Read Kuranko Romu 13 Bible Online

Romu 13 - Kuranko bible

Romu 13

¹Mɔgɛ bɛɛ ni nyamanita mɔgɔ-banuna kumɛ bira. Ma ni wo ma bawo kun-tigi wo kun-tigi sa nyɔ Alla ma min sigi. Alla kelen pe le si sɛnbɛ di mɔgɛ ma ka mansayɛ kɛ.

²Ni min ya kun-tigi wonu sɔsɔ, wo ye Allala ko-latɛgɛnɛ le sɔsɔla, ado ni min ya wo ma, wo si kiti lana a nyɛrɛ kuma.

³Wole min bi ko-nyimɛ kɛla, hali wo ma kilan wola kun-tiginu na. Kɔnɔ min bi ko-yogomɛ kɛla, wonu denu ni kilan. Nba, wo ni to ko-nyimɛ kɛla, anu si wo tanto worɔ.

⁴Allala wɔli-kɛlɛ le anu na wo munanfaga-koe la. Kɔnɔ ni i wara ko-yogomɛ kɛ, i ni kilan anu na bawo sɛnbɛ ye anu bolo ka mɔgɛnu tɔrɔ. Allala wɔli-kɛlɛ le anu na min bi Allala diminyɛ labɔnna ko-yogoma-kɛlɛnu kuma.

⁵Ka a tɛgɛ wo ma, fɔ wo ni anuna kumɛ bira. Wo ye wo mala bawo wo kilannɛ tɔrɔyɛ la. Wo kɔma, wo sɔndɔma-gbɛnɛ ni to.

⁶ Wo ye duti sarala kɛ le fananna ko la bawo kun-tigi wonu bi anuta wɔlɛ kɛla Alla le kɔrɔ.

⁷Ni yili ye minnu na, anu ni anu sara. Wo ni wola duti bɛɛ sara fanan. Wo ni mɔgɛnu gbiliya iko a bɛnta, wo ni anu gbiliya nya min.

⁸Mɔgɔna-yili kana to i la fɔ yili kelen pe, wo le ka ma nyɔgɔn keni. Min ba a ta-nyɔgɛ keni, wo ara tɔn-kitabu bɛɛ kanbali.

⁹ A sɛbɛnɛ Nɛbi Musala tɔn-kitabu rɔ ko, “Wo kana yɛlɛnyɛ kɛ. Wo kana mɔgɔ faga. Wo kana kankanyɛ kɛ. Wo kana wo niyi sa mɔgɔna-fan kuma.” Tɔn kɛ bɛɛsi anubɛ doinu, wonu bɛɛsi ye tɔn kelen pe kɔrɔ min ya a fɔ ko, “Wo ni wo ta-nyɔgɔn keni iko wo nyɛrɛ.”

¹⁰Wo ara minnu keni, wo ti ko-yogomɛ ma wonu na ni! Keninteyɛ le tɔn-kitabu bɛɛ lakanbalila worɔ.

¹¹Ma ya a lɔn ma ye wati min tɔ kaka. Sɛbɛ-don-tumɛ ara ke. Ma ni kunden wona. Mala kisi-wati Alla bolo ara gbɛrɛn ka tenbi ma dɛnkɛninyara Yisa ma wati min.

¹²Suyi-banmatoe le. Banda-ka-dɛ ara gbɛrɛn. Ma ni pinpirɔ-koenu boloka wona ka mala kɛlɛ-kɛ-mirannu bi ka Allata kɛlɛ kɛ wan-takanɛ rɔ.

¹³Ma ni mala ko-ladan-nyanu natelen iko mɔgɛ minnu tonɛ waan rɔ. Manamanatoyɛ wo, gbɛɛ-min-wɛ wo, yɛlɛnyɛ wo, kisimiriya-koe wo, nyɔgɔn-tiran wo, keliyɛ wo, ma kana basan wonu fenfen na.

¹⁴Ma ni Mari Yisa, Allata-Mɔgɔ-Yabɔnɛ kelen pe le lɔn ma tigi la. Ma si ma nyɛrɛ wasa min na, ma kana wo ko ladan.