Read Kuranko Romu 10 Bible Online

Romu 10 - Kuranko bible

Romu 10

¹A sɔgɛ ye n na bɛrɛbɛrɛ-wɛ-kɛ ko n na-kelen-nyɔgɔ Yahudiyanu ni kisi! N bi Alla matarala anu ye dɛɛ!

²Anu sere le nde la ko Allala hɔnyɛ ye anu na kɔnɔ anu ma a lɔn anu si Alla bato a kilɛ fɛ nya min.

³Alla si mɔgɔ latelen a nyɛrɛ ye nya min, anu ma wo lɔn. Anu bara anu taya ka anu nyɛrɛta kilɛ nyini. Alla si mɔgɔ latelen a nyɛrɛ ye kilɛ min fɛ, anu ma sɔnnɛya Alla ye kilɛ wo ma.

⁴Nba, Kirasiti ara na min kɛ, sɛnbɛ sa Nɛbi Musala tɔn-kitabu la tun. Woletɔ dɛnkɛninyɛ ye min bɛɛ yisi rɔ, wonu bara telen Alla yala.

⁵ Nɛbi Musa ya kɛ le sɛbɛ ka a bɛn telen-koe ma Alla yala tɔn-birɛ fɛ. A ko, “Ni min bi a fɛ ka to a niyi la, fɔ a ni tɔn-kitabu bɛɛ bira minnu sɛbɛnɛ Allala kitabu rɔ.”

⁶ Kɔnɔ min sɛbɛnɛ Allala kitabu rɔ ka a bɛn latelen-koe ma Alla yala dɛnkɛninyɛ fɛ, wo kɛ-koe ma gbɛlɛ. A ko, “Hali i ma nyinikalɛ kɛ ko, ‘Yon si ta Arinyɛni tɔ’ ” (ka na Kirasiti la duninya kɛ rɔ).

⁷A sɛbɛnɛ fanan ko, “Hali i ma nyinikalɛ kɛ ko, ‘Yon si ta lakira’ ” (ka Kirasiti labɔ furinu tɛma).

⁸Min sɛbɛnɛ nyɔ tun ko, “Allala sarakanɛ ye i dafɛ, a ye i dɛ rɔ, a ye i yisi rɔ.” Sarakanɛ min bɛnnɛ dɛnkɛninyɛ ma, ma ya wo lake wo ma mala kawandilinu tɔ.

⁹Ni min ya sereyɛ bɔ a dɛ la ko, “Yisa, Mari le,” ka dɛnkɛninya a yisi rɔ ko Alla le ya a lawuli ka bɔ furinu tɛma, wo tigi si kisi,

¹⁰ado ma si telen Alla yala mala dɛnkɛninyɛ le fɛ. Ma wa Marila sereyɛ bɔ ma dɛ la, ma si kisi,

¹¹ ado a sɛbɛnɛ Allala kitabu rɔ ko, “Min ba dɛnkɛninya a ma, wo tigi ti baya,”

¹²a Yahudiya wo, a sibolo-gbɛrɛ wo. Ma damasi kelen. Alla kelen pe le Mari la mɔgɛ bɛɛ ye. Minnu ba Mari rakele, a si ata duwɛ layigi wonu kuma foninsereyɛ rɔ.

¹³ Iko a sɛbɛnɛ Allala kitabu rɔ nya min, a ko, “Min bɛɛ si Mari rakele a dɛnbɛn-koe la, wonu si kisi.”

¹⁴Kɔnɔ anu si Mari rakele kama, ni anu ma dɛnkɛninya a ma wɛ? Anu si dɛnkɛninya a ma kama, ni anu ma ala sarakanɛ wo lamɔɛn bɛ? Anu si sarakanɛ wo lamɔɛn kama, ni mɔgɔ ma a fɔ anu ye?

¹⁵ Ado nfan, mɔgɛ si sarakanɛ wo lake kama, ni mɔgɔ ma anu sɔ? Iko a sɛbɛnɛ Allala kitabu rɔ nya min, a ko, “Mɔgɔ wa kilayɛ yen nala kibara-nyimɛ la a bolo, wo di mɔgɛnu ye.”

¹⁶ Kɔnɔ bɛɛ ma kibara-nyimɛ bira. Nɛbi Aiseya nyɛrɛ ya a fɔ ko, “Mari, yon bara la mala sarakanɛ la?”

¹⁷Woletɔ fɔ mɔgɛnu ba sarakanɛ lamɔɛn ka a bɛn Yisa ma, yanni anu ni dɛnkɛninya a ma. Fɔ mɔgɛnu ba Kirasitila ko fɔ anu ye alako anu si a lamɔɛn nya min.

¹⁸ Kɔnɔ n ni nyinikalɛ kɛ. Yahudiyanu ya sarakanɛ kɛ lamɔɛn, ba? Tonyɛ le, anu ya a lamɔɛn. Iko a sɛbɛnɛ Allala kitabu rɔ nya min ko, “Sarakanɛ kɛ kera duninya kan tinɛ bɛɛ rɔ. A kera ha duninya dan la.”

¹⁹ N ni nyinikalɛ kɛ tun ko Isirɛla mɔgɛnu ma kɛ nya-yen, ba? Anu bara a nya-yen, bi ma. Nɛbi Musa fɔlɔn ya a yabi ko, “Wo ye yɛlɛnna sibole minnu ma, Mari si wonu bi ka anu ma wo lamɔniya-fan la. Wo tɛgɛnɛ mɔgɛ minnu tɔ, wonuna keliyɛ si wuli wo fanan na.”

²⁰ Wo kɔma, Nɛbi Aiseya ya a kerinteya wo tumɛ a ya a fɔ ko, “Minnuna ko sa Allala ko rɔ, a sɔnta ko wonu fɔlɔn ni a yen. Minnu sa a wara-koe manyinikala, a ara a nyɛrɛ yira wonu na.”

²¹ Kɔnɔ Alla ya kɛ le fɔ Isirɛla mɔgɛnuna ko la ko, “Telen gbɛn, n bole rasiginɛ mɔgɔ-murutiyanɛ anubɛ kuma-birabɛlɛ wonu ye.”