɛ Pɔli bira tinɛ. Anu ya a sagan ka a bɔ Alla-Bato-Bɔn kata burɔ. Wo kɔma, anu ya nyɔ-tenbi-bolɔnnu natogon tiriya!

³¹Nyama kɛra Pɔli ma tumɛ min, a fɔra Romu kɛlɛ-den-kun-tigi-ba ye ko sɔnkɔ-sɔnkɛ ye Yerusalɛm kan tinɛ bɛɛ rɔ.

³²Tiriyante wo rɔ, kɛlɛ-den-kun-tigi-ba wo ya kɛlɛ-den-kunyɛ donu bi anubɛ kɛlɛ-dannu. Anu burumatoe tara nyama tɛma. Mɔgɛnu ya kɛlɛ-den-kun-tigi-ba anubɛ ala kɛlɛ-dannu yen tumɛ min, anu ya Pɔli gbesɛ boloka.

³³Kun-tigi-ba wo tara Pɔli bira tinɛ. A ya a fɔ ala kɛlɛ-dannu ye ko anu ni a kiri yɔlɔkɔ fila la. Wo kɔma, a ya nyinikalɛ kɛ ko, “Yon bi kɛ la? A ya nfen tinya?”

³⁴Donu ya sɔnkɔ layɛlɛ ko kelenna ko la. Donu ya sɔnkɔ layɛlɛ ko-gbɛrɛla ko la. Anu ya kun-tigi-ba kɔndɔfili ha a ma ke a nya-bɛrɛ yenna. Woletɔ a ya a fɔ ala mɔgɛnu ye ko anu ni ta Pɔli la bariki burɔ, anu ti kɛ a ma kan min.

³⁵Anu kera a la nyɔ-yɛlɛ tinɛ ma tumɛ min, fɔ kɛlɛ-dannu ni a kɔrɔbi ka ta a la bawo nyama bɛɛ nyɛɛnɛ nun.

³⁶Anu dama bilara a fɛ. Anu bi sɔnkɛ layɛlɛla ko, “A faga! A faga!”

³⁷Anu bi tala a la bariki burɔ tumɛ min, Pɔli kumara kun-tigi-ba wo ye Kiriki-kan rɔ, a ko, “I si sɔn n ni koe do fɔ i ye?” Kun-tigi-ba wo ya a manyinika ko, “I ya Kiriki-kan lamɔɛn kama?

³⁸Iyipiti kɛ min ya murutiyɛ lawuli nun ka sɔ mɔgɔ-fagalɛ waga nani (4,000) yarɔ wulɛ rɔ, wo ma ile la, nyɛ?”

³⁹Pɔli ya a yabi ko, “Yahudiya le nde la. N sɔrɔnta Tarasa, Salesiya nyamanita-so-karantan do rɔ, kɔni. N fa, i yandi, i ni sɔn, n ni kuma mɔgɛnu na.”

⁴⁰Nba, kun-tigi-ba wo sɔnta. Woletɔ Pɔli sɔra yɛlɛ tinɛ kuma ka mɔgɛnu masabari a bole la. Anu ya anu masabari tumɛ min, Pɔli kumara anu ye anuna Yahudiya-kan rɔ.