Read Kuranko Romu 14 Bible Online

Romu 14 - Kuranko bible

Romu 14

¹ Mɔgɛ minnuta dɛnkɛninyɛ ma kolo wo tɛma, wo ni wonu tabira. Ka a fɔ ko kɛ bɛnta, kɛ ma bɛn, wo sɔsɔli-sufa kana na wo tɛma.

²Mɔgɛ do lanɛ a la ko a si ke fan bɛɛ dɔnna. Mɔgɛ minta dɛnkɛninyɛ ma kolo, wo ti soge dɔn fɔ sɛnita-fannu gbansan!

³Mɔgɛ min da-tanɛ sa, wo kana mɔgɛ doi wo lafɛya. Min bi sɛnita-fannu gbansan dɔnna, wo kana doi rasɛ min bi fan bɛɛ dɔnna bawo Alla ara anu filɛ bɛɛ rabira.

⁴Yon bi ile la min bi mɔgɔ-gbɛrɛla wɔli-kɛlɛ rasɛla? Ni a buira wo, a sɔra wo, wo bɛɛ tonɛ a tigi le ma, ado wɔli-kɛlɛ wo si ke a sɔla bawo Alla min bi ma tigi la, wo si ke a mala, a ni sɔ.

⁵Donu miriya ko tele do tenbira do la. Donu miriya ko tele bɛɛ kelen. Wo ye min mala, bɛɛ ni wo latɛgɛ a nyɛrɛ yisi rɔ.

⁶Minnu miriya ko tele do ma tenbi tele do la, anu bi wo mala Marita gbiliyɛla ko la. Minnu bi fan bɛɛ dɔnna, anu bi wo mala Marita gbiliyɛla ko la fanan, ado anu bi baraka birala Alla ye dɔn-fan wola ko la. Minnu sa fan donu dɔnna, wonu fanan bi wo mala Marita gbiliyɛla ko la, ado anu fanan bi baraka birala Alla ye.

⁷Ado nfan, ma fenfen sa belila ma nyɛrɛ ma. Ma fenfen sa fagala ma nyɛrɛ ma. Ni ma belita, ma belinɛ Mari hɛnɛ-koe la.

⁸Ni ma fagara, ma faganɛ Mari hɛnɛ-koe la. Ma belinɛ wo, ma faganɛ wo, Maritɛ le male la tolon,

⁹ado Kirasiti fagara ka wuli ka niyi lafɛ tun alako a ni ma Mari la kɛndɛwaganu anubɛ furinu ye.

¹⁰ Ile min bi i dɛnkɛninya-nyɔgɛ rasɛla, i ye wo mala nfenna? I ye i dɛnkɛninya-nyɔgɛ lafɛyala nfenna? Kiti-tɛgɛ-lunyɛ, ma dama si sɔ Alla yakɔrɔ,

¹¹ ado a sɛbɛnɛ Allala kitabu rɔ ko Mari ara a keli a nyɛrɛ rɔ ko mɔgɛ bɛɛ si na a nyɛnkin a ye. Mɔgɛ bɛɛ si a fɔ a dɛ la ko Mari le Alla la.

¹²Ma kelen-kelennamɛ-bɛɛ si ma nyɛrɛ dantɛgɛ Alla ye worɔ.

¹³Woletɔ ma ni fara ma nyɔgɔn tasɛla, ado wo ni a latɛgɛ ko wo kana ko-wo-ko ma min si wo na-kelen-nyɔgɔn kian latugu. Wo kana a ma, a ni bui hakɛ rɔ.

¹⁴N bi Mari Yisa rɔ min kɛ, wo ara a yira n na yati, ko dɔn-fen wo dɔn-fen sa min natinyanɛ Alla yala. Kɔnɔ ni mɔgɛ do lanɛ a la ko dɔn-fan do latinyanɛ le, a la ara tinya ale ye worɔ.

¹⁵Ni wo ya fɛɛ sa wo na-kelen-nyɔgɛla dɛnkɛninyɛ la wola dɔn-fanla ko la, wo sa tagamana keninteyɛ rɔ tun. Kirasiti fagara mɔgɛ min ye, wo kana sɔn, wola dɔn-fan ni wo tigi halaki!

¹⁶Wo ya min lɔn ko-nyimɛ la, wo kana sɔn, mɔgɛ ni wo lɔn ko-yogomɛ la ila ko-ladan-nya fɛ.

¹⁷Allala mansayɛ ma dɔn-fan anubɛ minni-fan la fɔ telenbagayɛ anubɛ yisi-kimɛ anubɛ sewɛ, Allata Ni-Sɛnimɛ ye min su dila, kɔni.

¹⁸Min bɛɛ si wɔlɛ kɛ Kirasiti ye kilɛ kɛ fɛ, wo tigi si diya Alla ye ka tɔgɔ-nyimɛ sɔrɔn mɔgɛnu bolo.

¹⁹Nba, koe minnu si yisi-kimɛ lana anubɛ minnu si ma nyɔgɔn sɛnbɛ don, fɔ ma ni to wonu mala tuma-wo-tuma.

²⁰Alla ara min nadan, mɔgɔ kana wo tinya dɔn-fanla ko la. Dɔn-fan bɛɛ si dɔn kɔnɔ min si mɔgɔ do labui hakɛ rɔ, wo dɔn ma telen.

²¹Min fisa, sogo-dɔn wo, gbɛɛ-minyɛ wo, ko-wo-ko min si a ma, wo na-kelen-nyɔgɛ la ni bui ala dɛnkɛninyɛ rɔ, wo kana wonu ma.

²²Wo lanɛ min na koe kɛnu tɔ, wo ni wo lamara wo nyɛrɛ anubɛ Alla tɛma. Ni mɔgɛ ya a lɔn ko a ye ko-latelennɛ le mala, ado a ma sika a nyɛrɛ rɔ, wo tigi sewanɛ le.

²³Kɔnɔ ni a sikanɛ ala dɔn-fan rɔ, a wa a dɔn tumɛ min, Alla si a yiliki bawo a ma a dɔn dɛnkɛninyɛ fɛ, ado ni wo ya ko-wo-ko ma wo sikanɛ min tɔ, hakɛ le wo la.