Read Kuranko Kɛwɔlɛnu 22 Bible Online

Kɛwɔlɛnu 22 - Kuranko bible

Kɛwɔlɛnu 22

¹Pɔli ya a fɔ anu ye ko, “N fanubɛ n kɔrɔnu, wo ni wo wɔlɔ matɔlɔ n na, n ni n nyɛrɛ fɛka wo yala!”

²Anu ya a lamɔɛn a ye kumala anuna kan rɔ tumɛ min, anu ya anu made don! Pɔli ko worɔ,

³ “Yahudiya le nde la. N sɔrɔnta Tarasa soe burɔ Salesiya nyamanɛ rɔ kɔnɔ n makolota n karan-mɔgɔ Kameliyɛ bolo Yerusalɛm yan karan-denyɛ la. N ya ma benbanuna tɔn lɔn a kila-bɛrɛbɛrɛ fɛ! N bara n nyɛrɛ di Allata wɔlɛ ma fasai iko wo dama ye nya min yan bi.

⁴ N ya Yisata mɔgɛnu tɔrɔya ka donu faga anu tɔ. N ya keinubɛ musinu bira ka anu nadon yele la.

⁵Saraka-masɔla-kun-tigi-wɛ anubɛ anuna mɔgɔ-ba dama si ke wo sereyɛ bɔla ko n bi tonyɛ le fɔ tinɛ wo la. Anu denu ya kɛdinu di n ma minnu sɛbɛnɛ ma na-kelen-nyɔgɔ Yahudiyanu ma Damasika soe burɔ alako n ni ta mɔgɛ wonu bira tinɛ nyɔ nun. N tara alako n si anu kiri yɔlɔkɛnu na nya min ka sɛgi anu na Yerusalɛm anu tɔrɔ tinɛ.

⁶“Nba, n gbɛrɛnnɛ Damasika soe ma tele latelan wati, wan-belebele bɔra san ma tiriya ka nna foolɛ bɛɛ lamalan. N buira dugi ma.

⁷N ya kuman-kan lamɔɛn n manyinikala ko, ‘Sɔli, Sɔli, i ye n tɔrɔla nfenna?’

⁸N ya nyinikalɛ kɛ ko, ‘N fa, yon bi ile la?’ A ya n yabi ko, ‘Yisa, Nasarɛti kɛ le nde la, i ye min tɔrɔla.’

⁹N ta-nyɔgɛ wonu ya waan yen kɔnɔ anu ma kuman-kan lamɔɛn.

¹⁰N ya nyinikalɛ kɛ ko, ‘Mari, n ni nfen ma?’ Nba, Mari ya n yabi ko, ‘I lasɔ. I ni ta Damasika. Alla ara koe min bɛɛ latɛgɛ ile ye, wo bɛɛ si fɔ i ye nyɔ.’

¹¹Waan wo ya n nafiyonya, woletɔ n ta-nyɔgɛnu ya n bole bira ka ta n na Damasika soe burɔ.

¹²“Kei do ye nyɔ nun, a tɔgɛ Ananayasi. Mɔgɔ-telennɛ le min si Nɛbi Musata tɔn bɛɛ bira. Yahudiya min bɛɛ siginɛ Damasika, wonu si a gbiliya bɛrɛkɛ!

¹³Wo nara n bara ka sɔ n dafɛ. A ko, ‘N diyana-mɔgɛ Sɔli, i ni fen yen de gbɛ!’ Wo wati nyɛrɛ rɔ, n ya fen yen tun.

¹⁴Ananayasi ko, ‘Ma benbanuta Alla ara ile yabɔ ko i ni a lɔn i ye min mala a ye. A ara ile yabɔ alako i ni ala Wɔli-Kɛla-Telennɛ yen ka a kuman-kan fanan namɔɛn.

¹⁵I wara min yen ka a lamɔɛn, i ni ma sereyɛ la wo la mɔgɛ bɛɛ ye.

¹⁶Nba kaka, i ye nfen makɔnɔna tun? I lasɔ ka batasi. I ni Alla matara Yisa tɔgɛ rɔ alako i hakɛ bɛɛ ni yesi ka ban feu!’

¹⁷“Nba, n sɛgira Yerusalɛm. N bi Alla-matarɛ kun na Alla-Bato-Bɔn la tumɛ min, n ya ko-rayirɛ do rayen.

¹⁸N ya Mari le yen ko-rayirɛ wo rɔ. A ya a fɔ n ye ko, ‘I kaliya ka bɔ Yerusalɛm bawo i ye sereyɛ min bɔla n ye, yan-mɔgɛnu ti wo bira.’

¹⁹N ya a fɔ ko, ‘Mari, n tara ileta mɔgɛnu gbesi dina-bɔnnu na nya min ka wonu bira, bɛɛ ya wo lɔn serr!

²⁰ Hali Sitifen min fagara ala kumɛla ko la, nde nyɛrɛ ye nyɔ nun ka sɔn a faga-koe ma ka a fagalɛnuna durukinu makandan.’

²¹Kɔnɔ Mari ya a fɔ n ye ko n ni ta bawo a si n nata kan-tina-yanrɔ-sibolo-gbɛrɛnu ma.”

²²Mɔgɛnu ya anu tole masɔ Pɔli la kɔnɔ a ya wo fɔ tumɛ min, anu gbele-gbelenta kan-ba la ko, “Wo ni a bɔ yan ka a faga! A ma bɛn a kɛndɛ ni to!”

²³Anu tora gbele-gbelenna. Anu tenbi anuna kurɛnu firifiri ka gbangban nyɛnsɛn san ma diminyɛ bolo,

²⁴Romu kɛlɛ-den-kun-tigi-ba ya a fɔ ala kɛlɛ-dannu ye ko anu ni ta Pɔli la bariki rɔ mɔgɛnu ti kɛ a ma kan min. A ko anu ni a gbesi bosɛ la ka a lɔn Yahudiyanu bi sɔnkɛ layɛlɛla a ma minna ko la.

²⁵Kɔnɔ anu ya a kiri tumɛ min a gbesi-koe la, Pɔli ya a fɔ a dafɛ-kun-tigi ye ko, “Romu tɔn rɔ, a bɛnta ile ni nde, Romu kɛ gbesi min yilikini ma, wa?”

²⁶Kun-tigi wo ya wo lamɔɛn tumɛ min, a tara ala kun-tigi-ba wara ka a manyinika ko, “I ye nfen mala? Romu kɛ le kei wo la!”

²⁷Woletɔ kɛlɛ-den-kun-tigi-ba wo tara Pɔli wara ka a manyinika ko, “A fɔ n ye, wa, Romu kɛ le ile la?” Pɔli ya a yabi ko, “Ɔnde, Romu kɛ le nde la.”

²⁸Kun-tigi-ba wo ko, “Nde ya wodi-ba bɔ alako n ni ma Romu kɛ la.” Pɔli ya a fɔ a ye ko, “Kebi n sɔrɔnta, Romu kɛ le nde la.”

²⁹Tiriyante wo rɔ, minnu bi tala Pɔli gbesi tinɛ ka a fɛsɛfɛsɛ nun, wonu ya a masɛgi a la. Kun-tigi-ba wo ya a lɔn tumɛ min ko Romu kɛ le ale Pɔli la, ado a ya a kiri yɔlɔkɛnu na, ale fanan kilanta kati!

³⁰Yahudiyanu ya Pɔli maburi minna ko la, kun-tigi-ba wo ye a fɛ ka wo lɔn, yɔ! Woletɔ wo banda kɛ, a ya yɔlɔkɛnu bɔ Pɔli ma. A ya a fɔ saraka-masɔla-wɛnu ye ko anubɛ anuna kun-tigi dama ni na ladɛn kɛ. Wo kɔma, a tara Pɔli la anu yakɔrɔ.