Read Kuranko Kɛwɔlɛnu 5 Bible Online

Kɛwɔlɛnu 5 - Kuranko bible

Kɛwɔlɛnu 5

¹Kei do ye nyɔ nun, a tɔgɛ Ananayasi, ala musi tɔgɛ Safara. Anu ya anuna dugi do feri iko doi wonu

²kɔnɔ a ya do bɔ wodi wo la ka wo lamara anu nyɛrɛ ye. Ala musi fanan ye wo kalama. Woletɔ Ananayasi nara a toe la Marita kilayɛnu bara tumɛ min,

³Pita ya a fɔ a ye ko, “Ananayasi, nfenna i wara sɔn ko Setanɛ ni don i yisi rɔ? I ya ila dugi feri min nyɔgɔn na, i ya do bɔ wodi wo la ka a lamara i nyɛrɛ ye, ado i ye foninyɛ le fɔ tinɛ Allala Ni-Sɛnimɛ ye wo la.

⁴Yanni i ni ila dugi feri, itɛ le nun. I banta a ferila tumɛ min, itɛ le wodi wo la nun. Kɔnɔ nfenna i ya a latɛgɛ i yisi rɔ ka kɛ ko sifa ma? I ma foninyɛ fɔ mɔgɛ ye. I ya foninyɛ fɔ Alla le ye!”

⁵Ananayasi ya wo lamɔɛn nkɛkuna, a buira. A niyi bɔra. Min bɛɛ ya wo lamɔɛn, wonu kilanta kati!

⁶Keminɛ donu donta ka a kasankɛ ka ta a togon.

⁷Hawa sawa wo kɔma, ala musi fanan nara. A donta bɔn la kɔnɔ min bara ma nun, a ma wo lamɔɛn bɛ.

⁸Pita ya a fɔ a ye ko, “A fɔ n ye, wa? Wobɛ ila kei ya wodi min sɔrɔn wola dugi rɔ, wo damɛ le kɛ la, wa?” A ya a yabi ko, “Ɔn, a damɛ le kɛ la.”

⁹Woletɔ Pita ya a fɔ a ye ko, “Nfenna wobɛ ila kei ya a latɛgɛ ko wo ni Marita Ni-Sɛnimɛ kɔrɔbɔ? Minnu tara ila kei togon, wonu bi dɛ la kaka. Anu si ta ile fanan na!”

¹⁰A buira Pita kin kɔrɔ ka faga kelenna! Keminɛnu donta gbɛ! Anu ya a faganɛ yen min kɛ, anu tara a la ka a togon ala kei dafɛ.

¹¹Allata chɔchi anubɛ min bɛɛ ya kɛ lamɔɛn, wonu kilanta ha ka a dan natenbi.

¹²Marita kilayɛnu ya tamasere anubɛ kabana-ko siyaman kɛ mɔgɛnu tɛma. Dɛnkɛninya-mɔgɛ bɛɛ ya anu nadɛn dandan wo kɔrɔ min tɔgɛ ko, “Silamɛnita Dandan Kɔrɔ.”

¹³Hali anu gbiliyanɛ nyama bolo, mɔgɔ-wo-mɔgɔ ma sisi a madonna anu na kilan bolo.

¹⁴Keinubɛ musi min bɛɛ dɛnkɛninyara Mari ma, wonu tora kofula anu ma dɛɛ!

¹⁵Ka a tɛgɛ Marita kilayɛnu bi wɔlɛ min kɛla nun, mɔgɛnu ya kirayatoenu sa kilɛ la sa-fannu anubɛ nyandannu tɔ alako Pita tenbi tenbila tumɛ min ko tumado a ninɛ si sa wo donu kuma min si anu nakɛndɛya.

¹⁶Nyama siyaman nara anuna kirayatoenu na ka bɔ Yerusalɛm dafɛ-so-mɛsɛnu tɔ. A kirayato wo, a nyina-yogoma-tigi wo, anu dama kɛndɛyara.

¹⁷Nba, keliyɛ wulita saraka-masɔla-kun-tigi-wɛ anubɛ a ta-nyɔgɔ Sadusinu na Marita kilayɛnuna ko la ha ka a dan natenbi. Woletɔ anu ya a latɛgɛ ko anu ni wuli wonu kan ma.

¹⁸Anu ya Marita kilayɛnu bira mɔgɛnu yala ka anu sa yele la.

¹⁹Kɔnɔ suyi wo rɔ, Marita melika ya yele wo dɛ laka ka kilayɛnu nabɔ. A ya a fɔ anu ye ko,

²⁰“Wo ta wo sɔ Alla-Bato-Bɔn la ka ni-kurɛ kɛ wara-koe[4] fɔ mɔgɛnu ye.”

²¹Kilayɛ wonu sɔnta. Banda-ka-dɛ ma, anu donta Alla-Bato-Bɔn la ka mɔgɛnu-karan dabira. Saraka-masɔla-kun-tigi-wɛ anubɛ a ta-nyɔgɛnu ya Yahudiya mɔgɔ-banu kele anuta ladɛn kuma. Wo kɔma, anu ya sarakanɛ lata yele-kandannɛ ma ko a ni kilayɛ wonu nana anu ma.

²²Nyɔ-makandannɛnu kera yele la tumɛ min, anu ma kilayɛ wonu taran nyɔ. Anu sɛgira mɔgɔ-banu bara gbɛ ka a fɔ anu ye ko,

²³“Ma kera yele la tumɛ min, ma ya a dɛnu rasɔgɔnɛ taran a kin na, nyɔ-kandannɛnu sɔnɛ dɛnu na. Kɔnɔ ma ya dɛnu naka tumɛ min, ma ma mɔgɔ-wo-mɔgɔ yen a burɔ.”

²⁴Alla-Bato-Bon-makandannɛnuna kun-tigi anubɛ saraka-masɔla-wɛnu ya wo lamɔɛn tumɛ min, anu kɔndɔfilita. Anu ma a lɔn ni min bara ma kilayɛ wonu na.

²⁵Mɔgɛ do nara gbɛ! Wo ya a fɔ anu ye ko, “Wo ni wo wɔlɔ matɔlɔ! Wo ya minnu sa yele la, wonu sɔnɛ Alla-Bato-Bɔn la mɔgɛnu karan tinɛ!”

²⁶Woletɔ anuna kun-tigi anubɛ a kandanna-nyɔgɛnu tara kilayɛ wonu bi tinɛ. Kɔnɔ anu ma wo kɛ fɔrɔsɛ la de bawo anu dama kilannɛ nun ko mɔgɛnu kana anu denu mabon kuri la.

²⁷Anu nara Marita kilayɛnu na ka anu sɔ mɔgɔ-banu yakɔrɔ. Saraka-masɔla-kun-tigi-wɛ ya anu manyinika, a ko,

²⁸ “Ma ara wo makawandi nun bɛrɛkɛ, ko wo kana mɔgɛnu karan kei kɛ tɔgɛ rɔ tun. Kɔnɔ wo ara min kɛ, wo ma a yen? Wo ara wola karan kɛ nyɛnsɛn Yerusalɛm fan bɛɛ. Wo ye a fɛ ka male ma ala saya-sabuyɛ la!”

²⁹Pita anubɛ Marita kilayɛnu ya a yabi ko, “A fɛrɛ sa fɔ ma ni Allala kumɛ bira ka mɔgɛnutɛ to nyɔ.

³⁰Wo ya Yisa le gbangban kɔlɔma ma ka a faga kɔnɔ ma benbanuta Alla le ya a lawuli ka bɔ furinu tɛma.

³¹Alla ya a lawuli ka a sigi a kɔɛn-nyimɛ rɔ ka a ma kun-tigi anubɛ kisilɛ la. A ya wo ma alako Isirɛla mɔgɛnu ni fɛrɛ sɔrɔn tubi-koe la. Anu ba wo ma, Alla si anu makoto anu hakɛ ma.

³²Koe kɛnu sereyɛ le male la. Alla ara ata Ni-Sɛnimɛ di ata kuma-biralɛnu ma.”

³³Mɔgɔ-banu ya wo lamɔɛn tumɛ min, anu yisi bɔra bɛrɛkɛ! Marita kilayɛnu faga-sɔgɛ ya anu bira kosɛbɛ!

³⁴Kɔnɔ mɔgɔ kelen de anu tɔ, tɔn-karan-mɔgɛ, kɔni, ado Farisi do le. A tɔgɛ Kamaliyɛli. A gbiliyanɛ mɔgɛ bɛɛ bolo. Wo ya a lasɔ mɔgɔ-banu tɛma ka a fɔ ko anu ni Marita kilayɛnu nabɔ doni.

³⁵A ya a fɔ mɔgɛ-banu ye ko, “N ta-nyɔgɛ Isirɛla mɔgɛnu, wo ye min mala mɔgɛ kɛnu na, wo ni a ma wo fɛrɛma de!

³⁶Wati tenbinɛ, Tudasi wulita ka a nyɛrɛ ma tɔgɔlamɛ la, ado kemini kɛmɛ nani nyɔgɔn (400) bilara a fɛ. Kɔnɔ mɔgɛ do ya wo faga. A gba-fɛ-bilalɛ bɛɛ nyɛnsɛnta. Ala koe mara fuyi la.

³⁷Wo kɔma, mɔgɛ bɛɛ tɔgɔ-sɛbɛ-wati, Yudasi, Kalili kɛ wulita. Mɔgɔ siyaman bilara wo fɛ fanan kɔnɔ mɔgɛ do ya wo fanan faga. A gba-fɛ-bilalɛ bɛɛ nyɛnsɛnta.

³⁸Woletɔ n bi a fɔla wo ye kɛla ko la kaka, ko wo kana ko-wo-ko ma mɔgɛ kɛnu na. Wo fara anu na bawo anu ya koe min nadan, ni mɔgɛtɛ le wonu na, a si ma fuyi la.

³⁹Kɔnɔ ni Allatɛ le wo la, wo ti ke anu nɔla mumɛ! Wo si a yen ko wo ye Alla le kɛlɛla tun!” Mɔgɔ-banu ya karan-mɔgɔ Kamaliyɛlila kumɛ bira.

⁴⁰Anu ya Marita kilayɛnu kele bɔn la tun. Anu ya anu gbesi bosɛ la ka a fɔ anu ye ko anu kana kuma Yisa tɔgɛ rɔ tun! Wo kɔma, anu ya anu boloka.

⁴¹Kilayɛnu bɔra mɔgɔ-banu tɛma tumɛ min, anu sewara bɛrɛkɛ, ko Alla ara a fonde lamiri anu ma ko a bɛnnɛ anu ni fɛyɛ sɔrɔn Yisa tɔgɛla ko la.

⁴²Anu tora mɔgɛnu karanna ka Yisa, Allata-Mɔgɔ-Yabɔnɛla kibara-nyimɛ lake Alla-Bato-Bɔn la anubɛ mɔgɛnu barɛnu tɔ tele-wo-tele.