Read Kuranko Romu 15 Bible Online

Romu 15 - Kuranko bible

Romu 15

¹Sɛnbɛ ye male min na dɛnkɛninyɛ la, a bɛnta, min tafaganɛ, ma ni wonu sɛnbɛ don ka anu dɛnbɛ anuna dunɛnu bila. Ma kana bila ma nyɛrɛ diyana-koenu dɔrɔn fɛ.

²Ma kelen-kelennamɛ-bɛɛ ni ko-nyimɛ kɛ ma na-kelen-nyɔgɛnu ye min si anu hɛnɛ alako anu ni sabati dɛnkɛninyɛ rɔ,

³ ado Kirasiti ma a raya a nyɛrɛ-hɛnɛ-koe la. A sɛbɛnɛ Yaburi kitabu rɔ ko, “Anu bi mɔɛn-kumɛ minnu natala ile Alla ma, wo ye sɛgila nde, ala wɔli-kɛlɛ le ma.”

⁴Min bɛɛ sɛbɛnɛ Allala kitabu rɔ kɔrɔma la, wo sɛbɛnɛ alako ka ma karan. Anu si a ma, ma ni ma munyu ka ma sɛnbɛ don alako ma si yigi sɔrɔn nya min.

⁵Nba, Alla min bi munyu anubɛ yisi-kimɛ dila ma ma, alamɛ wo ya wo dɛnbɛ alako wo ni to sɔn kelen tɔ wo nyɔgɔn fɛ ka bila Kirasiti Yisala misalɛ fɛ.

⁶Wo si ma alako wo dama ni Mari Yisa Kirasiti Fa Alla tanto kan kelen tɔ.

⁷Wo ni wo nyɔgɔn tabira Allala gbiliyɛla ko la iko Kirasiti ara wo rabira nya min,

⁸ado n bi a fɔla wo ye ko Kirasiti mara Yahudiyanuna wɔli-kɛlɛ la ka a mayira ko Alla si ala lanyiri latɔnbagaya min kirinɛ ma benbanu ye.

⁹ A ya wo ma fanan alako sibolo-gbɛrɛnu ni Alla tanto ala kinikinɛla ko la. Iko a sɛbɛnɛ kitabu kan tinɛ donu tɔ nya min ko, “E, Alla, n si i matɔgɔ sibolo-gbɛrɛnu yala. N bi tantoli-bɛti bɔla i ye.”

¹⁰ A sɛbɛnɛ fanan ko, “Sibolo-gbɛrɛnu, wo ni sewa Allala mɔgɔ-yabɔnɛnu fɛ.”

¹¹ Awa, a sɛbɛnɛ tun ko, “Sibolo-gbɛrɛnu ni Mari tanto. Bɛɛ ni a tanto kosɛbɛ!”

¹² Wo kɔma, Nɛbi Aiseya ya a sɛbɛ ko, “Mansa-kurɛ si bɔ Dawudala[9] kebilɛ rɔ. A si sibolo-gbɛrɛnu mara. Anu si anu yigi sigi ale rɔ.”

¹³Ma yigi siginɛ Alla min tɔ, alamɛ wo ya wo lafa sewɛ anubɛ yisi-kimɛ la wola dɛnkɛninyɛ fɛ. Wola yigi min bi Yisa rɔ, wo ni to warala Allata Ni-Sɛnimɛ baraka rɔ.

¹⁴N na-kelen-nyɔgɛnu, nde lanɛ a la ko wo fanɛ ko-nyimɛ la, ado wo fanɛ lɔnnɛ bɛɛ la fanan. Tonyɛ le, wo si ke wo nyɔgɔn makawandila.

¹⁵Kɔnɔ kɛdi kɛ rɔ, Alla ara n yisi ragbɛlɛya ka wo hɛnkili bila koe donu ko. Ka ma Kirasiti Yisala wɔli-kɛlɛ la sibolo-gbɛrɛnu ye, Alla ya wo fɛrɛ di n ma. N tenbi Allala kibara-nyimɛ-kawandili bɔla, n bi saraka-masɔ-wɔlɛ le kɛla. N ya wo ma le alako sibolo-gbɛrɛnu ni ma kɔ-fen-nyimɛ la Alla ye. Anu sɛninyanɛ a yala ata Ni-Sɛnimɛ baraka rɔ.

¹⁷N si ke n nyɛrɛ matɔgɔla nta wɔlɛla ko la Alla ye Kirasiti Yisa baraka rɔ.

¹⁸N sa kuma-gbɛrɛkɛ fɔla fɔ Kirasiti ya min ke nde warala dɔrɔn. Sibolo-gbɛrɛnu bara Allala kumɛ bira ka a tɛgɛ nde, Pɔlila kawandilɛ anubɛ n kɛ-nya ma.

¹⁹N ya tamaserenu anubɛ kabana-ko-sɛnbɛmɛnu kɛ Allata Ni-Sɛnimɛta sɛnbɛ fɛ. Woletɔ ka a dabira Yerusalɛm ha ka ta ke Ilirikim nyamanɛ rɔ, n bara tagama wo bɛɛ rɔ Kirasitita kibara-nyimɛ lake-koe la.

²⁰Mɔgɔ ma Kirasiti tɔgɔ fɔ kan min wɛ, a sɔgɛ ya n bira ka kibara-nyimɛ lake nyɔ bɛɛ rɔ. N kana nna bɔn sɔ mɔgɔ-gbɛrɛla bon-kurukɛnɛ kuma.

²¹ Wo ma-sɔgɛ ye n na iko a sɛbɛnɛ Allala kitabu rɔ nya min ko, “Alla wara-koe ma fɔ minnu ye, wonu si a yen. Minnu ma a wara-koe lamɔɛn bɛ tele-kelen-bɛrɛni, wonu si a nya-yen.”

²² Ta-sɔgɛ ye n na nun ka ke wo ma kɔnɔ ka a tɛgɛ nna wɔli-siyamɛ ma, n ma fɛrɛ sɔrɔn.

²³Kɔnɔ kaka, n bara nna wɔlɛ dafa nyamanɛ kɛnu tɔ. A sɔgɛ ye n na san siyaman kɔrɔ ko n ni ta ke wo ma.

²⁴A di n ye hali kaka, n ni ta ke wo ma. N tenbi tala Sipeni nyamanɛ rɔ tumɛ min, n si ke wo ma. N ba wati-kundu-ni kɛ wo fɛ diyanayɛ rɔ tumɛ min, wo si n madɛnbɛ tala nyɔ.

²⁵ Kɔnɔ kaka, n bi tala Yerusalɛm, Allala mɔgɛnu dɛnbɛ tinɛ.

²⁶Chɔchi minnu bi Masidoniya sigisɔn anubɛ Akeya sigisɔn rɔ, wonu bara a latɛgɛ anu nyɛrɛ ma ka bolo-kolɔnnu dɛnbɛ Allala mɔgɛnu tɛma Yerusalɛm.

²⁷ Anu denu denu ya wo latɛgɛ, ado a bɛnnɛ anu ni bolo-kolɔn wonu dɛnbɛ. Nyɔ-Yahudiyanu bara duwɛ donu sɔrɔn sibolo-gbɛrɛnu na min kɛ, woletɔ a bɛnnɛ sibolo-gbɛrɛnu ni Yahudiyanu makoe nyinya anu nyɛrɛ bolo-fannu tɔ.

²⁸N ba ban wodi wo dantɛgɛla anu ma, n tenbi tala Sipeni, n si tenbi wo kɔndɔnna nyɔ.

²⁹N ya a lɔn ko n ba na ke wo wara tumɛ min, n si Kirasitila duwɛ-bɛrɛbɛrɛ latenbi wo ma.

³⁰N na-kelen-nyɔgɛnu, ka a tɛgɛ mala dɛnkɛninyɛ ma ma Mari Yisa, Allata-Mɔgɔ-Yabɔnɛ ma anubɛ ata Ni-Sɛnimɛ ye keninteyɛ min dila ma ma, n bi wo madiyala ko wo ni wo raya n fɛ Alla madiya tinɛ nde ye.

³¹Wo ni a madiya ko Alla ni n tanka dɛnkɛninyabɛlɛ-wasinɛnu ma Yudiya nyamanɛ wo rɔ. A madiya fanan ko nta wɔlɛ Yerusalɛm, wo ni diya ata mɔgɛnu ye nyɔ.

³²Woletɔ ni Alla sɔnta, n sewanɛ si ta wo taran, ado n tenbi nyɔ, n si wo wara-koe diya bɔ.

³³Alla min bi yisi-kimɛ dila ma ma, alamɛ wo tora wo dama fɛ. Amina!